یُوحنّا 21 - کِتاب مُقدّس سرائیکی ترجمہ

یسُوع سَت شاگرداں اُتے ظاہر تھیندے

¹ اِنہاں گالھیں دے بعد یسُوع ہِک پھیری وَل آپنڑے آپ کُوں شاگرداں اُتے تِبریاس دی جھیل دے کنارے ظاہر کیتا۔ تے اِینویں ظاہر کیتا۔

² شمعون پطرس تے توما جیہڑا جاڑا اکھویندے تے نتن ایل جیہڑا گلیل دی وستی قانا دا ہا، تے زبدی دے پوتر، تے ڈُوجھے بئے شاگرد اُتھاں جمع ہَن۔

³ شمعون پطرس اُنہاں کُوں آکھیا، ”مَیں تاں مچھی پکڑن ویندا ہاں۔“ اُنہاں آکھیا، ”اساں وی تیڈے نال ویندے ہیں۔“ او نِکل تے کشتی ءچ وَنج بیٹھے پر اُوں رات کُجھ نہ پکڑیا۔

⁴ سویل نال ای یسُوع کنارے اُتے آ کھڑا تھیّا پر شاگرداں نہ پچھانڑیا جو او یسُوع ہے۔

⁵ بس یسُوع اُنہاں کُوں آکھیا، ”بالو! کیا تُہاڈے کولھ کوئی مچھی ہے؟“ اُنہاں جواب ڈِتا، ”کائناں۔“

⁶ اُوں اُنہاں کُوں آکھیا، ”جال کُوں کشتی دے سجے پاسے سٹو تاں پکڑیسو۔“ اُنہاں اِینویں ای کیتا تے وَل مچھیاں دی کثرت پارُوں جال چھیک نہ سگے۔

⁷ وَل اُوں شاگرد جِینکُوں یسُوع عزیز رکھیندا ہا، پطرس کُوں آکھیا، ”ایہ تاں خُداوند ہے۔“ جِینویں ای شمعون پطرس ایہ سُنڑیا جو ایہ خُداوند ہے اُوں آپنڑا چولا چیل نال بدھیا کیوں جو اُوں اُونکُوں کم کیتے لہایا ہویا ہا تے پانڑی ءچ ٹپّا مار ڈِتا۔

⁸ باقی شاگرد مچھیاں دا جال چھکیندے ہوئے کشتی ءچ آئے کیوں جو او کنارے کنُوں بہُوں پرے نہ ہَن تے اندازاً سو گز دا فاصلہ ہا۔

⁹ جِیں ویلے کنارے اُتے لتھے تاں ڈِٹھا جو کولیاں دی بھاہ ہے تے اُوندے اُتے مچھی رکھی ہوئی تے روٹی ڈِٹھی۔

¹⁰ یسُوع اُنہاں کُوں آکھیا، ”جیہڑیاں مچھیاں تُساں ہُنڑ پکڑیاں ہِن اُنہاں ءچوں کُجھ گِھن آؤ۔“

¹¹ شمعون پطرس کشتی اُتے چڑھ گِیا تے جال کُوں کنارے اُتے چھیک آیا۔ او ہِک سو تِرونجھاہ وڈیاں وڈیاں مچھیاں نال بھریا ہا، پر مچھیاں دی کثرت دے باوجود جال وَل وی نہ پھٹیا۔

¹² یسُوع اُنہاں کُوں آکھیا، ”آؤ کھانڑا کھا گِھنو۔“ شاگرداں ءچوں کہیں کُوں وی جُرأت نہ تھئی جو پُچھے جو ”تُوں کوݨ ہیں؟“ کیوں جو او جانڑدے ہَن جو خُداوند ای ہے۔

¹³ یسُوع آ تے روٹی گِھدی تے اُنہاں کُوں ڈِتی تے اِینویں ای مچھی وی ڈِتی۔

¹⁴ یسُوع مُردیاں ءچوں زندہ تھی ونجنڑ دے بعد ایہ تریجھی پھیری آپنڑے شاگرداں اُتے ظاہر تھیّا۔

یسُوع تے پطرس

¹⁵ جِیں ویلے اُنہاں کھانڑا کھا گِھدا تاں یسُوع شمعون پطرس کُوں آکھیا، ”یُوحنّا دے پوتر شمعون! کیا تُوں میکُوں اِنہاں کنُوں زیادہ عزیز رکھیندیں؟“ اُوں آکھیا، ”ہاں خُداوند تُساں تاں جانڑدے ای ہیوے جو مَیں تُہاکُوں عزیز رکھیندا ہاں۔“ اُوں جواب ڈِتا، ”تُوں میڈے لیلے چَرا۔“

¹⁶ یسُوع اُونکُوں ولا آکھیا، ”یُوحنّا دے پوتر شمعون! کیا تُوں میکُوں عزیز رکھیندیں؟“ اُوں آکھیا، ”ہاں خُداوند تُساں تاں جانڑدے ای ہیوے جو مَیں تُہاکُوں عزیز رکھیندا ہاں۔“ یسُوع اُونکُوں آکھیا، ”تُوں میڈیاں بھیڈاں دی رکھوالی کر۔“

¹⁷ یسُوع تریجھی پھیری ولا اُونکُوں آکھیا، ”یُوحنّا دے پوتر شمعون! کیا تُوں میکُوں عزیز رکھیندیں؟“ پطرس ڈُکھی تھی گِیا کیوں جو اُوں اُونکُوں تریجھی پھیری آکھیا ہا، ”کیا تُوں میکُوں عزیز رکھیندیں؟“ اُوں اُونکُوں آکھیا، ”اے خُداوند! تُساں تاں سبھ کُجھ جانڑدے ہیوے۔ تُہاکُوں پتہ ہے جو مَیں تُہاکُوں عزیز رکھیندا ہاں۔“ یسُوع اُونکُوں آکھیا، ”تُوں میڈیاں بھیڈاں چَرا۔

¹⁸ مَیں تیکُوں سچ آدھا ہاں جو جِیں ویلے تُوں جوان ہَویں تاں آپ ای آپنڑی چیل بدھیندا ہَویں تے جِتھاں دل آدھا ہا ٹُر پوندا ہَویں۔ پر جِیں ویلے تُوں بُڈھا تھی ویسیں تاں تُوں آپنڑے ہتھ ودھیسیں تے کوئی ڈُوجھا تیڈی چیل بدھیسی تے جِتھاں تُوں ونجنڑ وی نہ چاہسیں، تیکُوں گِھن ویسی۔“

¹⁹ اُوں اِنہاں گالھیں تُوں اِشارہ کر ڈِتا جو پطرس کیجھی موت تُوں خُدا دا جلال ظاہر کریسی۔ تے ایہ آکھ تے اُونکُوں آکھیا، ”میڈے پِچُھوں تھی پو۔“

یسُوع تے ڈُوجھے شاگرد

²⁰ پطرس مُڑ تے اُوں شاگرد کُوں پِچُھوں آندے ڈِٹھا جِینکُوں یسُوع عزیز رکھیندا ہا تے جئیں شام دے کھانڑے ویلے یسُوع دو جُھک تے پُچھیا ہا، ”مالک! او کوݨ ہے جیہڑا تُہاکُوں پکڑویسی؟“

²¹ پطرس اُونکُوں ڈیکھ تے یسُوع کُوں آکھیا، ”اے خُداوند! اِیں بندے دا کیا بنڑسی؟“

²² یسُوع اُونکُوں آکھیا، ”جے مَیں چاہواں جو ایہ میڈے ولنڑ تئیں زندہ راہوے تاں اِیندے نال تیکُوں کیا؟ تُوں میڈے پِچُھوں ٹُر۔“

²³ بس اِیمانداراں ءچ ایہ گالھ مشہور تھی گئی جو او شاگرد نہ مر سی۔ پر یسُوع ایہ نہ آکھیا ہا جو ”او نہ مرسی“ بلکہ ایہ آکھیا ہا، ”جے مَیں چاہواں جو او میڈے ولنڑ تئیں زندہ راہوے تاں اِیں گالھ نال تیکُوں کیا؟“

²⁴ ایہ اُوہو شاگرد ہے جیہڑا اِنہاں گالھیں دی گواہی ڈیندے تے جئیں اِنہاں کُوں لِکھیا ہے تے اساں جانڑدے ہیں جو اُوندی گواہی سچی ہے۔

اِختتامیہ

²⁵ بئے وی بہُوں سارے کم ہِن جیہڑے یسُوع کیتے۔ جے ہر ہِک دے بارے ءچ لِکھیا ویندا تاں مَیں سمجھدا ہاں جو جیہڑیاں کتاباں لِکھیاں ویندیاں اُنہاں کیتے دُنیا ءچ جاہ نہ ہوندی۔