مرقس 16 - کِتاب مُقدّس سرائیکی ترجمہ

مسیح دا مُردیاں ءچوں زندہ تھی ونجنڑاں

¹ جِیں ویلے سبت دا ڈینہہ لنگھ گِیا تاں مریم مگدلینی تے یعقُوب دی ماء مریم تے سلومی خوشبودار مصالحے مُل گِھدے تاں جو وَنج تے یسُوع دی لاش اُتے مَلنڑ۔

² او ہفتے دے پہلے ڈینہہ بہُوں سویلے سِجھ نِکلدے ای قبر اُتے آئیاں۔

³ او آپس ءچ آکھنڑ لگیاں جو ”ساڈے کیتے قبر دے مُنہ اگُوں پتھر کوݨ ریڑھ تے ہٹیسی؟“

⁴ پر جِیں ویلے اُنہاں نِگاہ کیتی تاں ڈِٹھا جو او پتھر جیہڑا بہُوں وڈا ہا پہلے کنُوں ای ریڑھیا ہویا ہے۔

⁵ قبر آلی غار دے اندر داخل تھی تے اُنہاں ہِک جوان کُوں چِٹا چولا پاتے سجے پاسُوں بیٹھے ڈِٹھا تے بہُوں حیران تھیّاں۔

⁶ اُوں اُنہاں کُوں آکھیا، ”ایجھیاں حیران نہ تھیؤ۔ تُساں یسُوع ناصری کُوں گولھیندیاں ہیوے جیہڑا مصلُوب تھیّا ہا۔ او زندہ تھی گئے۔ او اِتھاں کائنی۔ ڈیکھو ایہ او جاہ ہے جِتھاں اُنہاں اُونکُوں رکھیا ہا۔

⁷ پر تُساں وَنج تے پطرس تے بئے شاگرداں کُوں آکھو جو او تُہاڈے کنُوں پہلے گلیل کُوں ویسی۔ تُساں اُتھائیں اُونکُوں ڈیکھسو جِینویں اُوں تُہاکُوں آکھیا ہا۔“

⁸ او جلدی نال قبر کنُوں باہر نِکل تے بھج پئیاں کیوں جو کمبڑیں تے ہیبت اُنہاں اُتے غالب آ گئی ہئی، تے اُنہاں کہیں کُوں کُجھ نہ آکھیا کیوں جو او ڈردیاں ہَن۔

یسُوع مریم مگدلینی اُتے ظاہر تھیندے

⁹ ہفتے دے پہلے ڈینہہ جِیں ویلے یسُوع صُبح سویلے زندہ تھی گِیا تاں سبھ کنُوں پہلے مریم مگدلینی اُتے ظاہر تھیّا، جیندے ءچوں اُوں سَت بدرُوحاں کڈھیاں ہَن۔

¹⁰ اُوں وَنج تے اُوندے ساتھیاں کُوں جیہڑے غم پارُوں روندے تے ماتم کریندے ہَن، خبر ڈِتی۔

¹¹ اُنہاں ایہ سُنڑ تے جو یسُوع زندہ ہے تے اُونکُوں ڈِکھالی ڈِتے، یقین نہ کیتا۔

یسُوع آپنڑے ڈُو پیروکاراں اُتے ظاہر تھیندے

¹² اِیندے بعد یسُوع ڈُوجھی صورت ءچ ڈُو بندیاں اُتے جِیں ویلے او دیہات دو پیدل ویندے پئے ہَن، ظاہر تھیّا۔

¹³ اُنہاں وی وَنج تے باقی لوکاں کُوں خبر ڈِتی پر اُنہاں، اُنہاں دا وی یقین نہ کیتا۔

یسُوع یارہاں شاگرداں اُتے ظاہر تھیندے

¹⁴ وَل یسُوع اُنہاں یارہاں شاگرداں اُتے جِیں ویلے او کھانڑا کھاوݨ بیٹھے ہَن ظاہر تھیّا۔ اُوں اُنہاں دی بےاعتقادی تے سخت دِلی اُتے اُنہاں کُوں ملامت کیتی، کیوں جو جِنہاں اُوندے زندہ تھیوݨ تُوں بعد اُونکُوں ڈِٹھا ہا اُنہاں، اُنہاں دا یقین نہ کیتا ہا۔

¹⁵ اُوں اُنہاں کُوں آکھیا جو ”تُساں ساری دُنیا ءچ وَنج تے سارے لوکاں دے سامنڑے خوشخبری دی تبلیغ کرو۔

¹⁶ جیہڑا اِیمان گِھن آوے تے بپتسمہ گِھنے او نجات پیسی، پر جیہڑا اِیمان نہ گِھن آوے او مُجرم کھڑایا ویسی۔

¹⁷ تے اِیمان گِھن آوݨ آلیاں دے وچال ایہ معجزے تھیسن: او میڈے ناں نال بدرُوحاں کُوں کڈھیسن، نوِیاں نوِیاں زباناں بُولیسن،

¹⁸ نانگاں کُوں چا گِھنسن، تے جے کوئی زہریلی چیز پی گِھنسن تاں اُنہاں کُوں کُجھ نُقصان نہ تھیسی۔ او بیماراں اُتے ہتھ رکھیسن تے او چنگے تھی ویسن۔“

یسُوع اسمان اُتے چایا ویندے

¹⁹ خُداوند یسُوع اُنہاں نال کلام کرݨ تُوں بعد اسمان اُتے چا گِھدا گِیا تے خُدا دے سجے پاسُوں بہہ گِیا۔

²⁰ وَل شاگرداں نِکل تے جاہ جاہ تبلیغ کیتی، تے خُداوند اُنہاں دے نال کم کریندا ریہا، تے اُنہاں معجزیاں دے وسیلے نال جیہڑے نال نال تھیندے ہَن کلام کُوں ثابت کریندا ریہا۔