عبرانیوں 4 - کِتاب مُقدّس سرائیکی ترجمہ

خُدا دے لوکاں کیتے دائمی ارام

¹ بس جڈاں خُدا دا ایہ وعدہ قائم ہے جو اساں اُوندے ارام دی جاہ ءچ داخل تھی سگدے ہیں تاں ساکُوں خبردار راہونڑا چاہیدے، کِتھائیں اِینویں نہ تھیوے جو تُہاڈے ءچوں کوئی اُوندے ءچ داخل تھیوݨ کنُوں محروم رہ ونجے۔

² کیوں جو جِینویں اُنہاں لوکاں خوشخبری سُنڑی اُونویں ای اساں وی خوشخبری سُنڑی ہے، پر جیہڑا پیغام اُنہاں سُنڑیا او اُنہاں کیتے بے فائدہ ثابت تھیّا کیوں جو اُنہاں اُونکُوں اِیمان نال نہ سُنڑیا۔

³ صرف اساں جیہڑے اِیمان گِھن آئے ہیں خُدا دے ارام دی جاہ ءچ داخل تھیندے ہیں جِینویں اُوں آکھے جو ”مَیں آپنڑے غضب ءچ قَسم کھادی جو او اُوں جاہ ءچ کڈھائیں داخل نہ تھیسن جِتھاں مَیں اُنہاں کُوں ارام ڈیونڑا ہا۔“ بھانویں جو دُنیا دے بنڑائے ونجنڑ دے وقت کنُوں اُوندے کم پُورے تھی گئے ہَن۔

⁴ بلکہ ستویں ڈینہہ دے بارے ءچ کہیں جاہ تے اِینویں فرمایا گئے جو ”خُدا آپنڑے کم کُوں ستویں ڈینہہ مکمل کیتا تے اِیں تُوں فارغ تھیّا۔“

⁵ تے وَل اُونہئی جاہ تے او آدھے، ”او اُوں جاہ ءچ کڈھائیں داخل نہ تھیسن جِتھاں مَیں اُنہاں کُوں ارام ڈیونڑا ہا۔“

⁶ جِنہاں سبھ تُوں پہلے ایہ خوشخبری سُنڑی او آپنڑی نافرمانی دی وجہ کنُوں داخل نہ تھی سگے، پر کُجھ ہُنڑ وی داخل تھی سگدے ہِن۔

⁷ تے خُدا ہِک بِیا ڈینہہ مقرر کیتا یعنی اَج۔ بہُوں سالاں بعد اُوں داؤد دے ذریعے ایہ گالھ آکھی جِینویں پہلے ذِکر تھیّا ہے جو ”جے اَج تُساں اُوندی اواز سُنڑو تاں آپنڑے دِلاں کُوں سخت نہ کرو۔“

⁸ جے یشُوع بِن نُون اُنہاں کُوں ارام ڈِتا ہوندا تاں خُدا اُوندے بعد ہِک بئے ڈینہہ دا ذِکر نہ کریندا۔

⁹ اِیں واسطے خُدا دے لوکاں کیتے ایجھا خاص ارام باقی ہے جیہڑا سبت دے ڈینہہ آلی کار ہے۔

¹⁰ کیوں جو جیہڑا کوئی خُدا دے ارام ءچ داخل تھیندے او خُدا وانگُوں آپنڑے کماں تُوں فارغ تھی تے ارام کریندے۔

¹¹ اِیں واسطے آؤ، اساں اُوں ارام ءچ داخل تھیوݨ دی پُوری کوشش کرُوں تاں جو کوئی بندہ پِیُو ڈاڈا دے نافرمانی دے نمونے اُتے ٹُر تے، ڈھے نہ پووے۔

¹² کیوں جو خُدا دا کلام زندہ تے موثر ہے۔ او ہر ڈُو دھاری تلوار کنُوں زیادہ تیز ہے، اِتُھوں تئیں جو جان تے رُوح، تے جوڑاں تے مِکھ کُوں چِیردا ہویا لنگھ ویندے، تے دل دے خیالاں تے اِرادیاں کُوں پرکھدے۔

¹³ کائنات دی کوئی چیز خُدا دی نظر کنُوں لُکی ہوئی نئیں، بلکہ جیندے حضُور ءچ ساکُوں جواب ڈیونڑے، اُوندی نظر ءچ ہر چیز بے نقاب تے ظاہر ہے۔

یسُوع ساڈا کامِل کاہِن ِ اعظم

¹⁴ بس جڈاں ساڈا ہِک ایجھا عظیم کاہِن ِ اعظم ہے جیہڑا اسماناں کنُوں لنگھ گِیا یعنی خُدا دا پوتر یسُوع، تاں آؤ اساں آپنڑے اِیمان اُتے قائم راہوں، جِیندا اِقرار اساں کریندے ہیں۔

¹⁵ کیوں جو ساڈا کاہِن ِ اعظم ایجھا نئیں جیہڑا ساڈیاں کمزوریاں ءچ ساڈا ہمدرد نہ بنڑ سگے بلکہ او ساڈے وانگُوں سارے گالھیں ءچ ازمایا گِیا، وَل وی بے گُناہ ریہا۔

¹⁶ اِیں واسطے اساں خُدا دے فضل دے تخت دے کولھ دلیری نال جُلوں تاں جو او ساڈے اُتے رحم کرے تے اساں اُوں فضل کُوں حاصل کرُوں جیہڑا ضرورت ویلے ساڈی مدد کرے۔