متّی 20 - کِتاب مُقدّس سرائیکی ترجمہ

انگُوراں دا باغ تے مزدُور

¹ ”کیوں جو اسمان دی بادشاہی اُوں گھر دے مالک وانگُوں ہے جیہڑا سویل نال باہر گِیا تاں جو آپنڑے انگُوراں دے باغ ءچ مزدُوراں کُوں کم تے لاوے۔

² تے اُوں مزدُوراں نال ہِک ڈینہوار دی مزدُوری ہِک دینار مُکا تے اُنہاں کُوں آپنڑے انگُوراں دے باغ ءچ بھیج ڈِتا۔

³ کوئی ترے گھنٹے بعد او ولا باہر گِیا تاں اُوں ڈِٹھا جو کُجھ مزدُور بازار ءچ بیکار کھڑے ہِن،

⁴ تے اُنہاں کُوں آکھیا، ’تُساں وی میڈے انگُوراں دے باغ ءچ چلے ونجو۔ جیہڑا مناسب ہے تُہاکُوں ڈیساں۔‘ بس او چلے گئے۔

⁵ وَل ڈوپہر تے تریجھے پہر دے نیڑے نِکل تے اُوں اِینویں ای کیتا۔

⁶ تے او ڈینہہ لہنڑ کنُوں ہِک گھنٹہ پہلے ولا باہر گِیا تے کُجھ بئیاں کُوں کھڑے ڈِٹھا تے اُنہاں کُوں آکھیا، ’تُساں کیوں اِتھاں سارا ڈینہہ بےکار کھڑے ریہے ہیوے؟‘

⁷ اُنہاں جواب ڈِتا، ’اِیں واسطے جو ساکُوں کہیں کم تے نئیں کھڑایا۔‘ اُوں اُنہاں کُوں آکھیا، ’تُساں وی انگُوراں دے باغ ءچ چلے ونجو۔‘

⁸ جِیں ویلے شام تھئی تاں انگُوراں دے باغ دے مالک آپنڑے مُنشی کُوں آکھیا، ’آخر ءچ کم اُتے کھڑائے ہوئے مزدُوراں کنُوں گِھن تے پہلے تئیں سبھ کُوں سڈ تے اُنہاں دی مزدُوری ڈے چا۔‘

⁹ جِیں ویلے او آئے جیہڑے ڈینہہ لہنڑ کنُوں ہِک گھنٹہ پہلے کھڑائے گئے ہَن، اُنہاں کُوں ہِک ہِک دینار مِلیا۔

¹⁰ اِیں واسطے جیہڑے پہلے آئے ہَن، اُنہاں ایہ سمجھیا جو ساکُوں زیادہ مِلسی، پر اُنہاں کُوں وی ہِک ای دینار مِلیا۔

¹¹ او مزدُوری گِھن تے گھر دے مالک کُوں ایہ آدھے ہوئے شکایت کرݨ لگے جو

¹² ’آخر ءچ کم اُتے کھڑائے ونجنڑ آلیاں صرف ہِک گھنٹہ کم کیتے، تے اساں دُھپ ءچ سارا ڈینہہ محنت کیتی پر تُساں اُنہاں کُوں ساڈے برابر کر ڈِتے۔‘

¹³ اُوں اُنہاں ءچوں ہِک کُوں جواب ڈِتا، ’میاں مَیں تیڈے نال بے اِنصافی نئیں کریندا۔ کیا تیڈے نال مزدُوری دا ہِک دینار نہ مُکا ہا؟

¹⁴ جیہڑا تیڈا ہے گِھن تے ٹُردا تھی۔ ایہ میڈی مرضی ہے جو جِتّی تیکُوں ڈیندا پِیا ہاں اُتنا ای آخری کُوں ڈیواں۔

¹⁵ کیا میکُوں ایہ حق نئیں جو آپنڑے مال نال جیہڑا کُجھ چاہواں کراں؟ یا تیکُوں میڈی نیکی بُری لگدی ہے؟‘

¹⁶ بس جیہڑے آخر ہِن اوّل، تے جیہڑے اوّل ہِن آخر تھی ویسن۔“

یسُوع تریجھی پھیری آپنڑی موت دی گالھ کریندے

¹⁷ یروشلیم ویندے ہوئے یسُوع بارہاں شاگرداں کُوں اَنج گِھن گِیا تے رستے ءچ اُنہاں کُوں آکھیا،

¹⁸ ”ڈیکھو اساں یروشلیم ویندے ہیں تے اِبنِ آدم سردار کاہِناں تے شریعت دے عالماں دے حوالے کیتا ویسی۔ او اُوندے قتل دا حُکم ڈیسن،

¹⁹ تے اُونکُوں غیر قوماں دے حوالے کریسن تاں جو او اُوندا مذاق اُڈاوݨ، کوڑے مارݨ تے مصلُوب کرݨ۔ پر او تریجھے ڈینہہ زندہ تھی ویسی۔“

ہِک ماء دی اِلتجا

²⁰ اُوں ویلے زبدی دے پوتراں دی ماء آپنڑے پوتراں دے نال یسُوع کولھ آئی تے جُھک تے اُونکُوں ہِک عرض کیتی۔

²¹ یسُوع اُونکُوں آکھیا ”تُوں کیا چاہندی ہیں؟“ اُوں عرض کیتی جو تُہاڈی بادشاہی ءچ میڈے پوتراں ءچوں ہِک تُہاڈے سجے تے ڈُوجھا کھبے پاسُوں بَہوے۔

²² پر یسُوع جواب ءچ آکھیا، ”تُساں نئیں جانڑدے جو کیا منگدے ہیوے۔ کیا تُساں ڈُکھ دا او پیالہ پی سگدے ہیوے جیہڑا مَیں پِیوݨ آلا ہاں؟“ اُنہاں اُونکُوں آکھیا، ”اساں پی سگدے ہیں۔“

²³ اُوں اُنہاں کُوں آکھیا، ”تُساں میڈا پیالہ تاں پِیسو پر کہیں کُوں آپنڑے سجے یا کھبے پاسُوں بِلھاونڑاں میڈا کم نئیں بلکہ ایہ جاہ صرف اُنہاں کیتے ہے جِنہاں کُوں میڈے باپ اِیں کیتے چُنڑ گِھدے۔“

²⁴ جِیں ویلے باقی ڈاہ شاگرداں ایہ سُنڑیا تاں او اُنہاں ڈوہائیں بِھرانواں نال خفا تھئے۔

²⁵ پر یسُوع اُنہاں کُوں آپنڑے کولھ سڈیا تے آکھیا، ”تُہاکُوں پتہ ہے جو غیر قوماں دے سردار اُنہاں اُتے حکُومت کریندے ہِن تے اُنہاں دے امیر اُنہاں اُتے اِختیار جتیندے ہِن۔

²⁶ تُہاڈے ءچ اِینویں نہ ہوسی بلکہ تُہاڈے ءچ جیہڑا وڈا بنڑݨ چاہوے او تُہاڈا خادم بنڑے۔

²⁷ تے جیہڑا تُہاڈے ءچوں اوّل تھیوݨ چاہوے او تُہاڈا غُلام بنڑے۔

²⁸ اِبنِ آدم اِیں واسطے نئیں آیا جو خدمت گِھنے بلکہ اِیں واسطے جو خدمت کرے تے آپنڑی جان بہُوں ساریاں کیتے فِدیہ ءچ ڈیوے۔“

یسُوع ڈُو اندھیاں کُوں شِفا ڈیندے

²⁹ جِیں ویلے او یرِیحُو شہر ءچوں نِکلدے پئے ہَن تاں ہِک وڈی بِھیڑ اُوندے پِچُھوں تھی پئی۔

³⁰ ڈُو اندھے جیہڑے راہ دے کنارے بیٹھے ہَن ایہ سُنڑ تے جو یسُوع لنگھدا پئے تاں دھاڑ دھاڑ کرݨ لگ پئے گئے جو ”مالک، اِبنِ داؤد! ساڈے اُتے رحم کرو۔“

³¹ لوکاں اُنہاں کُوں دَڑکیا جو چُپ راہوݨ پر او تاں بِیا وی دھاڑ دھاڑ کرݨ لگ پئے، ”مالک، اِبنِ داؤد! ساڈے اُتے رحم کرو۔“

³² یسُوع کھڑ تے اُنہاں کُوں سڈ یا تے پُچھیا، ”ڈساؤ جو مَیں تُہاڈے کیتے کیا کراں؟“

³³ اُنہاں اُونکُوں آکھیا، ”مالک! اِیہو جو ساڈے اکھیں کُھل ونجنڑ۔“

³⁴ یسُوع کُوں اُنہاں اُتے ترس آیا تے اُنہاں دے اکھیں کُوں ہتھ لایا تے او فوراً ڈیکھنڑ لگ پئے تے اُوندے پِچُھوں ٹُر پئے۔