یعقُوب 1 - کِتاب مُقدّس سرائیکی ترجمہ

تعارف

¹ ایہ خط میں یعقُوب دی طرفوں ہے جیہڑا خُدا دا تے خُداوند یسُوع مسیح دا خادم ہاں، بنی اِسرائیل دے بارہاں قبیلیاں کُوں جیہڑے غیر یہُودی قوماں ءچ تِتربِتر تھی گئے ہِن، سلام پُجے۔

اِیمان تے حِکمت

² میڈے بِھراؤ، جِیں ویلے تُساں طرحاں طرحاں دیاں ازمائیشاں دا سامنڑا کریندے ہیوے تاں اِینکُوں وڈی خوشی دی گالھ سمجھو۔

³ کیوں جو تُساں جانڑدے ہیوے جو تُہاڈے اِیمان دا اِمتحان تُہاڈے ءچ صبر پیدا کریندے۔

⁴ تے صبر کُوں آپنڑا اثر پُورا کرݨ ڈیؤ تاں جو تُساں پکّے تے کامِل تھی ونجو تے تُہاڈے ءچ کہیں گالھ دی کمی نہ راہوے۔

⁵ جے تُہاڈے ءچوں کہیں ءچ حِکمت دی کمی ہووے تاں او خُدا کنُوں منگے جیہڑا جِھڑکے بغیر ساریاں کُوں فیاضی نال ڈیندے تے خُدا اُونکُوں ڈیسی۔

⁶ پر اِیمان نال منگے تے ذرا وی شک نہ کرے، کیوں جو شک کرݨ آلا سمندر دی چھل وانگُوں ہوندے جیہڑی ہوا دے زور نال اُچھلدی راہندی ہے۔

⁷ ایجھا بندہ ایہ نہ سمجھے جو اُونکُوں خُداوند کنُوں کُجھ مِلسی،

⁸ کیوں جو او ڈُو دِلا ہے تے کہیں گالھ اُتے نئیں کھڑدا۔

غربت تے دولت

⁹ غریب بِھرانواں کُوں مسیح ءچ آپنڑے اُچے مرتبہ اُتے فخر کرنڑا چاہیدے۔

¹⁰ تے دولت مند بِھرانواں کُوں آپنڑے چھوٹے مرتبہ اُتے کیوں جو او گھاہ دے پُھل وانگُوں مُرجھا ویسن۔

¹¹ جِیں ویلے سِجھ نِکلدے تاں دُھپ دی تیزی گھاہ کُوں سُکا ڈیندی ہے، اُوندا پُھل جَھڑ ویندے تے اُوندی خوبصورتی ختم تھی ویندی ہے۔ اِینویں ای دولت مند وی آپنڑی راہ اُتے ٹُردے ٹُردے مِٹی ءچ مِل ویسی۔

اِمتحان تے ازمائش

¹² مُبارک ہے او بندہ جیہڑا ازمائش ویلے ثابت قدم راہندے، کیوں جو کامیاب تھیوݨ اُتے اُونکُوں اِنعام ءچ زندگی دا او تاج مِلسی جِیندا وعدہ خُداوند آپنڑے سبھ پیار کرݨ آلیاں نال کیتے۔

¹³ ازمائش ویلے کوئی ایہ نہ آکھے جو ”ایہ ازمائش خُدا دی طرفوں ہے،“ کیوں جو نہ تاں خُدا بُرائی نال ازمایا وَنج سگدے تے نہ او کہیں کُوں ازمائش ءچ پیندے۔

¹⁴ بلکہ ہر بندہ اُوں ویلے ازمایا ویندے جِیں ویلے اُوندی نفسانی خواہش اُونکُوں ورغلا تے پَھسا گِھندی ہے۔

¹⁵ وَل خواہش حاملہ تھی تے گُناہ پیدا کریندی ہے تے گُناہ بالغ تھی تے موت پیدا کریندے۔

¹⁶ میڈے پیارے بِھراؤ، دوکھا نہ کھاؤ۔

¹⁷ ہر چنگی برکت تے کامِل نعمت اسمان کنُوں خُدا دی طرفوں مِلدی ہے جیہڑا نُوراں دا خالق ہے۔ اُوندے ءچ نہ تبدیلی آندی ہے تے نہ ای او پچھانویں وانگُوں تبدیل تھیندے۔

¹⁸ اُوں آپنڑی مرضی نال ساکُوں سچائی دے کلام دے وسیلے نال پیدا کیتا تاں جو اساں اُوندی مخلوقات ءچوں پہلے پھل وانگُوں خاص تھیؤں۔

سُنڑنڑا تے عمل کرنڑا

¹⁹ میڈے پیارے بِھراؤ، یاد رکھو جو ہر بندہ سُنڑݨ ءچ تیز، بولنڑ ءچ اتاولا نہ ہووے تے جلدی کوڑیجنڑ آلا نہ ہووے۔

²⁰ کیوں جو اِنسان دی کاوڑ او راستبازی پیدا نئیں کریندی جیہڑی خُدا چاہندے۔

²¹ اِیں واسطے ساری ناپاکی تے بُرائی کُوں دُور کر تے اُوں کلام کُوں فروتنی نال قبول کر گِھنو جیہڑا تُہاڈے دِلاں ءچ رہایا گئے تے تُہاکُوں نجات ڈے سگدے۔

²² کلام اُتے عمل کرݨ آلے بنڑو نہ جو صرف سُنڑݨ آلے جیہڑے خود کُوں دوکھا ڈیندے ہِن۔

²³ کیوں جو جیہڑا کوئی صرف کلام کُوں سُنڑݨ آلا ہووے تے اُوندے اُتے عمل کرݨ آلا نہ ہووے، او اُوں بندے وانگُوں ہے جیہڑا شیشے ءچ آپنڑی شکل ڈیدھے۔

²⁴ او اُونکُوں ڈیکھ تے چلیا ویندے تے فوراً بُھل ویندے جو میں کیجھا لگدا پِیا ہم۔

²⁵ پر جیہڑا ازادی ڈیوݨ آلی کامِل شریعت اُتے غور نال نظر کریندا راہندے، تے جیہڑا کُجھ سُنڑدے اُونکُوں بُھلدا نئیں بلکہ اُوندے اُتے عمل کریندے، او آپنڑے ہر کم ءچ برکت پیسی۔

²⁶ جے کوئی بندہ آپنڑے آپ کُوں دیندار سمجھدا ہووے تے وَل وی آپنڑی زبان کُوں قابو ءچ نہ رکھیندا ہووے تاں او آپنڑے آپ کُوں دوکھا ڈیندے۔ اُوندی دینداری فضول ہے۔

²⁷ ساڈے خُدا باپ دی نظر ءچ حقیقی تے بے عیب دینداری ایہ ہے جو یتیماں تے بیوہ عورتاں دی مُصیبت ویلے خبر گِیری کرو تے آپنڑے آپ کُوں دُنیا کنُوں بچا تے بے داغ رکھو۔