متّی 9 - کِتاب مُقدّس سرائیکی ترجمہ

یسُوع ہِک مفلُوج کُوں شِفا ڈیندے

¹ وَل یسُوع کشتی ءچ سوار تھی تے پار گِیا تے آپنڑے شہر ءچ آیا۔

² تے لوک ہِک فالج دے مریض کُوں اُوندے کولھ گِھن آئے جیہڑا کَھٹ اُتے ہا۔ یسُوع اُنہاں دا اِیمان ڈیکھ تے فالج دے مریض کُوں آکھیا، ”پوتر حوصلہ رکھ، تیڈے گُناہ معاف تھئے۔“

³ تے شریعت دے کُجھ عالماں آپنڑے دل ءچ آکھیا، ”ایہ کُفر بَکدے۔“

⁴ یسُوع اُنہاں دے خیال جاݨ گِھدے تے آکھیا جو ”تُساں آپنڑے دل ءچ بُرے گالھیں کیوں سوچیندے ہیوے؟

⁵ کیا ایہ آکھنڑ اسان ہے جو تیڈے گُناہ معاف تھئے یا ایہ آکھنڑ جو اُٹھی تے ٹُر پِھر؟

⁶ پر مَیں چاہندا ہاں جو تُہاکُوں پتہ لگے جو اِبنِ آدم کُوں زمین اُتے گُناہ معاف کرݨ دا اِختیار ہے۔“ وَل اُوں فالج دے مریض کُوں آکھیا، ”اُٹھی، آپنڑی کَھٹ چا تے گھر لگا وَنج۔“

⁷ او اُٹھی تے آپنڑے گھر لگا گِیا۔

⁸ لوک ایہ ڈیکھ تے ڈر گئے تے خُدا دی حمد کرݨ لگے جئیں اِنسان کُوں ایجھا اِختیار بخشیا۔

یسُوع متّی کُوں سڈیندے

⁹ یسُوع اُتھوں کنُوں اگُوں ودھ تے متّی ناں دے ہِک محصُول گِھننڑ آلے کُوں محصُول دی چوکی اُتے بیٹھے ڈِٹھا تے اُونکُوں آکھیا، ”میڈے پِچُھوں تھی پو۔“ او اُٹھی تے اُوندے پِچُھوں تھی پِیا۔

¹⁰ تے جِیں ویلے یسُوع متّی دے گھر ءچ کھانڑا کھاوݨ بیٹھا ہا تاں بہُوں سارے محصُول گِھننڑ آلے تے گُنہگار لوک آ تے یسُوع تے اُوندے شاگرداں نال کھانڑا کھاوݨ بیٹھے۔

¹¹ فریسیاں ایہ ڈِٹھا تاں اُوندے شاگرداں کُوں آکھیا، ”تُہاڈا اُستاد محصُول گِھننڑ آلیاں تے گُنہگاراں دے نال کیوں کھاندے؟“

¹² اُوں ایہ سُنڑ تے آکھیا جو ”تندرُستاں کُوں حکیم دی لوڑ نئیں بلکہ بیماراں کُوں۔

¹³ پر تُساں وَنج تے اِیندا مطلب پتہ کرو جو ’مَیں قُربانی نئیں بلکہ رحم پسند کریندا ہاں۔‘ کیوں جو مَیں راستبازاں کُوں نئیں بلکہ گُنہگاراں کُوں سڈݨ آیا ہاں۔“

روزہ دے بارے ءچ سوال

¹⁴ اُوں ویلے یُوحنّا دے شاگرداں یسُوع دے کولھ آ تے آکھیا، ”کیا وجہ ہے جو اساں تے فریسی اکثر روزہ رکھیندے ہیں پر تُہاڈے شاگرد روزہ نئیں رکھیندے؟“

¹⁵ یسُوع اُنہاں کُوں آکھیا، ”کیا براتی جِیں ویلے تئیں گھوٹ اُنہاں دے نال ہے ماتم کر سگدے ہِن؟ پر او ڈینہہ آسن جڈاں گھوٹ اُنہاں تُوں جُدا کیتا ویسی۔ اُوں ویلے او روزہ رکھیسن۔

¹⁶ پُرانڑے کپڑے اُتے نویں کپڑے دی ٹاکی کوئی نئیں لیندا، کیوں جو نواں کپڑا سُنگڑ تے پُرانڑے کپڑے ءچوں کُجھ چھیک گِھنسی تے او زیادہ پھٹ ویسی۔

¹⁷ تے انگُور دے تازہ رَس کُوں پُرانڑیاں مشکاں ءچ نئیں بھریندے، کیوں جو مشکاں پھٹ ویندیاں ہِن تے رَس ضائع تھی ویندے، تے مشکاں برباد تھی ویندیاں ہِن۔ بلکہ انگُور دا تازہ رَس نوِیاں مشکاں ءچ بھریندن تے او ڈوہائیں محفوظ راہندن۔“

سردار دی دِھی تے ہِک عورت کُوں شِفا

¹⁸ او اُنہاں کُوں ایہ گالھیں آدھا ای پِیا ہا جو ہِک سردار اُوندے پیراں ءچ ڈھے تے عرض کیتی، ”میڈی دِھی ہُنڑیں موئی ہے پر جے تُساں آ تے اُوندے اُتے آپنڑاں ہتھ رکھو تاں او زندہ تھی ویسی۔“

¹⁹ یسُوع اُٹھی تے اُوندے نال ٹُر پِیا تے اُوندے شاگرد وی اُوندے پِچُھوں تھی پئے۔

²⁰ تے ڈیکھو ہِک تریمت جِیندا بارہاں سالہاں کنُوں خون جاری ہا اُوندے پِچُھوں آ تے اُوندی پُشاک دے پَلے کُوں ہتھ لایا،

²¹ کیوں جو آپنڑے دل ءچ ایہ آدھی ہئی جو ”جے مَیں اُوندی پُشاک کُوں ای ہتھ لا گِھنساں تاں ٹھیک تھی ویساں۔“

²² یسُوع مُڑ تے اُونکُوں ڈِٹھا تے آکھیا، ”دِھی حوصلہ رکھ۔ تیڈے اِیمان تیکُوں چنگا کر ڈِتے۔“ تے او تریمت اُوں ویلے ای ٹھیک تھی گئی۔

²³ جِیں ویلے یسُوع سردار دے گھر آیا تے بانسری وجاوݨ آلیاں کُوں تے بِھیڑ کُوں شور مچیندے ڈِٹھا،

²⁴ تاں آکھیا، ”پرے تھی ونجو کیوں جو چھوہیر موئی نئیں بلکہ سُتی پئی ہے۔“ ایہ سُنڑ تے او اُوندے اُتے کِھلنڑ لگ پئے۔

²⁵ پر جِیں ویلے بِھیڑ کُوں اُتھوں کڈھ ڈِتا گِیا تاں یسُوع اندر وَنج تے چھوہیر دا ہتھ پکڑیا تے او اُٹھ پئی۔

²⁶ تے اِیں گالھ دی شُہرت اُوں سارے علاقے ءچ کِھنڈ گئی۔

یسُوع ڈُو اندھیاں کُوں شِفا ڈیندے

²⁷ جیہڑے ویلے یسُوع اُتھوں کنُوں اگُوں روانہ تھیّا تاں ڈُو اندھے اُوندے پِچُھوں دھاڑ دھاڑ کریندے ہوئے آکھنڑ لگے، ”اِبنِ ِ داؤد! ساڈے اُتے رحم کرو۔“

²⁸ جِیں ویلے او گھر ءچ داخل تھیّا تاں او اندھے اُوندے کولھ آئے تے یسُوع اُنہاں تُوں پُچھیا، ”کیا تُہاڈا اِیمان ہے جو مَیں ایہ کر سگدا ہاں؟“ اُنہاں اُونکُوں آکھیا، ”ہاں مالک۔“

²⁹ وَل اُوں اُنہاں دے اکھیں کُوں ہتھ لایا تے آکھیا، ”تُہاڈے اِیمان دے مطابق تُہاڈے کیتے تھیوے۔“

³⁰ تے اُنہاں دے اکھیں کُھل گئیاں تے یسُوع اُنہاں کُوں سختی نال آکھیا، ”خبردار کہیں کُوں پتہ نہ لگے۔“

³¹ پر اُنہاں باہر وَنج تے سارے علاقے ءچ اُونکُوں مشہور کر ڈِتا۔

یسُوع ہِک گُونگے کُوں شِفا ڈیندے

³² جیہڑے ویلے او باہر ویندے پئے ہَن تاں لوک ہِک گُونگے کُوں جَیندے ءچ بدرُوح ہئی اُوندے کولھ گِھن آئے۔

³³ جِیں ویلے او بدرُوح کڈھ ڈِتی گئی تاں گُونگا بولنڑ لگ پِیا تے لوکاں حیران تھی تے آکھیا جو ”ایجھا اِسرائیل ءچ کڈھائیں نئیں ڈِٹھا گِیا۔“

³⁴ پر فریسیاں آکھیا جو ”ایہ تاں بدرُوحاں دے سردار دی مدد نال بدرُوحاں کُوں کڈھیندے۔“

یسُوع کُوں لوکاں اُتے ترس آندے

³⁵ یسُوع سارے شہراں تے دیہاتاں ءچ وَنج تے اُنہاں دے عبادت خانیاں ءچ تعلیم ڈیندا تے بادشاہی دی خوشخبری سُنڑیندا تے ہر طرحاں دی بیماری تے کمزوری کُوں دُور کریندا ریہا۔

³⁶ تے جِیں ویلے اُوں بِھیڑ کُوں ڈِٹھا تاں اُونکُوں اُنہاں اُتے ترس آیا کیوں جو او اُنہاں بھیڈاں وانگُوں جِنہاں دا کوئی آجڑی نہ ہووے بہُوں بدحال تے پریشان ہَن۔

³⁷ وَل اُوں آپنڑے شاگرداں کُوں آکھیا جو ”فصل تاں بہُوں ہے پر مزدُور تھوڑے ہِن۔

³⁸ اِیں واسطے فصل دے مالک دی مِنت کرو جو آپنڑی فصل کپنڑ کیتے مزدُور بھیج ڈیوے۔“