یعقُوب 3 - کِتاب مُقدّس سرائیکی ترجمہ

زبان اُتے قابو

¹ میڈے بِھراؤ! تُہاڈے ءچوں بہُوں سارے کلام سِکھاوݨ آلے نہ بنڑݨ کیوں جو تُساں جانڑدے ہیوے جو خُدا ڈُوجھیاں دے مُقابلے ءچ اساں اُستاداں دی زیادہ سختی نال عدالت کریسی۔

² اِیں واسطے جو اساں سبھ بہُوں ساریاں غلطیاں کریندے ہیں۔ کامِل بندہ او ہے جیہڑا آپنڑی کہیں گالھ ءچ خطا نئیں کریندا۔ ایجھا بندہ آپنڑے سارے بدن کُوں وی قابو ءچ رکھ سگدے۔

³ ڈیکھو، اساں گھوڑیاں دے مُنہ ءچ لگام پا ڈیندے ہیں تاں جو او ساڈا حُکم مننڑ تے اِینویں اساں اُنہاں دا پُورا جِسم آپنڑی مرضی نال گُھما سگدے ہیں۔

⁴ سمندری جہازاں کُوں وی ڈیکھو، بھانویں او وڈے وڈے ہوندن تے تیز ہواواں نال چلائے ویندن، وَل وی ہِک چھوٹے چپُو دے ذریعے چلاوݨ آلے دی مرضی دے مطابق موڑے وَنج سگدن۔

⁵ اِینویں ای زبان وی جِسم دا ہِک چھوٹا جِیہا اَنگ ہے پر وڈی شیخی مریندی ہے۔ ڈیکھو! ہِک چھوٹی جیہی چنگاری نال کتنے وڈے جنگل ءچ بھاہ لگ ویندی ہے۔

⁶ زبان وی ہِک بھاہ ہے۔ او باقی انگاں دے وچال رہ تے آپنڑے اندر بُرائی دی ہِک دُنیا رکھی پئی ہے۔ زبان ساڈا او اَنگ ہے جیہڑا سارے جِسم کُوں وِگاڑ ڈیندے تے اِنسان دی ساری زندگی کُوں ساڑ ڈیندے کیوں جو او خود دوزخ دی بھاہ نال بلدا راہندے۔

⁷ اِنسان ہر قِسم دے جانوراں، پکھیاں، کیڑے مکوڑیاں تے سمندری جانوراں کُوں آپنڑے قابو ءچ کر سگدے بلکہ کیتا وی ہے۔

⁸ پر کوئی اِنسان زبان کُوں قابو ءچ نئیں رکھ سگدا۔ ایہ ہِک بلا ہے جیہڑی کڈھائیں نئیں رُکدی تے ہلاک کرݨ آلے زہر نال بھری ہوئی ہے۔

⁹ اِیں زبان نال ای اساں آپنڑے خُداوند تے باپ دی حمد کریندے ہیں تے اِیندے نال ای اِنساناں کُوں جیہڑے خُدا دی صورت اُتے خلق کیتے گئے ہِن لعنت کریندے ہیں۔

¹⁰ ہِکو مُنہ ءچوں برکت تے لعنت نِکلدی ہے۔ میڈے بِھراؤ، اِینویں تاں نئیں ہوونڑا چاہیدا۔

¹¹ کیا چشمہ دے ہِکو مُنہ ءچوں مِٹھا تے کھارا پانڑی نِکل سگدے؟

¹² میڈے بِھراؤ، کیا ہنجیر دے درخت تُوں زیتون یا انگُور تُوں ہنجیر پیدا تھی سگدے ہِن؟ نئیں۔ اِینویں ای کھارے پانڑی دے چشمہ ءچوں مِٹھا پانڑی نئیں نِکل سگدا۔

اسمانی حِکمت

¹³ تُہاڈے ءچوں کیہڑا دانشمند تے سمجھدار ہے؟ جے کوئی ایجھا ہے تاں او اِینکُوں آپنڑے چنگے چال چلنڑ دے ذریعے ثابت کرے تے ایجھے نیک اعمال دے ذریعے وی جیہڑے حِکمت تُوں پیدا تھیوݨ آلی حلیمی نال کیتے ویندن۔

¹⁴ پر جے تُہاڈے دل ءچ سخت حسد تے خود غرضی ہے تاں شیخی نہ مارو تے نہ ای سچائی دے خلاف کُوڑ مارو۔

¹⁵ ایجھی حِکمت اسمان کنُوں نئیں لہندی بلکہ دُنیاوی، نفسانی تے شیطانی ہے۔

¹⁶ کیوں جو جِتھاں حسد تے خود غرضی ہوندی ہے اُتھاں فساد تے ہر طرحاں دا بُرا کم وی ہوندا ہے۔

¹⁷ پر جیہڑی حِکمت اسمان کنُوں آندی ہے، اوّل تاں او پاک ہوندی ہے، وَل امن پسند، نرم مزاج تے تربیت قبول کرݨ آلی ہوندی ہے تے رحم تے چنگے کماں نال بھری ہوندی ہے۔ اُوندے ءچ طرفداری تے منافقت نئیں ہوندی۔

¹⁸ صُلح کراوݨ آلے جیہڑے صُلح رہیندن او راستبازی دی فصل کپیندن۔