متّی 10 - کِتاب مُقدّس سرائیکی ترجمہ

بارہاں رسُول

¹ وَل یسُوع آپنڑے بارہاں شاگرداں کُوں کولھ سڈ تے اُنہاں کُوں بدرُوحاں کُوں کڈھنڑ تے سبھ بیماریاں تے تکلیفاں کنُوں شِفا ڈیوݨ دا اِختیار بخشیا۔

² بارہاں رسُولاں دے ناں ایہ ہِن۔ پہلا شمعون جیہڑا پطرس اکھویندے تے اُوندا بِھرا اندریاس، زبدی دا پوتر یعقُوب تے اُوندا بِھرا یُوحنّا،

³ فِلپُس تے بَرتُلمائی، توما تے متّی محصُول گِھننڑ آلا،

⁴ حلفئی دا پوتر یعقُوب تے تدّی، شمعون قنانی تے یہُوداہ اِسکریُوتی جئیں اُونکُوں پکڑوا وی ڈِتا۔

بارہاں رسُولاں دی ذمہ داری

⁵ یسُوع اِنہاں بارہاں کُوں بھیجیا تے اُنہاں کُوں حُکم ڈے تے آکھیا، ”غیر قوماں دو نہ وَنجائے تے سامریاں دے کہیں شہر ءچ داخل نہ تھیوائے۔

⁶ بلکہ اِسرائیل دے گھرانڑے دیاں گُم تھیّاں بھیڈاں دے کولھ وَنجائے۔

⁷ ٹُردے ٹُردے ایہ تبلیغ کرائے جو اسمان دی بادشاہی نیڑے آ گئی ہے۔

⁸ بیماراں کُوں شِفا ڈیوائے۔ مُردیاں کُوں زندہ کرائے۔ کوڑھیاں کُوں پاک صاف کرائے۔ بدرُوحاں کُوں کڈھائے۔ تُہاکُوں مُفت مِلے، مُفت ڈیوائے۔

⁹ آپنڑے کمر بند ءچ نہ سونا چاندی رکھائے نہ پیسے۔

¹⁰ نہ رستے کیتے تھیلا گِھنائے نہ ڈُو ڈُو چولے نہ جُتی تے نہ سوٹی کیوں جو مزدُور آپنڑی مزدُوری دا حقدار ہے۔

¹¹ تُساں جیہڑے وی شہر یا وستی ءچ داخل تھیوائے تاں پتہ کرائے جو کیہڑا اُوندے ءچ لائق ہے تے جئیں تئیں اُتھوں روانہ نہ تھیؤ، اُتھائیں ٹِکائے۔

¹² تے گھر ءچ داخل تھیندے ہوئے سلام ولائے۔

¹³ جے او گھر لائق ہوسی تاں تُہاڈا سلام اُونکُوں پُج ویسی، تے جے لائق نہ ہوسی تاں تُہاڈا سلام تُہاڈے اُتے وَل آسی۔

¹⁴ جے کوئی تُہاکُوں قبول نہ کرے تے تُہاڈے گالھیں نہ سُنڑے تاں اُوں گھر یا شہر کنُوں روانہ تھیندے ہوئے آپنڑے پیراں دی دُھوڑ اُتھائیں چِھنڈک ڈیوائے۔

¹⁵ مَیں تُہاکُوں سچ آدھا ہاں جو عدالت دے ڈینہہ سدُوم تے عمُورہ دے علاقے دا حال اُوں شہر دے حال کنُوں زیادہ برداشت دے لائق ہوسی۔

آوݨ آلیاں تکلیفاں

¹⁶ ڈیکھو مَیں تُہاکُوں بھجیندا ہاں جِینویں بھیڈاں کُوں نہراں ءچ۔ اِیں واسطے تُساں نانگاں وانگُوں ہوشیار تے کبوتراں وانگُوں بھولے بنڑو۔

¹⁷ پر لوکاں کنُوں خبردار رہوائے کیوں جو او تُہاکُوں پکڑ تے عدالتاں ءچ پیش کریسن تے آپنڑے عبادت خانیاں ءچ تُہاکُوں کوڑے مریسن۔

¹⁸ تُساں میڈی وجہ کنُوں حاکماں تے بادشاہاں دے سامنڑے حاضر کیتے ویسو تاں جو اُنہاں، تے غیر قوماں کیتے گواہی ہووے۔

¹⁹ پر جِیں ویلے او تُہاکُوں پکڑواوݨ تاں فِکر نہ کرائے جو اساں کِینویں تے کیا آکھوں کیوں جو جیہڑا کُجھ آکھنڑا ہوسی اُوں ویلے تُہاکُوں ڈسا ڈِتا ویسی۔

²⁰ کیوں جو آکھنڑ آلے تُساں نئیں بلکہ تُہاڈے اسمانی باپ دا رُوح ہوسی جیہڑا تُہاڈے ءچوں بُولیسی۔

²¹ بِھرا کُوں بِھرا تے پِیُو آپنڑے پوتر کُوں قتل کیتے پکڑویسی۔ تے بال آپنڑے ماء پِیُو دے خلاف کھڑے تھی تے اُنہاں کُوں مروا ڈیسن۔

²² تے میڈے ناں دے سببّوں سبھ لوک تُہاڈے نال دُشمنڑی رکھیسن پر جیہڑا آخر تئیں برداشت کریسی اُوہو نجات پیسی۔

²³ پر جِیں ویلے لوک تُہاکُوں ہِک شہر ءچ ستاوݨ تاں ڈُوجھے شہر کُوں بھج وَنجائے کیوں جو مَیں تُہاکُوں سچ آدھا ہاں جو اِیں کنُوں پہلے جو تُساں اِسرائیل دے سارے شہراں ءچ نہ پِھر گِھن سو، اِبنِ آدم آ ویسی۔

²⁴ شاگرد آپنڑے اُستاد کنُوں وڈا نئیں ہوندا تے نہ ای نوکر آپنڑے مالک کنُوں۔

²⁵ شاگرد کیتے کافی ہے جو او آپنڑے اُستاد وانگُوں تے نوکر کیتے ایہ جو او آپنڑے مالک وانگُوں ہووے۔ جِیں ویلے اُنہاں گھر دے مالک کُوں شیطان آکھیا تاں اُوندے گھر آلیاں کُوں کیوں نہ اکھیسن۔

کئیں کنُوں ڈرنڑا چاہیدے

²⁶ بس اُنہاں کنُوں نہ ڈرو کیوں جو کوئی چیز ڈھکی ہوئی نئیں جیہڑی کھولی نہ ویسی، تے کوئی چیز لُکی ہوئی نئیں جیہڑی ظاہر نہ کیتی ویسی۔

²⁷ جیہڑا کُجھ مَیں تُہاکُوں اندھارے ءچ آدھا ہاں تُساں اُونکُوں سوجھلے ءچ آکھو۔ تے جیہڑا کُجھ تُساں کَن ءچ سُنڑدے ہیوے کوٹھیاں اُتے اُوندی تبلیغ کرو۔

²⁸ اُنہاں کنُوں نہ ڈرو جیہڑے جِسم کُوں تاں قتل کر سگدے ہِن پر رُوح کُوں نئیں۔ بلکہ اُوں کنُوں ڈرو جیہڑا جِسم تے رُوح ڈوہائیں کُوں دوزخ ءچ سَٹ سگدے۔

²⁹ کیا ہِک سِکے ءچ ڈُو چِڑیاں نئیں وِکدیاں؟ تے اُنہاں ءچوں ہِک وی تُہاڈے باپ دی مرضی دے بغیر زمین اُتے نئیں ڈھے سگدی۔

³⁰ بلکہ تُہاڈے سر دے وال وی گِنڑے ہوئے ہِن۔

³¹ بس ڈرو نہ۔ تُہاڈی قدر تاں بہُوں ساریاں چِڑیاں تُوں وی زیادہ ہے۔

مسیح کُوں قبول تے رَد کرنڑاں

³² بس جیہڑا کوئی لوکاں دے سامنڑے میڈا اِقرار کریسی مَیں وی آپنڑے باپ دے سامنڑے جیہڑا اسمان اُتے ہے اُوندا اِقرار کریساں۔

³³ پر جیہڑا کوئی لوکاں دے سامنڑے میڈا اِنکار کریسی مَیں وی آپنڑے اسمانی باپ دے سامنڑے اُوندا اِنکار کریساں۔

صُلح نئیں بلکہ تلوار

³⁴ ایہ نہ سمجھو جو مَیں زمین اُتے صُلح کراوݨ آیا ہاں۔ صُلح کراوݨ نئیں بلکہ تلوار چلاوݨ آیا ہاں۔

³⁵ کیوں جو مَیں اِیں کیتے آیا ہاں جو پوتر کُوں پِیُو کنُوں، دِھی کُوں ماء کنُوں، تے نُونہہ کُوں سس کنُوں اَنج کراں۔

³⁶ تے بندے دے دُشمنڑ اُوندے گھر دے لوک ای ہوسن۔

³⁷ جیہڑا کوئی آپنڑے پِیُو یا ماء کُوں مَیں کنُوں زیادہ پیار کریندے او میڈے لائق نئیں، تے جیہڑا کوئی آپنڑے پوتر یا دِھی کُوں مَیں کنُوں زیادہ پیار کریندے او میڈے لائق نئیں۔

³⁸ تے جیہڑا کوئی آپنڑی صلیب چا تے میڈے پِچُھوں نئیں ٹُردا او میڈے لائق نئیں۔

³⁹ جیہڑا کوئی آپنڑی جان بچیندے او اُونکُوں ونجیسی تے جیہڑا میڈی خاطر آپنڑی جان ونجیندے، او اُونکُوں پیسی۔

اجر

⁴⁰ جیہڑا تُہاکُوں قبول کریندے، او میکُوں قبول کریندے، تے جیہڑا میکُوں قبول کریندے او میڈے بھیجنڑ آلے کُوں قبول کریندے۔

⁴¹ جیہڑا نبی کُوں نبی سمجھ تے قبول کریندے اُونکُوں نبی دا اجر مِلسی، تے جیہڑا نیک کُوں نیک سمجھ تے قبول کریندے اُونکُوں نیک بندے دا اجر مِلسی۔

⁴² تے جیہڑا اِنہاں چھوٹیاں ءچوں کہیں کُوں میڈا شاگرد مَن تے ہِک پیالہ ٹھڈا پانڑی ای پِلیسی تاں مَیں تُہاکُوں آدھا ہاں او آپنڑا اجر ہرگز نہ ونجیسی۔“