لُوقا 3 - کِتاب مُقدّس سرائیکی ترجمہ

یُوحنّا بپتسمہ ڈیوݨ آلے دی تبلیغ

¹ رومی بادشاہ تِبرِیُس قیصر دی حکُومت دے پندھرویں سال جِیں ویلے پنطیُس پِیلاطُس یہُودیہ دا گورنر ہا، تے ہیرودیس گلیل دا تے اُوندا بِھرا فِلپُس اِتُوریہ تے ترخونیتِس دا تے لِسانیاس اَبِلینے دا حاکم ہا،

² تے حنّا تے کائفا کاہِن ِ اعظم ہَن، اُوں ویلے خُدا دا کلام بیابان ءچ یُوحنّا بِن زکریاہ اُتے نازل تھیّا۔

³ او یردن دے آسُوں پاسُوں وَنج تے تبلیغ کرݨ لگا جو گُناہاں دی معافی کیتے توبہ کر تے بپتسمہ گِھنو۔

⁴ جِینویں یسعیاہ نبی دی کتاب ءچ لِکھیا ہے جو ”بیابان ءچ ہکل ڈیوݨ آلے دی اواز آندی ہے جو رب دی راہ تیار کرو تے اُوندے رستے سِدھے بنڑاؤ۔

⁵ ہر وادی بھر ڈِتی ویسی ہر پہاڑ تے ٹِبہ پدھرا کر ڈِتا ویسی جیہڑا ڈِنگا ہے او سِدھا بنڑ ویسی تے جیہڑا اُچا جِھکا ہے ہموار رستہ بنڑ ویسی۔

⁶ تے سارے لوک خُدا دی نجات ڈیکھسن۔“

⁷ بس جیہڑے لوک یُوحنّا تُوں بپتسمہ گِھننڑ کیتے آندے ہَن او اُنہاں کُوں آدھا ہا، ”نانگ دے بالو! تُہاکُوں کئیں چتا ڈِتے جو آوݨ آلے قہر کنُوں بھجو؟

⁸ بس ایجھے کم کرو جو نظر آوے جو تُساں توبہ کیتی ہے تے آپنڑی اِیں بُھل ءچ نہ راہو جو ’ابرہام ساڈا پِیُو ہے۔‘کیوں جو مَیں تُہاکُوں آدھا ہاں جو خُدا اِنہاں پتھراں کنُوں ابرہام کیتے اولاد پیدا کر سگدے۔

⁹ ہُنڑ تاں درختاں دی جڑھ اُتے کُہاڑا رکھ ڈِتا گئے۔ بس جیہڑا درخت چنگا پھل نئیں ڈیندا او کپیا تے بھاہ ءچ سٹیا ویندے۔“

¹⁰ لوکاں اُوں کنُوں پُچھیا، ”وَل اساں کیا کرُوں؟“

¹¹ اُوں جواب ءچ آکھیا، ”جیندے کولھ ڈُو چولے ہووݨ، او ہِک اُونکُوں ڈیوے جیندے کولھ ہِک وی کائنی، تے جیندے کولھ کھانڑا ہووے او وی اِینویں ای کرے۔“

¹² تے محصُول گِھننڑ آلے وی بپتسمہ گِھننڑ آئے تے اُوں کنُوں پُچھنڑ لگے جو ”اُستاد! اساں کیا کرُوں؟“

¹³ اُوں اُنہاں کُوں آکھیا، ”جیہڑا تُہاڈے کیتے مقرر ہے اُوں کنُوں زیادہ نہ گِھنو۔“

¹⁴ سپاہیاں وی اُوں کنُوں پُچھیا جو ”اساں کیا کرُوں؟“ اُوں اُنہاں کُوں آکھیا، ”کہیں اُتے ظلم نہ کرو تے نہ کہیں تُوں ناحق کُجھ گِھنو تے آپنڑی تنخواہ ءچ گُزارہ کرو۔“

¹⁵ جِیں ویلے لوک مسیح دی آمد دے اِنتظار ءچ ہَن تے سارے آپنڑے آپنڑے دل ءچ یُوحنّا دے بارے سوچیندے پئے ہَن جو شاید او المسیح ہے یا نئیں،

¹⁶ تاں یُوحنّا سبھ کُوں جواب ءچ آکھیا، ”مَیں تاں تُہاکُوں پانڑی نال بپتسمہ ڈیندا ہاں، پر جیہڑا مَیں کنُوں زور آور ہے، او آوݨ آلا ہے۔ مَیں اُوندی جُتی دا تسمہ کھولنڑ دے لائق نئیں۔ او تُہاکُوں رُوح القُدس تے بھاہ نال بپتسمہ ڈیسی۔

¹⁷ اُوندا چھج اُوندے ہتھ ءچ ہے تے او آپنڑے دانڑیاں کُوں بُھوں تُوں اَنج کریسی۔ وَل او دانڑیاں کُوں تاں آپنڑے پَلیاں ءچ کٹھا کریسی پر بُھوں کُوں اُوں بھاہ ءچ سَٹ ڈیسی جیہڑی وِسمنڑ آلی نئیں۔“

¹⁸ بس یُوحنّا اُنہاں کُوں نصیحت ءچ بہُوں سارے گالھیں ڈسیندا تے خوشخبری سُنڑیندا ریہا۔

¹⁹ پر اِیندے بعد یُوحنّا چوتھائی مُلک دے حاکم ہیرودیس کُوں ملامت کیتی، کیوں جو ہیرودیس آپنڑے بِھرا فِلپُس دی ذال ہیرودیاس نال شادی کیتی ہئی، تے اِیندے علاوہ بہُوں بئے بُرائیاں وی کیتیاں ہَن۔

²⁰ اِیندے اُتے ہیرودیس اِنہاں سبھ کنُوں ودھ تے ایہ وی کیتا جو یُوحنّا کُوں قید ءچ سَٹ ڈِتا۔

یسُوع دا بپتسمہ

²¹ جِیں ویلے سبھ لوکاں بپتسمہ گِھن گِھدا تاں یسُوع وی بپتسمہ گِھدا۔ جِیں ویلے او دُعا کریندا پِیا ہا تاں اسمان کُھل گِیا،

²² تے رُوح القُدس جِسمانی صورت ءچ کبوتر وانگُوں اُوندے اُتے نازل تھیّا تے اسمان کنُوں اواز آئی جو ”تُوں میڈا پیارا پوتر ہیں، تَیں کنُوں مَیں بہُوں خوش ہاں۔“

یسُوع دے آباو اجداد

²³ جِیں ویلے یسُوع خدمت شروع کیتی، او تقریباً ترِیح سال دا ہا۔ جِینویں سمجھیا ویندا ہا او یُوسف دا پوتر ہا۔ یُوسف عیلی دا پوتر ہا،

²⁴ تے او متّات دا تے او لاوی دا تے او ملکی دا تے او ینّا دا تے او یُوسف دا،

²⁵ تے او متِّتیاہ دا تے او عامُوس دا تے او ناحُوم دا تے او اسلیاہ دا تے او نوگہ دا،

²⁶ تے او ماعَت دا تے او متِّتیاہ دا تے او شمِعی دا تے او یوسیخ دا تے او یوداہ دا،

²⁷ تے او یُوحنّا دا تے او ریسا دا تے او زرُبابل دا تے او سیالتی ایل دا تے او نیری دا،

²⁸ تے او ملکی دا تے او اَدّی دا تے او قوسام دا تے او اِلمودام دا تے او عیر دا،

²⁹ تے او یشُوع دا تے او الِیعزر دا تے او یورِیم دا تے او متّات دا تے او لاوی دا،

³⁰ تے او شمعون دا تے او یہُوداہ دا تے او یُوسف دا تے او یُونان دا تے او اِلیاقِیم دا،

³¹ تے او ملےآہ دا تے او مِنّاہ دا تے او متّتاہ دا تے او ناتن دا تے او داؤد دا،

³² تے او یسّی دا تے او عوبید دا تے او بوعز دا تے او سلمون دا تے او نحسون دا،

³³ تے او عِمّینداب دا تے او ارنی دا تے او حصرون دا تے او فارص دا تے او یہُوداہ دا،

³⁴ تے او یعقُوب دا تے او اِضحاق دا تے او ابرہام دا تے او تارہ دا تے او نحُور دا،

³⁵ تے او سروج دا تے او رعُو دا تے او فلج دا تے او عِبر دا تے او سِلح دا،

³⁶ تے او قینان دا تے او ارفکسد دا تے او سم دا تے او نُوح دا تے او لمک دا،

³⁷ تے او متوسِلح دا تے او حنُوک دا تے او یارِد دا تے او مہلل ایل دا تے او قِینان دا،

³⁸ تے او انُوس دا تے او سیت دا تے او آدم دا تے او خُدا دا ہا۔