متّی 12 - کِتاب مُقدّس سرائیکی ترجمہ

سبت دے بارے ءچ سوال

¹ اُوں ویلے یسُوع سبت دے ڈینہہ رَڑھیں ءچوں تھی تے ویندا پِیا ہا تے اُوندے شاگرداں کُوں بُکھ لگی تے او سِٹے تروڑ تروڑ تے کھاوݨ لگے۔

² فریسیاں ایہ ڈیکھ تے اُونکُوں آکھیا جو ”ڈیکھو تُہاڈے شاگرد او کم کریندن جیہڑے سبت دے ڈینہہ کرݨ جائز نئیں۔“

³ اُوں اُنہاں کُوں جواب ڈِتا، ”کیا تُساں نئیں پڑھیا جو جِیں ویلے داؤد تے اُوندے ساتھی بُکھے ہَن تاں اُوں کیا کیتا؟

⁴ او کِینویں خُدا دے گھر ءچ گِیا تے نذر دیاں روٹیاں کھادیاں تے آپنڑے ساتھیاں کُوں وی کھاوݨ کیتے ڈِتیاں، بھانویں ایجھیاں روٹیاں کھاوݨ صرف کاہِناں کُوں جائز ہا؟

⁵ یا کیا تُساں توریت ءچ ایہ نئیں پڑھیا جو کاہِن سبت دے ڈینہہ ہیکل ءچ سبت دی بے حُرمتی کرݨ دے باوجود وی بے قصُور راہندن؟

⁶ مَیں تُہاکُوں آدھا ہاں جو اِتھاں او ہے جیہڑا ہیکل کنُوں وی وڈا ہے۔

⁷ پر جے تُساں اِیں نوِشتہ دا مطلب جانڑدے جو ’مَیں قُربانی نئیں بلکہ رحم پسند کریندا ہاں،‘ تاں بے قصُوراں کُوں قصُوروار نہ آدھے۔

⁸ کیوں جو اِبنِ آدم سبت دا مالک ہے۔“

سُکے ہتھ آلا بندہ

⁹ تے او اُتھوں کنُوں روانہ تھی تے اُنہاں دے عبادت خانے ءچ گِیا۔

¹⁰ اُتھاں ہِک بندہ ہا جِیندا ہتھ سُکیا ہویا ہا۔ فریسیاں اُوندے اُتے اِلزام لاوݨ دے اِرادے نال ایہ پُچھیا جو ”کیا سبت دے ڈینہہ شِفا ڈیوݨ جائز ہے؟“

¹¹ اُوں اُنہاں کُوں آکھیا، ”تُہاڈے ءچوں ایجھا کوݨ ہے جیندی بھیڈ سبت دے ڈینہہ کھڈے ءچ ڈھے پووے تے او اُونکُوں نہ کڈھے؟

¹² بس اِنسان دی قدر تاں بھیڈ کنُوں بہُوں ای زیادہ ہے۔ اِیں کیتے سبت دے ڈینہہ نیکی کرݨ جائز ہے۔“

¹³ وَل اُوں اُوں بندے کُوں آکھیا، ”آپنڑا ہتھ ودھا۔“ اُوں ودھایا تے او اُوندے ڈُوجھے ہتھ آلی کار ٹھیک تھی گِیا۔

¹⁴ وَل فریسی باہر چلے گئے تے اُوندے خلاف مشورہ کیتا جو اُونکُوں کِینویں ہلاک کرُوں۔

خُدا دا چُنڑیا ہویا خادم

¹⁵ یسُوع ایہ معلوم کر تے اُتھوں کنُوں روانہ تھیّا تے لوکاں دی ہِک بِھیڑ اُوندے پِچُھوں ٹُر پئی تے اُوں سبھ کُوں چنگا کر ڈِتا۔

¹⁶ تے اُنہاں کُوں چِتا تے آکھیا جو میکُوں ظاہر نہ کرائے۔

¹⁷ اِینویں یسعیاہ نبی دی پیشن گوئی پُوری تھئی جو

¹⁸ ”ڈیکھو میڈا خادم، جِینکُوں مَیں چُنڑیا۔ میڈا محبوب جئیں کنُوں میڈا دل خوش ہے۔ مَیں آپنڑا رُوح اُوندے اُتے نازل کریساں تے او قوماں ءچ اِنصاف دا اعلان کریسی۔

¹⁹ ایہ نہ جھیڑا کریسی نہ شور تے نہ گلیاں ءچ کوئی اُوندی اواز سُنڑسی۔

²⁰ ایہ لتاڑے ہوئے کانے کُوں نہ تُوڑیسی تے نہ بُجھدے ہوئے ڈیوے کُوں وِسمیسی جئیں تئیں اِنصاف کُوں فتح نہ ڈیوا وے۔

²¹ تے اِیندے ناں کنُوں غیر قوماں اُمید رکھیسن۔“

یسُوع تے بعل زبُول

²² اُوں ویلے لوک یسُوع دے کولھ ہِک اندھے گُونگے بندے کُوں گِھن آئے جیندے ءچ بدرُوح ہئی۔ اُوں اُونکُوں چنگا کر ڈِتا۔ وَل او اندھا گُونگا ڈیکھنڑ تے بولنڑ لگ گِیا۔

²³ سارے لوک حیران تھی تے آکھنڑ لگے، ”کیا ایہ اِبنِ داؤد ہے؟“

²⁴ فریسیاں سُنڑ تے آکھیا، ”ایہ بدرُوحاں دے سردار بعل زبُول دی مدد دے بغیر بدرُوحاں کُوں نئیں کڈھیندا۔“

²⁵ یسُوع اُنہاں دے خیالاں کُوں جاݨ تے اُنہاں کُوں آکھیا، ”جِیں بادشاہی ءچ پُھٹ پے ویندی ہے او تباہ تھی ویندی ہے تے جِیں شہر یا گھر ءچ پُھٹ پے ویسی او قائم نہ راہسی۔

²⁶ جے شیطان ای شیطان کُوں کڈھیا تاں او آپ ای آپنڑا مخالف تھی گِیا۔ وَل اُوندی بادشاہی کِینویں قائم راہسی؟

²⁷ تے جے مَیں بعل زبُول دی مدد نال بدرُوحاں کُوں کڈھیندا ہاں تاں تُہاڈے شاگرد کیندی مدد نال کڈھیندے ہِن؟ اِیں واسطے اُوہو تُہاڈے مُنصف ہوسن۔

²⁸ پر جے مَیں خُدا دی رُوح دی مدد نال بدرُوحاں کُوں کڈھیندا ہاں تاں خُدا دی بادشاہی تُہاڈے کولھ آݨ پُجی۔

²⁹ یا کوئی بندہ کہیں زور آور دے گھر وڑ تے اُوندا مال کِینویں لُٹ سگدے جئیں تئیں پہلے اُوں زور آور کُوں بَدھ نہ گِھنے؟ وَل او اُوندا گھر لُٹ گِھنسی۔

³⁰ جیہڑا میڈے نال نئیں او میڈے خلاف ہے، تے جیہڑا میڈے نال جمع نئیں کریندا او کِھنڈیندے۔

³¹ اِیں واسطے مَیں تُہاکُوں آدھا ہاں جو آدمیاں دا ہر گُناہ تے کُفر معاف کیتا ویسی پر جیہڑا کُفر رُوح القُدس دے خلاف ہوسی او بخشیا نہ ویسی۔

³² تے جے کوئی اِبنِ آدم دے خلاف کوئی گالھ کریسی اُونکُوں معاف کیتا ویسی، پر جیہڑا رُوح القُدس دے خلاف کوئی گالھ کریسی او اُونکُوں معاف نہ کیتی ویسی نہ اِیں جہان ءچ نہ آوݨ آلے ءچ۔

درخت تے اُوندا پھل

³³ یا تاں درخت کُوں چنگا آکھو تے اُوندے پھل کُوں وی چنگا، یا درخت کُوں وی بُرا آکھو تے اُوندے پھل کُوں وی بُرا، کیوں جو درخت آپنڑے پھل کنُوں سُنجانڑیا ویندے۔

³⁴ نانگ دے بالو! تُساں بُرے تھی تے کِینویں چنگے گالھیں آکھ سگدے ہیوے؟ کیوں جو جیہڑا دل ءچ ہوندے اُوہو زبان اُتے آندے۔

³⁵ چنگا بندہ آپنڑے دل دے چنگے خزانے ءچوں چنگیاں چیزاں کڈھیندے تے بُرا بندہ بُرے خزانے ءچوں بُریاں چیزاں کڈھیندے۔

³⁶ تے مَیں تُہاکُوں آدھا ہاں جو عدالت دے ڈینہہ لوکاں کُوں ہر نکمی گالھ دا حساب ڈیونڑاں پوسی۔

³⁷ کیوں جو تُساں آپنڑے گالھیں دی وجہ کنُوں راستباز یا قصُوروار کھڑائے ویسو۔“

معجزانہ نشان دا مطالبہ

³⁸ وَل کُجھ شریعت دے عالماں تے فریسیاں جواب ءچ اُونکُوں آکھیا، ”اُستاد، اساں تُہاڈے کنُوں ہِک نشان ڈیکھنڑ چاہندے ہیں۔“

³⁹ اُوں جواب ڈے تے آکھیا، ”اِیں زمانے دے بُرے تے زِناکار لوک نشان ڈیکھنڑ چاہندے ہِن پر یُوناہ نبی دے نشان دے علاوہ بِیا کوئی نشان اُنہاں کُوں نہ ڈِتا ویسی۔

⁴⁰ کیوں جو جِینویں یُوناہ ترے ڈینہہ رات وڈی مچھی دے پیٹ ءچ ریہا اِینویں ای اِبنِ آدم ترے ڈینہہ رات زمین دے اندر راہسی۔

⁴¹ نِینوہ دے لوک عدالت دے ڈینہہ اِیں زمانے دے لوکاں نال کھڑ تے اُنہاں کُوں مُجرم کھڑیسن کیوں جو اُنہاں یُوناہ دی تبلیغ دی وجہ کنُوں توبہ کر گِھدی ہئی تے ڈیکھو اِتھاں او ہے جیہڑا یُوناہ کنُوں وی وڈا ہے۔

⁴² جنُوب دی ملکہ عدالت دے ڈینہہ اِیں زمانے دے لوکاں نال کھڑ تے اُنہاں کُوں مُجرم کھڑیسی۔ کیوں جو او بہُوں دُور کنُوں سُلیمان دی حِکمت سُنڑݨ کیتے آئی ہئی تے ڈیکھو اِتھاں او ہے جیہڑا سُلیمان کنُوں وی وڈا ہے۔

بدرُوح دی واپسی

⁴³ جِیں ویلے کہیں بندے ءچوں بدرُوح نِکلدی ہے تاں او بیاباناں ءچ آرام گولھیندی پِھردی ہے پر نئیں پیندی۔

⁴⁴ وَل او آدھی ہے جو ’مَیں آپنڑے اُوں گھر وَل ویساں جِتُھوں نِکلی ہم،‘ تے او آ تے اُوں گھر کُوں خالی تے صاف ستھرا تے سجیا ہویا ڈیدھی ہے۔

⁴⁵ وَل او وَنج تے آپنڑے کنُوں وی بدتر سَت بئیاں بدرُوحاں کُوں نال گِھن آندی ہے تے او اندر وَنج تے راہنڑ لگدیاں ہِن تے اُوں بندے دا حال پہلے کنُوں وی بُرا تھی ویندے۔ اِیں زمانے دے بُرے لوکاں دا حال وی ایجھا ای ہوسی۔“

یسُوع دی ماء تے بِھرا

⁴⁶ جِیں ویلے یسُوع بِھیڑ نال گالھ کریندا پِیا ہا تاں اُوندی ماء تے بِھرا باہر کھڑے ہَن تے او اُوندے نال گالھ کرݨ چاہندے ہَن۔

⁴⁷ کہیں اُونکُوں خبر ڈِتی جو ”تُہاڈی ماء تے تُہاڈے بِھرا باہر کھڑے ہِن تے تُہاڈے نال گالھ کرݨ چاہندے ہِن۔“

⁴⁸ یسُوع جواب ءچ آکھیا، ”کوݨ ہے میڈی ماء تے کوݨ ہِن میڈے بِھرا؟“

⁴⁹ تے آپنڑے شاگرداں دو ہتھ ودھا تے آکھیا، ”ڈیکھو، میڈی ماء تے میڈے بِھرا ایہ ہِن۔

⁵⁰ کیوں جو جیہڑا کوئی میڈے اسمانی باپ دی مرضی اُتے چلدے اُوہو میڈا بِھرا تے میڈی بھینڑ تے میڈی ماء ہے۔“