مرقس 12 - کِتاب مُقدّس سرائیکی ترجمہ

انگُوراں دے باغ دے ٹھیکیداراں دی مثال

¹ وَل یسُوع اُنہاں نال مثالاں ءچ گالھیں کرݨ لگا جو ”ہِک بندے انگُوراں دا باغ رہایا تے اُوندے چودھارُوں واڑ ڈِتی تے انگُوراں دا رَس کڈھنڑ کیتے ہِک حوض کھٹیا تے چوکیداری کیتے ہِک بُرج بنڑایا۔ وَل او انگُوراں دا باغ ٹھیکیداراں کُوں کاشتکاری کیتے ڈے تے خود پردیس چلیا گِیا۔

² وَل پھل دے موسم ءچ اُوں ہِک نوکر کُوں ٹھیکیداراں دے کولھ پھل دا آپنڑا حصہ گِھننڑ کیتے بھیجیا۔

³ پر اُنہاں اُونکُوں پکڑ تے کُٹیا تے خالی ہتھ بھیج ڈِتا۔

⁴ وَل اُوں ہِک بئے نوکر کُوں بھیجیا پر اُنہاں اُوندا سر پھاڑ ڈِتا تے بے عزت کیتا۔

⁵ وَل اُوں ہِک بئے کُوں بھیجیا تے اُنہاں اُونکُوں قتل کر ڈِتا۔ اِینویں ای بہُوں بندے بھیجے۔ ٹھیکیداراں اُنہاں ءچوں کُجھ کُوں کُٹیا تے کُجھ کُوں قتل کر ڈِتا۔

⁶ ہُنڑ ہِکو راہندا ہا جیہڑا اُوندا پیارا پوتر ہا۔ آخر ءچ اُوں آپنڑے پوتر کُوں ایہ سوچ تے اُنہاں دے کولھ بھیجیا جو او میڈے پوتر دا تاں لحاظ کریسن۔

⁷ پر ٹھیکیدار آپس ءچ آکھنڑ لگے جو ’اِیہو وارث ہے۔ آؤ اِینکُوں قتل کرُوں۔ جائیداد ساڈی تھی ویسی۔‘

⁸ بس اُنہاں اُونکُوں پکڑ تے قتل کر ڈِتا تے انگُوراں دے باغ کنُوں باہر سَٹ ڈِتا۔

⁹ ہُنڑ باغ دا مالک کیا کریسی؟ او آ تے اُنہاں ٹھیکیداراں کُوں ہلاک کریسی تے انگُوراں دا باغ ڈُوجھیاں دے حوالے کر ڈیسی۔

¹⁰ کیا تُساں ایہ نوِشتہ وی نئیں پڑھیا جو ’جِیں پتھر کُوں مِستریاں رَد کر ڈِتا اُوہو کونے دے سرے دا پتھر تھی گِیا۔

¹¹ ایہ رب العالمین دی طرفوں تھیّا، تے ساڈی نظر ءچ حیران کُن ہے‘؟“

¹² اِیں تے یہُودی راہنما یسُوع کُوں پکڑن دی کوشش کرݨ لگے کیوں جو او سمجھ گئے ہَن جو ایہ مثال اُنہاں دے خلاف آکھی گئی ہے پر لوکاں دے ڈر دی وجہ کنُوں اُونکُوں چھوڑ تے چلے گئے۔

ٹیکس ڈیوݨ دے بارے ءچ سوال

¹³ وَل اُنہاں کُجھ فریسیاں تے ہیرودیس دے پیروکاراں کُوں اُوندے کولھ بھیجیا تاں جو اُوندی کوئی گالھ پکڑ سگن۔

¹⁴ اُنہاں آ تے یسُوع کُوں آکھیا، ”اُستاد، اساں جانڑدے ہیں جو تُساں سچے ہیوے، تے کہیں دی پرواہ نئیں کریندے، کیوں جو تُساں کہیں دے طرفدار نئیں بلکہ سچائی نال خُدا دی راہ ڈسیندے ہیوے۔ بس رومی بادشاہ قیصر کُوں ٹیکس ڈیوݨ جائز ہے یا نئیں؟ اساں ڈیؤں یا نا ڈیؤں؟“

¹⁵ یسُوع اُنہاں دی مکاری کُوں معلوم کر تے اُنہاں کُوں آکھیا، ”تُساں میکُوں کیوں پھساوݨ دی کوشش کریندے ہیوے؟ میڈے کولھ ہِک دینار گِھن آؤ جو مَیں ڈیکھاں۔“

¹⁶ او گِھن آئے۔ اُوں اُنہاں کنُوں پُچھیا، ”اِیندے اُتے کیندی تصویر تے ناں ہے؟“ اُنہاں آکھیا، ”قیصر دا۔“

¹⁷ یسُوع اُنہاں کُوں آکھیا، ”جیہڑا قیصر دا ہے او قیصر کُوں، تے جیہڑا خُدا دا ہے او خُدا کُوں ڈِتا کرو۔“ او یسُوع دی گالھ سُنڑ تے بہُوں حیران تھئے۔

مُردیاں دی قیامت دے بارے ءچ سوال

¹⁸ وَل صدوقیاں جیہڑے قیامت دے مُنکر ہَن، یسُوع دے کولھ آ تے اُونکُوں ایہ سوال کیتا جو

¹⁹ ”اُستاد! ساڈے کیتے مُوسیٰ لِکھیا ہے جو ’جے کہیں دا بِھرا مر ونجے تے آپنڑی ذال بے اولاد چھوڑ ونجے تاں اُوندا بِھرا اُوندی ذال نال شادی کر گِھنے تاں جو آپنڑے بِھرا کیتے نسل پیدا کرے۔‘

²⁰ سَت بِھرا ہَن۔ پہلے شادی کیتی تے بے اولاد مر گِیا۔

²¹ وَل ڈُوجھے بِھرا اُوں بیوہ نال شادی کیتی پر او وی بے اولاد مر گِیا تے اِینویں ای تریجھے کیتا۔

²² تے اِینویں ای ستّاں اُوں عورت نال شادی کیتی پر بے اولاد مر گئے، تے آخر ءچ او عورت وی مر گئی۔

²³ قیامت ءچ او کیندی ذال ہوسی؟ کیوں جو او ستّاں دی ذال بنڑی ہئی۔“

²⁴ یسُوع اُنہاں کُوں آکھیا، ”کیا تُساں اِیں سبب تُوں گُمراہ نئیں جو نہ خُدا دے کلام کُوں جانڑدے ہیوے، نہ خُدا دی قُدرت کُوں؟

²⁵ کیوں جو جِیں ویلے لوک مُردیاں ءچوں زندہ تھیسن تاں اُنہاں ءچ شادی ویاہ نہ ہوسی، بلکہ اسمان اُتے فرشتیاں وانگُوں ہوسن۔

²⁶ پر اِیں بارے ءچ جو مُردے زندہ تھیندے ہِن، کیا تُساں مُوسیٰ دی کتاب ءچ بلدی ہوئی جھاڑی دے بیان ءچ ایہ نئیں پڑھیا جو خُدا مُوسیٰ کُوں آکھیا، ’مَیں ابرہام دا خُدا تے اِضحاق دا خُدا تے یعقُوب دا خُدا ہاں؟‘

²⁷ او مُردیاں دا خُدا نئیں بلکہ زندیاں دا خُدا ہے۔ بس تُساں بالکل گُمراہ ہیوے؟“

سبھ کنُوں وڈا حُکم

²⁸ شریعت دے عالماں ءچوں ہِک اُنہاں کُوں تکرار کریندے سُنڑ تے جاݨ گِھدا جو یسُوع اُنہاں کُوں چنگا جواب ڈِتے۔ او کولھ آیا تے اُوں کنُوں پُچھیا جو ”سبھ حُکماں کنُوں وڈا حُکم کیہڑا ہے؟“

²⁹ یسُوع جواب ڈِتا، ”اوّل ایہ ہے، ’اِسرائیل! سُنڑ، رب العالمین ساڈا خُدا ہِک ای خُدا ہے۔

³⁰ تُوں رب العالمین آپنڑے خُدا نال آپنڑے سارے دل تے آپنڑی ساری جان تے آپنڑی ساری عقل تے آپنڑی ساری طاقت نال محبت رکھ۔‘

³¹ ڈُوجھا ایہ ہے جو ’آپنڑے ہمسائے نال اُونویں ای محبت رکھ جِینویں آپنڑے نال رکھیندیں۔‘ اِنہاں کنُوں وڈا بِیا کوئی حُکم نئیں۔“

³² شریعت دے عالم اُونکُوں آکھیا، ”اُستاد! بہُوں خُوب، تُساں سچ آکھیا ہیوے جو خُدا ہِک ای ہے تے اُوندے علاوہ بِیا کوئی نئیں۔

³³ تے اُونکُوں سارے دل تے ساری عقل تے ساری طاقت نال محبت رکھنڑ تے آپنڑے ہمسائے کُوں آپنڑے وانگُوں پیار کرݨ سبھ ساڑے ونجنڑ آلیاں قُربانیاں تے نذراں کنُوں ودھ ہے۔“

³⁴ جِیں ویلے یسُوع ڈِٹھا جو اُوں عقلمندی نال جواب ڈِتے تاں اُونکُوں آکھیا، ”تُوں خُدا دی بادشاہی کنُوں دُور نئیں۔“ تے وَل کہیں اُوں کنُوں سوال کرݨ دی جُرأت نہ کیتی۔

مسیح دے بارے ءچ سوال

³⁵ وَل یسُوع ہیکل ءچ تعلیم ڈیندے ہوئے آکھیا جو ”شریعت دے عالم کیونکر آدھے ہِن جو المسیح داؤد دا پوتر ہے؟

³⁶ داؤد خود رُوح القُدس دی ہدایت نال آکھیا جو ’رب میڈے مالک کُوں آکھیا میڈے سجے پاسُوں بہہ جئیں تئیں مَیں تیڈے دُشمنڑاں کُوں تیڈے پیراں دے تلے نہ کر ڈیواں۔‘

³⁷ داؤد تاں خود اُونکُوں مالک آدھے وَل او اُوندا پوتر کِینویں تھی سگدے؟“ سبھ لوک خوشی نال یسُوع دی سُنڑدے ہَن۔

یسُوع شریعت دے عالماں دے خلاف خبردار کریندے

³⁸ وَل یسُوع آپنڑی تعلیم ءچ آکھیا جو ”شریعت دے عالماں کنُوں خبردار رہوائے جیہڑے لمبے لمبے چولے پا تے پِھرݨ پسند کریندے ہِن تے چاہندے ہِن جو لوک بازاراں ءچ اُنہاں کُوں سلام کرݨ،

³⁹ تے عبادت خانیاں ءچ اُچے درجے دیاں کُرسیاں تے ضیافتاں ءچ صدارت چاہندے ہِن۔

⁴⁰ او بیوہ عورتاں دے گھراں کُوں ہڑپ کر گِھندے ہِن تے ڈِکھاوے کیتے لمبیاں لمبیاں دُعاواں کریندے ہِن۔ اُنہاں کُوں زیادہ سزا مِلسی۔“

ہِک بیوہ دا نذرانہ

⁴¹ وَل یسُوع ہیکل دے خزانے دے سامنڑے بہہ تے ڈیدھا پِیا ہا جو لوک ہیکل دے خزانے ءچ پیسے کِینویں سٹیندے ہِن۔ بہُوں سارے دولت مند بہُوں کُجھ سٹیندے پئے ہَن۔

⁴² وَل ہِک غریب بیوہ اُتھاں آئی تے اُوں تانبے دے ڈُو چھوٹے سِکے سٹے۔

⁴³ یسُوع شاگرداں کُوں کولھ سڈ تے آکھیا، ”مَیں تُہاکُوں سچ آدھا ہاں جو جیہڑے ہیکل دے خزانے ءچ سٹیندے پئے ہِن، اِیں غریب بیوہ اُنہاں سبھ کنُوں زیادہ سٹیا ہے۔

⁴⁴ کیوں جو ساریاں آپنڑی بہُوں دولت ءچوں کُجھ حصہ سٹیا پر اِیں بیوہ آپنڑی غریبی ءچ وی جیہڑا کُجھ اُوندے کولھ گُزارے کیتے ہا، او سبھ سَٹ ڈِتا۔“