متّی 1 - کِتاب مُقدّس سرائیکی ترجمہ

یسُوع المسیح دا شجرہ

¹ یسُوع مسیح اِبنِ داؤد اِبنِ ابرہام دا شجرہ۔

² ابرہام تُوں اِضحاق جمیا تے اِضحاق تُوں یعقُوب جمیا تے یعقُوب تُوں یہُوداہ تے اُوندے بِھرا جمے۔

³ تے یہُوداہ تُوں فارص تے زارح تمر تُوں جمے۔ تے فارص تُوں حصرون تے حصرون تُوں رام جمیا۔

⁴ تے رام تُوں عِمّینداب جمیا تے عِمّینداب تُوں نحسون جمیا تے نحسون تُوں سلمون جمیا۔

⁵ تے سلمون تُوں بوعز راحب تُوں جمیا تے بوعز تُوں عوبید رُوت تُوں جمیا۔ تے عوبید تُوں یسّی جمیا۔

⁶ تے یسّی تُوں داؤد بادشاہ جمیا۔ تے داؤد تُوں سُلیمان اُوں عورت تُوں جمیا جیہڑی پہلے اُوریاہ دی ذال ہئی۔

⁷ تے سُلیمان تُوں رحُبعام جمیا تے رحُبعام تُوں ابیاہ جمیا تے ابیاہ تُوں آسا جمیا۔

⁸ تے آسا تُوں یہُوسفط جمیا تے یہُوسفط تُوں یُورام جمیا تے یُورام تُوں عُزیاہ جمیا۔

⁹ تے عُزیاہ تُوں یُوتام جمیا تے یُوتام تُوں آخز جمیا تے آخز تُوں حِزقیاہ جمیا۔

¹⁰ تے حِزقیاہ تُوں منسّی جمیا تے منسّی تُوں امُون جمیا تے امُون تُوں یُوسیاہ جمیا۔

¹¹ تے گرفتار تھی تے بابل ونجنڑ دے زمانے ءچ یُوسیاہ تُوں یکُونیاہ تے اُوندے بِھرا جمے۔

¹² تے گرفتار تھی تے بابل ءچ ونجنڑ تُوں بعد یکُونیاہ تُوں سیالتی ایل جمیا تے سیالتی ایل تُوں زرُبابل جمیا۔

¹³ تے زرُبابل تُوں ابِیہُود جمیا تے ابِیہُود تُوں اِلیاقِیم جمیا تے اِلیاقِیم تُوں عازور جمیا۔

¹⁴ تے عازور تُوں صدُوق جمیا تے صدُوق تُوں اخیم جمیا تے اخیم تُوں الِیہُود جمیا۔

¹⁵ تے الِیہُود تُوں الِیعزر جمیا تے الِیعزر تُوں متّان جمیا تے متّان تُوں یعقُوب جمیا۔

¹⁶ تے یعقُوب تُوں یُوسف جمیا۔ ایہ اُوں مریم دا پایا ہا جِیں تُوں یسُوع جمیا جیہڑا المسیح اکھویندا ہے۔

¹⁷ اِینویں ساریاں پُشتاں ابرہام تُوں داؤد تئیں چوڈھاں پُشتاں تھیّاں تے داؤد تُوں گِھن تے گرفتار تھی تے بابل ونجنڑ تئیں چوڈھاں پُشتاں تے گرفتار تھی تے بابل ونجنڑ تُوں گِھن تے المسیح تئیں چوڈھاں پُشتاں تھیّاں۔

یسُوع المسیح دی پیدائش

¹⁸ یسُوع مسیح دی پیدائش اِینویں تھئی جو جِیں ویلے اُوندی ماء مریم دی منگنڑی یُوسف نال تھی گئی تاں اُنہاں دے کٹھے تھیوݨ تُوں پہلے او رُوح القُدس دی قُدرت نال حاملہ تھی گئی۔

¹⁹ اِیں واسطے اُوندے پئے یُوسف، جیہڑا راستباز ہا تے اُونکُوں بدنام کرݨ نہ چاہندا ہا، اُونکُوں چُپ کر تے چھوڑ ڈیوݨ دا اِرادہ کیتا۔

²⁰ او اِنہاں گالھیں دے بارے ءچ سوچیندا ای پِیا ہا جو رب دے فرشتے اُونکُوں خواب ءچ نظر آ تے آکھیا، ”یُوسف! داؤد دے پوتر، آپنڑی ذال مریم کُوں آپنڑے کولھ گِھن آوݨ تُوں نہ ڈر، کیوں جو جیہڑا اُوندے پیٹ ءچ ہے او رُوح القُدس دی قُدرت نال ہے۔

²¹ اُوندے پوتر جمسی تے تُوں اُوندا ناں یسُوع رکھیں کیوں جو اُوہو آپنڑے لوکاں کُوں اُنہاں دے گُناہاں تُوں نجات ڈیسی۔“

²² ایہ سبھ کُجھ اِیں واسطے تھیّا جو جیہڑا رب العالمین، نبی دی معرفت فرمایا ہا او پُورا تھیوے جو

²³ ”ڈیکھو ہِک کُنواری حاملہ تھیسی تے پوتر جمسی تے اُوندا ناں عِمانُوایل رکھیسن۔“ جِیندا ترجمہ ہے خُدا ساڈے نال۔

²⁴ جِیں ویلے یُوسف نیندر تُوں اُٹھیا تاں اُوں اُونویں ای کیتا جِینویں رب دے فرشتہ اُونکُوں حُکم ڈِتا ہا تے آپنڑی ذال کُوں آپنڑے گھر گِھن آیا۔

²⁵ پر اُوں ویلے تئیں اُوندے کولھ نہ آیا جئیں تئیں اُوندا پوتر نہ جمیا تے اُوندا ناں یسُوع رکھیا۔