لُوقا 23 - کِتاب مُقدّس سرائیکی ترجمہ

یسُوع دی پِیلاطُس دے سامنڑے پیشی

¹ وَل اُنہاں دی ساری جماعت اُٹھی تے اُونکُوں پِیلاطُس دے کولھ گِھن گئی۔

² تے اُنہاں اُوندے اُتے اِلزام لاوݨ شروع کیتا جو ”اساں اِیں بندے کُوں آپنڑی قوم کُوں ورغلیندے تے رومی بادشاہ قیصر کُوں ٹیکس ڈیوݨ کنُوں منع کریندے تے آپنڑے آپ کُوں المسیح بادشاہ آدھے ڈِٹھے۔“

³ پِیلاطُس اُوں کنُوں پُچھیا، ”کیا تُوں یہُودیاں دا بادشاہ ہیں؟“ یسُوع جواب ءچ اُونکُوں آکھیا، ”تُوں خود آدھیں۔“

⁴ پِیلاطُس سردار کاہِناں تے عوام کُوں آکھیا، ”مَیں اِیں بندے ءچ کوئی قصُور نئیں ڈیدھا۔“

⁵ پر او ضد کر تے آکھنڑ لگے جو ”او تمام یہُودیہ ءچ بلکہ گلیل تُوں گِھن تے اِتھاں تئیں لوکاں کُوں سِکھا سِکھا تے ورغلیندے۔“

یسُوع کُوں ہیرودیس دے کولھ بھیجیا ویندے

⁶ پِیلاطُس ایہ سُنڑیا تاں پُچھیا، ”کیا ایہ بندہ گلیلی ہے؟“

⁷ تے جِینویں ای اُونکُوں معلوم تھیّا جو او ہیرودیس دے علاقہ دا ہے تاں اُونکُوں ہیرودیس دے کولھ بھیجیا کیوں جو او اُنہاں ڈینہاں ءچ خود وی یروشلیم ءچ ہا۔

⁸ جِیں ویلے ہیرودیس یسُوع کُوں ڈِٹھا تاں بہُوں خوش تھیّا کیوں جو اُونکُوں بہُوں عرصے کنُوں یسُوع کُوں ڈیکھنڑ دی خواہش ہئی، اِیں واسطے جو اُوں اُوندے بارے ءچ بہُوں گالھیں سُنڑیاں ہَن۔ تے اُونکُوں اُمید ہئی جو اُوں کنُوں کوئی معجزہ تھیندا ڈیکھ سگسی۔

⁹ او بہُوں سارے سوال اُوں کنُوں پُچھدا ریہا، پر یسُوع اُونکُوں کوئی جواب نہ ڈِتا۔

¹⁰ سردار کاہِن تے شریعت دے عالم اُتھاں کھڑے تھی تے بہُوں زور شور نال اُوندے اُتے اِلزام لیندے ریہے۔

¹¹ وَل ہیرودیس آپنڑے سپاہیاں دے نال رَل تے اُونکُوں ذلیل کیتا تے اُوندا مذاق اُڈایا، تے ہِک چمکنڑاں چوغہ پوا تے اُونکُوں پِیلاطُس دے کولھ واپس بھیج ڈِتا۔

¹² اُونہی ڈینہہ پِیلاطُس تے ہیرودیس ہِک ڈُوجھے دے دوست بنڑ گئے کیوں جو پہلے اُنہاں دی دُشمنڑی ہئی۔

یسُوع کُوں سزائے موت سُنڑائی ویندی ہے

¹³ وَل پِیلاطُس، سردار کاہِناں، سرداراں تے عوام کُوں جمع کر تے

¹⁴ اُنہاں کُوں آکھیا جو ”تُساں اِیں بندے کُوں ایہ آکھ تے گِھن آئے ہیوے جو ایہ لوکاں کُوں ورغلیندے۔ تے ڈیکھو مَیں خود وی تُہاڈے سامنڑے تفتیش کیتی ہے پر جیہڑے جُرم دا اِلزام تُساں اُوندے اُتے لیندے ہیوے، مَیں اُوندے ءچ ایجھی کوئی گالھ نئیں ڈیدھا۔

¹⁵ تے نہ ہیرودیس، کیوں جو اُوں اُونکُوں ساڈے کولھ واپس بھیج ڈِتے۔ ڈیکھو اُوں کنُوں کوئی ایجھا کم نئیں تھیّا جیندی وجہ تُوں اُونکُوں قتل دی سزا ڈِتی ونجے۔

¹⁶ بس مَیں اُونکُوں کُٹوا تے چھوڑ ڈیندا ہاں۔“

¹⁷ اُوندے کیتے لازم ہا جو ہر عید اُتے مُجرماں ءچوں کہیں ہِک کُوں لوکاں دی خاطر چھوڑ ڈیوے۔

¹⁸ او سارے رَل تے چیخنڑ لگے جو ”اِیں بندے کُوں گِھن وَنج، تے برابّا کُوں ساڈے کیتے چھوڑ ڈے۔“

¹⁹ برابّا شہر ءچ بغاوت تے قتل کرݨ دی وجہ تُوں قید ہا۔

²⁰ پر پِیلاطُس یسُوع کُوں چھوڑ ڈیوݨ دے اِرادہ نال، اُنہاں نال وَل گالھ کیتی۔

²¹ پر او چیخدے ریہے جو ”اُونکُوں مصلُوب کر، مصلُوب کر!“

²² اُوں تریجھی پھیری اُنہاں کنُوں پُچھیا، ”کیوں؟ آخر اُوں کیہڑی بُرائی کیتی ہے؟ مَیں اُوندے ءچ قتل دی کوئی وجہ نئیں پاتی۔ بس مَیں اُونکُوں کُٹوا تے چھوڑ ڈیندا ہاں۔“

²³ پر او چیخ چیخ تے مطالبہ کرݨ لگے جو اُونکُوں صلیب اُتے چڑھایا ونجے تے اُنہاں دے چیخنڑ نال اُنہاں دی سُنڑی گئی۔

²⁴ بس پِیلاطُس اُنہاں دی مرضی دے مطابق فیصلہ کیتا،

²⁵ تے جیہڑا بندہ بغاوت تے خون دے جُرم ءچ قید ہا تے جیندی رہائی کیتے اُنہاں درخاست کیتی ہئی اُونکُوں چھوڑ ڈِتا، پر یسُوع کُوں اُنہاں دی مرضی دے مطابق سپاہیاں دے حوالے کر ڈِتا۔

یسُوع کُوں مصلُوب کیتا ویندے

²⁶ جِیں ویلے اُونکُوں گِھدی ویندے ہَن تاں اُنہاں شمعون ناں دے ہِک کُرینی بندے کُوں جیہڑا دیہات تُوں آندا پِیا ہا، پکڑ گِھدا تے صلیب اُوندے اُتے رکھ ڈِتی تاں جو او اُونکُوں چا تے یسُوع دے پِچُھوں پِچُھوں ٹُرے۔

²⁷ لوکاں دی ہِک بِھیڑ تے بہُوں ساریاں عورتاں جیہڑیاں اُوندے کیتے وینڑ تے ماتم کریندیاں ہَن، اُوندے پِچُھوں ٹُریاں۔

²⁸ یسُوع مُڑ تے اُنہاں کُوں آکھیا، ”یروشلیم دی دِھیو! میڈے کیتے نہ رووو، بلکہ آپنڑے تے آپنڑے بالاں کیتے رووو۔

²⁹ کیوں جو او ڈینہہ آوݨ آلے ہِن جِیں ویلے تُساں ایہ اکھیسو جو او بانجھ عورتاں مُبارک ہِن جِنہاں دے رِحم خالی ریہے تے او چھاتیاں جِنہاں کھیر نئیں پِلایا۔

³⁰ وَل او پہاڑاں کُوں اکھیسن جو ’ساڈے اُتے ڈھے پوو‘ تے ٹِبیاں کُوں جو ’ساکُوں لُکا گِھنو۔‘

³¹ جے او ساوے درخت نال ایہ سبھ کُجھ کریندے ہِن تاں سُکے درخت نال کیا کُجھ نہ کریسن؟“

³² تے ڈُو مُجرم بئے وی ہَن جِنہاں کُوں اُوندے نال گِھدی ویندے ہَن تاں جو او وی قتل کیتے ونجنڑ۔

³³ جِیں ویلے او اُوں جاہ اُتے پُجے جِینکُوں کھوپڑی آدھے ہِن تاں اُنہاں اُتھاں اُونکُوں صلیب چڑھا ڈِتا تے اُنہاں ڈُو مُجرماں کُوں وی، ہِک کُوں سجے پاسُوں تے ڈُوجھے کُوں کھبے پاسُوں۔

³⁴ یسُوع آکھیا، ”باپ! اِنہاں کُوں معاف کر کیوں جو ایہ نئیں جانڑدے جو کیا کریندے ہِن۔“ تے اُنہاں پرچی پا تے اُوندے کپڑے آپس ءچ وَنڈ گِھدے۔

³⁵ لوک کھڑے ڈیدھے پئے ہَن تے سردار وی ٹھٹّھے مار مار تے آدھے ہَن جو ”اِیں بئیاں کُوں بچایا۔ جے ایہ خُدا دا المسیح تے اُوندا چُنڑیا ہویا ہے، تاں آپنڑے آپ کُوں وی بچاوے۔“

³⁶ سپاہیاں وی اُوندا مذاق اُڈایا۔ اُوں پِیوݨ کیتے اُونکُوں سِرکہ پیش کیتا تے آکھیا جو

³⁷ ”جے تُوں یہُودیاں دا بادشاہ ہیں تاں آپنڑے آپ کُوں بچا۔“

³⁸ یسُوع دے سر اُتوں ہِک تختی وی لائی گئی جیندے اُتے لِکھیا ہا جو ”ایہ یہُودیاں دا بادشاہ ہے۔“

³⁹ وَل جیہڑے مُجرم صلیب اُتے چڑھائے گئے ہَن، اُنہاں ءچوں ہِک اُونکُوں طعنہ ڈے تے آکھیا، ”کیا تُوں المسیح نئیں؟ تُوں آپنڑے آپ کُوں تے ساکُوں بچا۔“

⁴⁰ پر ڈُوجھے اُونکُوں جِھڑک تے آکھیا، ”کیا تیکُوں خُدا دا ڈر نئیں جڈاں جو تیکُوں وی اُوہو سزا مِلی ہے؟

⁴¹ ساڈی سزا تاں جائز ہے کیوں جو اساں آپنڑے کماں دا بدلہ پیندے پئے ہیں پر اِیں کوئی ایجھا کم نئیں کیتا۔“

⁴² وَل اُوں آکھیا، ”یسُوع! جِیں ویلے تُساں آپنڑی بادشاہی ءچ آؤ تاں میکُوں یاد کرائے۔“

⁴³ یسُوع اُونکُوں آکھیا، ”مَیں تیکُوں سچ آدھا ہاں جو تُوں اَج ای میڈے نال فِردوس ءچ ہوسیں۔“

یسُوع دی موت

⁴⁴ وَل ڈوپہر کنُوں تریجھے پہر تئیں پُورے مُلک ءچ اندھارا چھایا ریہا،

⁴⁵ کیوں جو سورج اندھا تھی گِیا ہا۔ تے ہیکل دا پڑدہ پھٹ تے ڈُو ٹوٹے تھی گِیا۔

⁴⁶ وَل یسُوع وڈی اواز نال پُکار تے آکھیا، ”باپ! مَیں آپنڑی رُوح تیڈے ہتھاں ءچ ڈیندا ہاں۔“ تے ایہ آکھ تے دم ڈے ڈِتا۔

⁴⁷ جِیں ویلے صوبہ دار ایہ حال ڈِٹھا تاں خُدا دی تعریف کریندے ہوئے آکھیا، ”بے شک ایہ بندہ راستباز ہا۔“

⁴⁸ تے سبھ لوک جیہڑے اُتھاں جمع ہَن ایہ سبھ ڈیکھ تے چھاتی پِٹدے ہوئے پِچُھوں وَل گئے۔

⁴⁹ تے یسُوع دے سبھ جاݨ پچھاݨ آلے تے او عورتاں جیہڑیاں گلیل کنُوں اُوندے نال آئیاں ہَن، پرے کنُوں ایہ سبھ ڈیدھیاں پئیاں ہَن۔

یسُوع دی تدفین

⁵⁰ اُتھاں یُوسف ناں دا ہِک نیک تے راستباز بندہ ہا جیہڑا صدر عدالت دا ممبر ہا،

⁵¹ پر اُنہاں دی صلاح تے فیصلہ اُتے راضی نہ ہا۔ ایہ یہُودیاں دے شہر ارِمَتِیاہ دا راہنڑ آلا ہا تے خُدا دی بادشاہی دے اِنتظار ءچ ہا۔

⁵² اُوں پِیلاطُس دے کولھ وَنج تے یسُوع دی لاش منگی،

⁵³ تے اُونکُوں لہا تے مہین چادر ءچ ولھیٹیا تے اُونکُوں ہِک قبر ءچ جیہڑی چٹان ءچ کھودی گئی ہئی، رکھ ڈِتا۔ اُوں قبر ءچ پہلے کوئی نہ رکھیا گِیا ہا۔

⁵⁴ او تیاری دا ڈینہہ ہا تے سبت دا ڈینہہ شروع تھیوݨ آلا ہا۔

⁵⁵ او عورتاں جیہڑیاں گلیل کنُوں اُوندے نال آئیاں ہَن، یُوسف دے پِچُھوں پِچُھوں گئیاں تے اُنہاں اُوں قبر کُوں ڈِٹھا تے ایہ وی جو اُوندی لاش کُوں کِینویں رکھیا گِیا ہے۔

⁵⁶ وَل اُنہاں واپس وَنج تے خوشبودار مصالحے تے عِطر تیار کیتا پر سبت دے ڈینہہ اُنہاں حُکم دے مطابق آرام کیتا۔