لُوقا 2 - کِتاب مُقدّس سرائیکی ترجمہ

یسُوع دی پیدائش

¹ اُنہاں ڈینہاں ءچ اِینویں تھیّا جو رومی بادشاہ قیصر اَوگُوستُس دی طرفوں ایہ حُکم جاری تھیّا جو رومی سلطنت دے سارے لوکاں دے ناں لِکھے ونجنڑ۔

² ایہ پہلی مردم شماری سُوریہ دے گورنر کورنِیُس دے دور ءچ تھئی۔

³ تے سبھ لوک ناں لِکھواوݨ کیتے آپنڑے آپنڑے شہر کُوں گئے۔

⁴ اِیں واسطے یُوسف وی گلیل دے شہر ناصرت تُوں یہُودیہ ءچ داؤد دے شہر بیت لحم کُوں گِیا، کیوں جو او داؤد دے گھرانڑے تے اولاد ءچوں ہا۔

⁵ تاں جو آپنڑی منگیتر مریم نال جیہڑی حاملہ ہئی، ناں لِکھواوے۔

⁶ جِیں ویلے او اُتھاں ہَن تاں مریم دے بال جمنڑ دا وقت آ گِیا،

⁷ تے اُوندا پلوٹھا پوتر جمیا۔ اُوں اُونکُوں کپڑے ءچ ولھیٹ تے کُھرلی ءچ رکھ ڈِتا کیوں جو اُنہاں کیتے سراں ءچ جاہ نہ ہئی۔

آجڑی تے فرشتے

⁸ اُوں علاقے ءچ کُجھ آجڑی ہَن جیہڑے رات کُوں میدان ءچ رہ تے آپنڑے اِجڑ دی رکھوالی کریندے پئے ہَن۔

⁹ رب دا ہِک فرشتہ اُنہاں اُتے ظاہر تھیّا تے رب دا جلال اُنہاں دے چودھارُوں چمکیا تے او بہُوں ڈر گئے۔

¹⁰ پر فرشتے اُنہاں کُوں آکھیا، ”ڈرو نہ، کیوں جو ڈیکھو مَیں تُہاکُوں وڈی خوشی دی بشارت ڈیندا ہاں جیہڑی ساری اُمت کیتے ہوسی۔

¹¹ اَج داؤد دے شہر ءچ تُہاڈے کیتے ہِک نجات ڈیوݨ آلا پیدا تھئے یعنی المسیح جیہڑا خُداوند ہے۔

¹² تے اُوندا تُہاڈے کیتے ایہ نشان ہے جو تُساں ہِک بال کُوں کپڑے ءچ ولھیٹیا تے کُھرلی ءچ پِیا ہویا پے سو۔“

¹³ یک دم فرشتیاں دا ہِک گروہ اُوں فرشتہ نال خُدا دی تعریف کریندا تے ایہ آدھا ظاہر تھیّا جو

¹⁴ ”سبھ تُوں اُچے اسمان اُتے خُدا دی تمجید ہووے تے زمین اُتے اُنہاں آدمیاں نال صُلح جِنہاں تُوں او خوش ہے۔“

¹⁵ جِیں ویلے فرشتے اُنہاں کولُھوں اسمان اُتے چلے گئے تاں آجڑیاں آپس ءچ آکھیا، ”آؤ بیت لحم تئیں جُلوں تے ایہ گالھ جیہڑی تھئی ہے تے جیندی خُداوند ساکُوں خبر ڈِتی ہے، ڈیکھوں۔“

¹⁶ بس اُنہاں جلدی نال وَنج تے مریم تے یُوسف کُوں گولھ گِھدا تے اُوں بال کُوں کُھرلی ءچ پِیا ہویا ڈِٹھا۔

¹⁷ اُنہاں کُوں ڈیکھ تے او گالھ جیہڑی اُوں بال دے بارے ءچ آکھی گئی ہئی، مشہور کیتی۔

¹⁸ آجڑیاں دے گالھیں سُنڑ تے سارے لوک حیران تھئے۔

¹⁹ پر مریم اِنہاں سارے گالھیں کُوں آپنڑے دل ءچ رکھ تے غور کریندی ریہی۔

²⁰ آجڑیاں کُوں جِینویں ڈسایا گِیا ہا، او اُونویں ای سبھ کُجھ ڈیکھ تے، تے سُنڑ تے خُدا دی تعریف کریندے ہوئے واپس وَل گئے۔

یسُوع دا ناں رکھیا ویندے

²¹ جِیں ویلے اَٹھ ڈینہہ پُورے تھئے تے بال دے ختنہ کراوݨ دا وقت آیا تاں اُوندا ناں یسُوع رکھیا گِیا جیہڑا فرشتے مریم کُوں حاملہ تھیوݨ کنُوں پہلے ڈسیا ہا۔

یسُوع کُوں ہیکل ءچ پیش کیتا ویندے

²² وَل جِیں ویلے مُوسیٰ دی شریعت دے مطابق اُنہاں دے پاک تھیوݨ دے ڈینہہ پُورے تھی گئے تاں یُوسف تے مریم بال کُوں یروشلیم گِھن آئے تاں جو اُونکُوں خُداوند دے حضُور پیش کرݨ،

²³ جِینویں خُداوند دی شریعت ءچ لِکھیا ہے جو ”ہر ہِک پلوٹھا رب کیتے مخصوص کیتا ویسی،“

²⁴ تے خُداوند دی شریعت دے اِیں قول دے مطابق قُربانی کرݨ جو ”گُھگیاں دا ہِک جوڑا یا کبوتر دے ڈُو بچّے گِھن آؤ۔“

²⁵ یروشلیم ءچ ہِک بندہ ہا جِیندا ناں شمعون ہا۔ او نیک تے خُدا ترس تے اِسرائیل دی نجات دا اِنتظار کریندا پِیا ہا تے رُوح القُدس اُوندے اُتے ہا۔

²⁶ رُوح القُدس اُونکُوں ڈسا ڈِتا ہا جو تُوں نہ مرسیں جئیں تئیں تُوں خُداوند دے المسیح کُوں ڈیکھ نہ گِھنیں۔

²⁷ او رُوح القُدس دی ہدایت نال ہیکل ءچ آیا، تے جیہڑے ویلے ماء پِیُو اُوں بال یسُوع کُوں اندر گِھن آئے تاں جو اُوندے کیتے شریعت دے فرائض ادا کرݨ،

²⁸ تاں شمعون بال کُوں آپنڑی جھولی ءچ گِھن گِھدا تے خُدا دی حمد کر تے آکھنڑ لگا جو

²⁹ ”مالک! تُوں آپنڑے وعدے دے مطابق ہُنڑ آپنڑے خادم کُوں سلامتی نال رُخصت کر۔

³⁰ کیوں جو میڈے اکھیں تیڈی نجات ڈیکھ گِھدی ہے

³¹ جیہڑی تُوں سبھ قوماں دے سامنڑے تیار کیتی ہے،

³² تاں جو او غیر قوماں کُوں روشنی ڈیوݨ آلا نُور تے تیڈی اُمت اِسرائیل دا جلال بنڑے۔“

³³ بال دا پِیُو تے اُوندی ماء اِنہاں گالھیں کُوں جیہڑیاں اُوندے حق ءچ آکھیاں ویندیاں ہَن حیران تھیندے ہَن۔

³⁴ شمعون اُنہاں کیتے دُعائے خیر کیتی تے اُوندی ماء مریم کُوں آکھیا، ”ایہ بال اِسرائیل ءچ بہُوں سارے لوکاں دے ڈھاوݨ تے کھڑے تھیوݨ کیتے مقرر تھئے۔ او ایجھا نشان ہوسی جیندی مخالفت کیتی ویسی،

³⁵ تاں جو بہُوں سارے لوکاں دے دِلاں دے خیال ظاہر تھی ونجنڑ، بلکہ خود تیڈی جان کُوں وی تلوار لگسی۔“

³⁶ اُتھاں ہِک نبِیّہ وی ہئی یعنی فنُوایل دی دِھی حنّاہ، جیہڑی آشر دے قبیلے ءچوں ہئی۔ او بہُوں بُڈھی ہئی، تے آپنڑی شادی دے بعد سَت سال تئیں آپنڑے پئے نال راہندی ریہی ہئی۔

³⁷ او چُوراسی (84) سال کنُوں بیوہ ہئی، تے ہیکل ءچوں نہ نِکلدی ہئی بلکہ ڈینہہ رات روزہ رکھ تے دُعا تے عبادت کریندی راہندی ہئی۔

³⁸ او اُوں ویلے اُنہاں دے کولھ آ تے خُدا دا شُکر کرݨ لگی، تے اُنہاں ساریاں نال جیہڑے یروشلیم دی رہائی دے منتظر ہَن، اُوندے بارے ءچ گالھیں کرݨ لگی۔

مریم تے یُوسف دی ناصرت واپسی

³⁹ جِیں ویلے اُنہاں رب دی شریعت دے مطابق سبھ کُجھ کر گِھدا تاں گلیل ءچ آپنڑے شہر ناصرت کُوں وَل گئے۔

⁴⁰ تے او چھوہر ودھدا تے قوت پَیندا گِیا تے حِکمت نال بھریندا گِیا تے خُدا دا فضل اُوندے اُتے ہا۔

یسُوع ہیکل ءچ

⁴¹ یسُوع دے ماء پِیُو ہر سال عید ِ فسح کیتے یروشلیم ویندے ہَن۔

⁴² جِیں ویلے او بارہاں سال دا تھیّا تاں او عید دے دستور دے مطابق یروشلیم گئے۔

⁴³ جڈاں عید دے ڈینہہ پُورے تھئے تاں اُوندے ماء پِیُو گھر وَل گئے پر او چھوہر یسُوع یروشلیم ءچ رہ گِیا تے اُنہاں کُوں پتہ نہ ہا۔

⁴⁴ ایہ سوچ تے جو او قافلے ءچ ہے، اُوندے ماء پِیُو ہِک ڈینہہ دا سفر کر تے اُونکُوں آپنڑے رشتہ داراں تے جاݨ پچھاݨ آلیاں ءچ گولھنڑ لگے۔

⁴⁵ جِیں ویلے او نہ مِلیا تاں اُونکُوں گولھیندے گولھیندے یروشلیم تئیں واپس گئے۔

⁴⁶ ترے ڈینہہ بعد اُنہاں اُونکُوں ہیکل ءچ عالماں دے وچال بیٹھے، اُنہاں دی سُنڑدے تے اُنہاں نال سوال کریندے ڈِٹھا۔

⁴⁷ تے جِتّی اُوندی سُنڑدے پئے ہَن، اُوندی سمجھ تے اُوندے جواب سُنڑ تے حیران ہَن۔

⁴⁸ اُوندے ماء پِیُو اُونکُوں ڈیکھ تے حیران تھئے تے اُوندی ماء اُونکُوں آکھیا، ”پوتر! تَیں ساڈے نال اِینویں کیوں کیتے؟ ڈیکھ تیڈا پِیُو تے مَیں فِکر مند تھی تے تیکُوں گولھیندے پئے ہسے۔“

⁴⁹ اُوں اُنہاں کُوں آکھیا، ”تُساں میکُوں کیوں گولھیندے پئے ہَوے؟ کیا تُہاکُوں پتہ نہ ہا جو میکُوں آپنڑے باپ دے گھر ہووݨ لازم ہے؟“

⁵⁰ پر او اُوندی گالھ نہ سمجھے۔

⁵¹ او اُنہاں نال روانہ تھی تے ناصرت ءچ آیا تے اُنہاں دے تابع ریہا۔ اُوندی ماء ایہ سارے گالھیں آپنڑے دل ءچ رکھیاں۔

⁵² تے یسُوع حِکمت تے قد ءچ ودھدا گِیا تے خُدا تے اِنسان دی نِگاہ ءچ مقبول تھیندا گِیا۔