متّی 4 - کِتاب مُقدّس سرائیکی ترجمہ

یسُوع دا ازمایا ونجنڑ

¹ وَل رُوح القُدس یسُوع کُوں بیابان ءچ گِھن گِیا تاں جو او ابلیس تُوں ازمایا ونجے۔

² چالیہہ ڈینہہ تے چالیہہ رات دے روزے تُوں بعد آخر اُونکُوں بُکھ لگی۔

³ وَل ابلیس کولھ آ تے اُونکُوں آکھیا، ”جے تُوں خُدا دا پوتر ہیں تاں اِنہاں پتھراں کُوں آکھ جو ایہ روٹیاں بنڑ ونجنڑ۔“

⁴ اُوں جواب ءچ آکھیا، ”لِکھیا ہے جو ’اِنسان صرف روٹی نال ای زندہ نہ راہسی بلکہ ہر گالھ تُوں جیہڑی خُدا دے مُنہ ءچوں نِکلدی ہے‘۔“

⁵ وَل ابلیس اُونکُوں مُقدّس شہر ءچ گِھن گِیا تے ہیکل دے منارے اُتے کھڑا کر تے اُونکُوں آکھیا جو

⁶ ”جے تُوں خُدا دا پوتر ہیں تاں آپنڑے آپ کُوں تلے سَٹ ڈے کیوں جو لِکھیا ہے جو ’او تیڈے کیتے آپنڑے فرشتیاں کُوں حُکم ڈیسی تے او تیکُوں آپنڑے ہتھاں اُتے چا گِھنسن اِینویں نہ تھیوے جو تیڈے پیراں کُوں پتھر نال دھک لگے‘۔“

⁷ یسُوع اُونکُوں آکھیا، ”ایہ وی لِکھیا ہے جو تُوں رب آپنڑے خُدا دی ازمائش نہ کر۔“

⁸ وَل ابلیس اُونکُوں ہِک بہُوں اُچے پہاڑ اُتے گِھن گِیا تے دُنیا دیاں ساریاں بادشاہیاں تے اُنہاں دی شان و شوکت اُونکُوں ڈِکھائی۔

⁹ تے اُونکُوں آکھیا، ”جے تُوں میڈے اگُوں جُھک تے میکُوں سجدہ کریں تاں مَیں ایہ سبھ کُجھ تیکُوں ڈے ڈیساں۔“

¹⁰ یسُوع اُونکُوں آکھیا، ”شیطان! دُور تھی وَنج، کیوں جو لِکھیا ہے جو ’تُوں رب آپنڑے خُدا کُوں سجدہ کر تے صرف اُوندی عبادت کر‘۔“

¹¹ وَل ابلیس اُوندے کنُوں چلیا گِیا تے فرشتے آ تے اُوندی خدمت کرݨ لگے۔

یسُوع گلیل ءچ خدمت دا آغاز کریندے

¹² جِیں ویلے یسُوع ایہ سُنڑیا جو یُوحنّا پکڑوا ڈِتا گئے تاں او گلیل دے علاقے دو وَل گِیا۔

¹³ تے ناصرت کُوں چھوڑ تے کفرنحُوم ءچ راہنڑ لگا، جیہڑا جھیل دے کنارے زبُولُون تے نفتالی دی سرحد اُتے ہے،

¹⁴ تاں جو جیہڑا یسعیاہ نبی دی معرفت فرمایا گِیا ہا او پُورا تھیوے جو

¹⁵ ”زبُولُون دا علاقہ تے نفتالی دا علاقہ جھیل دی راہ یردن دریا دے پار غیر قوماں دی گلیل:

¹⁶ جیہڑے لوک اندھارے ءچ راہندے ہَن اُنہاں تیز روشنی ڈِٹھی جیہڑے موت دے مُلک تے پچھاویں ءچ راہندے ہَن اُنہاں اُتے نُور چمکیا۔“

¹⁷ اُوں ویلے تُوں یسُوع تبلیغ کرݨ تے ایہ آکھنڑ شروع کیتا، ”توبہ کرو کیوں جو اسمان دی بادشاہی نیڑے آ گئی ہے۔“

یسُوع مچھیریاں کُوں چُنڑدے

¹⁸ گلیل دی جھیل دے کنارے اُتے ٹُردے ہوئے یسُوع ڈُو بِھرانواں، شمعون جیہڑا پطرس اکھویندا ہا تے اُوندے بِھرا اندریاس، کُوں جھیل ءچ جال سٹیندے ڈِٹھا کیوں جو او مچھیرے ہَن۔

¹⁹ تے اُنہاں کُوں آکھیا، ”میڈے پِچُھوں آؤ تے مَیں تُہاکُوں خُدا کیتے بندے پکڑن آلا بنڑیساں۔“

²⁰ او فوراً آپنڑے جال چھوڑ تے اُوندے پِچُھوں ٹُر پئے۔

²¹ اُتھوں اگھاں ودھ تے اُوں بئے ڈُو بِھرا، یعقُوب تے یُوحنّا ڈِٹھے جیہڑے زبدی دے پوتر ہَن تے کشتی ءچ آپنڑے پِیُو نال آپنڑے جالاں دی مرمت کریندے پئے ہَن، تے اُنہاں کُوں سڈیا۔

²² او فوراً کشتی تے آپنڑے پِیُو کُوں چھوڑ تے اُوندے پِچُھوں ٹُر پئے۔

یسُوع تعلیم ڈیندے، تے شِفا ڈیندے

²³ یسُوع سارے گلیل ءچ پِھردا ریہا تے عبادت خانیاں ءچ تعلیم ڈیندا تے بادشاہی دی خوشخبری سُنڑیندا ریہا، تے لوکاں کُوں ہر طرحاں دی بیماری تے کمزوری تُوں شِفا ڈیندا ریہا۔

²⁴ یسُوع دی شُہرت سارے سُوریہ ءچ تھی گئی تے لوک سبھ بیماراں کُوں جیہڑے طرحاں طرحاں دیاں بیماریاں تے تکلیفاں دے وکھیڑے ءچ ہَن تے جیہڑے مِرگی دے مریض ہَن، تے مفلُوج ہَن، تے جِنہاں ءچ بدرُوحاں ہَن اُوندے کولھ گِھن آئے تے اُوں اُنہاں کُوں شِفا ڈِتی۔

²⁵ تے گلیل تے دکُپُلس تے یروشلیم تے یہُودیہ تے یردن دے پار تُوں وڈی بِھیڑ اُوندے پِچُھوں تھی پئی۔