یعقُوب 2 - کِتاب مُقدّس سرائیکی ترجمہطرفداری دے خلاف تنبیہ 1 میڈے بِھراؤ، ساڈے جلالی خُداوند یسُوع مسیح اُتے اِیمان رکھیندے ہوئے تُہاڈے ءچ طرفداری نہ ہووے۔ 2 جے ہِک بندہ سونے دی مُندری تے شاندار کپڑے پاتے ہوئے تُہاڈی جماعت ءچ آوے تے ہِک غریب بندہ میلے کُچیلے کپڑے پاتے ہوئے آوے۔ 3 تے تُساں اُوں شاندار کپڑے آلے دا لحاظ کر تے اُونکُوں آکھو جو ”اِتھاں چنگی جاہ تے باہو“ پر اُوں غریب کُوں آکھو جو ”تُوں اُتھاں کھڑا رہ“ یا ”میڈے پیراں دے کولھ بہہ وَنج“ 4 تاں کیا تُساں طرفداری نہ کیتی تے بدنیتی نال فیصلہ نہ کیتا؟ 5 میڈے پیارے بِھراؤ سُنڑو! کیا خُدا دُنیا دے غریباں کُوں نئیں چُنڑیا جو اِیمان ءچ دولت مند ہووݨ تے اُوں بادشاہی دے وارث ہووݨ جِیندا اُوں آپنڑے محبت رکھنڑ آلیاں کُوں ڈیوݨ دا وعدہ کیتے؟ 6 پر تُساں غریب دی بے عزتی کیتی۔ کیا دولت مند ای تُہاڈے اُتے ظلم نئیں کریندے تے تُہاکُوں عدالتاں ءچ گِھیل تے نئیں گِھن ویندے؟ 7 کیا ایہ لوک مسیح دے ناں دی توہین نئیں کریندے جیندے ناں تُوں تُساں اکھویندے ہیوے؟ 8 پر جے تُساں خُدا دے کلام دے اِیں شاہی فرمان اُتے جو ”آپنڑے ہمسائے نال آپنڑے وانگُوں محبت رکھ“ عمل کریندے ہیوے تاں چنگا کریندے ہیوے۔ 9 پر جے تُساں طرفداری نال کم گِھندے ہیوے تاں گُناہ کریندے ہیوے تے شریعت تُہاکُوں قصُوروار کھڑیندی ہے۔ 10 کیوں جو جے کوئی ساری شریعت اُتے عمل کرے پر کہیں ہِک حُکم دا نافرمان ہووے تاں او ساری شریعت دا قصُوروار کھڑدے۔ 11 کیوں جو جئیں آکھیا جو ”زِنا نہ کر،“ اُوں ایہ وی آکھیا جو ”خون نہ کر۔“ بس جے تُوں زِنا تاں نئیں کریندا پر خون کریندیں تاں تُوں شریعت دا نافرمان بنڑیا۔ 12 اِیں واسطے تُساں جیہڑا کُجھ وی اکھیندے یا کریندے ہیوے، یاد رکھو جو تُہاڈی عدالت ازاد کرݨ آلی شریعت دے مطابق تھیسی۔ 13 کیوں جو جئیں رحم نئیں کیتا، اُوندا اِنصاف بغیر رحم دے کیتی ویسی پر رحم اِنصاف اُتے غالب آندے۔ اِیمان تے اعمال 14 میڈے بِھراؤ! جے کوئی دعویٰ کرے جو مَیں اِیمان رکھیندا ہاں پر عمل نہ کریندا ہووے تاں کیا فائدہ؟ کیا ایجھا اِیمان اُونکُوں نجات ڈے سگدے؟ 15 جے کہیں بِھرا یا بھینڑ کولھ کپڑے تے روزانہ کھاوݨ کیتے روٹی نہ ہووے، 16 تے تُہاڈے ءچوں کوئی اُونکُوں آکھے جو ”سلامتی نال وَنج، گرم تھی، تے کھا پی،“ پر اُنہاں کُوں جِسمانی ضرورت دیاں چیزاں نہ ڈیوے تاں کیا فائدہ؟ 17 اِینویں ای جے اِیمان دے نال اعمال نہ ہووݨ تاں او اِیمان مُردہ ہے۔ 18 تھی سگدے جو کوئی آکھے جو ”تُوں اِیمان رکھیندا ہیں پر مَیں نیک اعمال کریندا ہاں۔“ تُوں بغیر اعمال دے آپنڑا اِیمان میکُوں ڈِکھا تے مَیں آپنڑا اِیمان آپنڑے اعمال تُوں تیکُوں ڈِکھیساں۔ 19 تُوں اِیمان رکھیندیں جو خُدا ہِک ای ہے۔ بہُوں چنگا کریندیں، ایہ تاں بدرُوحاں وی منیندیاں ہِن تے ڈر تے کمبدیاں ہِن۔ 20 پر بیوقُوف! کیا تُوں ایہ وی نئیں سمجھدا جو اِیمان اعمال دے بغیر مُردہ ہے؟ 21 جِیں ویلے ساڈے پِیُو ابرہام آپنڑے پوتر اِضحاق کُوں قُربان گاہ اُتے نذر کیتا تاں کیا او آپنڑے اُوں عمل دی وجہ کنُوں راستباز نہ کھڑایا گِیا؟ 22 تُساں ڈیکھ سگدے ہیوے جو اُوندے اِیمان اُوندے اعمال نال رَل تے کم کیتا تے اعمال دے ذریعے اِیمان کامِل تھی گِیا۔ 23 اِینویں خُدا دے کلام دی ایہ گالھ پُوری تھئی جو ”ابرہام خُدا اُتے اِیمان گِھن آیا تے ایہ اُوندے کیتے راستبازی شمار کیتا گِیا،“ تے ”او خُدا دا دوست اکھوایا۔“ 24 بس تُساں ڈیکھ گِھدے جو اِنسان اعمال نال راستباز کھڑایا ویندے نہ جو کلھے اِیمان نال۔ 25 اِینویں ای کیا راحب طوائف آپنڑے اعمال دی وجہ تُوں راستباز نہ کھڑائی گئی جڈاں اُوں جاسُوساں کُوں پناہ ڈِتی تے ڈُوجھے رستے کنُوں بھیج ڈِتا؟ 26 بس جِینویں بدن بغیر رُوح دے مُردہ ہے، اُونویں ای اِیمان وی بغیر اعمال دے مُردہ ہے۔ |
Modern Central Saraiki Bible © 2024 Strategic Resource Group
Strategic Resource Group