عبرانیوں 2 - کِتاب مُقدّس سرائیکی ترجمہ

عظیم نجات

¹ اِیں واسطے لازم ہے جو جیہڑا کلام اساں سُنڑے، اُوندے اُتے بِیا وی غور کرُوں، کِتھائیں اِینویں نہ تھیوے جو اساں وَیہہ تے اُوندے کنُوں دُور لگے ونجُوں۔

² کیوں جو جڈاں او کلام جیہڑا فرشتیاں دے ذریعے فرمایا گِیا ہا، قائم ریہا تے اُوندی ہر خلاف ورزی تے نافرمانی دی سزا مِلدی ہئی،

³ تاں وَل جے اساں اِتنی وڈی نجات کُوں نظر انداز کرُوں تاں کِینویں بچ سگسوں؟ کیوں جو اِیں نجات دا اعلان پہلے خُداوند خود کیتا تے وَل جِنہاں لوکاں اِینکُوں سُنڑیا، اُنہاں اُوندی سچائی ساڈے اُتے ثابت کر ڈِتی۔

⁴ نال ای خُدا آپنڑی مرضی دے مطابق نشاناں، عجیب کماں، قِسم قِسم دے معجزیاں تے رُوح القُدس دیاں ونڈیاں ہوئیاں نعمتاں دے ذریعے خود وی اُوندی گواہی ڈیندا ریہا۔

یسُوع مسیح نجات دا ذریعہ تے کامِل راہنما

⁵ خُدا اُوں آوݨ آلی دُنیا کُوں جِیندا ذِکر اساں کریندے ہیں، فرشتیاں دے تابع نئیں کیتا۔

⁶ بلکہ کلام ءچ کِتھائیں ایہ آکھیا گِیا ہے جو ”اِنسان کیا چیز ہے جو تُوں اُوندا خیال رکھیں؟ یا آدم زاد کیا ہے جو تُوں اُوندی فِکر کریں؟

⁷ تَیں اُونکُوں فرشتیاں کنُوں کُجھ ای گھٹ بنڑایا۔ تے جلال تے عزت دا تاج اُونکُوں پوایا۔ [تے آپنڑے ہتھاں دے کماں اُتے اُونکُوں مُختار بنڑایا۔]

⁸ تے سبھ کُجھ اُوندے پیراں تلے کر ڈِتا۔“ جِیں ویلے لِکھیا ہے جو ”سبھ کُجھ اُوندے پیراں تلے کر ڈِتا“ تاں اِیندا مطلب ہے جو خُدا کوئی ایجھی چیز نئیں چھوڑی جیہڑی اُوندے تابع نہ کیتی گئی ہووے۔ پر اساں ہُنڑ تئیں ساریاں چیزاں اُوندے تابع نئیں ڈیدھے۔

⁹ پر اساں یسُوع کُوں، جِینکُوں کُجھ دیر کیتے فرشتیاں کنُوں گھٹ کیتا گِیا، موت دا ڈُکھ سہنڑ دے سببّوں شان تے عزت دا تاج پاتے ہوئے ڈیدھے ہیں۔ ہا خُدا دے فضل نال اُوں ہر اِنسان کیتے موت دا مزہ چکھیا۔

¹⁰ کیوں جو مناسب ہا جو خُدا جیندے کیتے تے جیندے وسیلے نال سبھ چیزاں موجود ہِن، جِیں ویلے او بہُوں سارے فرزنداں کُوں آپنڑے جلال ءچ شامل کرے تاں اُنہاں دی نجات دے بانی یسُوع کُوں ڈُکھاں دے ذریعے کامِل بنڑاوے۔

¹¹ پاک کرݨ آلا یسُوع تے پاک تھیوݨ آلے لوک ہِکو خاندان دے ہِن۔ اِیں واسطے او اُنہاں کُوں بِھرا آکھنڑ تُوں نئیں شرمیندا۔

¹² او فرمیندے جو ”مَیں آپنڑے بِھرانواں کُوں تیڈے ناں دا بیان کریساں، تے جماعت دے وچال تیڈی حمد دے گیت گاساں۔“

¹³ تے وَل ایہ جو ”مَیں اُوندے اُتے بھروسا رکھیساں۔“ تے ایہ جو ”ڈیکھ مَیں اُنہاں بالاں نال حاضر ہاں جیہڑے خُدا میکُوں ڈِتے ہِن۔“

¹⁴ بس کیوں جو خُدا دے فرزند خون تے گوشت نال بنڑے ہوئے اِنسان ہِن، اِیں واسطے یسُوع خود وی اُنہاں آلی کار اِنسان بنڑیا تاں جو آپنڑی موت دے وسیلے نال موت دی قُدرت رکھنڑ آلے یعنی ابلیس کُوں تباہ کرے،

¹⁵ تے اُنہاں کُوں چُھڑا گِھنے جیہڑے ساری عُمر موت دے ڈر کنُوں غُلامی ءچ گرفتار ریہے۔

¹⁶ ہُنڑ ظاہر ہے جو یسُوع فرشتیاں دی نئیں بلکہ ابرہام دی نسل دی فِکر کریندے۔

¹⁷ اِیں واسطے ضروری ہا جو او ہر لحاظ نال آپنڑے بِھرانواں وانگُوں بنڑے، تاں جو او خُدا دی خدمت کریندے ہوئے ہِک رحم دل تے وفادار کاہِن ِ اعظم بنڑ تے اُنہاں دے گُناہاں دا کفارہ ڈے سگے۔

¹⁸ تے کیوں جو یسُوع خود ازمائش دا سامنڑا کریندے ہوئے ڈُکھ برداشت کیتے، اِیں واسطے او اُنہاں دی وی مدد کر سگدے جیہڑے ازمائش دا سامنڑا کریندے ہِن۔