متّی 6 - کِتاب مُقدّس سرائیکی ترجمہخیرات دے بارے ءچ تعلیم 1 ”خبر دار، آپنڑے نیک کم لوکاں کُوں ڈِکھاوݨ کیتے نہ کرو۔ کیوں جو تُہاڈا اسمانی باپ تُہاکُوں کوئی اجر نہ ڈیسی۔ 2 بس جِیں ویلے تُوں خیرات کریں تاں آپنڑے اگُوں ڈھنڈورہ نہ پِٹوا، جِینویں منافق عبادت خانیاں تے گلیاں ءچ نرسِنگا وجوا تے کریندے ہِن تاں جو لوک اُنہاں دی تعریف کرݨ۔ مَیں تُہاکُوں سچ آدھا ہاں جو اُنہاں آپنڑا اجر پا گِھدے۔ 3 بلکہ جِیں ویلے تُوں خیرات کریں تاں جیہڑا کُجھ تُوں آپنڑے سجے ہتھ نال ڈیویں اُوندا تیڈے کھبے ہتھ کُوں پتہ نہ لگے۔ 4 تاں جو تیڈی خیرات لُکی راہوے۔ وَل تیڈا باپ جیہڑا لُکے ہوئے کم ڈیدھے، تیکُوں اجر ڈیسی۔ دُعا دے بارے ءچ تعلیم 5 تے جِیں ویلے تُساں دُعا کرو تاں منافقاں آلی کار نہ کرو۔ او عبادت خانیاں تے بازاراں دے چوکاں ءچ کھڑے تھی تے دُعا کرݨ پسند کریندے ہِن تاں جو لوک اُنہاں کُوں ڈیکھنڑ۔ مَیں تُہاکُوں سچ آدھا ہاں جو اُنہاں آپنڑا اجر پا گِھدے۔ 6 بلکہ جِیں ویلے تُوں دُعا کریں تاں آپنڑی کوٹھڑی ءچ وَنج، تے دروازہ بند کر تے آپنڑے اسمانی باپ کنُوں جیہڑا نظر کنُوں لُکیا ہے دُعا کر۔ وَل تیڈا باپ جیہڑا تیڈے لُکے ہوئے کم ڈیدھے تیکُوں اجر ڈیسی۔ 7 تے دُعا کریندے ویلے غیر قوماں آلی کار رَٹے رٹائے لفظ دُہریندے نہ راہو، کیوں جو او سمجھدے ہِن جو اُنہاں دے بہُوں بولنڑ دی وجہ کنُوں اُنہاں دی سُنڑی ویسی۔ 8 بس اُنہاں دے وانگُوں نہ بنڑو کیوں جو تُہاڈا اسمانی باپ تُہاڈے منگنڑ تُوں وی پہلے تُہاڈیاں ضرورتاں تُوں واقف ہے۔ 9 بس تُساں اِینویں دُعا کیتا کرو جو ساڈے باپ، تُوں جیہڑا اسمان اُتے ہیں تیڈا ناں پاک منیا ونجے۔ 10 تیڈی بادشاہی آوے تیڈی مرضی جِینویں اسمان اُتے پُوری تھیندی ہے زمین اُتے وی تھیوے۔ 11 ساڈی روز دی روٹی اَج ساکُوں ڈے۔ 12 تے جِینویں اساں آپنڑے قصُورواراں کُوں معاف کیتے تُوں وی ساڈے قصُور معاف کر۔ 13 تے ساکُوں ازمائش ءچ نہ پا بلکہ بُرائی تُوں بچا۔ [کیوں جو بادشاہی، قُدرت تے جلال ہمیشاں تیڈے ای ہِن۔ آمین۔] 14 جے تُساں لوکاں دے قصُور معاف کریسو تاں تُہاڈا اسمانی باپ وی تُہاکُوں معاف کریسی۔ 15 جے تُساں لوکاں دے قصُور معاف نہ کریسو تاں تُہاڈا اسمانی باپ وی تُہاکُوں معاف نہ کریسی۔ روزہ دے بارے ءچ تعلیم 16 جِیں ویلے تُساں روزہ رکھو تاں منافقاں آلی کار آپنڑا مُنہ نہ بنڑاؤ، کیوں جو او آپنڑاں مُنہ وِگڑیندے ہِن تاں جو لوکاں کُوں پتہ لگے جو او روزے نال ہِن۔ مَیں تُہاکُوں سچ آدھا ہاں جو اُنہاں آپنڑا اجر پا گِھدے۔ 17 بلکہ جِیں ویلے تُوں روزہ رکھیں تاں آپنڑاں مُنہ دھو تے آپنڑے سر ءچ تیل سَٹ، 18 تاں جو بندہ نئیں بلکہ تیڈا اسمانی باپ جیہڑا نظر کنُوں لُکیا ہے، تیکُوں روزہ دار جانڑے۔ اِیں صورت ءچ تیڈا باپ جیہڑا نظر کنُوں لُکے ہوئے کم ڈیدھے، تیکُوں اجر ڈیسی۔ اسمان اُتے خزانہ 19 آپنڑے کیتے زمین اُتے مال جمع نہ کرو جِتھاں کیڑا تے زنگ لگ ویندے تے چور سَندھ مار تے چوری کر گِھندے۔ 20 بلکہ آپنڑے کیتے اسمان اُتے خزانہ جمع کرو جِتھاں کیڑا تے زنگ خراب نئیں کریندا تے نہ چور سَندھ مار تے چوری کریندے ہِن۔ 21 کیوں جو جِتھاں تیڈا خزانہ ہے اُتھائیں تیڈا دل وی لگیا راہسی۔ بدن دا چراغ 22 بدن دا چراغ اکھ ہے۔ بس جے تیڈی اکھ ٹھیک ہے تاں تیڈا سارا بدن روشن ہوسی۔ 23 تے جے تیڈی اکھ خراب ہے تاں تیڈا سارا بدن تاریک ہوسی۔ بس جے تیڈے اندر دی روشنی ای اندھارا بنڑ ونجے تاں اندھارا کتنا زیادہ ہوسی! خُدا تے دولت 24 کوئی بندہ ڈُو مالکاں دی خدمت نئیں کر سگدا، کیوں جو یا او ہِک کنُوں نفرت کریسی تے ڈُوجھے نال محبت، یا ہِک نال وفا کریسی تے ڈُوجھے کُوں حقیر جانڑسی۔ تُساں خُدا تے دولت ڈوہائیں دی خدمت نئیں کر سگدے۔ فِکر 25 اِیہو وجہ ہے جو مَیں تُہاکُوں آدھا ہاں جو نہ تاں آپنڑی زندگی دی فِکر کرو جو کیا کھاسوں یا کیا پی سُوں، نہ آپنڑے تَن دی جو کیا پیسُوں؟ کیا جان خوراک کنُوں تے بدن پُشاک کنُوں ودھ تے نئیں؟ 26 پکھیں کُوں ڈیکھو جیہڑے نہ تاں رہیندے ہِن نہ کپیندے ہِن نہ گوداماں ءچ جمع کریندے ہِن، وَل وی تُہاڈا اسمانی باپ اُنہاں کُوں کھویندے۔ کیا تُہاڈی قدر اُنہاں کنُوں زیادہ نئیں؟ 27 تُہاڈے ءچوں ایجھا کوݨ ہے جیہڑا فِکر کر تے آپنڑی زندگی دا ہِک لاحظہ وی ودھا سگے؟ 28 تے پُشاک کیتے کیوں فِکر کریندے ہیوے؟ جنگلی سوسن اُتے غور کرو جو او کِینویں ودھدے ہِن۔ نہ او محنت کریندے ہِن نہ کَتیندے ہِن۔ 29 وَل وی مَیں تُہاکُوں آدھا ہاں جو سُلیمان وی آپنڑی ساری شان و شوکت دے باوجود اُنہاں ءچوں کہیں آلی کار پُشاک نہ پَیندا ہا۔ 30 بس جِیں ویلے خُدا میدان دی گھاہ کُوں جیہڑی اَج ہے تے کل تنُور ءچ سَٹ ڈِتی ویسی ایجھی پُشاک پویندے، تاں کمزور اِیمان آلیو! کیا تُہاکُوں نہ پویسی؟ 31 اِیں واسطے فِکر کر تے ایہ نہ آکھو جو اساں کیا کھاسوں یا کیا پی سُوں یا کیا پے سُوں؟ 32 کیوں جو اِنہاں ساریاں چیزاں دی گولھ ءچ تاں غیر قوماں راہندیاں ہِن، پر تُہاڈا اسمانی باپ جانڑدے جو تُساں اِنہاں سبھ چیزاں دے مُتھاج ہیوے۔ 33 پر پہلے تُساں خُدا دی بادشاہی تے راستبازی دی گولھ ءچ راہو تاں ایہ سبھ چیزاں وی تُہاکُوں مِل ویسن۔ 34 بس کل دی فِکر نہ کرو کیوں جو کل دا ڈینہہ آپنڑی فِکر آپ ای کر گِھن سی۔ اَج کیتے اَج دا ڈُکھ کافی ہے۔“ |
Modern Central Saraiki Bible © 2024 Strategic Resource Group
Strategic Resource Group