لُوقا 5 - کِتاب مُقدّس سرائیکی ترجمہ

یسُوع آپنڑے شاگرداں کُوں سڈیندے

¹ ہِک ڈینہہ یسُوع گنّیسرت دی جھیل دے کنارے اُتے کھڑا ہا تے خُدا دا کلام سُنڑݨ کیتے بِھیڑ اُوندے اُتے ڈھاندی پئی ہئی۔

² تاں اُوں ڈُو کشتیاں جھیل دے کنارے اُتے لگیاں ڈِٹھیاں، پر مچھی پکڑن آلے اُنہاں کُوں اُتھاں چھوڑ تے آپنڑے جال دھوندے پئے ہَن۔

³ یسُوع اُنہاں ڈُو کشتیاں ءچوں ہِک اُتے چڑھ تے جیہڑی شمعون دی ہئی، تے اُونکُوں درخاست کیتی جو ”کنارے کنُوں تھوڑا جِیہا دُور گِھن جُل۔“ وَل او کشتی ءچ بہہ تے لوکاں کُوں تعلیم ڈیوݨ لگا۔

⁴ تعلیم ڈیوݨ تُوں بعد اُوں شمعون کُوں آکھیا، ”کشتی کُوں جِھکے پانڑی ءچ گِھن جُل تے تُساں شکار کیتے آپنڑے جال سٹو۔“

⁵ شمعون جواب ءچ آکھیا، ”اُستاد! اساں ساری رات محنت کیتی ہے پر کُجھ ہتھ نئیں آیا۔ وَل وی تُہاڈے آکھنڑ اُتے جال سٹیندا ہاں۔“

⁶ جِیں ویلے اُنہاں جال سٹے تاں اِتی ساریاں مچھیاں پکڑ گِھدیاں جو اُنہاں دے جال پڑیجنڑ لگے۔

⁷ اِیں واسطے اُنہاں ڈُوجھی کشتی آلے ساتھیاں کُوں اِشارہ کیتا جو ”آؤ ساڈی مدد کرو۔“ بس اُنہاں آ تے ڈوہائیں کشتیاں مچھیاں نال اِتُھوں تئیں بھر ڈِتیاں جو بُڈݨ لگ گئیاں۔

⁸ شمعون پطرس ایہ ڈیکھ تے یسُوع دے پیراں اُتے ڈھٹھا تے آکھیا، ”مالک! میڈے کولُھوں چلے ونجو کیوں جو مَیں گُنہگار بندہ ہاں۔“

⁹ کیوں جو مچھیاں دے اِیں شکار دی وجہ کنُوں شمعون تے اُوندے دوست بہُوں حیران تھئے۔

¹⁰ تے اِیہو حال زبدی دے پوتراں یعقُوب تے یُوحنّا دا ہا جیہڑے شمعون دے ساتھی ہَن۔ یسُوع شمعون کُوں آکھیا، ”ڈر نہ۔ ہُنڑ کنُوں تُوں خُدا کیتے بندیاں کُوں پکڑیسیں۔“

¹¹ او کشتیاں کُوں کنارے اُتے گِھن آئے تے سبھ کُجھ چھوڑ تے اُوندے پِچُھوں ٹُر پئے۔

یسُوع ہِک بندے کُوں شِفا ڈیندے

¹² جِیں ویلے یسُوع ہِک شہر ءچ ہا تاں ڈیکھو ہِک بندہ جیندے سارے جِسم اُتے کوڑھ ہا، اُونکُوں ڈیکھ تے مُنہ بھرنے ڈھے تے اُوندی مِنت کرݨ لگا جو ”مالک! جے تُساں چاہو تاں میکُوں پاک صاف کر سگدے ہیوے۔“

¹³ یسُوع آپنڑا ہتھ ودھایا تے اُوندے اُتے رکھ تے آکھیا، ”مَیں چاہندا ہاں۔ پاک صاف تھی وَنج۔“ تے فوراً اُوندا کوڑھ ٹھیک تھی گِیا۔

¹⁴ وَل اُوں اُونکُوں تاکید کیتی جو ”کہیں کُوں نہ ڈساویں بلکہ وَنج تے آپنڑے آپ کُوں کاہِن کُوں ڈِکھا تے جیہڑا نذرانہ مُوسیٰ مقرر کیتے او آپنڑی پاکیزگی کیتے پیش کر، تاں جو اُنہاں کیتے گواہی ہووے۔“

¹⁵ پر یسُوع دے بارے ءچ خبر مزید کِھنڈ گئی تے بہُوں سارے لوک جمع تھی گئے تاں جو اُوندی سُنڑݨ تے آپنڑیاں بیماریاں کنُوں شِفا پاوݨ۔

¹⁶ پر او اکثر بیابان ءچ الگ وَنج تے دُعا کریندا ہا۔

یسُوع ہِک مفلُوج کُوں شِفا ڈیندے

¹⁷ ہِک ڈینہہ یسُوع تعلیم ڈیندا پِیا ہا تے کُجھ فریسی تے شریعت دے عالم جیہڑے گلیل تے یہُودیہ دی ہر وستی تے یروشلیم کنُوں آئے ہَن، اُتھاں بیٹھے ہَن۔ تے خُداوند دی قُدرت شِفا ڈیوݨ کیتے یسُوع دے نال ہئی۔

¹⁸ اُوں ویلے کئی لوک ہِک فالج دے مریض کُوں کَھٹ اُتے گِھن آئے تے کوشش کیتی جو اُونکُوں گھر دے اندر اُوندے سامنڑے رکھنڑ۔

¹⁹ جِیں ویلے بِھیڑ دی وجہ کنُوں اُونکُوں اندر گِھن تے وَنج نہ سگے تاں چھت اُتے چڑھ گئے تے کھپریل ہٹا تے فالج دے مریض کُوں کَھٹ سمیت لوکاں دے اَدھ ءچ یسُوع دے سامنڑے لہا ڈِتا۔

²⁰ اُوں اُنہاں دا اِیمان ڈیکھ تے آکھیا، ”جوان! تیڈے گُناہ معاف تھئے۔“

²¹ اِیں تُوں شریعت دے عالم تے فریسی سوچنڑ لگے ”ایہ بندہ کوݨ ہے جیہڑا کُفر بَکدے؟ خُدا دے سِوا کوݨ گُناہ معاف کر سگدے؟“

²² یسُوع اُنہاں دے خیال جاݨ گِھدے تے اُنہاں کُوں آکھیا، ”تُساں آپنڑے دِلاں ءچ اِینویں کیوں سوچیندے ہیوے؟

²³ کیا ایہ آکھنڑ اسان ہے جو ’تیڈے گُناہ معاف تھئے،‘ یا ایہ آکھنڑ جو ’اُٹھی تے ٹُر پِھر؟‘

²⁴ پر مَیں چاہندا ہاں جو تُہاکُوں پتہ لگے جو اِبنِ آدم کُوں زمین اُتے گُناہ معاف کرݨ دا اِختیار ہے۔“ وَل اُوں فالج دے مریض کُوں آکھیا، ”مَیں تیکُوں آدھا ہاں، اُٹھی تے آپنڑی کَھٹ چا تے گھر لگا وَنج۔“

²⁵ تے او اُونہی ویلے اُنہاں دے سامنڑے کھڑا تھی گِیا تے جیہڑی کَھٹ اُتے پِیا ہا اُونکُوں چا تے خُدا دی حمد کریندا ہویا آپنڑے گھر چلیا گِیا۔

²⁶ او سبھ حیران تھی گئے تے خُدا دی حمد کرݨ لگے۔ تے او بہُوں ڈر گئے تے آکھنڑ لگے جو اَج اساں عجیب گالھیں ڈِٹھیاں ہِن۔

یسُوع لاوی کُوں سڈیندے

²⁷ اِنہاں گالھیں دے بعد یسُوع باہر گِیا تے ہِک محصُول گِھننڑ آلے کُوں جِیندا ناں لاوی ہا، محصُول دی چوکی اُتے بیٹھے ڈِٹھا تے اُونکُوں آکھیا، ”میڈے پِچُھوں تھی پو۔“

²⁸ او کھڑا تھیّا تے سبھ کُجھ چھوڑ تے اُوندے پِچُھوں تھی پِیا۔

²⁹ وَل لاوی آپنڑے گھر ءچ اُوندی وڈی دعوت کیتی تے اُتھاں محصُول گِھننڑ آلے تے ڈُوجھے لوکاں دی، جیہڑے دعوت ءچ شریک ہَن، وڈی بِھیڑ ہئی۔

³⁰ فریسی تے اُنہاں دے شریعت دے عالم یسُوع دے شاگرداں کُوں شکایت کر تے ایہ آکھنڑ لگے جو ”تُساں محصُول گِھننڑ آلیاں تے گُنہگاراں دے نال کیوں کھاندے پِیندے ہیوے؟“

³¹ یسُوع جواب ءچ اُنہاں کُوں آکھیا جو ”تندرُستاں کُوں حکیم دی لوڑ نئیں بلکہ بیماراں کُوں۔

³² مَیں راستبازاں کُوں نئیں بلکہ گُنہگاراں کُوں توبہ کیتے سڈݨ آیا ہاں۔“

روزہ دے بارے ءچ سوال

³³ وَل اُنہاں اُونکُوں آکھیا ”یُوحنّا دے شاگرد تاں اکثر روزہ رکھیندے تے دُعا منگدے ہِن تے اِینویں ای فریسیاں دے وی، پر تُہاڈے شاگرد تاں کھاندے پِیندے ہِن۔“

³⁴ یسُوع اُنہاں کُوں آکھیا، ”کیا تُساں گھوٹ دی موجودگی ءچ براتیاں کنُوں روزہ رکھوا سگدے ہیوے؟

³⁵ پر او ڈینہہ آسن جڈاں گھوٹ اُنہاں تُوں جُدا کیتا ویسی، وَل اُنہاں ڈینہاں ءچ او روزہ رکھیسن۔“

³⁶ تے اُوں ہِک مثال وی اُنہاں کُوں سُنڑائی جو ”نویں کپڑے کُوں پھاڑ تے اُوندی ٹاکی پُرانڑے کپڑے اُتے کوئی نئیں لیندا۔ نہ تاں نواں کپڑا وی پھٹ ویسی تے نویں کپڑے دی ٹاکی پُرانڑے کپڑے نال نہ رَلسی۔

³⁷ تے انگُور دے تازہ رَس کُوں پُرانڑیاں مشکاں ءچ کوئی نئیں بھریندا نہ تاں مشکاں تازہ رَس پکنڑ نال پھٹ ویسن، تے رَس تے مشکاں ڈوہائیں برباد تھی ویسن۔

³⁸ بلکہ تازہ رَس کُوں نوِیاں مشکاں ءچ بھرنڑا چاہیدے۔

³⁹ تے کوئی بندہ پُرانڑا رَس پی تے نویں دی خواہش نئیں کریندا کیوں جو او آدھا ہے جو ’پُرانڑی ای چنگی ہے‘۔“