عبرانیوں 5 - کِتاب مُقدّس سرائیکی ترجمہ

¹ ہر کاہِن ِ اعظم آدمیاں ءچوں چُنڑیا ویندے تاں جو او خُدا نال تعلق رکھنڑ آلے گالھیں ءچ لوکاں دی نمائندگی کرے تے گُناہاں کیتے نذراں تے قُربانیاں پیش کرے۔

² او بے سمجھ تے گُمراہ لوکاں نال نرمی نال پیش آ سگدے کیوں جو اُوندے ءچ وی کمزوریاں ہوندیاں ہِن۔

³ اِیہو وجہ ہے جو لوکاں دے گُناہاں دے نال نال اُونکُوں آپنڑے گُناہاں دی خاطر وی قُربانیاں پیش کرنڑیاں پوندیاں ہِن۔

⁴ کہیں بندے کُوں کاہِنِ اعظم دا باعزت عُہدہ آپنڑی مرضی نال نئیں مِلدا بلکہ ہارُون آلی کار خُدا دی طرفوں سڈے ونجنڑ نال مِلدے۔

⁵ اِینویں ای مسیح وی کاہِن ِ اعظم بنڑݨ دی عزت آپنڑی مرضی نال نئیں گِھدی بلکہ خُدا اُونکُوں فرمائے جو ”تُوں میڈا پوتر ہیں، اَج مَیں تیڈا باپ بنڑیا۔“

⁶ تے خُدا ہِک بئی جاہ تے وی فرمیندے جو ”تُوں مَلک صِدق آلی کار ہمیشاں تئیں کاہِن ہیں۔“

⁷ جِیں ویلے یسُوع اِیں دُنیا ءچ ہا، اُوں خُدا کنُوں جیہڑا اُونکُوں موت کنُوں بچا سگدا ہا، اُچی اواز ءچ تے ہنجُو وہا وہا تے دُعاواں تے مِنتاں کیتیاں، تے اُوندی سُنڑی گئی کیوں جو اُوں آپنڑے آپ کُوں خُدا کیتے وقف کیتا ہا۔

⁸ پوتر ہووݨ دے باوجود اُوں ڈُکھ چا چا تے تابعداری سِکھی۔

⁹ اِیں طرح کاملیت تئیں پُجنڑ تُوں بعد او اُنہاں ساریاں کیتے ابدی نجات دا سبب بنڑیا جیہڑے اُوندی تابعداری کریندے ہَن۔

¹⁰ تے خُدا اُونکُوں مَلک صِدق وانگُوں کاہِن ِ اعظم مقرر کیتا۔

اِیمان ءچ ترقی کرݨ دی ضرورت

¹¹ اِیندے بارے ءچ ساکُوں مزید بہُوں کُجھ آکھنڑا ہے پر تُہاکُوں سمجھاونڑا مُشکل ہے، کیوں جو تُساں ڈورے ہیوے۔

¹² وقت دے حساب نال تاں ہُنڑ تئیں تُہاکُوں اُستاد ہوونڑا چاہیدا ہا پر ہُنڑ تئیں اِیں گالھ دی لوڑ ہے جو کوئی بندہ تُہاکُوں خُدا دے کلام دے بنیادی اصُول ولا سِکھاوے۔ تُہاکُوں روٹی کھاوݨ دی نئیں بلکہ کھیر پِیوݨ دی لوڑ ہے۔

¹³ جیہڑا کھیر پِیندے، او حالی تئیں چھوٹا بال ہے، تے راستبازی دی تعلیم کنُوں ناواقف ہے۔

¹⁴ پر روٹی وڈیاں کیتے ہوندی ہے جیہڑے تجربے تے تربیت نال اِیں قابل تھی گئے ہِن جو نیکی تے بُرائی ءچ فرق کر سگنڑ۔