مرقس 5 - کِتاب مُقدّس سرائیکی ترجمہ

یسُوع ہِک بدرُوح گرفتہ بندے کُوں شِفا ڈیندے

¹ وَل او جھیل دے پار گراسینیاں دے علاقے ءچ پُجے۔

² جِینویں ای یسُوع کشتی ءچوں لتھا، ہِک بندہ جیندے ءچ بدرُوح ہئی، قبرستان ءچوں نِکل تے اُونکُوں مِلیا۔

³ او قبراں ءچ راہندا ہا تے ہُنڑ کوئی اُونکُوں زنجیراں نال وی نہ بَدھ سگدا ہا۔

⁴ پہلے اُونکُوں اکثر بیڑیاں تے زنجیراں نال بَدھ تے رکھیا ویندا ہا، پر او زنجیراں کُوں تروڑ سٹیندا تے بیڑیاں دے ٹوٹے ٹوٹے کر ڈیندا ہا، تے کوئی اُونکُوں قابو ءچ نہ رکھ سگدا ہا۔

⁵ او ڈینہہ رات قبراں تے پہاڑاں ءچ پِھردا تے ہر ویلے چیخدا راہندا تے آپنڑے آپ کُوں پتھراں نال زخمی کر گِھندا ہا۔

⁶ او یسُوع کُوں پرے کنُوں ڈیکھ تے بھجیا تے اُونکُوں سجدہ کیتا۔

⁷ تے زور نال چیخدے ہوئے آکھیا، ”یسُوع، خُدا تعالیٰ دے پوتر! میکُوں تیڈے نال کیا کم؟ تیکُوں خُدا دا واسطہ، میکُوں عذاب ءچ نہ سَٹ۔“

⁸ کیوں جو یسُوع اُونکُوں آکھیا ہا، ”بدرُوح! اِیں بندے ءچوں باہر نِکل وَنج۔“

⁹ وَل یسُوع اُوں کنُوں پُچھیا، ”تیڈا ناں کیا ہے؟“ اُوں جواب ڈِتا، ”میڈا ناں لشکر ہے کیوں جو اساں بہُوں سارے ہاں۔“

¹⁰ وَل اُوں اُوندی بہُوں مِنت کیتی جو ”ساکُوں اِیں علاقے کنُوں باہر نہ بھیج۔“

¹¹ اُتھاں پہاڑ اُتے سُؤراں دا ہِک وڈا اِجڑ چردا پِیا ہا۔

¹² بدرُوحاں اُوندی مِنت کر تے آکھیا جو ”ساکُوں اُنہاں سُؤراں ءچ بھیج ڈے تاں جو اساں اُنہاں ءچ داخل تھی ونجُوں۔“

¹³ یسُوع اُنہاں کُوں اِجازت ڈِتی تے بدرُوحاں اُوں بندے ءچوں نِکل تے سُؤراں ءچ داخل تھی گئیاں۔ تے اُوں اِجڑ دے سارے سُؤر، جیہڑے تقریباً ڈُو ہزار ہَن، ریڑھ کنُوں بھجدے ہوئے جھیل ءچ وَنج ڈھٹھے تے بُڈ مرے۔

¹⁴ سُؤر چراوݨ آلے اُتھوں کنُوں بھج پئے تے شہر تے دیہات ءچ اِیں گالھ دی خبر پُچائی۔ بس لوک ایہ ڈیکھنڑ کیتے نِکل آئے۔

¹⁵ او یسُوع دے کولھ آئے، تے اُوں بندے کُوں جیندے ءچ بدرُوحاں دا لشکر ہا، کپڑے پاتے، تے ہوش ءچ بیٹھے ڈِٹھا تاں ڈر گئے۔

¹⁶ جِنہاں ایہ واقعہ ڈِٹھا ہا اُنہاں بدرُوح گرفتہ بندے تے سُؤراں دا حال اُنہاں کُوں بیان کیتا۔

¹⁷ وَل او یسُوع دی مِنت کرݨ لگے جو ”ساڈے علاقے ءچوں چلیا وَنج۔“

¹⁸ جِیں ویلے یسُوع کشتی ءچ چڑھن لگا تاں او بندہ جیہڑا پہلے بدرُوحاں ءچ گرفتار ہا، اُوندی مِنت کرݨ لگا جو ”مَیں تُہاڈے نال ویساں۔“

¹⁹ پر اُوں اُونکُوں اِجازت نہ ڈِتی بلکہ اُونکُوں آکھیا، ”گھر وَنج تے آپنڑے لوکاں کُوں ڈسا جو خُداوند تیڈے کیتے کتنے وڈے کم کیتے تے تیڈے اُتے رحم کیتا۔“

²⁰ او چلیا گِیا تے دکُپُلس ءچ اِیں گالھ دا چرچا کرݨ لگا جو یسُوع اُوندے کیتے کیجھے وڈے کم کیتے، تے سارے لوک حیران تھیندے ہَن۔

یائِیر دی دِھی تے ہِک عورت کُوں شِفا

²¹ جِیں ویلے یسُوع کشتی ءچ جھیل دے پار گِیا تاں اُتھاں وڈی بِھیڑ اُوندے کولھ آئی، تے او جھیل دے کنارے اُتے ہا۔

²² وَل مقامی عبادت خانہ دا ہِک سردار جِیندا ناں یائِیر ہا، اُتھاں آیا۔ او یسُوع کُوں ڈیکھ تے اُوندے پیراں ءچ ڈھے پِیا

²³ تے مِنت کریندے ہوئے آکھنڑ لگا جو ”میڈی نِکی دِھی مرݨ آلی ہے۔ مہربانی کر تے آؤ تے اُوندے اُتے آپنڑے ہتھ رکھو تاں جو او ٹھیک تھی ونجے تے زندہ راہوے۔“

²⁴ بس یسُوع اُوندے نال روانہ تھیّا تے وڈی بِھیڑ اُوندے پِچُھوں تھی پئی تے اُوندے اُتے ڈھاندی پئی ہئی۔

²⁵ بِھیڑ ءچ ہِک تریمت ہئی جِیندا بارہاں سالہاں کنُوں خون جاری ہا۔

²⁶ او بہُوں حکیماں کنُوں علاج کروا کروا تے ڈُکھ جَھلی کھڑی ہئی، تے آپنڑی ساری جمع پُونجی خرچ کر تے وی اُونکُوں کُجھ فائدہ نہ تھیّا ہا بلکہ زیادہ بیمار تھی گئی ہئی۔

²⁷ او یسُوع دے بارے ءچ سُنڑ تے بِھیڑ ءچ اُوندے پِچُھوں کنُوں آئی تے اُوندی پُشاک کُوں ہتھ لا یا،

²⁸ کیوں جو او آدھی ہئی جو ”جے مَیں اُوندی پُشاک کُوں ای ہتھ لا گِھنساں تاں ٹھیک تھی ویساں۔“

²⁹ تے فوراً اُوندا خون واہنڑ بند تھی گِیا، تے اُونکُوں آپنڑے بدن ءچ محسوس تھیّا جو مَیں آپنڑی اِیں بیماری کنُوں شِفا پا گِھدی ہے۔

³⁰ یسُوع فوراً جاݨ گِھدا جو اُوندے ءچوں قوت نِکلی ہے۔ او بِھیڑ ءچ پِچُھوں مُڑ تے پُچھنڑ لگا، ”کئیں میڈی پُشاک کُوں ہتھ لائے؟“

³¹ شاگرداں اُونکُوں آکھیا، ”تُساں ڈیدھے پئے ہیوے جو لوک تُہاڈے اُتے ڈھاندے پئے ہِن، تے وَل وی تُساں پُچھدے ہیوے جو ’کئیں میکُوں ہتھ لائے‘؟“

³² اُوں چودھارُوں نِگاہ ماری تاں جو اُونکُوں ڈیکھے جئیں اِینویں کیتے؟

³³ او عورت ایہ جاݨ تے جو اُوندے اندر کیا تھئے ڈردی تے کمبدی ہوئی آئی تے اُوندے اگُوں ڈھے تے اُونکُوں ساری حقیقت ڈسائی۔

³⁴ یسُوع اُونکُوں آکھیا، ”دِھی تیڈے اِیمان تیکُوں چنگا کر ڈِتے۔ خیر نال وَنج تے آپنڑی بیماری کنُوں بچی رہ۔“

³⁵ او ایہ آدھا ای پِیا ہا جو عبادت خانہ دے سردار دے گھر تُوں کُجھ لوک آ تے آکھنڑ لگے جو ”تُہاڈی دِھی مر گئی ہے۔ ہُنڑ اُستاد کُوں تکلیف کیوں ڈیندے ہیوے؟“

³⁶ یسُوع اُنہاں دی گالھ اُتے توجہ نہ ڈِتی تے عبادت خانہ دے سردار کُوں آکھیا، ”اصلُوں نہ ڈر، صرف اِیمان رکھ۔“

³⁷ وَل اُوں پطرس، یعقُوب تے یعقُوب دے بِھرا یُوحنّا دے علاوہ کہیں بئے کُوں آپنڑے نال آوݨ دی اِجازت نہ ڈِتی۔

³⁸ جِیں ویلے او عبادت خانہ دے سردار دے گھر پُجے تاں اُوں ڈِٹھا جو اُتھاں لوک بہُوں شورشرابہ تے ماتم کریندے پئے ہِن۔

³⁹ اُوں اندر وَنج تے اُنہاں کُوں آکھیا، ”تُساں کیوں اِتنا شور مچیندے تے روندے ہیوے؟ چُھوہیر موئی نئیں بلکہ سُتی پئی ہے۔“

⁴⁰ او اُوندے اُتے کِھلنڑ لگے۔ پر اُوں اُنہاں ساریاں کُوں اُتھوں باہر کڈھ ڈِتا تے چُھوہیر دے ماء پِیُو تے آپنڑے شاگرداں کُوں گِھن تے چھوہیر دے کولھ گِیا۔

⁴¹ وَل چھوہیر دا ہتھ پکڑ تے اُونکُوں آکھیا، ”تلیتا قُومی!“ جِیندا مطلب ہے ”چھوہیر مَیں تیکُوں آدھا ہاں، اُٹھی۔“

⁴² چُھوہیر فوراً اُٹھی تے ٹُرݨ پِھرݨ لگ پئی۔ او بارہاں سال دی ہئی۔ ایہ ڈیکھ تے لوک بہُوں ای حیران تھئے۔

⁴³ وَل اُوں اُنہاں کُوں چِتا تے آکھیا جو ”اِیں گالھ دا کہیں کُوں پتہ نہ چلے۔“ تے آکھیا جو ”چھوہیر کُوں کُجھ کھاوݨ کیتے ڈِتا ونجے۔“