متّی 11 - کِتاب مُقدّس سرائیکی ترجمہ

یُوحنّا بپتسمہ ڈیوݨ آ لا

¹ تے جِیں ویلے یسُوع آپنڑے بارہاں شاگرداں کُوں حُکم ڈے چُکیا تاں او اُتھوں روانہ تھیّا تاں جو اُنہاں دے شہراں ءچ تعلیم ڈیوے تے تبلیغ کرے۔

² تے یُوحنّا قید خانہ ءچوں مسیح دے کماں دے بارے ءچ سُنڑ تے آپنڑے شاگرداں دی معرفت اُونکُوں پُچھوا بھیجیا

³ جو ”آوݨ آلے تُساں ای ہیوے یا اساں کہیں بئے دی راہ ڈیکھوں؟“

⁴ یسُوع اُنہاں کُوں جواب ڈِتا، ”جیہڑا کُجھ تُساں ڈیدھے تے سُنڑدے ہیوے وَنج تے یُوحنّا کُوں ڈساؤ،

⁵ جو اندھے ڈیدھے ہِن، منڈے ٹُردے ہِن، کوڑھی پاک صاف کیتے ویندے ہِن، ڈورے سُنڑدے ہِن، مُردے زندہ کیتے ویندے ہِن تے غریباں کُوں خوشخبری سُنڑائی ویندی ہے۔

⁶ مُبارک ہے او جیہڑا میڈی وجہ کنُوں ٹھوکر نہ کھاوے۔“

⁷ جِیں ویلے یُوحنّا دے شاگرد روانہ تھی گئے تاں یسُوع لوکاں کُوں یُوحنّا دے بارے ءچ آکھنڑ لگا جو ”تُساں بیابان ءچ کیا ڈیکھنڑ گئے ہَوے؟ کیا ہوا نال ہِلدے ہوئے کانے کُوں؟

⁸ تاں وَل کیا ڈیکھنڑ گئے ہَوے؟ کیا نفِیس کپڑے پاتے ہوئے بندے کُوں؟ ڈیکھو جیہڑے نفِیس کپڑے پیندے ہِن او شاہی محلاں ءچ راہندے ہِن۔

⁹ تاں وَل تُساں کیا ڈیکھنڑ گئے ہَوے؟ کیا ہِک نبی کُوں؟ ہاں، پر مَیں تُہاکُوں آدھا ہاں جو نبی کنُوں وی وڈے کُوں۔

¹⁰ ایہ اُوہو ہے جیندے بارے کلام ءچ لِکھیا ہے جو ’ڈیکھ مَیں آپنڑا پیغمبر تیڈے اگُوں بھجیندا ہاں جیہڑا تیڈے اگُوں تیڈی راہ تیار کریسی۔‘

¹¹ مَیں تُہاکُوں سچ آدھا ہاں جو جیہڑے عورتاں ءچوں پیدا تھئے ہِن اُنہاں ءچوں یُوحنّا بپتسمہ ڈیوݨ آلے کنُوں وڈا کوئی نئیں تھیّا، پر جیہڑا اسمان دی بادشاہی ءچ سبھ تُوں چھوٹا ہے او اُوں کنُوں وڈا ہے۔

¹² یُوحنّا بپتسمہ ڈیوݨ آلے دے ڈینہاں کنُوں اِیں ویلے تئیں اسمان دی بادشاہی دی زور نال مخالفت تھیندی پئی ہے تے زور آور اُونکُوں کَھس گِھندے ہِن۔

¹³ کیوں جو سارے نبیاں تے توریت، یُوحنّا تئیں نبُوّت کیتی،

¹⁴ تے جے تُساں چاہو تاں منّو، ایلیّاہ جیہڑا آوݨ آلا ہا اِیہو ہے۔

¹⁵ جیندے سُنڑݨ دے کَن ہووݨ او سُنڑ گِھنے۔

¹⁶ مَیں اِیں زمانے دے لوکاں کُوں کیندے نال تشبیہ ڈیواں؟ او اُنہاں چھوہراں آلی کار ہِن جیہڑے بازاراں ءچ بیٹھے ہوئے آپنڑے دوستاں کُوں سڈ مار تے آدھن،

¹⁷ ’اساں تُہاڈے کیتے بانسری وجائی تے تُساں نہ نچے۔ اساں ماتم کیتا پر تُساں چھاتی نہ پِٹی۔‘

¹⁸ کیوں جو یُوحنّا نہ کھاندا نہ پِیندا آیا تے او آدھن جو اُوندے ءچ بدرُوح ہے۔

¹⁹ اِبنِ آدم کھاندا پِیندا آیا تے او آدھن، ’ڈیکھو ایہ کھاؤُ تے شرابی بندہ، محصُول گِھننڑ آلیاں تے گُنہگاراں دا یار۔‘ پر حِکمت آپنڑے کماں تُوں برحق ثابت تھئی۔“

اِیمان نہ گِھن آوݨ آلے شہر

²⁰ وَل یسُوع اُنہاں شہراں کُوں ملامت کرݨ لگا جِنہاں ءچ اُوں بہُوں سارے معجزے کیتے ہَن کیوں جو اُنہاں توبہ نہ کیتی ہئی۔ اُونیں آکھیا،

²¹ ”خُرازین! تَیں اُتے افسوس، بیت صیدا! تَیں اُتے افسوس، کیوں جو جیہڑے معجزے تُہاڈے ءچ کیتے گئے، جے صور تے صیدا ءچ تھیندے تاں اُتھاں دے لوک ٹاٹ پا تے، تے سواہ ءچ بہہ تے کڈݨ دے توبہ کر گِھندے۔

²² پر مَیں تُہاکُوں آدھا ہاں جو عدالت دے ڈینہہ صور تے صیدا دا حال تُہاڈے حال کنُوں زیادہ برداشت دے لائق ہوسی۔

²³ تے کفرنحُوم! کیا تُوں اسمان تئیں اُچا کیتا ویسیں؟ تُوں تاں عالم ِ ارواح ءچ لہایا ویسیں۔ کیوں جو جیہڑے معجزے تیڈے ءچ ظاہر تھئے، جے سدُوم ءچ ظاہر تھیندے تاں او اَج تئیں قائم راہندا۔

²⁴ پر مَیں تُہاکُوں آدھا ہاں جو عدالت دے ڈینہہ سدُوم دا حال تَیں کنُوں زیادہ برداشت دے لائق ہوسی۔“

میڈے کولھ آؤ تے آرام پاؤ

²⁵ اُوں ویلے یسُوع آکھیا، ”اے باپ، اسمان تے زمین دے مالک، مَیں تیڈا شُکر کریندا ہاں جو تَیں ایہ گالھیں دانا لوکاں تے عالماں کنُوں لُکائیاں تے بالاں اُتے ظاہر کیتیاں۔

²⁶ ہاں باپ، کیوں جو تیڈی نظر ءچ اِیہو چنگا ہا۔

²⁷ میڈے باپ دی طرفوں سبھ کُجھ میڈے سپُرد کیتا گِیا ہے تے کوئی پوتر کُوں نئیں جانڑدا سوائے باپ دے، تے نہ ای کوئی باپ کُوں جانڑدے سوائے پوتر دے یا او بندہ جیندے اُتے پوتر اُونکُوں ظاہر کرݨ چاہندے۔

²⁸ محنت کرݨ آلیو تے بھار تلے دبے ہوئے لوکو! سبھ میڈے کولھ آؤ۔ مَیں تُہاکُوں آرام ڈیساں۔

²⁹ میڈی پنجالی چا گِھنو تے میڈے کنُوں سِکھو۔ کیوں جو مَیں نرم تے دل دا فروتن ہاں۔ وَل تُہاکُوں آرام مِل سی۔

³⁰ کیوں جو میڈی پنجالی نرم تے میڈا بھار ہلکا ہے۔“