مرقس 1 - کِتاب مُقدّس سرائیکی ترجمہ

یُوحنّا بپتسمہ ڈیوݨ آلے دی تبلیغ

¹ خُدا دے پوتر یسُوع مسیح دے بارے ءچ خوشخبری دا شروع ایہ ہے۔

² جِینویں یسعیاہ نبی دے صحیفے ءچ لِکھیا ہے، ”ڈیکھ مَیں آپنڑا پیغمبر تیڈے اگُوں بھجیندا ہاں جیہڑا تیڈی راہ تیار کریسی۔

³ بیابان ءچ ہکل ڈیوݨ آلے دی اواز آندی ہے جو ’رب کیتے راہ تیار کرو۔ اُوندے کیتے رستے سِدھے بنڑاؤ‘۔“

⁴ یُوحنّا بپتسمہ ڈیوݨ آلا آیا تے بیابان ءچ تبلیغ کرݨ لگا جو گُناہاں دی معافی کیتے توبہ کر تے بپتسمہ گِھنو۔

⁵ یہُودیہ دے علاقے تے یروشلیم دے سارے لوک اُوندے کولھ آئے تے آپنڑے گُناہاں دا اِقرار کر تے یردن دریا ءچ اُوں کنُوں بپتسمہ گِھدا۔

⁶ یُوحنّا اُٹھ دے والاں دا لباس پَیندا تے چمڑے دا پٹکا آپنڑی چیل نال بدھی رکھیندا تے ٹِڈیاں تے جنگلی ماکھی کھاندا ہا۔

⁷ تے ایہ تبلیغ کریندا ہا جو ”میڈے بعد او بندہ آوݨ آلا ہے جیہڑا مَیں کنُوں زیادہ زور آور ہے۔ مَیں اِیں لائق نئیں جو جُھک تے اُوندی جُتی دا تسمہ کھول سگاں۔

⁸ مَیں تاں تُہاکُوں پانڑی نال بپتسمہ ڈیندا ہاں پر او تُہاکُوں رُوح القُدس نال بپتسمہ ڈیسی۔“

یسُوع دا بپتسمہ تے ازمائش

⁹ اُنہاں ڈینہاں ءچ یسُوع گلیل دے شہر ناصرت کنُوں آ تے یُوحنّا تُوں یردن دے دریا ءچ بپتسمہ گِھدا۔

¹⁰ جِیں ویلے او پانڑی ءچوں نِکل تے باہر آیا تاں اُوں اسمان کُوں پھٹدے تے رُوح القُدس کُوں کبوتر وانگُوں آپنڑے اُتے لہندے ڈِٹھا۔

¹¹ تے اسمان کنُوں ایہ اواز آئی جو ”تُوں میڈا پیارا پوتر ہیں، مَیں تَیں کنُوں بہُوں خوش ہاں۔“

¹² اِیں تُوں فوراً بعد رُوح القُدس اُونکُوں بیابان ءچ بھیج ڈِتا۔

¹³ او چالیہہ ڈینہہ تئیں بیابان ءچ ریہا تے شیطان کنُوں ازمایا گِیا۔ او جنگلی جانوراں دے نال ریہا تے فرشتے اُوندی خدمت کریندے ریہے۔

یسُوع چار مچھیریاں کُوں سڈیندے

¹⁴ وَل یُوحنّا دے پکڑوائے ونجنڑ دے بعد یسُوع گلیل ءچ آیا تے خُدا دی بادشاہی دی خوشخبری دی تبلیغ کیتی۔

¹⁵ او آکھنڑ لگا جو ”وقت پُورا تھی گِیا ہے تے خُدا دی بادشاہی نیڑے آ گئی ہے۔ توبہ کرو تے خوشخبری اُتے اِیمان گِھن آؤ۔“

¹⁶ گلیل دی جھیل دے کنڈے کنڈے ٹُردے ہوئے یسُوع شمعون تے شمعون دے بِھرا اندریاس کُوں ڈِٹھا جیہڑے جھیل ءچ جال سٹیندے پئے ہَن، کیوں جو او مچھیرے ہَن۔

¹⁷ یسُوع اُنہاں کُوں آکھیا، ”میڈے پِچُھوں آؤ تے مَیں تُہاکُوں خُدا کیتے بندے پکڑن آلا بنڑیساں۔“

¹⁸ او فوراً آپنڑے جال چھوڑ تے اُوندے پِچُھوں ٹُر پئے۔

¹⁹ تھوڑا اگُوں وَنج تے اُوں زبدی دے پوتراں یعقُوب تے یُوحنّا کُوں ڈِٹھا جیہڑے آپنڑی کشتی ءچ جالاں دی مرمت کریندے پئے ہَن۔

²⁰ اُوں اُنہاں کُوں ڈیدھے ای سڈ گِھدا تے او آپنڑے پِیُو کُوں کشتی اُتے مزدُوراں دے نال چھوڑ تے اُوندے پِچُھوں ٹُر پئے۔

ہِک بدرُوح گرفتہ بندہ

²¹ وَل او کفرنحُوم ءچ داخل تھئے تے جِینویں ای سبت دا ڈینہہ آیا تاں یسُوع عبادت خانہ ءچ وَنج تے تعلیم ڈیوݨ لگا۔

²² لوک اُوندی تعلیم سُنڑ تے حیران تھی گئے کیوں جو او اُنہاں کُوں شریعت دے عالماں وانگُوں نئیں بلکہ اِختیار نال تعلیم ڈیندا ہا۔

²³ اُوں ویلے عبادت خانہ ءچ ہِک بندہ ہا جیندے ءچ بدرُوح ہئی۔ او ایہ آدھے ہوئے چیخاں مارݨ لگ پِیا

²⁴ جو ”یسُوع ناصری! ساکُوں تیڈے نال کیا کم؟ کیا تُوں ساکُوں ہلاک کرݨ آئیں؟ مَیں جانڑدا ہاں جو تُوں کوݨ ہیں؟ تُوں خُدا دا قدُّوس ہیں۔“

²⁵ یسُوع اُونکُوں دَڑکا ڈے تے آکھیا، ”چُپ رہ تے اِیں بندے ءچوں نِکل وَنج۔“

²⁶ بس او بدرُوح اُوں بندے کُوں بُری طرحاں مروڑ تے وڈے زور نال چیخ مار تے اُوندے ءچوں نِکل گئی۔

²⁷ سارے لوک حیران تھئے تے ہِک ڈُوجھے کُوں آکھنڑ لگے ”ایہ کیا ہے؟ ایہ تاں نوِیں تعلیم ہے جیہڑی اِختیار نال ڈِتی ویندی پئی ہے۔ او بدرُوحاں کُوں حُکم ڈیندے تے او اُوندا حُکم منیندیاں ہِن۔“

²⁸ یسُوع دی مشہوری بہُوں جلدی گلیل دے چودھارُوں ہر جاہ تھی گئی۔

یسُوع بہُوں لوکاں کُوں شِفا ڈیندے

²⁹ او عبادت خانہ ءچوں باہر نِکلدے ای یعقُوب تے یُوحنّا دے نال شمعون تے اندریاس دے گھر آئے۔

³⁰ شمعون دی سس کُوں تیز بُخار ہا تے اُنہاں یسُوع کُوں اُوندی خبر ڈِتی۔

³¹ اُوں کولھ وَنج تے اُوندا ہتھ پکڑ تے اُونکُوں کھڑا کیتا۔ اُوندا بُخار لہہ گِیا تے او اُوندی خدمت کرݨ لگ پئی۔

³² شام ویلے سِجھ لہندے ای لوک اُتھوں دے سارے بیماراں کُوں تے اُنہاں کُوں جِنہاں ءچ بدرُوحاں ہَن، اُوندے کولھ گِھن آئے۔

³³ تے سارا شہر دروازے اُتے کٹھا تھی گِیا۔

³⁴ اُوں بہُوں سارے لوکاں کُوں اُنہاں دیاں بیماریاں کنُوں شِفا بخشی تے بہُوں ساریاں بدرُوحاں کُوں کڈھ ڈِتا، پر بدرُوحاں کُوں بولنڑ نہ ڈِتا کیوں جو او جانڑدیاں ہَن جو او کوݨ ہے۔

یسُوع گلیل ءچ تبلیغ کریندے

³⁵ صُبح سویلے جِیں ویلے اندھارا ای ہا، یسُوع اُٹھی تے گھر کنُوں باہر ہِک ویران جاہ تے وَنج تے دُعا کیتی۔

³⁶ تے شمعون تے اُوندے ساتھی اُونکُوں گولھنڑ گئے۔

³⁷ جِیں ویلے او اُنہاں کُوں مِلیا تاں او آکھنڑ لگے جو ”سارے لوک تُہاکُوں گولھیندے پئے ہِن۔“

³⁸ پر اُوں آکھیا، ”آؤ اساں آسُوں پاسُوں دیاں وستیاں ءچ جُلوں تاں جو مَیں اُتھاں وی تبلیغ کراں کیوں جو مَیں اِیہو کم کرݨ کیتے نِکلیا ہاں۔“

³⁹ تے او سارے گلیل ءچ اُنہاں دے عبادت خانیاں ءچ تبلیغ کریندا تے بدرُوحاں کُوں کڈھیندا ریہا۔

یسُوع ہِک کوڑھی کُوں شِفا ڈیندے

⁴⁰ ہِک بندہ جِینکُوں کوڑھ دی بیماری ہئی، اُوندے کولھ آیا تے اُوندے اگُوں گوڈے ٹیک تے اُوندی مِنت کیتی ”جے تُساں چاہو تاں میکُوں پاک صاف کر سگدے ہیوے۔“

⁴¹ یسُوع اُوندے اُتے ترس کھا تے آپنڑا ہتھ ودھایا تے اُوندے اُتے رکھ تے آکھیا، ”مَیں چاہندا ہاں، پاک صاف تھی وَنج۔“

⁴² اُوں ویلے اُوندا کوڑھ ٹھیک تھی گِیا تے او پاک صاف تھی گِیا۔

⁴³ یسُوع اُونکُوں اُتھوں بھیج ڈِتا تے چِتا تے

⁴⁴ اُونکُوں آکھیا، ”خبردار! اِیں گالھ دا کہیں نال ذِکر نہ کریں، بلکہ وَنج تے آپنڑے آپ کُوں کاہِن کُوں ڈِکھا تے جیہڑے نذرانے مُوسیٰ مقرر کیتے ہِن، او آپنڑی پاکیزگی کیتے پیش کر، تاں جو اُنہاں کیتے گواہی ہووے۔“

⁴⁵ پر او اُتھوں نِکل تے ہر کہیں کُوں ڈساوݨ لگا تے اِیں گالھ کُوں اِتنا مشہور کر ڈِتا جو یسُوع کہیں وی شہر ءچ ظاہری طور تے داخل نہ تھی سگیا، بلکہ باہر ویران جاہیں ءچ ریہا تے لوک چودھارُوں اُوندے کولھ آندے ہَن۔