عبرانیوں 9 - کِتاب مُقدّس سرائیکی ترجمہ

اسمان تے زمین اُتے عبادت دا نِظام

¹ پہلے عہد ءچ وی عبادت دے قانُون ہَن تے زمین اُتے مُقدّس گھر وی ہئی۔

² یعنی ہِک تمبُو بنڑایا گِیا جیندے ڈُو حصے ہَن۔ پہلے حصے ءچ چراغ دان، میز تے اُوندے اُتے نذر دیاں روٹیاں ہَن۔ اُوں حصے کُوں مُقدّس کمرہ آدھے ہَن۔

³ وَل ڈُوجھے پڑدے دے پِچُھوں او جاہ ہئی جِینکُوں سبھ تُوں مُقدّس کمرہ آکھیا ویندا ہا۔

⁴ اُوندے ءچ خوشبودار مصالحہ ساڑن آلی سونے دی قُربان گاہ تے عہد دا صندوق ہا جیہڑا سونے نال مڑھیا ہویا ہا۔ اُوں صندوق ءچ مَن نال بھریا ہویا سونے دا برتن، ہارُون دی سوٹی جیندے ءچوں پُھلاں دیاں ڈوڈیاں نِکلیاں پئیاں ہَن، تے پتھر دیاں او تختیاں ہَن جِنہاں اُتے عہد دے حُکم کندہ کیتے گئے ہَن۔

⁵ صندوق دے اُتے کروبی فرشتے بنڑائے ہوئے ہَن، جیہڑے خُدا دے جلال کُوں ظاہر کریندے ہَن تے کفارہ دی جاہ یعنی صندوق دے ڈھکنڑ اُتے چھاں کیتی راہندے ہَن۔ پر اِنہاں گالھیں دی تفصیل بیان کرݨ دا ایہ موقع نئیں۔

⁶ بس اِنہاں چیزاں دے اِیں ترتیب نال تیار تھی ونجنڑ تُوں بعد کاہِن آپنڑی خدمت کرݨ کیتے تمبُو دے پہلے حصے ءچ بار بار داخل تھیندے راہندے ہَن۔

⁷ پر ڈُوجھے حصے ءچ صرف کاہِن ِ اعظم ویندا ہا، پر او وی سال ءچ صرف ہِک پھیری۔ تے او قُربانی دے خون دے بغیر نئیں ویندا، جیہڑا او آپنڑے تے قوم دے بُھل چُک ءچ کیتے ہوئے گُناہاں دی خاطر پیش کریندا ہا۔

⁸ اِیں تُوں رُوح القُدس ایہ اِشارہ ڈیندے جو جڈاں تئیں ایہ پہلا تمبُو موجود ہے، سبھ تُوں مُقدّس جاہ تئیں ونجنڑ دا رستہ نئیں کُھلیا۔

⁹ او موجودہ زمانے کیتے ہِک مثال ہے، تے ایہ ظاہر کریندے جو جیہڑیاں نذراں تے قُربانیاں اُتھاں پیش کیتیاں ویندیاں ہِن، او عبادت کرݨ آلے دے دل کُوں کامل تے مُطمئن نئیں کر سگدیاں۔

¹⁰ اُنہاں دا تعلق صرف کھاوݨ پِیوݨ تے غُسل دیاں مختلف رسماں نال ہے۔ ایہ جِسمانی قانُون ہِن جیہڑے صرف نویں نِظام دے آوݨ تئیں مقرر کیتے گئے ہِن۔

¹¹ پر ہُنڑ مسیح کاہِن ِ اعظم بنڑ تے آ گئے تے ساکُوں چنگیاں برکتاں مِلدیاں پئیاں ہِن۔ او عظیم تے کامِل تمبُو ءچ داخل تھی گِیا ہے جیہڑا اِنسانی ہتھاں دا بنڑایا ہویا نئیں یعنی اِیں دُنیا دا نئیں۔

¹² او بکریاں تے وچھیاں دا خون گِھن تے نئیں بلکہ آپنڑا خون گِھن تے ہِکے پھیری سبھ تُوں مُقدّس جاہ ءچ داخل تھی گِیا تے ساکُوں ایجھی مخلصی ڈِتی جیہڑی ہمیشاں کیتے ہے۔

¹³ کیوں جو جِیں ویلے بکریاں تے ڈانداں دے خون تے ویہڑیاں دی سواہ دے چِھنڈکے ونجنڑ نال ناپاک لوک جِسمانی طور تے پاک تھیندے ہِن،

¹⁴ تاں مسیح دا خون جئیں ازلی رُوح القُدس دے وسیلے نال آپنڑے آپ کُوں خُدا دے حضُور ءچ ہِک بے عیب قُربانی دے طور تے پیش کر ڈِتا، تُہاڈے دل کُوں موت گِھن آوݨ آلے کماں تُوں کیوں نہ پاک کریسی تاں جو تُساں زندہ خُدا دی عبادت کر سگو۔

¹⁵ اِیہو وجہ ہے جو مسیح نویں عہد دا درمیانی ہے تاں جو خُدا دی طرفوں سڈے گئے لوک وعدہ کیتی ہوئی ابدی میراث کُوں حاصل کر سگنڑ۔ ایہ صرف اِیں واسطے ممکن تھئے جو مسیح آپنڑی جان فِدیہ دے طور تے ڈے ڈِتی تاں جو اُنہاں کُوں اُنہاں گُناہاں دی سزا تُوں چُھڑاوے جیہڑے اُنہاں پہلے عہد دے دوران کیتے ہَن۔

¹⁶ جِتھاں وصیّت ہے اُتھاں وصیّت کرݨ آلے دی موت دا ثابت تھیوݨ وی لازمی ہے،

¹⁷ کیوں جو وصیّت صرف موت دے بعد عمل ءچ آندی ہے۔ وصیّت کرݨ آلے دے جِیندے جی وصیّت اُتے عمل نئیں تھی سگدا۔

¹⁸ اِیہو وجہ ہے جو پہلا عہد وی بغیر خون دے نئیں بدھیا گِیا۔

¹⁹ جِیں ویلے مُوسیٰ پُوری قوم کُوں شریعت دا ہِک ہِک حُکم سُنڑا ڈِتا تاں اُوں وچھیاں تے بکریاں دا خون گِھن تے پانڑی ءچ رَلایا۔ وَل اُوں رتّی اُون تے زُوفے دے ذریعے اُوں خون کُوں شریعت دی کتاب تے سارے لوکاں اُتے چِھنڈک ڈِتا

²⁰ تے آکھیا، ”ایہ خون اُوں عہد کُوں قائم کریندے جیندے اُتے خُدا تُہاکُوں عمل کرݨ دا حُکم ڈِتے۔“

²¹ اِینویں مُوسیٰ خون کُوں مُقدّس تمبُو اُتے تے عبادت دیاں سبھ چیزاں اُتے چِھنڈک ڈِتا۔

²² اصل ءچ شریعت دے مطابق تقریباً سبھ چیزاں خون نال پاک کیتیاں ویندیاں ہِن تے جِیں ویلے تئیں خون نہ وہایا ونجے معافی نئیں مِلدی۔

مسیح دی قُربانی گُناہاں تُوں پاک کریندی ہے

²³ بس ایہ لازم ہا جو ایہ چیزاں جیہڑیاں اسمانی چیزاں دی نقل ہِن، اُنہاں قُربانیاں دے وسیلے نال پاک کیتیاں ونجنڑ، پر اسمانی چیزاں اِنہاں کنُوں چنگیاں قُربانیاں دے وسیلے نال پاک کیتیاں ونجنڑ۔

²⁴ مسیح اِنسانی ہتھاں دے بنڑے مُقدّس گھر ءچ داخل نئیں تھیّا، جیہڑا حقیقی مُقدّس گھر دی صرف نقل ہے، بلکہ اسمان ءچ ای داخل تھیّا تاں جو او ساڈی خاطر خُدا دے سامنڑے حاضر تھیوے۔

²⁵ زمین اُتے کاہِن ِ اعظم سبھ تُوں مُقدّس کمرے ءچ کہیں ڈُوجھے دا یعنی جانوراں دا خون گِھن تے ہر سال ویندے پر مسیح آپنڑے آپ کُوں قُربانی دے طور تے ولا ولا پیش نئیں کیتا۔

²⁶ نہ تاں دُنیا دے شروع کنُوں گِھن تے ہُنڑ تئیں اُونکُوں ولا ولا موت دا ڈُکھ چاونڑا پوندا۔ پر ہُنڑ زمانیاں دے آخر ءچ مسیح ہِک پھیری ظاہر تھیّا تاں جو آپنڑے آپ کُوں قُربان کرݨ نال گُناہ کُوں ختم کر ڈیوے۔

²⁷ تے جِینویں اِنسان دا ہِک پھیری مرݨ تے اُوندے بعد عدالت دا تھیوݨ مقرر ہے،

²⁸ اُونویں ای مسیح وی بہُوں سارے لوکاں دے گُناہ آپنڑے سر اُتے چاوݨ کیتے ہِکے پھیری قُربان تھیّا۔ تے او ڈُوجھی پھیری گُناہ چاوݨ کیتے نئیں بلکہ اُنہاں لوکاں کُوں نجات ڈیوݨ کیتے ڈِکھالی ڈیسی جیہڑے اُوندے اِنتظار ءچ ہِن۔