یُوحنّا 2 - کِتاب مُقدّس سرائیکی ترجمہ

قانا ءچ ہِک شادی

¹ وَل تریجھے ڈینہہ گلیل دی وستی قانا ءچ ہِک شادی تھئی تے یسُوع دی ماء اُتھاں ہئی۔

² یسُوع تے اُوندے شاگرداں دی وی اُوں شادی ءچ دعوت ہئی۔

³ جِیں ویلے انگُور دا رَس ختم تھی گِیا تاں یسُوع دی ماء اُونکُوں آکھیا جو ”اُنہاں دے کولھ انگُور دا رَس مُک گِیا ہے۔“

⁴ یسُوع اُونکُوں آکھیا، ”ماء! میکُوں ایہ کیوں آدھی ہیں؟ اجنڑ میڈا وقت نئیں آیا۔“

⁵ اُوندی ماء نوکراں کُوں آکھیا، ”جیہڑا کُجھ او تُہاکُوں آکھے، او کرو۔“

⁶ اُتھاں پتھر دے چِھی مٹکے رکھے ہَن جِنہاں کُوں یہُودی طہارت کیتے اِستعمال کریندے ہَن۔ ہر مٹکے ءچ ڈُو ڈُو ترے ترے مَنڑ پانڑی دی گُنجائش ہئی۔

⁷ یسُوع اُنہاں کُوں آکھیا، ”مٹکیاں ءچ پانڑی بھر ڈیؤ۔“ بس اُنہاں مٹکیاں کُوں مُنہ تئیں بھر ڈِتا۔

⁸ وَل اُوں اُنہاں کُوں آکھیا، ”ہُنڑ کڈھ تے دعوت دا اِنتظام چلاوݨ آلے کولھ گِھن ونجو۔“ بس او گِھن گئے۔

⁹ دعوت دا اِنتظام چلاوݨ آلے او پانڑی چَکھیا جیہڑا ہُنڑ انگُور دا رَس بنڑ گِیا ہا۔ اُونکُوں پتہ نہ ہا جو او انگُور دا رَس کِتھوں آئے پر نوکر جِنہاں پانڑی بھریا ہا جانڑدے ہَن۔ وَل دعوت دا اِنتظام چلاوݨ آلے گھوٹ کُوں سڈیا تے اُونکُوں آکھیا،

¹⁰ ”ہر بندہ شروع ءچ انگُور دا چنگا رَس پیش کریندے تے بعد ءچ جیہڑے ویلے مہمان پی گِھندن، ہلکا رَس پیش کریندے، پر تَیں انگُور دا چنگا رَس ہُنڑ تئیں رکھ چھوڑیا ہے۔“

¹¹ ایہ یسُوع دا پہلا معجزہ ہا جیہڑا اُوں گلیل دی وستی قانا ءچ ڈِکھا تے آپنڑاں جلال ظاہر کیتا تے اُوندے شاگرد اُوندے اُتے اِیمان گِھن آئے۔

¹² اِیندے بعد او، اُوندی ماء تے بِھرا تے اُوندے شاگرد کفرنحُوم کُوں چلے گئے تے اُتھاں کُجھ ڈینہہ ریہے۔

یسُوع ہیکل ءچ ویندے

¹³ جِیں ویلے یہُودیاں دی عید ِ فسح نیڑے ہئی تاں یسُوع یروشلیم دو روانہ تھیّا۔

¹⁴ اُوں ہیکل دے صحن ءچ ڈاند، بھیڈاں تے کبوتر ویچنڑ آلیاں کُوں تے پیسے بدلاوݨ آلیاں کُوں بیٹھے ڈِٹھا،

¹⁵ تے رسیاں دا کوڑا بنڑا تے بھیڈاں تے ڈانداں سمیت ساریاں کُوں ہیکل ءچوں کڈھ ڈِتا۔ اُوں پیسے بدلاوݨ آلیاں دے سِکے کِھنڈا ڈِتے، تے اُنہاں دے پھٹے پُٹھے کر ڈِتے،

¹⁶ تے کبوتر فروشاں کُوں آکھیا، ”اِنہاں کُوں اِتُھوں گِھن ونجو۔ میڈے باپ دے گھر کُوں مَنڈی نہ بنڑاؤ۔“

¹⁷ اُوندے شاگرداں کُوں یاد آیا جو کلام ءچ لِکھیا ہے ”تیڈے گھر دی غیرت میکُوں کھا ویسی۔“

¹⁸ بس یہُودیاں جواب ءچ اُونکُوں آکھیا، ”اِنہاں کماں دے دفاع ءچ تُوں ساکُوں کیہڑا معجزہ ڈِکھا سگدیں؟“

¹⁹ یسُوع جواب ءچ اُنہاں کُوں آکھیا ”اِیں ہیکل کُوں سَٹ ڈیؤ تاں مَیں ترے ڈینہہ ءچ ولا کھڑا کر ڈیساں۔“

²⁰ یہُودیاں جواب ڈِتا، ”اِیں ہیکل دے بنڑاوݨ ءچ چھتالیہہ سال لگ گئے ہِن، تے کیا تُوں ترے ڈینہہ ءچ اِینکُوں ولا بنڑا ڈیسیں؟“

²¹ پر یسُوع آپنڑے جِسم دی ہیکل دے بارے ءچ آکھیا ہا۔

²² بس جِیں ویلے او مُردیاں ءچوں زندہ تھیّا تاں اُوندے شاگرداں کُوں یاد آیا جو اُوں ایہ آکھیا ہا تے اُنہاں کُوں خُدا دے کلام تے یسُوع دے آکھے ہوئے لفظاں اُتے یقین آ گِیا۔

یسُوع اِنسان دی فطرت کُوں جانڑدے

²³ جِیں ویلے یسُوع فسح دی عید کیتے یروشلیم ءچ ہا تاں بہُوں سارے لوک اُوندے معجزے ڈیکھ تے اُوندے اُتے اِیمان گِھن آئے،

²⁴ پر یسُوع کُوں اُنہاں اُتے اعتبار نہ ہا، اِیں کیتے جو او ساریاں کُوں جانڑدا ہا۔

²⁵ اُونکُوں اِیندی ضرورت نہ ہئی جو کوئی اُونکُوں اِنسان دے بارے ءچ ڈساوے کیوں جو او اِنسان دے دل دا حال جانڑدا ہا۔