عبرانیوں 3 - کِتاب مُقدّس سرائیکی ترجمہیسُوع مُوسیٰ تُوں افضل ہے 1 اِیں واسطے میڈے پاک بِھراؤ، تُساں جیہڑے اسمانی دعوتءچ شریک ہیوے، یسُوع اُتے غور کرو جیہڑا رسُول تے کاہِن ِ اعظم ہے تے جِیندا اساں اِقرار کریندے ہیں۔ 2 جِینویں مُوسیٰ خُدا دے گھر ءچ وفادار ہا، اُونویں ای یسُوع آپنڑے مقرر کرݨ آلے نال وفادار ریہا۔ 3 پر جِینویں گھر بنڑاوݨ آلا اُوں گھر کنُوں زیادہ عزت دے لائق سمجھیا ویندے، اُونویں ای یسُوع وی مُوسیٰ کنُوں زیادہ عزت دے لائق ہے۔ 4 ہر گھر دا کوئی نہ کوئی بنڑاوݨ آلا ہوندے، پر سبھ چیزاں دا بنڑاوݨ آلا خُدا ہے۔ 5 مُوسیٰ تاں خادم دی حیثیت نال خُدا دے سارے گھر ءچ وفادار ریہا، تاں جو اُنہاں گالھیں دی گواہی ڈیوے جیہڑیاں خُدا آئندہ بیان کرݨ آلا ہے۔ 6 پر مسیح پوتر دی حیثیت نال خُدا دے گھر دا مُختار ہے۔ تے اُوندے گھر آلے اساں ہیں پر شرط ایہ ہے جو اساں اُوں دلیری تے اُمید کُوں مضبوطی نال قائم رکھوں جیندے اُتے اساں فخر کریندے ہیں۔ خُدا دے لوکاں کیتے ارام 7 بس جِینویں رُوح القُدس فرمیندے ”جے اَج تُساں خُدا دی اواز سُنڑو 8 تاں آپنڑے دِلاں کُوں سخت نہ کرو، جِینویں لوکاں بغاوت کر تے بیابان ءچ ازمائش دے وقت کیتا۔ 9 اُتھاں تُہاڈے پِیُو ڈاڈے میکُوں ازما تے میڈا اِمتحان گِھدا بھانویں چالیہہ سال تئیں میڈے کم ڈِٹھے۔ 10 اِیں واسطے مَیں اُوں نسل نال ناراض تھیّا تے آکھیا جو ’اُنہاں دے دل ہمیشاں گُمراہ تھیندے راہندن، تے اُنہاں میڈے رستیاں کُوں نئیں پچھانڑیا۔‘ 11 اِیں واسطے مَیں آپنڑے غضب ءچ قَسم کھادی جو او اُوں جاہ ءچ کڈھائیں داخل نہ تھیسن جِتھاں مَیں اُنہاں کُوں ارام ڈیونڑا ہا۔“ 12 بِھراؤ، خبردار راہو جو تُہاڈے ءچوں کہیں دا دل بُرائی پارُوں تے اِیمان نہ رکھنڑ پارُوں زندہ خُدا تُوں پِھر نہ ونجے۔ 13 پر جئیں تئیں اَج دا ڈینہہ آکھیا ویندے، ہر روز ہِک ڈُوجھے کُوں نصیحت کریندے راہو تاں جو تُہاڈے ءچوں کوئی وی گُناہ دے دوکھے ءچ آ تے سخت دل نہ تھی ونجے۔ 14 کیوں جو اساں مسیح ءچ شریک تھی گئے ہیں پر شرط ایہ ہے جو جیہڑا اعتماد اساں شروع ءچ کریندے ریہے ہیں اُوندے اُتے آخر تئیں مضبوطی نال قائم راہوں۔ 15 جِینویں آکھیا گِیا ہے جو ”جے اَج تُساں اُوندی اواز سُنڑو تاں آپنڑے دِلاں کُوں سخت نہ کرو، جِینویں بغاوت ءچ کیتا ہا۔“ 16 او کیہڑے ہَن جِنہاں خُدا دی اواز سُنڑ تے وی بغاوت کیتی؟ کیا او سارے نہ ہَن جیہڑے مُوسیٰ دی راہنمائی ءچ مِصر تُوں باہر نِکلے ہَن؟ 17 تے او کیہڑے ہَن جِنہاں نال خُدا چالیہہ سال تئیں ناراض ریہا؟ کیا اُنہاں لوکاں نال نئیں جِنہاں گُناہ کیتا تے اُنہاں دیاں لاشاں بیابان ءچ پئیاں رہ گئیاں؟ 18 تے خُدا کیندے بارے ءچ قَسم کھا تے آکھیا جو او اُوں جاہ ءچ کڈھائیں داخل نہ تھیسن جِتھاں مَیں اُنہاں کُوں ارام ڈیونڑا ہا؟ کیا ایہ اُوہو نئیں جِنہاں نافرمانی کیتی ہئی؟ 19 اِینویں اساں ڈیدھے ہیں جو او اِیمان نہ رکھنڑ دی وجہ تُوں اُوں ارام دی جاہ ءچ داخل نہ تھی سگے۔ |
Modern Central Saraiki Bible © 2024 Strategic Resource Group
Strategic Resource Group