عبرانیوں 6 - کِتاب مُقدّس سرائیکی ترجمہ

¹ اِیں واسطے آؤ، اساں مسیح دے بارے ءچ بنیادی تعلیم دے گالھیں کُوں دُہراوݨ چھوڑ تے بالغ ہووݨ دو قدم ودھاؤں۔ اساں موت گِھن آوݨ آلے کماں کنُوں توبہ کرݨ، خُدا اُتے اِیمان رکھنڑ،

² بپتسمہ گِھننڑ، مخصوص کرݨ کیتے سر اُتے ہتھ رکھنڑ، مُردیاں دی قیامت تے ابدی عدالت دی تعلیم دی بنیاد ولا نہ رکھوں۔

³ جیکر خُدا دی مرضی ہوئی تاں اساں اِینویں ای کریسوں۔

⁴ او لوک جِنہاں دے دل ہِک پھیری روشن تھی گئے ہِن تے جِنہاں اسمانی نعمت دا مزہ چَکھ گِھدے، جِنہاں کُوں رُوح القُدس مِلیا ہے،

⁵ جِنہاں خُدا دے کلام دی چنگائی تے آوݨ آلے جہان دیاں قوتاں دا تجربہ کیتا ہا،

⁶ جے او آپنڑے اِیمان کنُوں پِھر ونجنڑ تاں اُنہاں کُوں ولا کنُوں توبہ دو رجُوع کراوݨ ممکن نئیں۔ کیوں جو آپنڑے اِیں کم نال او خُدا دے پوتر کُوں ڈُوجھی پھیری صلیب اُتے چڑھا تے اعلانیہ ذلیل کریندے ہِن۔

⁷ جیہڑی زمین ولا ولا تھیوݨ آلی بارش کُوں جذب کریندی تے کھیتی باڑی کرݨ آلے کُوں چنگی فصل ڈیندی ہے، اُوں زمین کُوں خُدا دی طرفوں برکت مِلدی ہے۔

⁸ پر جے او زمین جھاڑیاں تے کنڈیر پیدا کریندی راہوے تاں او کہیں کم دی نئیں۔ اُوندے اُتے لعنت جلدی آوݨ آلی ہے تے آخر کار اُونکُوں ساڑ ڈِتا ویسی۔

⁹ عزیزو! بھانویں اساں ایہ گالھیں آدھے ہیں، وَل وی اساں تُہاڈے کیتے اِنہاں کنُوں چنگے گالھیں دا یقین رکھیندے ہیں جِنہاں دا تعلق نجات نال ہے۔

¹⁰ کیوں جو خُدا بے اِنصاف نئیں جو او تُہاڈے کم تے اُوں محبت کُوں بُھل ونجے جیہڑی تُساں اُوندے ناں دی خاطر اُوندے مُقدّساں دی خدمت کر تے ظاہر کیتی تے ہُنڑ وی کریندے پئے ہیوے۔

¹¹ اساں چاہندے ہیں جو تُہاڈے ءچوں ہر ہِک اِینویں ای آخر تئیں کوشش کریندا راہوے تاں جو جِنہاں گالھیں دی تُساں اُمید رکھیندے ہیوے، او پُوریاں تھی ونجنڑ۔

¹² تُساں آلسی نہ بنڑو بلکہ اُنہاں دے نمونے اُتے ٹُرو جیہڑے آپنڑے اِیمان تے صبر دے سببّوں وعدیاں دے وارث تھیندے ہِن۔

خُدا دا وعدہ جیہڑا یقینی ہے

¹³ جِیں ویلے خُدا ابرہام نال وعدہ کیتا تاں اُوں آپنڑے ای ناں دی قَسم کھادی کیوں جو قَسم کھاوݨ کیتے خُدا کنُوں وڈا کوئی نہ ہا۔

¹⁴ خُدا فرمایا ”مَیں تیکُوں ضرور برکت ڈیساں تے تیڈی اولاد کُوں بہُوں ودھیساں۔“

¹⁵ اِینویں ابرہام صبر نال اِنتظار کر تے وعدہ کیتی ہوئی برکت گِھدی۔

¹⁶ لوک تاں آپنڑے کنُوں وڈے دی قَسم کھاندے ہِن تے قَسم گالھ دی تصدیق کر تے جھیڑے کُوں ختم کریندی ہے۔

¹⁷ اِیں واسطے جِیں ویلے خُدا دی مرضی تھئی جو وعدے دے وارثاں اُتے بِیا وی صاف طور تے ظاہر کرے جو میڈا اِرادہ لاتبدیل ہے تاں اُوں قَسم کھا تے اِیندی تصدیق کیتی۔

¹⁸ کیوں جو خُدا کُوڑ نئیں مار سگدا، اِیں واسطے خُدا دا وعدہ تے خُدا دی قَسم ڈُو ایجھیاں چیزاں ہِن جیہڑیاں لاتبدیل ہِن۔ تے اِنہاں دی وجہ کنُوں اساں جیہڑے پناہ کیتے خُدا دو بھج آئے ہیں، وڈے حوصلے نال اُوں اُمید کُوں جیہڑی ساڈے سامنڑے ہے، پکڑی رکھ سگدے ہیں۔

¹⁹ ایہ اُمید ساڈے کیتے ایجھے لنگر آلی کار ہے جیہڑا مضبوط تے قائم راہندے۔ تے ایہ اُمید ساکُوں پڑدے دے پِچُھوں خُدا دی سبھ تُوں مُقدّس جاہ تئیں پُچیندی ہے،

²⁰ جِتھاں یسُوع ساڈے کنُوں پہلے ای وَنج تے ہمیشاں کیتے مَلک ِ صِدق آلی کار کاہِن ِ اعظم بنڑ تے ساڈی خاطر داخل تھی گِیا ہے۔