مرقس 3 - کِتاب مُقدّس سرائیکی ترجمہ

سُکے ہتھ آلا بندہ

¹ یسُوع ولا عبادت خانہ ءچ داخل تھیّا تے اُتھاں ہِک بندہ ہا جِیندا ہِک ہتھ سُکیا ہویا ہا۔

² فریسی اُوندی تاڑ ءچ ہَن جو جے او سبت دے ڈینہہ اُونکُوں شِفا ڈیوے تاں اُوندے اُتے اِلزام لاوݨ۔

³ یسُوع سُکے ہتھ آلے بندے کُوں آکھیا، ”اُٹھی تے اِتھاں اَدھ ءچ کھڑا تھی۔“

⁴ وَل اُنہاں کُوں آکھیا، ”کیا سبت دے ڈینہہ نیکی کرݨ جائز ہے یا بدی کرݨ؟ جان بچاوݨ یا قتل کرݨ؟“ او چُپ ریہے۔

⁵ یسُوع اُنہاں دی سخت دِلی دے سببّوں بہُوں ڈُکھی تھیّا۔ اُوں اُنہاں کُوں کاوڑ نال ڈِٹھا تے اُوں بندے کُوں آکھیا، ”آپنڑا ہتھ ودھا۔“ اُوں ودھایا تے اُوندا ہتھ ٹھیک تھی گِیا۔

⁶ وَل فریسی فوراً باہر چلے گئے تے ہیرودیس دے پیروکاراں نال مشورہ کرݨ لگے جو اُونکُوں کِینویں ہلاک کرݨ۔

جھیل دے کنارے بِھیڑ

⁷ وَل یسُوع آپنڑے شاگرداں نال جھیل دو چلیا گِیا تے گلیل کنُوں لوکاں دی ہِک وڈی بِھیڑ پِچُھوں تھی پئی۔ تے یہُودیہ

⁸ تے یروشلیم تے اِدُومَیہ تے یردن دریا دے پار تے صور تے صیدا دے علاقے کنُوں ہِک بہُوں وڈی بِھیڑ ایہ سُنڑ تے جو او کیجھے وڈے کم کریندے، اُوندے کولھ آئی۔

⁹ بس اُوں آپنڑے شاگرداں کُوں آکھیا، ”بِھیڑ دی وجہ کنُوں میڈے کیتے ہِک چھوٹی کشتی تیار رکھو، تاں جو او میکُوں دبا نہ سٹنڑ۔“

¹⁰ کیوں جو اُوں بہُوں لوکاں کُوں چنگا کیتا ہا اِیں واسطے جِتّی لوک سخت بیماریاں ءچ گرفتار ہَن، اُوندے اُتے ڈھاندے ہَن جو اُونکُوں ہتھ لا گِھننڑ۔

¹¹ تے بدرُوحاں وی جیہڑے ویلے اُونکُوں ڈیدھیاں ہَن، اُوندے سامنڑے ڈھے تے چیخنڑ پے ویندیاں ہَن جو ”تُوں خُدا دا پوتر ہیں۔“

¹² پر او اُنہاں کُوں سختی نال چِتا تے آدھا ہا جو ”میکُوں ظاہر نہ کرائے۔“

یسُوع بارہاں رسُول چُنڑدے

¹³ وَل یسُوع پہاڑ اُتے چڑھ گِیا تے جِنہاں کُوں آپ چاہندا ہا اُنہاں کُوں آپنڑے کولھ سڈیا تے او اُوندے کولھ آئے۔

¹⁴ اُوں بارہاں کُوں آپنڑے رسُول مقرر کیتا تاں جو اُوندے نال راہوݨ تے او اُنہاں کُوں تبلیغ کیتے بھیجے۔

¹⁵ اُوں اُنہاں کُوں بدرُوحاں کڈھنڑ دا اِختیار وی ڈِتا۔

¹⁶ او بارہاں ایہ ہِن: شمعون جِیندا ناں یسُوع پطرس رکھیا،

¹⁷ تے یعقُوب تے اُوندا بِھرا یُوحنّا جیہڑے زبدی دے پوتر ہَن، (اُنہاں دا ناں یسُوع بُوانِرگِس یعنی گاج دے پوتر رکھیا،)

¹⁸ تے اندریاس، تے فِلپُس، تے بَرتُلمائی، تے متّی، تے توما، تے حلفئی دا پوتر یعقُوب، تے تدّی، تے شمعون قنانی،

¹⁹ تے یہُوداہ اِسکریُوتی جئیں اُونکُوں پکڑوا وی ڈِتا۔

یسُوع تے بعل زبُول

²⁰ وَل یسُوع گھر ءچ آیا تے اِتی لوک کٹھے تھی گئے جو او کھانڑا وی نہ کھا سگے۔

²¹ جِیں ویلے اُوندے رشتہ داراں سُنڑیا تاں او اُونکُوں پکڑن کُوں نِکلے کیوں جو اُنہاں دا آکھنڑ ہا جو ”او آپنڑے ہوش ءچ نئیں۔“

²² تے شریعت دے جیہڑے عالم یروشلیم کنُوں آئے ہَن ایہ آدھے ہَن جو ”اُوندے نال بعل زبُول ہے۔ او بدرُوحاں دے سردار دی مدد نال بدرُوحاں کُوں کڈھیندے۔“

²³ یسُوع اُنہاں کُوں آپنڑے کولھ سڈ تے مثالاں ءچ آکھنڑ لگا جو ”شیطان کُوں شیطان کِینویں کڈھ سگدے؟

²⁴ تے جے کہیں بادشاہی ءچ پُھٹ پے ونجے تاں او قائم نئیں رہ سگدی۔

²⁵ تے جے کہیں گھر ءچ پُھٹ پے ونجے تاں او قائم نئیں رہ سگدا۔

²⁶ تے جے شیطان آپنڑا ای مخالف تھی تے آپنڑے اندر پُھٹ پاوے تاں او قائم نئیں رہ سگدا بلکہ اُوندا خاتمہ تھی ویسی۔

²⁷ بلکہ کوئی بندہ کہیں زور آلے دے گھر ءچ وڑ تے اُوندا سامان نئیں لُٹ سگدا جِیں ویلے تئیں پہلے او اُوں زورآور کُوں بَدھ نہ گِھنے، وَل ای اُوندا گھر لُٹ گِھنسی۔

²⁸ مَیں تُہاکُوں سچ آدھا ہاں جو اِنساناں دے سارے گُناہ تے کُفر جیہڑے او کریندے تے بَکدے ہِن معاف کیتے ویسن۔

²⁹ پر جیہڑا رُوح القُدس دے خلاف کُفر بَکدے او کڈھائیں معافی نہ پے سی بلکہ ابدی گُناہ دا قصُوروار ہے۔“

³⁰ یسُوع ایہ اِیں واسطے آکھیا کیوں جو او آدھے ہَن ”اُوندے ءچ بدرُوح ہے۔“

یسُوع دی ماء تے بِھرا

³¹ وَل یسُوع دی ماء تے اُوندے بِھرا آئے تے باہر کھڑے تھی تے اُونکُوں سڈوایا۔

³² لوک اُوندے آسُوں پاسُوں بیٹھے ہَن تے اُنہاں اُونکُوں آکھیا، ”ڈیکھ تُہاڈی ماء تے تُہاڈے بِھرا باہر کھڑے تُہاڈا پُچھدے ہِن۔“

³³ اُوں اُنہاں کُوں ایہ جواب ڈِتا، ”میڈی ماء تے میڈے بِھرا کوݨ ہِن؟“

³⁴ تے اُوں آپنڑے چودھارُوں بیٹھے ہوئے لوکاں دو نظر کر تے آکھیا، ”ڈیکھو میڈی ماء تے میڈے بِھرا ایہ ہِن۔

³⁵ کیوں جو جیہڑا کوئی خُدا دی مرضی اُتے چلدے اُوہو میڈا بِھرا، میڈی بھینڑ تے میڈی ماء ہے۔“