مرقس 4 - کِتاب مُقدّس سرائیکی ترجمہ

بیج رہاوݨ آلے دی مثال

¹ یسُوع ولا جھیل دے کنارے تعلیم ڈیوݨ لگا۔ تے لوکاں دی ایجھی بِھیڑ لگ گئی جو او جھیل ءچ کھڑی ہِک کشتی اُتے وَنج بیٹھا، تے سبھ لوک جھیل دے کنارے اُتے کھڑے ریہے۔

² او اُنہاں کُوں مثالاں ءچ بہُوں سارے گالھیں سِکھاوݨ لگا۔ تے اُوں اُنہاں کُوں ایہ تعلیم ڈِتی:

³ ”سُنڑو، ہِک بیج رہاوݨ آلا بیج رہاوݨ نِکلیا۔

⁴ تے رہیندے ویلے کُجھ دانڑے راہ دے کنارے ڈھٹھے تے پکھیں آ تے اُنہاں کُوں چُگ گِھدا۔

⁵ کُجھ پتھریلی زمین اُتے ڈھٹھے جِتھاں مِٹی گھٹ ہئی تے زیادہ مِٹی نہ مِلنڑ دے سببّوں جلدی اُگ پئے۔

⁶ پر جِیں ویلے سِجھ نِکلیا تاں پودے سڑ گئے تے کیوں جو او جڑھ نہ پکڑ سگے، اِیں واسطے سُک گئے۔

⁷ کُجھ جھاڑیاں ءچ ڈھٹھے تے جھاڑیاں ودھ تے اُنہاں کُوں دبا گِھدا تے او پھل نہ گِھن آئے۔

⁸ تے کُجھ چنگی زمین اُتے ڈھٹھے تے رہیج پئے تے ودھ تے پھل گِھن آئے کوئی ترِیح گُنا، کوئی سَٹھ گُنا تے کوئی سو گُنا۔“

⁹ وَل اُوں آکھیا، ”جیندے کولھ سُنڑݨ دے کَن ہووݨ او سُنڑ گِھنے۔“

مثالاں دا مقصد

¹⁰ جِیں ویلے او کلھا ہا تاں اُوندے بارہاں شاگرداں تے ڈُوجھے ساتھیاں اُوں کنُوں اِنہاں مثالاں دے بارے ءچ پُچھیا۔

¹¹ اُوں اُنہاں کُوں آکھیا جو ”تُہاڈے اُتے خُدا دی بادشاہی دا راز ظاہر کیتا گِیا ہے پر باہر آلیاں کیتے سارے گالھیں مثالاں ءچ آکھیاں ویندیاں ہِن تاں جو،

¹² ’او ڈیکھسن تاں سہی پر جاݨ نہ سگسن تے سُنڑسن تاں سہی پر سمجھ نہ سگسن اِینویں نہ تھیوے جو او میڈے دو رجُوع گِھن آوݨ تے معافی پاوݨ‘۔“

یسُوع بیج رہاوݨ آلے دی مثال سمجھیندے

¹³ وَل یسُوع اُنہاں کُوں آکھیا، ”کیا تُساں ایہ مثال نئیں سمجھے؟ وَل باقی مثالاں کِینویں سمجھ سو؟

¹⁴ رہاوݨ آلا خُدا دا کلام رہیندے۔

¹⁵ راہ دے کنارے آلے دانڑے او لوک ہِن جیہڑے کلام سُنڑدے تاں ہِن پر شیطان فوراً کلام کُوں کڈھ تے گِھن ویندے جیہڑا اُنہاں دے دِلاں ءچ رہایا گِیا ہا۔

¹⁶ اِینویں ای جیہڑے پتھریلی زمین ءچ رہائے گئے، او لوک ہِن جیہڑے کلام کُوں سُنڑدے ای خوشی نال قبول کر گِھندے ہِن۔

¹⁷ پر آپنڑے اندر جڑھ نہ رکھنڑ پارُوں دیر تئیں قائم نئیں راہندے تے جِیں ویلے کلام دے سببّوں مُصیبت یا تنگی آندی ہے تاں فوراً ٹھوکر کھاندے ہِن۔

¹⁸ تے جھاڑیاں ءچ ڈھاوݨ آلے بیج او لوک ہِن جیہڑے کلام کُوں سُنڑدے ہِن۔

¹⁹ پر دُنیا دی فِکر تے دولت دا فریب تے ڈُوجھیاں چیزاں دا لالچ آ تے کلام کُوں دبا ڈیندے تے اُونکُوں پھل نئیں لگ دا۔

²⁰ تے چنگی زمین ءچ ڈھاوݨ آلے بیج وانگُوں او لوک ہِن جیہڑے کلام کُوں سُنڑدے ہِن تے قبول کریندے ہِن تے پھل گِھن آندے ہِن۔ کوئی ترِیح گُنا، کوئی سَٹھ گُنا، کوئی سو گُنا۔“

تھاں دے تلے ڈیوا

²¹ یسُوع اُنہاں کُوں ایہ وی آکھیا، ”کیا ڈیوا اِیں کیتے گِھن آندے ہِن جو کہیں تھاں یا پلنگ تلے رکھ ڈِتا ونجے؟ کیا اِیں واسطے نئیں جو ڈیواٹ اُتے رکھیا ونجے؟

²² کیوں جو کوئی چیز لُکی ہوئی نئیں جیہڑی ظاہر نہ کیتی ویسی تے کوئی بھید ایجھا نئیں جیہڑا کھولیا نہ ویسی۔

²³ جیندے کولھ سُنڑݨ آلے کَن ہووݨ، او سُنڑ گِھنے۔“

²⁴ وَل اُوں اُنہاں کُوں آکھیا، ”جیہڑا کُجھ تُساں سُنڑدے ہیوے غور نال سُنڑو۔ جیہڑے تھاں نال تُساں نپیندے ہیوے اُوندے نال ای تُہاڈے کیتے ناپیا ویسی بلکہ تُہاکُوں زیادہ ڈِتا ویسی۔

²⁵ کیوں جو جیندے کولھ ہے اُونکُوں تاں ڈِتا ویسی پر جیندے کولھ کُجھ نئیں، اُوندے کنُوں او وی گِھن گِھدا ویسی جیہڑا اُوندے کولھ ہے۔“

اُگنڑ تے ودھنڑ آلے بیج دی مثال

²⁶ وَل یسُوع آکھیا، ”خُدا دی بادشاہی اِینویں ہے، جِینویں کوئی بندہ زمین ءچ بیج سٹیندے۔

²⁷ ایہ بیج ڈینہہ رات اُگدا تے ودھدا راہندے، بھانویں رہاوݨ آلا سَم ونجے یا جاگدا راہوے۔ اُونکُوں اِیندا پتہ نئیں لگدا جو ایہ کِینویں تھیندے۔

²⁸ زمین آپنڑے آپ پھل گِھن آندی ہے، پہلے پتر نِکلدے ہِن، ولا سِٹے تے ولا دانڑے بھریج ویندے ہِن۔

²⁹ وَل جیہڑے ویلے دانڑے پک ویندے ہِن تاں او فوراً ڈاتری گِھن آندے کیوں جو رَڑھ کپنڑ دا ویلا آ گِیا ہے۔“

رائی دے دانڑے دی مثال

³⁰ وَل یسُوع آکھیا، ”اساں خُدا دی بادشاہی کُوں کیندے نال تشبیہ ڈیؤں تے کیہڑی مثال نال اُونکُوں بیان کرُوں؟

³¹ او رائی دے دانڑے وانگُوں ہے جو جِیں ویلے رہایا ویندے تاں زمین دے سبھ بِیجاں کنُوں چھوٹا ہوندے

³² پر جِیں ویلے رَہا یا گِیا تاں اُگ تے ساریاں بُوٹیاں کنُوں وڈا تھی ویندے تے اُوندیاں لڑیاں اِتی وڈیاں تھی ویندیاں ہِن جو ہوا دے پکھی اُوندی چھاں ءچ رہ سگدے ہِن۔“

³³ یسُوع اُنہاں کُوں اِیں طرحاں دیاں بہُوں ساریاں مثالاں نال اُنہاں دی سمجھ دے مطابق کلام سُنڑیندا ہا

³⁴ تے بغیر مثال دے اُنہاں کُوں کُجھ نہ آدھا ہا۔ پر کلھیپے ءچ آپنڑے شاگرداں کُوں سبھ کُجھ سمجھا ڈیندا ہا۔

یسُوع طوفان کُوں ہٹک ڈیندے

³⁵ اُونہی ڈینہہ جِیں ویلے شام تھئی تاں اُوں شاگرداں کُوں آکھیا، ”آؤ جھیل دے پار جُلوں۔“

³⁶ تے او بِھیڑ کُوں چھوڑ تے اُونکُوں جیہڑے حال ءچ او کشتی ءچ ہا، نال گِھن تے روانہ تھئے۔ کُجھ بئیاں کشتیاں وی اُنہاں دے نال ہَن۔

³⁷ تے وڈی اندھاری گُھلی تے پانڑی دیاں چھلاں کشتی نال زور نال ٹکراوݨ لگ گئیاں تے اُوندے ءچ پانڑی بھریجنڑ لگا۔

³⁸ پر یسُوع کشتی دے پِچھلے حصے ءچ ہِک گدّی اُتے سُتا پِیا ہا۔ بس اُنہاں اُونکُوں جگایا تے آکھیا، ”اُستاد! کیا تُہاکُوں پرواہ نئیں جو اساں ہلاک تھیندے پئے ہیں؟“

³⁹ اُوں جاگ تے ہوا کُوں دَڑکا ڈِتا تے جھیل کُوں آکھیا، ”خاموش تھی! رُک وَنج!“ بس ہوا رُک گئی تے بالکل سکون تھی گِیا۔

⁴⁰ وَل اُنہاں کُوں آکھیا، ”تُساں کیوں ڈر دے ہیوے؟ ہُنڑ تئیں اِیمان نئیں رکھیندے؟“

⁴¹ او حد کنُوں زیادہ ڈر گئے تے ہِک بئے کُوں آکھنڑ لگے، ”ایہ کوݨ ہے جِیندا حُکم ہوا تے پانڑی وی منیندے ہِن؟“