عبرانیوں 8 - کِتاب مُقدّس سرائیکی ترجمہ

یسُوع ساڈا سردار کاہِن

¹ جیہڑے گالھیں اساں ہُنڑ اکھیندے پئے ہیں، اُنہاں ءچوں مرکزی گالھ ایہ ہے جو ساڈا ایجھا کاہِن ِ اعظم ہے جیہڑا اسمان اُتے عظیم خُدا دے تخت دے سجے پاسے وَنج بیٹھے،

² تے اُوں مُقدّس گھر ءچ یعنی حقیقی تمبُو ءچ خدمت کریندے جِینکُوں کہیں اِنسان نئیں بلکہ خُداوند کھڑا کیتے۔

³ ہر کاہِن ِ اعظم نذراں تے قُربانیاں پیش کرݨ کیتے مقرر کیتا ویندے۔ اِیں واسطے لازمی ہا جو ساڈے سردار کاہِن دے کولھ وی پیش کرݨ کیتے کُجھ ہووے۔

⁴ جے یسُوع زمین اُتے ہوندا تاں کاہِن نہ ہوندا کیوں جو اِتھاں شریعت دے مطابق نذراں پیش کرݨ آلے کاہِن موجود ہِن،

⁵ جیہڑے اُوں مُقدّس گھر ءچ خدمت کریندے ہِن جیہڑا اسمانی ہیکل دی نقل تے اُوندا پچھاواں ہے۔ اِیہو وجہ ہے جو جِیں ویلے مُوسیٰ مُقدّس تمبُو بنڑاوݨ لگا تاں اُوں ویلے خُدا اُونکُوں فرمایا، ”ساریاں چیزاں اُوں نمونے دے مطابق دھیان نال بنڑا جیہڑا تیکُوں پہاڑ اُتے ڈِکھایا گِیا ہا۔“

⁶ پر ہُنڑ مسیح کُوں ڈُوجھے کاہِناں کنُوں افضل خدمت مِلی ہے کیوں جو او اُوں افضل عہد دا درمیانی ہے، جیہڑا چنگے وعدیاں اُتے قائم کیتا گِیا ہے۔

⁷ جے پہلا عہد بے نُقص ہوندا تاں ڈُوجھے عہد دی لوڑ ای نہ پوندی۔

⁸ پر خُدا اُنہاں لوکاں دے عیب ڈیکھ تے فرمیندے جو ”ڈیکھ! مَیں رب فرمیندا ہاں جو او ڈینہہ آندے پئے ہِن جڈاں مَیں اِسرائیل دے گھرانڑے، تے یہُوداہ دے گھرانڑے دے نال ہِک نواں عہد بدھیساں۔

⁹ ایہ اُوں عہد آلی کار نہ ہوسی، جیہڑا مَیں اُنہاں دے پِیُو ڈاڈے نال بدھیا ہم جڈاں مَیں اُنہاں دا ہتھ پکڑ تے اُنہاں کُوں مِصر دے مُلک ءچوں کڈھ تے گِھن آیا ہم۔ کیوں جو او میڈے عہد اُتے قائم نہ ریہے اِیں واسطے مَیں اُنہاں دو توجہ نہ کیتی۔

¹⁰ رب ایہ وی فرمیندے جو جیہڑا عہد مَیں اُنہاں ڈینہاں تُوں بعد بنی اِسرائیل نال بدھیساں، او ایہ ہوسی جو مَیں آپنڑے حُکم اُنہاں دے ذہناں ءچ پیساں تے اُنہاں دے دِلاں اُتے لِکھیساں مَیں ای اُنہاں دا خُدا ہوساں تے او میڈی قوم ہوسن۔

¹¹ کہیں کُوں ایہ لوڑ نہ ہوسی جو او آپنڑے ہمسائے یا آپنڑے بِھرا کُوں ایہ تعلیم ڈیوے جو رب کُوں سُنجاݨ، کیوں جو چھوٹے تُوں وڈے تئیں سبھ میکُوں سُنجاݨ گِھنسن۔

¹² مَیں اُنہاں دے قصُور معاف کریساں تے اُنہاں دے گُناہ ولا یاد نہ کریساں۔“

¹³ خُدا ”نویں عہد“ دا ذِکر کر تے پہلے کُوں پُرانڑا قرار ڈِتا۔ تے جیہڑی چیز پہلے دی ہے او پُرانڑی تے ناکارہ ہے، او جلدی ختم تھی ویسی۔