یُوحنّا 10 - کِتاب مُقدّس سرائیکی ترجمہ

آجڑی دی مثال

¹ ”مَیں تُہاکُوں سچ آدھا ہاں جو جیہڑا کوئی بھیڈاں دے واڑے ءچ دروازے کنُوں داخل نئیں تھیندا بلکہ کہیں بئے پاسُوں ٹپ تے اندر آندے، او چور تے ڈاکو ہے۔

² پر جیہڑا دروازے کنُوں اندر آندے او بھیڈاں دا آجڑی ہے۔

³ چوکیدار اُوندے کیتے دروازہ کھولیندے تے بھیڈاں اُوندی اواز سُنڑدیاں ہِن۔ او آپنڑی ہر بھیڈ دا ناں گِھن تے اُنہاں کُوں سڈیندے تے اُنہاں کُوں باہر گِھن ویندے۔

⁴ جِیں ویلے او آپنڑیاں ساریاں بھیڈاں کُوں باہر کڈھ گِھندے تاں اُنہاں دے اگُوں اگُوں ٹُردے تے اُوندیاں بھیڈاں اُوندے پِچُھوں پِچُھوں ٹُردیاں ہِن، کیوں جو او اُوندی اواز سُنجڑیندیاں ہِن،

⁵ پر او کہیں غیر دے پِچُھوں کڈھائیں نہ ٹُرسن بلکہ اُوں کنُوں دُور بھجسن کیوں جو او اُوں غیر دی اواز نئیں سُنجڑیندیاں۔“

⁶ یسُوع اُنہاں کُوں ایہ مثال سُنڑائی پر او نہ سمجھے جو او اُنہاں نال کیا گالھیں کریندے۔

یسُوع چنگا آجڑی ہے

⁷ بس یسُوع اُنہاں کُوں ولا آکھیا، ”مَیں تُہاکُوں سچ آدھا ہاں جو بھیڈاں دا دروازہ مَیں ہاں۔

⁸ او سارے جیہڑے مَیں کنُوں پہلے آئے چور تے ڈاکو ہَن، اِیں واسطے بھیڈاں اُنہاں دی نہ سُنڑی۔

⁹ دروازہ مَیں ہاں۔ جیہڑا کوئی میڈے ذریعے داخل تھیسی، او نجات پیسی تے اندر باہر آندا ویندا راہسی تے ساوی گھاہ پیسی۔

¹⁰ چور صرف چوری کرݨ، مار گھتنڑ تے برباد کرݨ آندے۔ مَیں اِیں واسطے آیا ہاں جو لوک زندگی پاوݨ تے کثرت نال پاوݨ۔

¹¹ چنگا آجڑی مَیں ہاں۔ چنگا آجڑی آپنڑیاں بھیڈاں کیتے جان ڈیندے۔

¹² پر مزدُور جیہڑا نہ تاں بھیڈاں دا آجڑی ہوندے تے نہ ای مالک، او نہر کُوں آندا ڈیکھ تے بھیڈاں کُوں چھوڑ تے بھج ویندے تے نہر بھیڈاں کُوں پکڑ تے تِتربِتر کر ڈیندے۔

¹³ او اِیں واسطے بھج ویندے کیوں جو او مزدُور ہے تے اُونکُوں بھیڈاں دی فِکر نئیں۔

¹⁴ چنگا آجڑی مَیں ہاں۔ مَیں آپنڑیاں بھیڈاں کُوں جانڑدا ہاں تے او میکُوں جانڑدیاں ہِن،

¹⁵ بالکل اُونویں ای جِینویں باپ میکُوں جانڑدے تے مَیں باپ کُوں جانڑدا ہاں۔ تے مَیں بھیڈاں کیتے آپنڑی جان ڈیندا ہاں۔

¹⁶ میڈیاں بیاں وی بھیڈاں ہِن جیہڑیاں اِیں واڑے دیاں نئیں۔ میکُوں ضرور ہے جو مَیں اُنہاں کُوں وی گِھن آواں تے او میڈی اواز سُنڑسن۔ وَل ہِکو اِجڑ تے ہِکو آجڑی ہوسی۔

¹⁷ میڈا باپ میکُوں اِیں واسطے پیار کریندے، جو مَیں آپنڑی جان قُربان کریندا ہاں تاں جو اُونکُوں ولا گِھن گِھناں۔

¹⁸ میڈی جان مَیں کنُوں کوئی وی نئیں کھسیندا بلکہ مَیں آپنڑی مرضی نال اُونکُوں قُربان کریندا ہاں۔ میڈے کولھ اُونکُوں ڈیوݨ دا وی اِختیار ہے تے اُونکُوں ولا گِھننڑ دا وی اِختیار ہے۔ ایہ حُکم میکُوں میڈے باپ کنُوں مِلیا ہے۔“

¹⁹ اِنہاں گالھیں دے سببّوں یہُودیاں ءچ وَل پُھٹ پے گئی۔

²⁰ اُنہاں ءچوں بہُوں سارے تاں آکھنڑ لگے، ”اُوندے ءچ بدرُوح ہے تے او پاگل ہے۔ تُساں اُوندی کیوں سُنڑدے ہیوے؟“

²¹ بئے بندیاں آکھیا، ”ایہ ایجھے بندے دے گالھیں نئیں جیندے ءچ بدرُوح ہووے۔ کیا کوئی بدرُوح اندھیاں دے اکھیں کھول سگدی ہے؟“

یسُوع کُوں رَد کیتا ویندے

²² یروشلیم ءچ ہیکل دی مخصوصیت دی عید ہئی تے سیالا ہا۔

²³ یسُوع ہیکل دے سُلیمانی برانڈے ءچ ٹہلدا پِیا ہا۔

²⁴ یہُودی اُوندے چودھارُوں جمع تھی تے آکھنڑ لگے، ”تُوں کڈھاں تئیں ساکُوں شک ءچ رکھیسیں؟ جے تُوں المسیح ہیں تاں ساکُوں صاف صاف ڈسا۔“

²⁵ یسُوع جواب ڈِتا، ”مَیں تاں تُہاکُوں ڈسا ڈِتے پر تُساں میڈا یقین ای نئیں کریندے۔ جیہڑے کم مَیں آپنڑے باپ دے ناں نال کریندا ہاں، اُوہو میڈے گواہ ہِن۔

²⁶ پر تُساں اِیں واسطے یقین نئیں کریندے کیوں جو تُساں میڈیاں بھیڈاں نئیں۔

²⁷ میڈیاں بھیڈاں میڈی اواز سُنڑدیاں ہِن تے مَیں اُنہاں کُوں جانڑدا ہاں تے او میڈے پِچُھوں پِچُھوں ٹُردیاں ہِن۔

²⁸ مَیں اُنہاں کُوں ہمیشاں دی زندگی ڈیندا ہاں تے او کڈھائیں ہلاک نہ تھیسن، تے کوئی اُنہاں کُوں میڈے ہتھ کنُوں کَھس نہ سگسی۔

²⁹ میڈا باپ جئیں اُنہاں کُوں میڈے سپُرد کیتے ساریاں کنُوں وڈا ہے تے کوئی اُنہاں کُوں میڈے باپ دے ہتھ کنُوں نئیں کَھس سگدا۔

³⁰ مَیں تے میڈا باپ ہِکو ہاں۔“

³¹ یہُودیاں ولا اُونکُوں سنگسار کرݨ کیتے پتھر چا تے۔

³² یسُوع اُنہاں کُوں آکھیا، ”مَیں تُہاکُوں آپنڑے باپ دی طرفوں وڈے وڈے کم ڈِکھائے ہِن۔ تُساں اُنہاں ءچوں کیہڑے کم دی وجہ کنُوں میکُوں سنگسار کریندے ہیوے؟“

³³ یہُودیاں اُونکُوں جواب ڈِتا، ”چنگے کم دی وجہ کنُوں نئیں بلکہ کُفر دے سببّوں سنگسار کریندے ہیں کیوں جو تُوں محض اِنسان ہوندے ہوئے آپنڑے آپ کُوں خُدا بنڑیندیں۔“

³⁴ یسُوع اُنہاں کُوں جواب ڈِتا، ”کیا تُہاڈی شریعت ءچ ایہ نئیں لِکھیا جو خُدا آکھے، ’تُساں خُدا ہیوے؟‘

³⁵ جِیں ویلے اُوں اُنہاں کُوں خُدا آکھیا جِنہاں کولھ اُوندا کلام آیا، تے کتاب ِ مُقدّس غلط نئیں تھی سگدی،

³⁶ تاں تُساں میڈے بارے ءچ جِینکُوں باپ مقرر کر تے دُنیا ءچ بھیجیا، کِینویں اکھیندے ہیوے جو تُوں کُفر بکدا ہیں، اِیں واسطے جو مَیں آکھیا، مَیں خُدا دا پوتر ہاں؟

³⁷ جے مَیں آپنڑے باپ دے کم نہ کراں تاں میڈا یقین نہ کرو۔

³⁸ پر جے مَیں کریندا ہاں تاں بھانویں میڈا یقین نہ کرو پر اُنہاں کماں دا یقین تاں کرو، تاں جو جاݨ گِھنو تے سمجھ گِھنو جو باپ میڈے ءچ ہے تے مَیں باپ ءچ۔“

³⁹ اُنہاں ولا اُونکُوں پکڑن دی کوشش کیتی پر او اُنہاں دے ہتُھوں نِکل گِیا۔

⁴⁰ یسُوع ولا یردن دریا دے پار اُوں جاہ تے چلیا گِیا جِتھاں یُوحنّا شروع ءچ بپتسمہ ڈیندا ہا تے اُتھائیں ریہا۔

⁴¹ بہُوں سارے لوک اُوندے کولھ آئے تے آکھنڑ لگے ”یُوحنّا تاں کوئی معجزہ نئیں ڈِکھایا پر جیہڑا کُجھ یُوحنّا اِیندے بارے ءچ آکھیا ہا او سچ ہا۔“

⁴² تے اُتھاں بہُوں سارے اُوندے اُتے اِیمان گِھن آئے۔