یُوحنّا 7 - کِتاب مُقدّس سرائیکی ترجمہ

یسُوع تے اُوندے بِھرا

¹ اِنہاں گالھیں دے بعد یسُوع گلیل ءچ پِھردا ریہا کیوں جو یہُودیہ ءچ ونجنڑ نہ چاہندا ہا، اِیں واسطے جو اُتھاں یہُودی اُوندے قتل دی کوشش ءچ ہَن۔

² پر یہُودیاں دی چھپراں دی عید نیڑے ہئی۔

³ بس اُوندے بِھرانواں اُونکُوں آکھیا، ”اِتُھوں کنُوں نِکل تے یہُودیہ دے علاقے دو چلیا وَنج تاں جو تیڈے شاگرد وی ایہ معجزے جیہڑے تُوں کریندیں، ڈیکھ سگن۔

⁴ کیوں جو کوئی ایجھا نئیں جیہڑا مشہور تھیوݨ چاہندا ہووے تے لُک تے کم کرے۔ جے تُوں اِنہاں کماں کُوں کریندیں تاں آپنڑے آپ کُوں دُنیا اُتے ظاہر کر۔“

⁵ کیوں جو اُوندے بِھرا وی اُوندے اُتے اِیمان نہ گِھن آئے ہَن۔

⁶ بس یسُوع اُنہاں کُوں آکھیا، ”میڈا مقررہ وقت اجنڑ نئیں آیا پر تُہاڈے کیتے سارا وقت مناسب ہے۔

⁷ دُنیا تُہاڈے نال نفرت نئیں رکھ سگدی پر میڈے نال رکھیندی ہے، کیوں جو مَیں اُوندے خلاف گواہی ڈیندا ہاں جو اُوندے کم بُرے ہِن۔

⁸ تُساں عید ءچ ونجو۔ مَیں اجنڑ اِیں عید ءچ نئیں ویندا، کیوں جو حالی تئیں میڈا وقت نئیں آیا۔“

⁹ ایہ گالھیں آکھ تے او گلیل دے علاقے ءچ ای ریہا۔

یسُوع چھپراں دی عید دے موقع تے

¹⁰ جِیں ویلے اُوندے بِھرا عید ءچ چلے گئے تاں او خود وی گِیا، پر ظاہری طور تے نئیں بلکہ خُفیہ طور تے۔

¹¹ بس یہُودی عید ءچ اُونکُوں گولھیندے تے پُچھدے پِھردے ہَن جو ”او کِتھاں ہے؟“

¹² تے لوک اُوندے بارے ءچ ہولے ہولے گالھیں کریندے پئے ہَن۔ کُجھ آدھے ہَن جو ”او نیک بندہ ہے“ تے کُجھ آدھے ہَن جو ”کائنی، او لوکاں کُوں گُمراہ کریندے۔“

¹³ وَل وی یہُودی سرداراں دے ڈر تُوں کوئی اُوندے بارے ءچ کُھل تے گالھ نہ کریندا ہا۔

¹⁴ جِیں ویلے عید دے ادھے ڈینہہ لنگھ گئے تاں یسُوع ہیکل ءچ وَنج تے تعلیم ڈیوݨ لگا۔

¹⁵ یہُودی حیران تھی تے آکھنڑ لگے جو ”اِیں کُوں بغیر پڑھے علم کِتھوں آ گِیا؟“

¹⁶ یسُوع جواب ءچ اُنہاں کُوں آکھیا، ”میڈی تعلیم میڈی نئیں بلکہ میڈے بھیجنڑ آلے دی ہے۔

¹⁷ جے کوئی اُوندی مرضی اُتے چلنڑ چاہوے تاں او اِیں تعلیم دے بارے ءچ جاݨ گِھنسی جو خُدا دی طرفوں ہے یا مَیں آپنڑے کولُھوں آدھا ہاں۔

¹⁸ جیہڑا آپنڑے کولُھوں کُجھ آدھے او آپنڑی عزت چاہندے پر جیہڑا آپنڑے بھیجنڑ آلے دی عزت چاہندے او سچا ہے تے اُوندے ءچ بُرائی نئیں۔

¹⁹ کیا مُوسیٰ تُہاکُوں شریعت نئیں ڈِتی؟ وَل وی تُہاڈے ءچوں کوئی شریعت اُتے عمل نئیں کریندا۔ تُساں کیوں میکُوں قتل کرݨ دی کوشش ءچ ہیوے؟“

²⁰ لوکاں جواب ڈِتا، ”تیڈے ءچ تاں کوئی بدرُوح ہے۔ کوݨ تیڈے قتل دی کوشش ءچ ہے؟“

²¹ یسُوع جواب ءچ اُنہاں کُوں آکھیا، ”مَیں سبت دے ڈینہہ ہِک کم کیتے، تے تُساں حیران تھیندے ہیوے۔

²² پر اِیں سببّوں جو مُوسیٰ تُہاکُوں ختنے دا حُکم ڈِتے، (حالانکہ او مُوسیٰ دی طرفوں نئیں بلکہ پِیُو ڈاڈا کنُوں آندا پِیا ہے،) تُساں سبت دے ڈینہہ آپنڑے بالاں دا ختنہ کریندے ہیوے۔

²³ جِیں ویلے سبت دے ڈینہہ بالاں دا ختنہ کیتا ویندے تاں جو مُوسیٰ دی شریعت نہ تروٹے، تاں تُساں مَیں کنُوں کیوں ناراض تھی گئے ہیوے جو مَیں ہِک بندے کُوں سبت دے ڈینہہ بالکل ٹھیک کر ڈِتے؟

²⁴ صرف ظاہر کُوں ڈیکھ تے فیصلہ نہ کرو بلکہ اِنصاف نال کرو۔“

کیا او مسیح مَوعُود ہے؟

²⁵ وَل یروشلیم دے کُجھ راہنڑ آلے آکھنڑ لگے، ”کیا ایہ اُوہو نئیں جیندے قتل دی کوشش تھیندی پئی ہے؟

²⁶ پر ڈیکھو او کُھلے عام اکھیندے تے او اِینکُوں کُجھ نئیں آدھے۔ کیا سرداراں سچ مچ مَن گِھدے جو اِیہو المسیح ہے؟

²⁷ اِیں بندے کُوں تاں اساں جانڑدے ہیں جو کِتھوں دا ہے، پر جِیں ویلے المسیح ظاہر تھیسی تاں کوئی نہ جانڑسی جو او کِتھوں دا ہے۔“

²⁸ بس یسُوع ہیکل ءچ تعلیم ڈیندے ہوئے اُچی اواز ءچ آکھیا، ”تُساں میکُوں وی جانڑدے ہیوے تے ایہ وی جانڑدے ہیوے جو مَیں کِتھوں دا ہاں۔ مَیں آپنڑی مرضی نال نئیں آیا پر جئیں میکُوں بھیجیا ہے، او سچا ہے۔ تُساں اُونکُوں نئیں جانڑدے۔

²⁹ مَیں اُونکُوں جانڑدا ہاں اِیں واسطے جو مَیں اُوندی طرفوں ہاں تے اُونہی میکُوں بھیجیا ہے۔“

³⁰ اِیں گالھ تے لوک اُونکُوں پکڑن دی کوشش کرݨ لگے پر کہیں اُوندے اُتے ہتھ نہ پایا کیوں جو اجنڑ اُوندا وقت نہ آیا ہا۔

³¹ پر بِھیڑ ءچوں بہُوں سارے اُوندے اُتے اِیمان گِھن آئے تے آکھنڑ لگے جو ”جِیں ویلے المسیح آسی تاں کیا او اِیں بندے کنُوں زیادہ معجزے ڈکھیسی؟“

یسُوع کُوں گرفتار کرݨ کیتے سپاہی بھیجے گئے

³² فریسیاں لوکاں تُوں سُنڑیا جو اُوندے بارے ءچ ہولے ہولے ایہ گالھیں کریندے ہِن۔ بس سردار کاہِناں تے فریسیاں اُونکُوں پکڑن کیتے ہیکل دے سپاہی بھیجے۔

³³ یسُوع آکھیا، ”مَیں بِیا کُجھ ڈینہاں تئیں تُہاڈے کولھ ہاں، وَل مَیں آپنڑے بھیجنڑ آلے کولھ چلیا ویساں۔

³⁴ تُساں میکُوں گولھیسو پر نہ پیسو، تے جِتھاں مَیں ہاں تُساں نئیں آ سگدے۔“

³⁵ یہُودی آپس ءچ آکھنڑ لگے، ”ایہ کِتھاں ویسی جو اساں اُونکُوں گولھ نہ سگسوں؟ کیا او اُنہاں دے کولھ جیہڑے یُونانیاں ءچ اِڈے اُڈے وسدے ہِن چلیا ویسی تے یُونانیاں کُوں تعلیم ڈیسی؟

³⁶ ایہ کیا گالھ ہے جیہڑی اُوں آکھی جو ’تُساں میکُوں گولھیسو پر نہ پیسو‘ تے ’جِتھاں مَیں ہاں، تُساں نئیں آ سگدے‘؟“

زندگی دے پانڑی دیاں ندیاں

³⁷ وَل عید دے آخری ڈینہہ جیہڑا سبھ تُوں خاص ڈینہہ ہے، یسُوع کھڑا تھیّا تے اُچی اواز ءچ آکھنڑ لگا، ”جے کوئی ترِسّا ہووے تاں میڈے کولھ آوے تے پِیوے۔

³⁸ جیہڑا کوئی میڈے اُتے اِیمان گِھن آسی اُوندے دل ءچوں، جِینویں خُدا دے کلام ءچ لِکھیا ہے، زندگی دے پانڑی دیاں ندیاں وَیہہ پوسن۔“

³⁹ اُوں ایہ گالھ اُوں رُوح دے بارے ءچ آکھی جیہڑا یسُوع اُتے اِیمان رکھنڑ آلیاں اُتے نازل تھیوݨ آلا ہا، کیوں جو رُوح القُدس اجنڑ تئیں نازل نہ تھیّا ہا، اِیں واسطے جو یسُوع اجنڑ آپنڑے جلال کُوں نہ پُجیا ہا۔

لوکاں ءچ اِختلاف

⁴⁰ ایہ گالھیں سُنڑ تے بِھیڑ ءچوں بعض آکھیا، ”بیشک اِیہو او نبی ہے۔“

⁴¹ کُجھ آکھیا، ”ایہ المسیح ہے“ تے کُجھ آکھیا، ”کائنا، کیا مسیح گلیل تُوں آسی؟

⁴² کیا خُدا دے کلام ءچ ایہ نئیں لِکھیا جو المسیح داؤد دی نسل تے بیت لحم دی وستی ءچوں آسی، جیہڑا داؤد دا شہر ہا؟“

⁴³ بس لوکاں ءچ اُوندے سببّوں اِختلاف تھیّا۔

⁴⁴ اُنہاں ءچوں کُجھ اُونکُوں پکڑن چاہندے ہَن پر کہیں اُوندے اُتے ہتھ نہ پایا۔

معتبر تے اِقتدار آلے یہُودیاں ءچ بے اعتقادی

⁴⁵ جِیں ویلے ہیکل دے سپاہی سردار کاہِناں تے فریسیاں دے کولھ آئے تاں اُنہاں، اُنہاں کنُوں پُچھیا جو ”تُساں اُونکُوں کیوں نئیں گِھن آئے؟“

⁴⁶ سپاہیاں جواب ڈِتا، ”کہیں بندے کڈھائیں ایجھا کلام نئیں کیتا۔“

⁴⁷ فریسیاں اُنہاں کُوں جواب ڈِتا، ”کیا تُساں وی اُوندے دوکھے ءچ آ گئے ہیوے؟

⁴⁸ کیا سرداراں یا فریسیاں ءچوں کوئی اُوندے اُتے اِیمان گِھن آئے؟

⁴⁹ پر ایہ عام لوک جیہڑے شریعت کنُوں واقف نئیں لعنتی ہِن۔“

⁵⁰ نِیکُدِیمُس جیہڑا یسُوع کولھ پہلے آیا ہا تے اُنہاں ءچوں ہا، اُوں آکھیا،

⁵¹ ”کیا ساڈی شریعت کہیں بندے کُوں مُجرم بنڑیندی ہے جئیں تئیں اُونکُوں سُنڑ تے ایہ معلوم نہ کر گِھنے جو او کیا کریندے؟“

⁵² اُنہاں جواب ڈِتا، ”کیا تُوں وی گلیل دے علاقے دا ہیں؟ کلام دی تحقیق کر تے ڈیکھ جو گلیل دے علاقے ءچوں کوئی نبی نہ ہوسی۔“

⁵³ [وَل اُنہاں ءچوں ہر ہِک آپنڑے آپنڑے گھر دو چلیا گِیا۔]