مرقس 2 - کِتاب مُقدّس سرائیکی ترجمہ

یسُوع ہِک مفلُوج کُوں شِفا ڈیندے

¹ کئی ڈینہاں بعد جِیں ویلے یسُوع ولا کفرنحُوم ءچ آیا تاں لوکاں سُنڑیا جو او گھر ءچ ہے۔

² وَل اِتی لوک جمع تھی گئے جو دروازے دے نال وی جاہ نہ بچی تے او اُنہاں کُوں کلام سُنڑیندا پِیا ہا۔

³ تے لوک ہِک فالج دے مریض کُوں چار بندیاں کنُوں چوا تے اُوندے کولھ گِھن آئے۔

⁴ پر جِیں ویلے او اُوں بیمار کُوں بِھیڑ دی وجہ کنُوں اُوندے کولھ نہ گِھن آ سگے تاں چھت اُتے چڑھ گئے، تے اُنہاں چھت دا او حصہ اُکھیڑ ڈِتا جِتھاں یسُوع ہا تے اُونکُوں اُدھیڑ تے اُوں کَھٹ کُوں جیندے اُتے فالج دا مریض ہا لٹکا ڈِتا۔

⁵ یسُوع اُنہاں لوکاں دا اِیمان ڈیکھ تے فالج دے مریض کُوں آکھیا، ”پوتر، تیڈے گُناہ معاف تھئے۔“

⁶ پر شریعت دے کُجھ عالم جیہڑے اُتھاں بیٹھے ہَن، آپنڑے دِلاں ءچ سوچنڑ لگے جو

⁷ ”ایہ کیوں اِینویں آدھے؟ کُفر بَکدے۔ خُدا دے سِوا کوݨ گُناہ معاف کر سگدے؟“

⁸ یسُوع آپنڑی رُوح ءچ فوراً جاݨ گِھدا جو او آپنڑے دِلاں ءچ کیا سوچیندے ہِن تے اُنہاں کُوں آکھیا، ”تُساں کیوں آپنڑے دِلاں ءچ ایہ گالھیں سوچیندے ہیوے؟

⁹ کیا فالج دے مریض کُوں ایہ آکھنڑ اسان ہے جو ’تیڈے گُناہ معاف تھئے‘ یا ایہ آکھنڑ جو ’اُٹھی، آپنڑی کَھٹ چا تے ٹُر پِھر؟‘

¹⁰ پر مَیں چاہندا ہاں جو تُہاکُوں پتہ لگے جو اِبنِ آدم کُوں زمین اُتے گُناہ معاف کرݨ دا اِختیار ہے۔“ وَل اُوں فالج دے مریض کُوں آکھیا،

¹¹ ”مَیں تیکُوں آدھا ہاں جو اُٹھی تے آپنڑی کَھٹ چا تے گھر لگا وَنج۔“

¹² او اُٹھیا تے فوراً کَھٹ چا تے اُنہاں ساریاں دے سامنڑے لگا گِیا۔ او سارے حیران تھی گئے تے خُدا دی حمد کر تے آکھنڑ لگے، ”اساں اِینویں پہلے کڈھائیں نئیں ڈِٹھا۔“

یسُوع لاوی کُوں سڈیندے

¹³ یسُوع ولا جھیل دے کنارے اُتے گِیا تاں اُوندے چودھارُوں ہِک وڈی بِھیڑ لگ گئی تے او اُنہاں کُوں تعلیم ڈیوݨ لگا۔

¹⁴ اُتھوں لنگھدے ہوئے اُوں حلفئی دے پوتر لاوی کُوں محصُول دی چوکی اُتے بیٹھے ڈِٹھا تے اُونکُوں آکھیا، ”میڈے پِچُھوں تھی پو۔“ تے او اُٹھی تے اُوندے پِچُھوں تھی پِیا۔

¹⁵ اِیندے بعد یسُوع لاوی دے گھر ءچ کھانڑا کھاوݨ بیٹھا تاں بہُوں سارے محصُول گِھننڑ آلے تے گُنہگار لوک یسُوع تے اُوندے شاگرداں نال کھاوݨ بیٹھے، کیوں جو یسُوع دے پیروکار بہُوں تھی گئے ہَن۔

¹⁶ فریسیاں دے شریعت دے عالماں یسُوع کُوں گُنہگاراں تے محصُول گِھننڑ آلیاں نال کھاندے ڈِٹھا تاں اُوندے شاگرداں کُوں آکھیا، ”ایہ محصُول گِھننڑ آلیاں تے گُنہگاراں دے نال کیوں کھاندے پِیندے۔“

¹⁷ یسُوع ایہ سُنڑ تے اُنہاں کُوں آکھیا، ”تندرُستاں کُوں حکیم دی لوڑ نئیں بلکہ بیماراں کُوں۔ مَیں راستبازاں کُوں نئیں بلکہ گُنہگاراں کُوں سڈݨ آیا ہاں۔“

روزہ دے بارے ءچ تعلیم

¹⁸ یُوحنّا دے شاگرد تے فریسی روزے نال ہَن۔ کُجھ لوک یسُوع کولھ آئے تے آکھیا، ”کیا وجہ ہے جو یُوحنّا تے فریسیاں دے شاگرد تاں روزہ رکھیندے ہِن پر تُہاڈے شاگرد روزہ نئیں رکھیندے؟“

¹⁹ یسُوع اُنہاں کُوں جواب ڈِتا، ”کیا براتی گھوٹ دی موجودگی ءچ روزہ رکھ سگدے ہِن؟ جِیں ویلے تئیں گھوٹ اُنہاں دے نال ہے او روزہ نئیں رکھ سگدے۔

²⁰ پر او ڈینہہ آسن جڈاں گھوٹ اُنہاں تُوں جُدا کیتا ویسی وَل او روزہ رکھیسن۔

²¹ پُرانڑے کپڑے اُتے نویں کپڑے دی ٹاکی کوئی نئیں لیندا، نہ تاں نواں کپڑا سُنگڑ تے پُرانڑے کپڑے ءچوں کُجھ چھیک گِھنسی تے او زیادہ پھٹ ویسی۔

²² تے انگُور دے تازہ رَس کُوں پُرانڑیاں مشکاں ءچ کوئی نئیں بھریندا۔ نہ تاں مشکاں رَس پکنڑ نال پھٹ ویسن تے رَس تے مشکاں ڈوہائیں برباد تھی ویسن بلکہ نویں رَس کُوں نوِیاں مشکاں ءچ بھریندن۔“

سبت دے بارے ءچ سوال

²³ سبت دے ڈینہہ یسُوع رَڑھیں ءچوں لنگھدا پِیا ہا تے اُوندے شاگرد ٹُردے ٹُردے کھاوݨ کیتے سِٹے تروڑن لگ پئے۔

²⁴ فریسیاں اُونکُوں آکھیا، ”ڈیکھ ایہ ایجھا کم کیوں کریندے ہِن جیہڑا سبت دے ڈینہہ جائز نئیں؟“

²⁵ اُوں جواب ڈِتا، ”کیا تُساں کڈھائیں نئیں پڑھیا جو جِیں ویلے داؤد تے اُوندے ساتھیاں کُوں ضرورت تھئی تے اُنہاں کُوں بُکھ لگی، تاں اُوں کیا کیتا؟

²⁶ او کِینویں کاہِن ِ اعظم ابیاتر دے زمانے ءچ خُدا دے گھر ءچ گِیا، تے نذر دیاں روٹیاں گِھن تے آپ وی کھادیاں تے آپنڑے ساتھیاں کُوں وی کھاوݨ کیتے ڈِتیاں، بھانویں ایہ روٹیاں کاہِناں دے علاوہ کہیں بئے کُوں کھاوݨ جائز نہ ہا؟“

²⁷ وَل یسُوع اُنہاں کُوں آکھیا، ”سبت اِنسان کیتے بنڑایا گِیا ہے نہ جو اِنسان سبت کیتے۔

²⁸ بس اِبنِ آدم سبت دا وی مالک ہے۔“