متّی 22 - کِتاب مُقدّس سرائیکی ترجمہ

شادی دی دعوت دی مثال

¹ یسُوع وَل مثالاں ءچ اُنہاں کُوں آکھنڑ لگا،

² ”اسمان دی بادشاہی اُوں بادشاہ وانگُوں ہے جئیں آپنڑے پوتر دی شادی کیتی۔

³ تے آپنڑے نوکراں کُوں بھیجیا جو اُنہاں لوکاں کُوں جِنہاں کُوں شادی دی دعوت ڈِتی گئی ہئی سڈ آوݨ، پر او نہ آئے۔

⁴ وَل اُوں بئے نوکراں کُوں ایہ آکھ تے بھیجیا جو ’جِنہاں کُوں دعوت ڈِتی ہے اُنہاں کُوں آکھو جو کھانڑا تیار تھی گئے۔ میڈے ڈاند تے موٹے موٹے جانور ذبح تھی گئے ہِن تے سبھ کُجھ تیار ہے۔ شادی ءچ آؤ۔‘

⁵ پر اُنہاں کوئی پرواہ نہ کیتی تے ٹُر پئے۔ کوئی آپنڑی رَڑھ کُوں، کوئی آپنڑے کاروبار ءچ لگ گِیا۔

⁶ تے بئیاں اُوندے نوکراں کُوں پکڑ تے اُنہاں دی بے عزتی کیتی تے قتل کر ڈِتا۔

⁷ بادشاہ بہُوں کوڑیج گِیا تے اُوں آپنڑا لشکر بھیج تے اُنہاں قاتلاں کُوں مروا ڈِتا تے اُنہاں دا شہر ساڑ ڈِتا۔

⁸ وَل اُوں آپنڑے نوکراں کُوں آکھیا، ’شادی دی ضیافت تاں تیار ہے پر جیہڑے سڈے گئے ہَن لائق نہ ہَن۔

⁹ بس رستے دے چوکاں اُتے ونجو تے جِتّی تُہاکُوں مِلنڑ، اُنہاں کُوں شادی دی دعوت ڈیؤ۔‘

¹⁰ نوکر گئے تے جِتّی چنگے مندے اُنہاں کُوں مِلے ساریاں کُوں جمع کر تے گِھن آئے تے شادی آلا گھر مہماناں نال بھریج گِیا۔

¹¹ پر جِیں ویلے بادشاہ مہماناں کُوں ڈیکھنڑ اندر آیا تاں اُوندی نظر ہِک بندے اُتے گئی جیہڑا شادی آلے جوڑے ءچ نہ ہا۔

¹² اُوں اُونکُوں آکھیا، ’میاں تُوں شادی آلا جوڑا پاتے بغیر اِتھاں کیوں آ گئیں؟‘ پر او کوئی جواب نہ ڈے سگیا۔

¹³ اِیں وجہ تُوں بادشاہ آپنڑے خادماں کُوں آکھیا، ’اِیندے ہتھ پیر بَدھ تے باہر اندھارے ءچ سَٹ ڈیؤ۔ اُتھاں رووݨ تے ڈنداں دا پِیہوݨ ہوسی۔‘

¹⁴ کیوں جو سڈے ہوئے بہُوں ہِن پر چُنڑے ہوئے تھوڑے۔“

ٹیکس ڈیوݨ دے بارے ءچ سوال

¹⁵ وَل فریسی وَنج تے آپس ءچ صلاح کرݨ لگ پئے جو یسُوع کُوں گالھیں ءچ کِینویں پھساوݨ۔

¹⁶ بس اُنہاں آپنڑے شاگرداں کُوں ہیرودیس دے پیروکاراں نال اُوندے کولھ بھیجیا تے اُنہاں آکھیا، ”اُستاد! اساں جانڑدے ہیں جو تُساں سچے ہیوے تے سچائی نال خُدا دی راہ دی تعلیم ڈیندے ہیوے، تے کہیں دی پرواہ نئیں کریندے کیوں جو تُساں کہیں بندے دے طرفدار نئیں۔

¹⁷ بس ساکُوں ڈساؤ جو تُہاڈے خیال ءچ رومی بادشاہ قیصر کُوں ٹیکس ڈیوݨ جائز ہے یا نئیں؟“

¹⁸ یسُوع اُنہاں دی بُری نیّت معلوم کر تے آکھیا، ”منافقو! میکُوں کیوں ازمیندے ہیوے؟

¹⁹ ٹیکس دا سِکہ میکُوں ڈِکھاؤ۔“ او ہِک دینار اُوندے کولھ گِھن آئے۔

²⁰ اُوں اُنہاں کنُوں پُچھیا، ”اِیندے اُتے کیندی تصویر تے ناں ہے؟“

²¹ اُنہاں اُونکُوں آکھیا، ”رومی بادشاہ قیصر دا۔“ وَل اُوں اُنہاں کُوں آکھیا، ”جیہڑا قیصر دا ہے قیصر کُوں تے جیہڑا خُدا دا ہے خُدا کُوں ڈیؤ۔“

²² او ایہ سُنڑ تے حیران تھی گئے تے اُونکُوں چھوڑ تے چلے گئے۔

مُردیاں دی قیامت دے بارے ءچ سوال

²³ اُوں ڈینہہ صدوقی جیہڑے قیامت دے مُنکر ہَن اُوندے کولھ آئے تے اُوں کنُوں ایہ پُچھیا جو

²⁴ ”اُستاد! مُوسیٰ آکھیا ہا جو جے کوئی بندہ بے اولاد مر ونجے تاں اُوندا بِھرا بیوہ نال شادی کر گِھنے تاں جو آپنڑے بِھرا کیتے نسل پیدا کرے۔

²⁵ ہُنڑ ساڈے اِتھاں سَت بِھرا ہَن۔ پہلے بِھرا شادی کیتی تے مر گِیا تے اِیں وجہ کنُوں جو اُوندی اولاد نہ ہئی، اُوندے بِھرا اُوں بیوہ نال شادی کیتی۔

²⁶ وَل ڈُوجھا بِھرا وی بے اولاد مر گِیا۔ تریجھے بِھرا نال وی اِینویں ای تھیّا۔ اِینویں ستّے بِھرا بیوہ نال شادی کر تے بے اولاد مر گئے۔

²⁷ آخر ءچ او عورت وی مر گئی۔

²⁸ بس قیامت ءچ او اُنہاں ستّاں بِھرانواں ءچوں کیندی ذال ہوسی؟ کیوں جو سبھ اُوندے نال شادی کیتی ہئی۔“

²⁹ یسُوع اُنہاں کُوں جواب ءچ آکھیا، ”تُساں گُمراہ ہیوے اِیں واسطے جو نہ تاں خُدا دے کلام کُوں جانڑدے ہیوے، نہ خُدا دی قُدرت کُوں۔

³⁰ کیوں جو قیامت ءچ شادی ویاہ نہ تھیسی بلکہ اسمان اُتے لوک فرشتیاں آلی کار ہوسن۔

³¹ پر مُردیاں دے زندہ تھیوݨ دے بارے ءچ کیا تُساں ایہ نئیں پڑھیا، جیہڑا خُدا فرمایا ہا

³² ’مَیں ابرہام دا خُدا تے اِضحاق دا خُدا تے یعقُوب دا خُدا ہاں؟‘ او مُردیاں دا خُدا نئیں بلکہ زندیاں دا خُدا ہے۔“

³³ لوک اُوندی ایہ تعلیم سُنڑ تے حیران تھی گئے۔

ساریاں تُوں وڈا حُکم

³⁴ جِیں ویلے فریسیاں سُنڑیا جو اُوں صدوقیاں کُوں لاجواب کر ڈِتے تاں او جمع تھی گئے۔

³⁵ تے اُنہاں ءچوں شریعت دے ہِک عالم اُونکُوں ازماوݨ کیتے پُچھیا،

³⁶ ”اُستاد! توریت ءچ سبھ کنُوں وڈا حُکم کیہڑا ہے؟“

³⁷ اُوں اُونکُوں آکھیا، ”رب العالمین آپنڑے خُدا نال آپنڑے سارے دل تے آپنڑی ساری جان تے آپنڑی ساری عقل نال محبت رکھ۔

³⁸ وڈا تے پہلا حُکم اِیہو ہے۔

³⁹ تے ڈُوجھا اِیندے وانگُوں ایہ ہے جو آپنڑے ہمسائے نال آپنڑے وانگُوں محبت رکھ۔

⁴⁰ ساری شریعت تے نبیاں دے صحیفیاں دا دار و مدار اِنہاں ڈُو حُکماں اُتے ہے۔“

مسیح ِ مَوعُود دے بارے ءچ سوال

⁴¹ جیہڑے ویلے فریسی جمع تھئے تاں یسُوع اُنہاں کنُوں پُچھیا،

⁴² ”المسیح دے بارے ءچ تُہاڈا کیا خیال ہے؟ او کِیندا پوتر ہے؟“ اُنہاں جواب ڈِتا، ”داؤد دا۔“

⁴³ اُوں اُنہاں کُوں آکھیا، ”وَل داؤد رُوح القُدس دی ہدایت نال اُونکُوں مالک کِینویں آدھا ہے جو

⁴⁴ ’رب میڈے مالک کُوں آکھیا میڈے سجے پاسُوں بہہ جئیں تئیں مَیں تیڈے دُشمنڑاں کُوں تیڈے پیراں دے تلے نہ کر ڈیواں؟‘

⁴⁵ بس جِیں ویلے داؤد اُونکُوں مالک آدھے تاں او اُوندا پوتر کِینویں تھی سگدے؟“

⁴⁶ کوئی ہِک لفظ وی اُوندے جواب ءچ نہ آکھ سگیا تے اُوں ڈینہہ دے بعد نہ ای کہیں کُوں جُرأت تھئی جو اُوں کنُوں مزید سوال کرݨ۔