مرقس 7 - کِتاب مُقدّس سرائیکی ترجمہ

بزُرگاں دیاں رسماں

¹ وَل یروشلیم دے کُجھ فریسی تے شریعت دے عالم یسُوع کولھ جمع تھئے۔

² تے اُنہاں ڈِٹھا جو اُوندے کُجھ شاگرد ناپاک ہتھاں نال یعنی ہتھ دھوتے بغیر کھانڑا کھاندے ہِن۔

³ کیوں جو فریسی بلکہ سارے یہُودی آپنڑے بزُرگاں دیاں رسماں دے ایجھے پابند ہَن جو جِیں ویلے تئیں آپنڑے ہتھ چنگی طرحاں دھو نہ گِھننڑ کھانڑا نہ کھاندے ہَن۔

⁴ تے بازار تُوں آ تے غُسل کیتے بغیر کھانڑا نہ کھاندے۔ تے اِیں طرحاں بئیاں وی بہُوں ساریاں رسماں ہِن جِنہاں دے او پابند ہِن جِینویں پیالیاں تے مُنگراں تے تانبے دے تھانواں کُوں دھوونڑاں۔

⁵ اِیں واسطے فریسیاں تے شریعت دے عالماں یسُوع کنُوں پُچھیا، ”کیا وجہ ہے جو تُہاڈے شاگرد بزُرگاں دیاں رسماں اُتے نئیں چلدے بلکہ ناپاک ہتھاں نال کھانڑا کھاندے ہِن؟“

⁶ اُوں اُنہاں کُوں آکھیا، ”یسعیاہ نبی تُساں منافقاں دے بارے کیا خُوب نبُوّت کیتی ہے، جِینویں لِکھیا ہے ’ایہ لوک زبان کنُوں تاں میڈی تعظیم کریندے ہِن پر اِنہاں دے دل مَیں کنُوں دُور ہِن۔

⁷ ایہ بے فائدہ میڈی عبادت کریندے ہِن کیوں جو آدمیاں دے حُکماں دی تعلیم ڈیندے ہِن۔‘

⁸ تُساں خُدا دے حُکماں کُوں چھوڑ تے اِنسانی رِیت کُوں قائم رکھیندے ہیوے۔“

⁹ تے یسُوع اُنہاں کُوں ایہ وی آکھیا، ”تُساں آپنڑی روایت کُوں قائم رکھنڑ کیتے خُدا دے حُکم کُوں بالکل رَد کر ڈیندے ہیوے۔

¹⁰ کیوں جو مُوسیٰ فرمائے، ’آپنڑے ماء پِیُو دی عزت کریں،‘ تے ’جیہڑا کوئی آپنڑے ماء پِیُو کُوں بُرا آکھے او ضرور جان تُوں مار ڈِتا ونجے۔‘

¹¹ پر تُساں آدھے ہیوے جو جے کوئی آپنڑے پِیُو یا ماء کُوں آکھے جو ’میڈی جیہڑی چیز کنُوں تُہاکُوں فائدہ تھی سگدا ہا او خُدا دی نذر دے طور تے قُربان تھی گئی،‘ تاں ٹھیک ہے۔

¹² اِیندے نال تُساں اُونکُوں آپنڑے ماء پِیُو دی کوئی مدد نئیں کرݨ ڈیندے۔

¹³ تے اِینویں تُساں آپنڑی رِیت کنُوں جیہڑی تُساں خود جاری کیتی، خُدا دے کلام کُوں بے اثر کر ڈیندے ہیوے، تے اِیں طرحاں دے بہُوں کم کریندے ہیوے۔“

بندے کُوں ناپاک کرݨ آلے گالھیں

¹⁴ وَل یسُوع لوکاں کُوں آپنڑے کولھ سڈ تے آکھنڑ لگا، ”تُساں سارے میڈی سُنڑو تے سمجھو۔

¹⁵ کوئی ایجھی چیز نئیں جیہڑی باہر کنُوں اندر وَنج تے اِنسان کُوں ناپاک کر سگے، پر جیہڑیاں چیزاں اِنسان ءچوں نِکلدیاں ہِن اُوہو اُونکُوں ناپاک کریندیاں ہِن۔“

¹⁶ [جیندے سُنڑݨ آلے کَن ہووݨ، او سُنڑ گِھنے۔]

¹⁷ جِیں ویلے او بِھیڑ کُوں چھوڑ تے گھر ءچ داخل تھیّا تاں اُوندے شاگرداں اُوں کنُوں اِیں مثال دا مطلب پُچھیا۔

¹⁸ اُوں اُنہاں کُوں آکھیا، ”کیا تُساں وی ایجھے بے سمجھ ہیوے؟ کیا تُساں نئیں سمجھدے جو جیہڑی چیز باہر کنُوں اِنسان دے اندر ویندی ہے او اُونکُوں ناپاک نئیں کر سگدی۔

¹⁹ اِیں واسطے جو او اُوندے دل ءچ نئیں بلکہ پیٹ ءچ ویندی ہے، تے ولا خارج تھی ویندی ہے؟“ ایہ آکھ تے اُوں کھاوݨ آلیاں سبھ چیزاں کُوں پاک قرار ڈِتا۔

²⁰ وَل اُوں آکھیا، ”جیہڑا کُجھ اِنسان ءچوں نِکلدے، اُوہو اُونکُوں ناپاک کریندے۔

²¹ کیوں جو اندر کنُوں یعنی دل ءچوں بُرے خیال، حرامکاریاں، چوریاں، خون ریزیاں،

²² زِنا کاریاں، لالچ، بدکاری، مکر، شہوت پرستی، بدنظری، بدگوئی، شیخی تے حماقت نِکلدے ہِن۔

²³ ایہ ساریاں بُرائیاں اندر کنُوں نِکل تے اِنسان کُوں ناپاک کریندیاں ہِن۔“

ہِک غیر یہُودی عورت دا اِیمان

²⁴ وَل یسُوع اُتھوں کنُوں روانہ تھی تے صور تے صیدا دے علاقے ءچ گِیا۔ او ہِک گھر ءچ داخل تھیّا، تے نہ چاہندا ہا جو کہیں کُوں پتہ لگے پر وَل وی لوکاں کُوں پتہ لگ گِیا۔

²⁵ بلکہ فوراً ہِک تریمت جیندی چھوٹی دِھی ءچ بدرُوح ہئی، یسُوع دے بارے ءچ سُنڑ تے آئی تے اُوندے پیراں ءچ ڈھے پئی۔

²⁶ ایہ تریمت یُونانی ہئی تے شام دے علاقے فینیکے ءچ پیدا تھئی ہئی۔ اُوں اُوندی مِنت کیتی جو ”میڈی چھوہیر ءچوں بدرُوح کڈھ ڈے۔“

²⁷ یسُوع اُونکُوں آکھیا، ”پہلے بالاں کُوں پیٹ بھر تے کھاوݨ ڈے کیوں جو بالاں دی روٹی گِھن تے کُتیاں کُوں سَٹ ڈیوݨ مناسب نئیں۔“

²⁸ اُوں جواب ءچ آکھیا، ”ہاں مالک، پر کُتے وی تاں میز دے تلُوں بالاں دے ڈھٹھے ہوئے ٹُکڑے کھاندے ہِن۔“

²⁹ اُوں اُونکُوں آکھیا، ”تَیں چنگا جواب ڈِتے، اِیں واسطے وَنج۔ بدرُوح تیڈی دِھی ءچوں نِکل گئی ہے۔“

³⁰ اُوں آپنڑے گھر وَنج تے ڈِٹھا جو چھوہیر کَھٹ اُتے پئی ہے تے بدرُوح نِکل گئی ہے۔

یسُوع ہِک ڈورے تے گُونگے کُوں شِفا ڈیندے

³¹ وَل یسُوع صور دے علاقے کنُوں نِکل تے صیدا دے رستے کنُوں دکُپُلس دے علاقے کنُوں تھیندا ہویا گلیل دی جھیل اُتے پُجیا۔

³² تے کُجھ لوک ہِک ڈورے کُوں جیہڑا مُشکل نال بُولیندا ہا اُوندے کولھ گِھن آئے تے اُوندی مِنت کیتی جو ”اُوندے اُتے آپنڑا ہتھ رکھو۔“

³³ یسُوع اُوں بندے کُوں بِھیڑ کنُوں اَنج گِھن گِیا تے آپنڑیاں انگلیاں اُوندے کَناں ءچ پاتیاں تے تُھک تے اُوندی زبان کُوں ہتھ لایا۔

³⁴ وَل اسمان دو نِگاہ کر تے ہِک آہ بھری تے اُونکُوں آکھیا، ”اِفتح،“ یعنی ”کُھل وَنج۔“

³⁵ تے فوراً اُوندے کَن تے زبان کُھل گئے تے او صاف بولنڑ لگ پِیا۔

³⁶ یسُوع اُنہاں کُوں حُکم ڈِتا جو ”کہیں کُوں ایہ نہ ڈسائے۔“ پر او جِتنا اُنہاں کُوں منع کریندا ہا، لوک اُتنا زیادہ چرچا کریندے ریہے۔

³⁷ لوکاں بہُوں ای حیران تھی تے آکھیا، ”جیہڑا کُجھ اُوں کیتے سبھ چنگا کیتے۔ او ڈوریاں کُوں سُنڑݨ تے گُونگیاں کُوں بولنڑ دی طاقت ڈیندے۔“