مرقس 15 - کِتاب مُقدّس سرائیکی ترجمہ

یسُوع دی پِیلاطُس دے سامنڑے پیشی

¹ سویل تھیندے ای سردار کاہِناں، بزُرگاں تے شریعت دے عالماں تے سبھ صدر ِ عدالت دے ممبراں نال صلاح کر تے یسُوع کُوں بدھیا تے گِھن تے پِیلاطُس دے حوالے کر ڈِتا۔

² پِیلاطُس اُوں کنُوں پُچھیا، ”کیا تُوں یہُودیاں دا بادشاہ ہیں؟“ یسُوع جواب ءچ آکھیا، ”ایہ تُوں خود آدھیں۔“

³ وَل سردار کاہِن اُوندے اُتے بہُوں سارے گالھیں دا اِلزام لیندے ریہے۔

⁴ پِیلاطُس اُونکُوں ولا پُچھیا جو ”تُوں کوئی جواب نئیں ڈیندا؟ ڈیکھ ایہ تیڈے اُتے کتنے اِلزام لیندے پئے ہِن۔“

⁵ یسُوع وَل وی کُجھ جواب نہ ڈِتا، ایہ تئیں جو پِیلاطُس بہُوں حیران تھیّا۔

یسُوع کُوں سزائے موت سُنڑائی ویندی ہے

⁶ عید دے موقع تے پِیلاطُس ہِک قیدی کُوں چھوڑ ڈیندا ہا جیندے کیتے لوک درخاست کریندے ہَن۔

⁷ برابّا ناں دا ہِک بندہ اُنہاں باغیاں دے نال قید ءچ ہا جِنہاں بغاوت ءچ قتل و غارت کیتی ہئی۔

⁸ تے بِھیڑ کولھ آ تے اُونکُوں درخاست کرݨ لگی جو ”آپنڑے دستور دے مطابق ساڈے کیتے کر۔“

⁹ پِیلاطُس جواب ءچ آکھیا، ”کیا تُساں چاہندے ہیوے جو مَیں تُہاڈے کیتے یہُودیاں دے بادشاہ کُوں چھوڑ ڈیواں؟“

¹⁰ کیوں جو اُونکُوں پتہ ہا جو سردار کاہِناں یسُوع کُوں حسد نال پکڑوائے۔

¹¹ پر سردار کاہِناں بِھیڑ کُوں اُبھاریا، تاں جو پِیلاطُس اُنہاں کیتے برابّا کُوں ای چھوڑ ڈیوے۔

¹² پِیلاطُس اُنہاں کُوں ڈُوجھی پھیری آکھیا، ”وَل مَیں اُوں بندے نال جِینکُوں تُساں یہُودیاں دا بادشاہ آدھے ہیوے، کیا کراں؟“

¹³ او وَل چِلائے جو ”اِینکُوں صلیب اُتے چڑھاؤ۔“

¹⁴ تے پِیلاطُس اُنہاں کُوں آکھیا، ”کیوں، اُوں کیہڑی بُرائی کیتی ہے؟“ پر او مزید شور مچا تے آکھنڑ لگے ”اِینکُوں صلیب اُتے چڑھاؤ۔“

¹⁵ پِیلاطُس لوکاں کُوں خوش کرݨ سانگے برابّا کُوں چھوڑ ڈِتا، تے یسُوع کُوں مصلُوب کرݨ کیتے کوڑے مروا تے سپاہیاں دے حوالے کر ڈِتا۔

سپاہی یسُوع کُوں ٹھٹّھیاں ءچ اُڈیندے ہِن

¹⁶ سپاہی اُونکُوں اُوں صحن ءچ گِھن گئے جیہڑا گورنر دے قلعہ دا حصہ ہا تے ساری پلٹن کُوں سڈوا گِھدا۔

¹⁷ اُنہاں اُونکُوں جامنی چوغہ پوایا تے کنڈیاں دا تاج بنڑا تے اُوندے سر اُتے رکھیا،

¹⁸ تے اُونکُوں سلام کر تے آکھنڑ لگے جو ”یہُودیاں دے بادشاہ! سلام،“

¹⁹ تے او اُوندے سر اُتے کانے مریندے تے اُوندے اُتے تُھوکیندے تے گوڈے ٹیک تے اُونکُوں سجدہ کریندے ریہے۔

²⁰ جِیں ویلے اُوندا مذاق بنڑا گِھدا تاں اُوندے اُتوں جامنی چوغہ لہا تے وَل اُوندے آپنڑے کپڑے اُونکُوں پوا ڈِتے۔ وَل اُونکُوں مصلُوب کرݨ کیتے باہر گِھن گئے۔

یسُوع کُوں مصلُوب کیتا ویندے

²¹ شمعون ناں دا ہِک کُرینی بندہ، سکندر تے رُوفُس دا پِیُو، دیہات تُوں آندے ہوئے اُتھوں لنگھیا۔ اُنہاں اُونکُوں وِنگار ءچ پکڑ گِھدا جو او یسُوع دی صلیب چاوے۔

²² تے او یسُوع کُوں گُلگُتا دے مقام تے گِھن آئے جِیندا ترجمہ ہے کھوپڑی دی جاہ۔

²³ وَل اُونکُوں مُر مِلیا ہویا انگُور دا رَس پِیوݨ کیتے ڈِتا پر اُوں نہ پِیتا۔

²⁴ تے اُنہاں اُونکُوں مصلُوب کیتا تے پرچی پا تے اُوندے کپڑے آپس ءچ وَنڈ گِھدے۔

²⁵ اُنہاں سویلے نؤں وجے دے نیڑے اُونکُوں مصلُوب کیتا۔

²⁶ تے اُوندا اِلزام لِکھ تے اُوندی صلیب اُتے لا ڈِتا گِیا جو ”ایہ یہُودیاں دا بادشاہ ہے۔“

²⁷ اُنہاں ڈُو ڈاکواں کُوں وی اُوندے نال مصلُوب کیتا، ہِک کُوں اُوندے سجے پاسُوں تے ڈُوجھے کُوں کھبے پاسُوں۔

²⁸ تے وَل ایہ گالھ پُوری تھئی جو ”او بدکاراں ءچ شمار کیتا گِیا۔“

²⁹ تے اُتھوں کنُوں لنگھنڑ آلے سر ہِلا ہِلا تے اُونکُوں لعن طعن کریندے تے اکھیندے ہَن جو ”واہ! ہیکل کُوں ڈھا تے ترے ڈینہہ ءچ بنڑاوݨ آلے،

³⁰ صلیب تُوں لہہ تے آپنڑے آپ کُوں بچا۔“

³¹ اِینویں ای سردار کاہِن وی شریعت دے عالماں نال رَل تے آپس ءچ اُوندا مذاق بنڑیندے ہوئے آدھے ہَن، ”اِیں بئیاں کُوں بچایا پر آپنڑے آپ کُوں نئیں بچا سگدا۔

³² اِسرائیل دے بادشاہ، المسیح، ہُنڑ صلیب تُوں لہہ آ تاں جو اساں ڈیکھ تے اِیمان گِھن آؤں۔“ تے جیہڑے اُوندے نال مصلُوب تھئے ہَن او وی اُونکُوں لعن طعن کریندے ہَن۔

یسُوع دی موت

³³ جِیں ویلے ڈوپہر تھئی تاں سارے مُلک ءچ تریجھے پہر تئیں اندھارا چھایا ریہا۔

³⁴ تریجھے پہر دے نیڑے یسُوع اُچی اواز ءچ آکھیا، ”اِلوہی اِلوہی لما شبقتنی؟“ جِیندا ترجمہ ہے ”میڈے خُدا! میڈے خُدا! تُوں میکُوں کیوں چھوڑ ڈِتا؟“

³⁵ جیہڑے لوک اُتھاں کھڑے ہَن، اُنہاں ءچوں کُجھ ایہ سُنڑ تے آکھیا، ”ڈیکھو او ایلیّاہ نبی کُوں سڈیندے۔“

³⁶ تے ہِک بندے بھج تے ہِک سپنج کُوں انگُور دے سِرکے ءچ بوڈ تے ہِک کانے اُتے رکھ تے اُونکُوں چُسایا تے آکھنڑ لگا، ”ذرا کھڑ ونجو، ڈیکھوں جو ایلیّاہ اُونکُوں لہاوݨ آندے یا نئیں۔“

³⁷ وَل یسُوع وڈی اواز نال چِلا تے دم ڈے ڈِتا۔

³⁸ تے ہیکل دا پڑدہ اُتوں کنُوں تلے تئیں پھٹ تے ڈُو ٹوٹے تھی گِیا۔

³⁹ جیہڑا صوبیدار اُوندے سامنڑے کھڑا ہا، اُوں اُونکُوں اِینویں دم ڈیندے ہوئے ڈیکھ تے آکھیا، ”سچ مُچ ایہ بندہ خُدا دا پوتر ہا۔“

⁴⁰ کئی عورتاں دُور کنُوں ڈیدھیاں پئیاں ہَن۔ اُنہاں ءچ مریم مگدلینی تے چھوٹے یعقُوب تے یوسیس دی ماء مریم تے سلومی ہَن۔

⁴¹ جِیں ویلے او گلیل ءچ ہا، ایہ عورتاں اُوندے پِچُھوں ٹُر پوندیاں تے اُوندی خدمت کریندیاں ہَن۔ تے بئیاں وی بہُوں ساریاں عورتاں ہَن جیہڑیاں اُوندے نال یروشلیم ءچ آئیاں ہَن۔

یسُوع دی تدفین

⁴² او تیاری دا ڈینہہ ہا جیہڑا سبت کنُوں ہِک ڈینہہ پہلے ہوندا ہا۔ اِیں واسطے جِیں ویلے شام تھئی تاں

⁴³ ارِمَتِیاہ شہر دے راہنڑ آلے یُوسف جیہڑا صدر ِ عدالت دا معزز ممبر ہا تے خود وی خُدا دی بادشاہی دا منتظر ہا، جُرأت نال پِیلاطُس دے کولھ وَنج تے یسُوع دی لاش منگی۔

⁴⁴ پِیلاطُس حیران تھیّا جو او اِتنی جلدی مر گئے تے صوبیدار کُوں سڈ تے پُچھیا جو ”اُونکُوں موئے کِتی دیر تھی گئی ہے؟“

⁴⁵ جِیں ویلے صوبیدار کنُوں حقیقت دا پتہ چلیا تاں لاش یُوسف کُوں ڈے ڈِتی۔

⁴⁶ اُوں ہِک لینن دی چادر مُل گِھدی تے لاش کُوں لہا تے اُوں چادر ءچ کفنایا۔ تے ہِک قبر ءچ رکھ ڈِتا جیہڑی چٹان ءچ کھودی گئی ہئی تے قبر دے مُنہ اُتے ہِک پتھر ریڑھ ڈِتا۔

⁴⁷ تے مریم مگدلینی تے یوسیس دی ماء مریم ڈیدھیاں پئیاں ہَن جو اُونکُوں کِتھاں رکھیا گِیا ہے۔