مرقس 8 - کِتاب مُقدّس سرائیکی ترجمہ

یسُوع چار ہزار کُوں کھانڑا کھویندے

¹ اُنہاں ڈینہاں ءچ ہِک بہُوں وڈی بِھیڑ وَل کٹھی تھی گئی تے اُنہاں دے کولھ کھاوݨ کیتے کُجھ نہ ہا۔ وَل یسُوع آپنڑے شاگرداں کُوں کولھ سڈ تے آکھیا،

² ”میکُوں اِیں بِھیڑ اُتے ترس آندے کیوں جو ایہ ترے ڈینہہ تُوں مسلسل میڈے نال ہے تے اِنہاں دے کولھ کھاوݨ کیتے کُجھ نئیں۔

³ جے مَیں اِنہاں کُوں بُکھا روانہ کر ڈیواں تاں ایہ رستے ءچ تھک تے رہ ویسن کیوں جو اِنہاں ءچوں کُجھ دُور کنُوں آئے ہِن۔“

⁴ اُوندے شاگرداں اُونکُوں جواب ڈِتا، ”اِتھاں بیابان ءچ اِتنے لوکاں دا پیٹ بھرݨ کیتے کوئی کِتھوں روٹیاں گِھن آوے؟“

⁵ اُوں اُنہاں کنُوں پُچھیا، ”تُہاڈے کولھ کِتی روٹیاں ہِن؟“ اُنہاں جواب ڈِتا، ”سَت۔“

⁶ اُوں لوکاں کُوں حُکم ڈِتا جو ”زمین اُتے بہہ ونجو۔“ تے وَل اُوں او سَت روٹیاں گِھدیاں تے شُکر کر تے تروڑیاں تے اُنہاں دے اگُوں رکھنڑ کیتے آپنڑے شاگرداں کُوں ڈیندا گِیا، تے اُنہاں لوکاں دے اگُوں رکھ ڈِتیاں۔

⁷ اُنہاں دے کولھ کُجھ چھوٹیاں مچھیاں وی ہَن۔ یسُوع اُنہاں اُتے برکت منگی تے شاگرداں کُوں آکھیا، ”ایہ وی اُنہاں کُوں ڈے ڈیؤ۔“

⁸ سبھ لوکاں رَج تے کھادا تے بچے ہوئے ٹُکڑیاں دیاں سَت ٹوکریاں چاتیاں۔

⁹ تے لوک چار ہزار دے قریب ہَن۔ وَل یسُوع اُنہاں کُوں رُخصت کیتا۔

¹⁰ تے او فوراً آپنڑے شاگرداں نال کشتی ءچ بہہ تے دَلَمنُوتہ دے علاقے ءچ گِیا۔

فریسی اِلٰہی نشان دا تقاضا کریندے ہِن

¹¹ وَل فریسی آ تے اُوندے نال تکرار کرݨ لگے، تے اُونکُوں ازماوݨ کیتے اُوں کنُوں کوئی اسمانی نشان منگیا۔

¹² یسُوع لمبا ساہ گِھدا تے آکھیا، ”اِیں زمانے دے لوک نشان کیوں ڈیکھنڑ چاہندے ہِن؟ مَیں تُہاکُوں سچ آدھا ہاں جو اِیں زمانے دے لوکاں کُوں کوئی نشان نہ ڈِتا ویسی۔“

¹³ تے او اُنہاں کُوں چھوڑ تے وَل کشتی ءچ بیٹھا تے پار چلیا گِیا۔

فریسیاں تے ہیرودیس دا خمیر

¹⁴ شاگرد روٹی گِھننڑ بُھل گئے ہَن تے اُنہاں دے کولھ کشتی ءچ صرف ہِک روٹی ہئی۔

¹⁵ یسُوع اُنہاں کُوں حُکم ڈِتا جو ”خبردار فریسیاں دے خمیر تے ہیرودیس دے خمیر کنُوں ہوشیار رہوائے۔“

¹⁶ او آپس ءچ بحث کرݨ لگ گئے جو ”او اِیں واسطے اکھیندے ہوسن جو ساڈے کولھ روٹی کائنی۔“

¹⁷ پر یسُوع اُنہاں دی سوچ جاݨ تے اُنہاں کُوں آکھیا، ”تُساں کیوں بحث کریندے ہیوے جو ساڈے کولھ روٹی کائنی؟ کیا تُساں ہُنڑ تئیں نئیں جانڑدے تے سمجھدے؟ کیا تُہاڈا دل سخت تھی گِیا ہے؟

¹⁸ اکھیں رکھیندے ہوئے وی نئیں ڈیدھے تے کَن رکھیندے ہوئے وی نئیں سُنڑدے؟ تے کیا تُہاکُوں یاد نئیں؟

¹⁹ جیہڑے ویلے مَیں پنج روٹیاں پنج ہزار کیتے تروڑیاں تاں تُساں ٹُکڑیاں نال بھریاں ہوئیاں کِتی ٹوکریاں چاتیاں؟“ اُنہاں اُونکُوں آکھیا، ”بارہاں۔“

²⁰ ”تے جیہڑے ویلے سَت روٹیاں چار ہزار کیتے تروڑیاں تاں تُساں ٹُکڑیاں نال بھریاں ہوئیاں کِتی ٹوکریاں چاتیاں؟“ اُنہاں جواب ڈِتا، ”سَت۔“

²¹ اُوں اُنہاں کُوں آکھیا، ”کیا تُساں ہُنڑ تئیں نئیں سمجھدے؟“

بیت صیدا ءچ یسُوع ہِک اندھے کُوں شِفا ڈیندے

²² وَل او بیت صیدا ءچ آیا تے لوک ہِک اندھے کُوں اُوندے کولھ گِھن آئے تے اُوندی مِنت کیتی جو اُونکُوں ہتھ لاوے۔

²³ او اُوں اندھے دا ہتھ پکڑ تے اُونکُوں وستی کنُوں باہر گِھن گِیا تے اُوندے اکھیں اُتے تُھک تے آپنڑے ہتھ اُوندے اُتے رکھے تے پُچھیا، ”کیا تُوں کُجھ ڈیدھا ہیں؟“

²⁴ اُوں نِگاہ کر تے آکھیا، ”میکُوں لوک ڈِکھالی تاں ڈیندے ہِن پر اِینویں جِینویں درخت ٹُردے پِھردے ہووݨ۔“

²⁵ وَل یسُوع دوبارہ آپنڑے ہتھ اُوں بندے دے اکھیں اُتے رکھے۔ اُوں غور نال نظر کیتی تے اُوندے اکھیں ٹھیک تھی گئیاں، تے او ہر چیز صاف صاف ڈیکھنڑ لگا۔

²⁶ وَل یسُوع اُونکُوں اُوندے گھر بھیج ڈِتا تے آکھیا جو ”اِیں وستی ءچ واپس نہ ونجیں بلکہ سِدھا آپنڑے گھر لگا وَنج۔“

یسُوع دے بارے ءچ پطرس دا اعلان

²⁷ وَل یسُوع تے اُوندے شاگرد قیصریہ فِلپی دے دیہاتاں ءچ چلے گئے۔ رستے ءچ اُوں آپنڑے شاگرداں کنُوں پُچھیا جو ”لوک میکُوں کیا آدھے ہِن؟“

²⁸ اُنہاں جواب ڈِتا ”کُجھ یُوحنّا بپتسمہ ڈیوݨ آلا، تے کُجھ ایلیّاہ، تے کُجھ نبیاں ءچوں کوئی نبی۔“

²⁹ اُوں اُنہاں کنُوں پُچھیا، ”پر تُساں میکُوں کیا آدھے ہیوے؟“ پطرس جواب ڈِتا، ”تُساں المسیح ہیوے۔“

³⁰ وَل اُوں اُنہاں کُوں تاکید کیتی جو ”میڈے بارے ءچ کہیں کُوں ایہ نہ اکھائے۔“

یسُوع آپنڑے ڈُکھ چاوݨ تے مرݨ دی گالھ کریندے

³¹ وَل یسُوع اُنہاں کُوں تعلیم ڈیوݨ لگا جو ضرور ہے جو اِبنِ آدم بہُوں ڈُکھ چاوے تے بزُرگ تے سردار کاہِن تے شریعت دے عالم اُونکُوں رَد کرݨ، تے او قتل کیتا ونجے تے تریجھے ڈینہہ ولا زندہ تھی ونجے۔

³² اُوں ایہ گالھ صاف صاف آکھی تاں پطرس اُونکُوں اَنج کر تے ملامت کرݨ لگا۔

³³ پر اُوں مُڑ تے آپنڑے شاگرداں کُوں ڈِٹھا تے پطرس کُوں ملامت کیتی تے آکھیا، ”شیطان! میڈے کنُوں دُور تھی وَنج کیوں جو تُوں خُدا دے گالھیں دا نئیں بلکہ اِنسان دے گالھیں دا لحاظ کریندیں۔“

³⁴ وَل اُوں بِھیڑ کُوں آپنڑے شاگرداں سمیت کولھ سڈ تے آکھیا، ”جے کوئی میڈی پیروی کرݨ چاہندے تاں او آپنڑی خُودی دا اِنکار کرے، تے آپنڑی صلیب چا تے میڈے پِچُھوں تھی پووے۔

³⁵ کیوں جو جیہڑا کوئی آپنڑی جان بچاوݨ چاہندے او اُونکُوں ونجیسی، تے جیہڑا کوئی میڈے تے اِنجیل کیتے آپنڑی جان ونجیسی او اُونکُوں بچیسی۔

³⁶ تے بندہ جے ساری دُنیا حاصل کر گِھنے پر آپنڑی جان دا نُقصان چاوے تاں اُونکُوں کیا فائدہ تھیسی؟

³⁷ بندہ آپنڑی جان دے بدلے کیا ڈیسی؟

³⁸ کیوں جو جیہڑا کوئی اِیں زِنا کار تے گُنہگار قوم ءچ مَیں کنُوں تے میڈے کلام کنُوں شرمیسی، مَیں اِبنِ آدم وی جِیں ویلے آپنڑے باپ دے جلال ءچ پاک فرشتیاں نال آساں تاں اُوندے کنُوں شرمیساں۔“