یُوحنّا 6 - کِتاب مُقدّس سرائیکی ترجمہ

یسُوع پنج ہزار کُوں کھانڑا کھویندے

¹ اِنہاں گالھیں دے بعد یسُوع گلیل دی جھیل دے پار گِیا، جِینکُوں تِبریاس دی جھیل وی اکھیندے ہِن۔

² ہِک وڈی بِھیڑ اُوندے پِچُھوں تھی پئی کیوں جو جیہڑے معجزے او بیماراں کیتے کریندا ہا او اُنہاں کُوں ڈیدھے ہَن۔

³ وَل یسُوع پہاڑ اُتے چڑھ گِیا تے آپنڑے شاگرداں نال اُتھاں بہہ گِیا۔

⁴ یہُودیاں دی عید ِ فسح نیڑے ہئی۔

⁵ جِیں ویلے یسُوع نِگاہ چا تے ڈِٹھا جو میڈے کولھ وڈی بِھیڑ آندی پئی ہے تاں فِلپُس کُوں آکھیا، ”اساں اِنہاں دے کھاوݨ کیتے روٹیاں کِتھوں مُل گِھنوں؟“

⁶ پر اُوں اُونکُوں ازماوݨ کیتے ایہ آکھیا ہا کیوں جو او خود جانڑدا ہا جو مَیں کیا کریساں۔

⁷ فِلپُس جواب ءچ اُونکُوں آکھیا، ”اِنہاں کیتے ڈُو سو دینار دیاں روٹیاں وی پُوریاں نہ تھیسن جو ہر ہِک کُوں کُجھ مِل سگے۔“

⁸ اُوندے شاگرداں ءچوں ہِک، یعنی اندریاس جیہڑا شمعون پطرس دا بِھرا ہا، اُونکُوں آکھیا،

⁹ ”اِتھاں ہِک چھوہر ہے جیندے کولھ جَوں دیاں پنج روٹیاں تے ڈُو مچھیاں ہِن، پر اِتی لوکاں ءچ اِنہاں نال کیا تھیسی؟“

¹⁰ یسُوع آکھیا، ”لوکاں کُوں بِلھاؤ۔“ اُتھاں بہُوں گھاہ ہئی۔ اِیں واسطے او مرد جیہڑے تقریباً پنج ہزار ہَن، تلے بہہ گئے۔

¹¹ یسُوع او روٹیاں گِھدیاں تے خُدا دا شُکر ادا کیتا تے اُنہاں ءچ جیہڑے بیٹھے ہَن وَنڈ ڈِتیاں۔ تے اِینویں ای مچھیاں وی جِتّی جِینکُوں ضرورت ہئی وَنڈ ڈِتیاں۔

¹² جِیں ویلے یکے لوک پیٹ بھر تے کھا چُکے تاں اُوں آپنڑے شاگرداں کُوں آکھیا جو ”بچے ہوئے ٹُکڑیاں کُوں جمع کر گِھنو تاں جو کُجھ وی ضائع نہ تھیوے۔“

¹³ بس لوکاں دے کھاوݨ تُوں بعد اُنہاں جَوں دیاں روٹیاں کنُوں بچے ہوئے ٹُکڑیاں کُوں جمع کیتا تے اُنہاں دیاں بارہاں ٹوکریاں بھر تے چاتیاں۔

¹⁴ بس لوک یسُوع دا ایہ معجزہ ڈیکھ تے آکھنڑ لگے، ”یقیناً اِیہو او نبی ہے جیہڑا دُنیا ءچ آوݨ آلا ہا۔“

¹⁵ بس یسُوع ایہ معلوم کر تے جو او میکُوں زبردستی پکڑ تے بادشاہ بنڑاوݨ چاہندے ہِن، وَل کلھا پہاڑ دو روانہ تھی گِیا۔

یسُوع پانڑی اُتے ٹُردے

¹⁶ جِیں ویلے شام تھئی تاں اُوندے شاگرد جھیل دو روانہ تھئے،

¹⁷ تے کشتی ءچ بہہ تے جھیل دے پار کفرنحُوم شہر کیتے روانہ تھی گئے۔ اُوں ویلے اندھارا تھی گِیا ہا تے یسُوع اُنہاں کولھ حالی تئیں نہ آیا ہا،

¹⁸ تے اندھاری دے سببّوں جھیل ءچ چھلاں اُٹھنڑ پے گئیاں۔

¹⁹ بس جِیں ویلے او کشتی کُوں چلیندے چلیندے ترے چار مِیل اگُوں نِکل آئے تاں اُنہاں یسُوع کُوں جھیل اُتے ٹُردے تے کشتی دے نیڑے آندے ڈِٹھا تے ڈر گئے۔

²⁰ پر اُوں اُنہاں کُوں آکھیا، ”ڈرو نہ، مَیں ہاں۔“

²¹ بس اُنہاں اُونکُوں خوشی نال کشتی ءچ سوار کر گِھدا تے کشتی فوراً اُوں جاہ تے پُج گئی جِتھاں او ویندے پئے ہَن۔

لوک یسُوع کُوں گولھیندے ہِن

²² ڈُوجھے ڈینہہ اُوں بِھیڑ، جیہڑی جھیل دے پار رہ گئی ہئی ایہ ڈِٹھا جو اِتھاں ہِک کشتی دے علاوہ کوئی بئی چھوٹی کشتی نہ ہئی تے یسُوع آپنڑے شاگرداں نال کشتی اُتے سوار نہ تھیّا ہا بلکہ صرف اُوندے شاگرد چلے گئے ہَن۔

²³ وَل کُجھ چھوٹیاں کشتیاں تِبریاس تُوں اُوں جاہ دے نیڑے آئیاں جِتھاں اُنہاں یسُوع مالک دے شُکر کرݨ دے بعد روٹی کھادی ہئی۔

²⁴ بس جِیں ویلے بِھیڑ ڈِٹھا جو نہ تاں یسُوع اُتھاں ہے، نہ اُوندے شاگرد تاں او خود چھوٹیاں کشتیاں ءچ بہہ تے یسُوع کُوں گولھنڑ کیتے کفرنحُوم آئے۔

یسُوع زندگی دی روٹی

²⁵ جِیں ویلے اُنہاں یسُوع کُوں جھیل دے پار گولھ گِھدا تاں آکھیا، ”ربّی! تُساں اِتھاں کِیں ویلے آئے ہیوے؟“

²⁶ یسُوع جواب ڈِتا، ”مَیں تُہاکُوں سچ آدھا ہاں جو تُساں میکُوں اِیں واسطے نئیں گولھیندے جو میڈے معجزے ڈِٹھے بلکہ اِیں واسطے جو تُہاکُوں پیٹ بھر تے کھاوݨ کُوں روٹیاں مِلیا ہَن۔

²⁷ فانی خوراک کیتے محنت نہ کرو بلکہ اُوندے کیتے جیہڑی ہمیشاں دی زندگی تئیں باقی راہندی ہے جیہڑی اِبنِ آدم تُہاکُوں عطا کریسی۔ کیوں جو خُدا باپ اُونہی اُتے مُہر کیتی ہے۔“

²⁸ بس اُنہاں اُونکُوں آکھیا جو ”اساں خُدا دے کم کرݨ کیتے کیا کرُوں؟“

²⁹ یسُوع جواب ڈِتا، ”خُدا دا کم ایہ ہے جو جِینکُوں اُوں بھیجیا ہے، اُوندے اُتے اِیمان گِھن آؤ۔“

³⁰ بس اُنہاں اُوں کنُوں پُچھیا، ”وَل تُساں کیہڑا معجزہ ڈکھیسو جِینکُوں ڈیکھ تے اساں تُہاڈے اُتے اِیمان گِھن آؤں؟ تُساں کیہڑا کم کریسو؟

³¹ ساڈے پِیُو ڈاڈا بیابان ءچ مَن کھادا اِیں واسطے لِکھیا ہے جو ’اُوں اُنہاں کُوں کھاوݨ کیتے اسمان کنُوں روٹی ڈِتی‘۔“

³² یسُوع اُنہاں کُوں آکھیا، ”مَیں تُہاکُوں سچ آدھا ہاں جو مُوسیٰ تاں تُہاکُوں اسمان تُوں او روٹی نہ ڈِتی بلکہ میڈا باپ تُہاکُوں اسمان تُوں حقیقی روٹی ڈیندا ہے۔

³³ کیوں جو خُدا دی روٹی او ہے جیہڑی اسمان کنُوں لہہ تے دُنیا کُوں زندگی بخشدی ہے۔“

³⁴ اُنہاں اُونکُوں آکھیا، ”مالک! ایہ روٹی ہمیشاں ساکُوں ڈِتا کر۔“

³⁵ یسُوع اُنہاں کُوں آکھیا، ”زندگی دی روٹی مَیں ہاں۔ جیہڑا میڈے کولھ آسی کڈھائیں بُکھا نہ راہسی تے جیہڑا میڈے اُتے اِیمان گِھن آسی کڈھائیں ترِسّا نہ راہسی۔

³⁶ پر مَیں تُہاکُوں آکھیا جو تُساں میکُوں ڈیکھ گِھدا ہے وَل وی اِیمان نئیں گِھن آندے۔

³⁷ جِتی لوک باپ میکُوں ڈیندے، او میڈے کولھ آسن تے جیہڑا کوئی میڈے کولھ آسی مَیں اُونکُوں ہرگز نہ کڈھیساں۔

³⁸ کیوں جو مَیں اسمان کنُوں اِیں واسطے نئیں لتھا جو آپنڑی مرضی پُوری کراں بلکہ اِیں واسطے جو آپنڑے بھیجنڑ آلے دی مرضی پُوری کراں۔

³⁹ تے میڈے بھیجنڑ آلے دی مرضی ایہ ہے جو جِتی وی لوک اُوں میکُوں ڈِتے ہِن، مَیں اُنہاں ءچوں کہیں کُوں وَنجا نہ ڈیواں بلکہ سبھ کُوں قیامت آلے ڈینہہ ولا زندہ کراں۔

⁴⁰ کیوں جو میڈے بھیجنڑ آلے دی مرضی ایہ ہے جو جیہڑا کوئی پوتر کُوں ڈیکھے تے اُوندے اُتے اِیمان گِھن آوے او ہمیشاں دی زندگی پاوے تے مَیں اُونکُوں قیامت آلے ڈینہہ ولا زندہ کراں۔“

⁴¹ بس یہُودی اُوندے اُتے بُڑبُڑ کرݨ لگے اِیں واسطے جو اُوں آکھیا ہا جو ”جیہڑی روٹی اسمان کنُوں لتھی ہئی او مَیں ہاں۔“

⁴² تے او آکھنڑ لگے جو، ”کیا ایہ یُوسف دا پوتر یسُوع نئیں جیندے ماء پِیُو کُوں اساں جانڑدے ہاں؟ ہُنڑ او کِینویں آدھے جو مَیں اسمان کنُوں لتھا ہاں؟“

⁴³ یسُوع جواب ءچ اُنہاں کُوں آکھیا، ”آپس ءچ بُڑبُڑ نہ کرو۔

⁴⁴ میڈے کولھ کوئی نئیں آ سگدا جئیں تئیں باپ جئیں میکُوں بھیجیا ہے اُونکُوں چھیک نہ گِھنے، تے مَیں اُونکُوں قیامت آلے ڈینہہ ولا زندہ کریساں۔

⁴⁵ نبیاں دے صحیفیاں ءچ ایہ لِکھیا ہے جو ’او سبھ خُدا کنُوں تعلیم گِھنسن۔‘ جئیں کہیں باپ تُوں سُنڑیا تے سِکھیا ہے، او میڈے کولھ آندے۔

⁴⁶ اِیندا مطلب ایہ نئیں جو کہیں کڈھائیں باپ کُوں ڈِٹھے۔ صرف اُوں جیہڑا خُدا دی طرفوں ہے، اُوں ای باپ کُوں ڈِٹھے۔

⁴⁷ مَیں تُہاکُوں سچ آدھا ہاں جو جیہڑا کوئی اِیمان گِھن آندے، ہمیشاں دی زندگی اُوندی ہے۔

⁴⁸ زندگی دی روٹی مَیں ہاں۔

⁴⁹ تُہاڈے پِیُو ڈاڈا بیابان ءچ مَن کھادا تے مر گئے۔

⁵⁰ پر ایہ او روٹی ہے جیہڑی اسمان کنُوں لہندی ہے تاں جو بندہ اُوں روٹی ءچوں کھاوے تے نہ مرے۔

⁵¹ مَیں او زندگی دی روٹی ہاں جیہڑی اسمان کنُوں لتھی۔ جے کوئی اِیں روٹی ءچوں کھاوے تاں ہمیشاں تئیں زندہ راہسی۔ ایہ روٹی میڈا گوشت ہے جیہڑا مَیں ساری دُنیا دی زندگی کیتے ڈیساں۔“

⁵² اِیں تے یہُودیاں ءچ جھیڑا شروع تھی گِیا تے او آکھنڑ لگے، ”ایہ بندہ کِینویں ساکُوں آپنڑا گوشت کھاوݨ کیتے ڈے سگدے؟“

⁵³ یسُوع اُنہاں کُوں آکھیا، ”مَیں تُہاکُوں سچ آدھا ہاں جو جئیں تئیں تُساں اِبنِ آدم دا گوشت نہ کھاؤ تے اُوندا خون نہ پِیؤ، تُہاڈے ءچ زندگی نہ ہوسی۔

⁵⁴ جیہڑا میڈا گوشت کھاندے تے میڈا خون پِیندے، اُوندے ءچ ہمیشاں دی زندگی ہے تے مَیں اُونکُوں قیامت آلے ڈینہہ ولا زندہ کریساں۔

⁵⁵ کیوں جو حقیقی کھانڑا میڈا گوشت تے پِیوݨ دی حقیقی چیز میڈا خون ہے۔

⁵⁶ جیہڑا کوئی میڈا گوشت کھاندے تے میڈا خون پِیندے، او میڈے ءچ قائم راہندے تے مَیں اُوندے ءچ۔

⁵⁷ جِینویں زندہ باپ میکُوں بھیجیا تے مَیں باپ دی وجہ کنُوں زندہ ہاں، اِینویں ای جیہڑا میکُوں کھاسی او میڈی وجہ کنُوں زندہ راہسی۔

⁵⁸ جیہڑی روٹی اسمان کنُوں لتھی ہے، اِیہو ہے۔ ایہ اُوں روٹی وانگُوں نئیں جِینکُوں پِیُو ڈاڈا کھادا تے مر گئے۔ جیہڑا ایہ روٹی کھاسی او ہمیشاں تئیں زندہ راہسی۔“

⁵⁹ ایہ گالھیں یسُوع کفرنحُوم دے ہِک عبادت خانہ ءچ تعلیم ڈیندے ہوئے آکھیاں۔

ہمیشاں دی زندگی دے گالھیں

⁶⁰ ایہ گالھیں سُنڑ تے اُوندے شاگرداں ءچوں بہُوں ساریاں آکھیا جو ”ایہ تعلیم بہُوں سخت ہے، اِینکُوں کوݨ سُنڑ سگدے؟“

⁶¹ یسُوع ایہ جاݨ تے جو اُوندے شاگرد اِیں گالھ اُتے آپس ءچ بُڑبُڑ کریندے ہِن، اُنہاں کُوں آکھیا، ”کیا تُساں اِیں تُوں تُھڈا کھاندے ہیوے؟

⁶² جے تُساں اِبنِ آدم کُوں اُتے ویندا ڈیکھسو، جِتھاں او پہلے ہا، تاں کیا تھیسی؟

⁶³ زندہ کرݨ آلی تاں رُوح ہے، اِنسانی طاقت کنُوں کُجھ نئیں تھی سگدا۔ جیہڑے گالھیں مَیں تُہاکُوں آکھیاں ہِن، او رُوح ہِن تے زندگی وی ہِن۔

⁶⁴ پر تُہاڈے ءچوں کُجھ ایجھے ہِن جیہڑے اِیمان نئیں گِھن آئے۔“ (کیوں جو یسُوع شروع کنُوں جانڑدا ہا جو اِیمان نہ گِھن آوݨ آلے کوݨ ہِن تے کوݨ میکُوں پکڑویسی۔)

⁶⁵ وَل اُوں آکھیا، ”اِیں واسطے مَیں تُہاکُوں آکھیا ہا جو کوئی میڈے کولھ نئیں آ سگدا جئیں تئیں باپ اُونکُوں توفیق نہ بخشے۔“

⁶⁶ اِیں تُوں اُوندے شاگرداں ءچوں بہُوں سارے اُونکُوں چھوڑ تے چلے گئے تے ولا اُوندے نال نہ ریہے۔

⁶⁷ بس یسُوع اُنہاں بارہاں کنُوں پُچھیا، ”کیا تُساں وی ونجنڑ چاہندے ہیوے؟“

⁶⁸ شمعون پطرس اُونکُوں جواب ڈِتا، ”مالک! اساں کیندے کولھ ونجُوں؟ ہمیشاں دی زندگی دے گالھیں تاں تُہاڈے ای کولھ ہِن۔

⁶⁹ تے اساں اِیمان گِھن آئے تے جاݨ گئے ہیں جو خُدا دے قدُّوس تُساں ای ہیوے۔“

⁷⁰ یسُوع اُنہاں کُوں جواب ڈِتا، ”کیا مَیں تُساں بارہاں کُوں نئیں چُنڑ گِھدا؟ وَل وی تُہاڈے ءچوں ہِک شیطان ہے۔“

⁷¹ اُوں ایہ شمعون اِسکریُوتی دے پوتر یہُوداہ دے بارے ءچ آکھیا کیوں جو اِیہو جیہڑا اُنہاں بارہاں ءچوں ہا، اُونکُوں پکڑواوݨ آلا ہا۔