یُوحنّا 1 - کِتاب مُقدّس سرائیکی ترجمہ

زندگی دا کلام

¹ ابتدا ءچ کلام ہا تے کلام خُدا دے نال ہا تے کلام خُدا ہا۔

² اِیہو ابتدا ءچ خُدا دے نال ہا۔

³ سبھ چیزاں اُوندے وسیلے خلق تھیّاں تے جیہڑا کُجھ خلق تھئے، اُنہاں ءچوں کوئی چیز اُوندے بغیر خلق نئیں تھئی۔

⁴ اُوندے ءچ زندگی ہئی تے او زندگی اِنساناں دا نُور ہئی۔

⁵ نُور اندھارے ءچ چمکدا ہے تے اندھارا اُوندے اُتے غالب نہ آیا۔

⁶ خُدا ہِک بندے کُوں بھیجیا جِیندا ناں یُوحنّا ہا۔

⁷ او اِیں واسطے آیا جو او نُور دی گواہی ڈیوے تاں جو سارے اُوندے وسیلہ نال اِیمان گِھن آوݨ۔

⁸ یُوحنّا خود تاں نُور نہ ہا پر نُور دی گواہی ڈیوݨ آیا ہا۔

⁹ سچا نُور جیہڑا ہر ہِک اِنسان کُوں روشن کریندے، دُنیا ءچ آوݨ آلا ہا۔

¹⁰ او دُنیا ءچ ہا تے دُنیا اُونکُوں نہ پچھانڑیا بھانویں جو دُنیا اُوندے وسیلے نال پیدا تھئی۔

¹¹ او اُوندے ءچ آیا جیہڑا اُوندا آپنڑا ہا پر اُوندے آپنڑیاں اُونکُوں قبول نہ کیتا،

¹² پر جِتنیاں اُونکُوں قبول کیتا یعنی جیہڑے اُوندے ناں اُتے اِیمان گِھن آئے ہِن، اُوں اُنہاں کُوں خُدا دے فرزند بنڑݨ دا حق بخشیا۔

¹³ او نہ خون کنُوں، نہ جِسمانی خواہش کنُوں تے نہ اِنسان دے اِرادے کنُوں بلکہ خُدا کنُوں پیدا تھئے۔

¹⁴ کلام جِسم اِختیار کیتا تے ساڈے وچال راہندا ریہا۔ اساں اُوندا جلال ڈِٹھا جیہڑا فضل تے سچائی نال بھریا ہویا ہا، ایجھا جلال جِینویں باپ دے اِکلوتے پوتر دا ہوندے۔

¹⁵ اُوندے بارے ءچ یُوحنّا گواہی ڈِتی تے اُچی اواز ءچ آکھیا جو ”ایہ اُوہو ہے جیندے حق ءچ مَیں آکھیا ہا جو جیہڑا میڈے بعد آوݨ آلا ہے، او مَیں کنُوں افضل ہے کیوں جو او مَیں کنُوں پہلے موجود ہا۔“

¹⁶ او فضل کنُوں بھریا ہا تے اساں اُوندے فضل ءچوں فضل اُتے فضل پایا۔

¹⁷ کیوں جو شریعت تاں مُوسیٰ دے وسیلے ڈِتی گئی پر فضل تے سچائی یسُوع مسیح دے وسیلے مِلی۔

¹⁸ خُدا کُوں کڈھائیں کہیں نئیں ڈِٹھا پر اِکلوتا پوتر جیہڑا باپ دی گود ءچ ہے، اُوں ای اُونکُوں ظاہر کیتا۔

یُوحنّا بپتسمہ ڈیوݨ آلے دی تبلیغ

¹⁹ تے یُوحنّا دی گواہی ایہ ہے جڈاں یہُودیاں یروشلیم تُوں کاہِن تے لاوی اُوندے کولھ ایہ پُچھنڑ کیتے بھیجے جو ”تُساں کوݨ ہیوے؟“

²⁰ اُوں اِنکار نہ کیتا بلکہ صاف صاف اِقرار کیتا جو ”مَیں تاں المسیح نئیں۔“

²¹ اُنہاں یُوحنّا کنُوں پُچھیا، ”وَل تُساں کوݨ ہیوے؟ کیا تُساں ایلیّاہ ہیوے؟“ یُوحنّا جواب ڈِتا، ”مَیں نئیں۔“ ”کیا تُساں او نبی ہیوے؟“ یُوحنّا جواب ڈِتا، ”نئیں۔“

²² بس اُنہاں پُچھیا، ”وَل تُساں کوݨ ہیوے؟ ساکُوں ڈساؤ، تاں جو اساں آپنڑے بھیجنڑ آلیاں کُوں ڈسا سگوں۔ تُساں آپنڑے حق ءچ کیا آدھے ہیوے؟“

²³ اُوں آکھیا، ”جِینویں یسعیاہ نبی آکھیا ہے ’مَیں بیابان ءچ ہکل ڈیوݨ آلے دی اواز ہاں جو رب دی راہ کُوں سِدھا بنڑاؤ‘۔“

²⁴ فریسی فرقے دے جیہڑے لوک بھیجے گئے ہَن،

²⁵ اُنہاں یُوحنّا کنُوں ایہ پُچھیا، ”جے تُساں نہ المسیح ہیوے، نہ ایلیّاہ، نہ او نبی تاں وَل بپتسمہ کیوں ڈیندے ہیوے؟“

²⁶ یُوحنّا جواب ءچ اُنہاں کُوں آکھیا جو ”مَیں تاں پانڑی نال بپتسمہ ڈیندا ہاں پر تُہاڈے وچال ہِک بندہ موجود ہے جِینکُوں تُساں نئیں جانڑدے۔

²⁷ او میڈے بعد آوݨ آلا ہے تے مَیں تاں اُوندی جُتی دا تسمہ کھولنڑ دے وی لائق نئیں۔“

²⁸ ایہ واقعات یردن دریا دے پار بیت عنیاہ ءچ پیش آئے جِتھاں یُوحنّا بپتسمہ ڈیندا ہا۔

خُدا دا لیلا

²⁹ ڈُوجھے ڈینہہ یُوحنّا یسُوع کُوں آپنڑے کولھ آندے ڈیکھ تے آکھیا ”ڈیکھو ایہ خُدا دا لیلا ہے جیہڑا دُنیا دا گُناہ چا تے گِھن ویندے۔

³⁰ ایہ اُوہو ہے جیندے بارے ءچ مَیں آکھیا ہا جو ’میڈے بعد ہِک بندہ آوݨ آلا ہے جیہڑا مَیں کنُوں افضل ہے اِیں واسطے جو او مَیں کنُوں پہلے ای موجود ہا۔‘

³¹ مَیں خود تاں اُونکُوں نہ جانڑدا ہم پر مَیں اِیں واسطے پانڑی نال بپتسمہ ڈیندا آیا تاں جو او بنی اِسرائیل اُتے ظاہر تھی ونجے۔“

³² وَل یُوحنّا ایہ گواہی ڈِتی جو ”مَیں رُوح القُدس کُوں کبوتر وانگُوں اسمان کنُوں لہندے ڈِٹھے تے او اُوندے اُتے کھڑ گِیا۔

³³ مَیں تاں اُونکُوں پچھانڑدا نہ ہم پر جئیں میکُوں پانڑی نال بپتسمہ ڈیوݨ کیتے بھیجیا ہا اُوں میکُوں ڈسایا جو ’جیندے اُتے رُوح القُدس کُوں لہندے تے کھڑ دا ڈیکھیں، اُوہو رُوح القُدس نال بپتسمہ ڈیسی۔‘

³⁴ بس مَیں ڈِٹھے تے گواہی ڈِتی ہے جو ایہ خُدا دا پوتر ہے۔“

یسُوع دا پہلا شاگرد

³⁵ ڈُوجھے ڈینہہ یُوحنّا آپنڑے ڈُو شاگرداں نال اُتھاں کھڑا ہا۔

³⁶ اُوں یسُوع کُوں اُتھوں لنگھدا ڈیکھ تے آکھیا ”ڈیکھو! ایہ خُدا دا لیلا ہے۔“

³⁷ ایہ گالھ سُنڑ تے اُوندے ڈوہائیں شاگرد یسُوع دے پِچُھوں ٹُر پئے۔

³⁸ یسُوع مُڑ تے اُنہاں کُوں پِچُھوں آندے ڈِٹھا تاں اُنہاں کنُوں پُچھیا، ”تُساں کیا گولھیندے ہیوے؟“ اُنہاں آکھیا، ”ربّی، (یعنی اُستاد) تُساں کِتھاں راہندے ہیوے؟“

³⁹ اُوں جواب ڈِتا ”جُلو ڈیکھ گِھنو۔“ بس او نال ٹُر پئے تے او جاہ ڈِٹھی جِتھاں او راہندا ہا تے باقی ڈینہہ اُوندے نال گُزار ڈِتا، ایہ ڈاہویں گھنٹے دے نیڑے دا ویلا ہا۔

⁴⁰ اُنہاں ڈوہائیں ءچوں جیہڑے یُوحنّا دی گالھ سُنڑ تے یسُوع دے پِچُھوں تھی پئے ہَن، ہِک اندریاس ہا جیہڑا شمعون پطرس دا بِھرا ہا۔

⁴¹ اندریاس پہلا کم ایہ کیتا جو آپنڑے بِھرا شمعون کُوں گولھ تے اُونکُوں آکھیا جو ”ساکُوں المسیح مِل گِیا ہے۔“ (مسیح دا مطلب خُدا دا چُنڑیا ہویا بادشاہ ہے۔)

⁴² او اُونکُوں یسُوع دے کولھ گِھن آیا۔ یسُوع اُوندے اُتے نِگاہ کیتی تے آکھیا، ”تُوں یُوحنّا دا پوتر شمعون ہیں۔ ہُنڑ کنُوں تیڈا ناں کیفا ہوسی۔“ (کیفا دا ترجمہ پطرس ہے جِیندا مطلب پتھر ہے۔)

یسُوع فِلپُس تے نتن ایل کُوں سڈیندے

⁴³ ڈُوجھے ڈینہہ یسُوع گلیل ءچ ونجنڑ دا اِرادہ کیتا تے فِلپُس کُوں آکھیا، ”میڈے پِچُھوں تھی پو۔“

⁴⁴ اندریاس تے پطرس وانگُوں فِلپُس دا وطنی شہر بیت صیدا ہا۔

⁴⁵ فِلپُس، نتن ایل کُوں مِلیا تاں اُونکُوں آکھنڑ لگا جو ”جِیندا ذِکر مُوسیٰ توریت ءچ تے نبیاں صحائف ءچ کیتے، او ساکُوں مِل گِیا ہے۔ او یُوسف دا پوتر یسُوع ناصری ہے۔“

⁴⁶ نتن ایل پُچھیا، ”کیا ناصرت ءچوں کوئی چنگی چیز نِکل سگدی ہے؟“ فِلپُس آکھیا، ”جُل تے خود ای ڈیکھ گِھن۔“

⁴⁷ یسُوع نتن ایل کُوں آندے ڈِٹھا تاں اُوندے بارے آکھیا، ”ڈیکھو! ایہ اصلی اِسرائیلی ہے، اِیندے ءچ مکر نئیں۔“

⁴⁸ نتن ایل پُچھیا، ”تُساں میکُوں کِینویں جانڑدے ہیوے؟“ یسُوع جواب ڈِتا، ”فِلپُس دے سڈݨ کنُوں پہلے جیہڑے ویلے تُوں ہنجیر دے درخت تلے ہَویں مَیں تیکُوں ڈیکھ گِھدا ہا۔“

⁴⁹ نتن ایل آکھیا، ”ربّی! تُساں خُدا دے پوتر ہیوے۔ تُساں اِسرائیل دے بادشاہ ہیوے۔“

⁵⁰ یسُوع جواب ءچ اُونکُوں آکھیا، ”کیا تُوں ایہ سُنڑ تے جو مَیں تیکُوں ہنجیر دے درخت دے تلے ڈِٹھا ہا، اِیں واسطے اِیمان گِھن آئیں؟ تُوں اِیں کنُوں وی وڈے وڈے کم ڈیکھسیں۔“

⁵¹ وَل اُونکُوں آکھیا، ”مَیں تُہاکُوں سچ آدھا ہاں جو تُساں اسمان کُوں کُھلا تے خُدا دے فرشتیاں کُوں اُتے ویندے تے اِبنِ آدم اُتے لہندے ڈیکھسو۔“