یُوحنّا 15 - کِتاب مُقدّس سرائیکی ترجمہ

یسُوع انگُور دی حقیقی ویل

¹ ”انگُور دی حقیقی ویل مَیں ہاں تے میڈا باپ باغبان ہے۔

² جیہڑی ٹاہنڑی میڈے ءچ ہے پر پھل نئیں ڈیندی اُونکُوں او کپ سٹیندے، تے جیہڑی پھل ڈیندی ہے اُونکُوں او چھنڈیندے تاں جو او زیادہ پھل ڈیوے۔

³ تُساں اُوں کلام دے سببّوں جیہڑا مَیں تُہاڈے نال کیتے پاک تھی گئے ہیوے۔

⁴ تُساں میڈے ءچ قائم راہو تے مَیں تُہاڈے ءچ قائم راہساں۔ جِینویں ٹاہنڑی جے انگُور دی ویل ءچ قائم نہ راہوے تاں آپنڑے آپ تُوں پھل نئیں ڈے سگدی، اُونویں ای تُساں وی جے میڈے ءچ قائم نہ راہو تاں پھل نئیں ڈے سگدے۔

⁵ مَیں انگُور دی ویل ہاں تے تُساں ٹاہنڑیاں ہیوے۔ جیہڑا میڈے ءچ قائم راہندے تے مَیں اُوندے ءچ، اُوہو بہُوں پھل ڈیندے کیوں جو مَیں کنُوں اَنج تھی تے تُساں کُجھ نئیں کر سگدے۔

⁶ جے کوئی میڈے ءچ قائم نہ راہوے تاں او ٹاہنڑی وانگُوں سَٹ ڈِتا ویندے تے سُک ویندے، تے لوک اُنہاں کُوں کٹھا کر تے بھاہ ءچ سَٹ ڈیندے ہِن تے او سڑ ویندیاں ہِن۔

⁷ جے تُساں میڈے ءچ قائم راہو تے میڈا کلام تُہاڈے دل ءچ قائم راہوے تاں جیہڑا کُجھ منگو او تُہاڈے کیتے تھی ویسی۔

⁸ میڈے باپ دا جلال اِیں تُوں تھیندے جو تُساں بہُوں سارا پھل گِھن آؤ۔ وَل تُساں واقعی میڈے شاگرد ہوسو۔

⁹ جِینویں باپ میڈے نال محبت کیتی ہے اُونویں ای مَیں تُہاڈے نال محبت کیتی ہے۔ تُساں میڈی محبت ءچ قائم راہو۔

¹⁰ جے تُساں میڈے حُکماں اُتے عمل کریسو تاں میڈی محبت ءچ قائم راہسو، جِینویں مَیں آپنڑے باپ دے حُکماں اُتے عمل کیتے تے اُوندی محبت ءچ قائم ہاں۔

¹¹ مَیں ایہ گالھیں تُہاکُوں اِیں واسطے آکھیاں ہِن جو میڈی خوشی تُہاڈے ءچ ہووے تے تُہاڈی خوشی پُوری تھی ونجے۔

¹² میڈا حُکم ایہ ہے جو جِینویں مَیں تُہاڈے نال محبت رکھی تُساں وی ہِک ڈُوجھے نال محبت رکھو۔

¹³ اِیں کنُوں زیادہ محبت کوئی نئیں کریندا جو آپنڑی جان آپنڑے دوستاں کیتے ڈے ڈیوے۔

¹⁴ جے تُساں میڈے حُکماں اُتے عمل کریسو تاں میڈے دوست ہوسو۔

¹⁵ ہُنڑ کنُوں مَیں تُہاکُوں نوکر نہ اکھیساں کیوں جو نوکر نئیں جانڑدا جو اُوندا مالک کیا کریندے بلکہ مَیں تُہاکُوں دوست آکھیا ہے کیوں جو سبھ کُجھ جیہڑا مَیں آپنڑے باپ کنُوں سُنڑیا ہے تُہاکُوں ڈسا ڈِتے۔

¹⁶ تُساں میکُوں نئیں چُنڑیا بلکہ مَیں تُہاکُوں چُنڑیا تے مقرر کیتے جو تُساں وَنج تے پھل گِھن آؤ تے تُہاڈا پھل قائم راہوے، تاں جو جیہڑا کُجھ تُساں میڈے ناں تُوں باپ کنُوں منگو، او تُہاکُوں ڈیوے۔

¹⁷ مَیں اِنہاں گالھیں دا حُکم تُہاکُوں اِیں واسطے ڈیندا ہاں جو تُساں ہِک ڈُوجھے نال محبت رکھو۔

دُنیا دی نفرت

¹⁸ جے دُنیا تُہاڈے نال نفرت کریندی ہے تاں جاݨ گِھنو جو اُوں تُہاڈے کنُوں پہلے میڈے نال وی نفرت کیتی ہے۔

¹⁹ جے تُساں دُنیا دے ہوندے تاں دُنیا تُہاکُوں آپنڑا سمجھ تے عزیز رکھیندی پر کیوں جو تُساں دُنیا دے نئیں بلکہ مَیں تُہاکُوں دُنیا ءچوں چُنڑ گِھدے اِیں واسطے دُنیا تُہاڈے نال نفرت کریندی ہے۔

²⁰ او گالھ یاد رکھو جیہڑی مَیں تُہاکُوں ڈسائی ہئی جو نوکر آپنڑے مالک کنُوں وڈا نئیں ہوندا۔ جے اُنہاں میکُوں ستایا ہے تاں او تُہاکُوں وی ستیسن۔ جے اُنہاں میڈی گالھ اُتے عمل کیتا تاں تُہاڈی گالھ اُتے وی عمل کریسن۔

²¹ پر او ایہ سبھ کُجھ میڈے ناں دی وجہ تُوں تُہاڈے نال کریسن کیوں جو او میڈے بھیجنڑ آلے کُوں نئیں جانڑدے۔

²² جے مَیں آ تے اُنہاں نال کلام نہ کریندا تاں او گُنہگار نہ تھیندے پر ہُنڑ اُنہاں دے گُناہ دا اُنہاں کولھ کوئی عُذر نئیں۔

²³ جیہڑا میڈے نال نفرت کریندے او میڈے باپ نال وی نفرت کریندے۔

²⁴ جے مَیں اُنہاں ءچ او کم نہ کریندا جیہڑے کہیں ڈُوجھے نئیں کیتے تاں او گُنہگار نہ ہوندے پر ہُنڑ اُنہاں ایہ سبھ ڈِٹھا تے وَل وی میڈے تے میڈے باپ ڈوہائیں نال نفرت کیتی ہے۔

²⁵ پر ایہ اِیں واسطے تھیّا جو اُنہاں دی شریعت ءچ لِکھی ہوئی گالھ پُوری تھی ونجے جو اُنہاں میڈے نال بِلاوجہ نفرت کیتی۔

²⁶ پر جِیں ویلے او مددگار آسی جِینکُوں مَیں تُہاڈے کولھ باپ دی طرفوں بھجیساں، یعنی سچائی دا رُوح جیہڑا باپ دی طرفوں صادر تھیندا ہے تاں او میڈی گواہی ڈیسی۔

²⁷ تے تُساں وی گواہی ڈیسو کیوں جو شروع کنُوں میڈے نال ہیوے۔“