عبرانیوں 12 - کِتاب مُقدّس سرائیکی ترجمہ

اِیمان دی راہ اُتے صبر نال بھجنڑا

¹ اِیں واسطے جڈاں گواہاں دی اِتنی وڈی بِھیڑ ساکُوں چارے پاسُوں ولھیٹی کھڑی ہے تاں آؤ، اساں وی ہر ہِک چیز کُوں جیہڑی ساڈے کیتے رکاوٹ دا سبب ہے تے اُوں گُناہ کُوں جیہڑا ساکُوں اسانی نال پَھسا گِھندے پرے کرُوں، تے اُوں دوڑ ءچ صبر نال بھجدے راہُوں جیہڑی ساڈے کیتے مقرر کیتی گئی ہے۔

² اساں آپنڑی دِید یسُوع اُتے لائی رکھوں جیہڑا اِیمان دا بانی تے کامل کرݨ آلا ہے، جئیں اُوں خوشی پارُوں جیہڑی اُوندی نظراں دے سامنڑے ہئی، صلیب دا ڈُکھ سہہ تے اُوندی شرمندگی دی پرواہ نہ کیتی۔ تے ہُنڑ خُدا دے تخت دے سجے پاسُوں بیٹھے۔

³ ہا، تُساں اُوندے اُتے غور کرو جئیں گُنہگاراں دی طرفوں اِتنی مخالفت برداشت کیتی، تاں جو تُساں بے دل تھی تے ہِمت نہ ہارو۔

⁴ تُساں گُناہ نال لڑن ءچ حالی تئیں ایجھا مُقابلہ نئیں کیتا جو تُہاڈا خون وِیہہ گِیا ہووے۔

⁵ کیا تُساں اُوں نصیحت کُوں بُھل گئے ہیوے جیہڑی تُہاکُوں فرزنداں وانگُوں کیتی گئی ہے جو ”میڈے پوتر، رب دی تربیت کُوں حقیر نہ سمجھ، تے جڈاں او تیکُوں ملامت کرے تاں بے دل نہ تھیویں۔

⁶ کیوں جو جیندے نال رب محبت رکھیندے اُوندی تربیت وی کریندے، تے جِینکُوں پوتر بنڑا گِھندے اُونکُوں سزا وی ڈیندے۔“

⁷ تُساں مُصیبت کُوں تربیت سمجھ تے برداشت کرو۔ خُدا تُہاکُوں آپنڑے پوتر سمجھ تے تُہاڈے نال سلوک کریندے۔ او کیہڑا پوتر ہے جیندی تربیت اُوندا پِیُو نئیں کریندا؟

⁸ پر جے تُہاڈی تربیت نہ کیتی ونجے، جِینویں جو ساریاں دی کیتی ویندی ہے تاں تُساں خُدا دے حقیقی پوتر نئیں بلکہ ناجائز اولاد ہوسو۔

⁹ اِیندے علاوہ جِیں ویلے ساڈا جِسمانی پِیُو ساڈی تربیت کریندے تے اساں اُوندی عزت کریندے ہیں، تاں کیا آپنڑے رُوحانی باپ دی زیادہ تابعداری کر تے زندگی نہ پاؤں؟

¹⁰ ساڈے پِیُو تاں تھوڑے ڈینہاں کیتے آپنڑی سمجھ دے مطابق ساڈی تربیت کریندے ہَن، پر خُدا ساڈے فائدہ کیتے ساڈی تربیت کریندے تاں جو جِینویں او پاک ہے اساں وی پاک بنڑ ونجُوں۔

¹¹ ہُنڑ ہر طرحاں دی تربیت ساکُوں ڈُکھ دا سبب لگدی ہے، خوشی دا نئیں۔ پر جیہڑے اُونکُوں سہہ سہہ تے پکّے تھی ویندن، او بعد ءچ سکون تے راستبازی دا پھل پیندن۔

اِیمان دی دوڑ ءچ ہِمت نہ ہارو

¹² بس تُساں آپنڑے تھکے ہوئے ہتھاں تے کمزور گوڈیاں کُوں مضبوط کرو۔

¹³ تے ”آپنڑے ٹُرݨ کیتے سِدھے رستے اِستعمال کرو“ تاں جو لنگڑا مزید لنگڑا نہ تھیوے بلکہ شِفا پاوے۔

نصیحت تے تنبیہ

¹⁴ ہِک ڈُوجھے نال صُلح سلامتی نال راہو تے اُوں پاکیزگی دے طالب راہو، جیندے بغیر کوئی خُداوند کُوں نہ ڈیکھسی۔

¹⁵ دھیان کرو جو کوئی بندہ خُدا دے فضل کنُوں محروم نہ رہ ونجے، اِینویں نہ تھیوے جو کوئی بندہ کڑوی جڑھ آلی کار پُھٹ تے تُہاکُوں تکلیف ڈیوے تے بہُوں سارے لوکاں کُوں وِگاڑ ڈیوے۔

¹⁶ خبردار، نہ کوئی زِناکار ہووے یا نہ عیسو وانگُوں بے دین، جئیں ہِک وقت دے کھانڑے کیتے آپنڑے پلیٹھی دے حق کُوں ویچ ڈِتا۔

¹⁷ تُساں جانڑدے ہیوے جو بعد ءچ جڈاں اُوں برکت کُوں وراثت ءچ گِھننڑ چاہیا تاں قبول نہ کیتا گِیا۔ اُونکُوں توبہ کرݨ دا موقع نہ مِلیا بھانویں جو او ہنجُو وہا وہا تے اُوں برکت کُوں حاصل کرݨ دی کوشش کریندا ریہا۔

¹⁸ تُساں سِینا پہاڑ دے کولھ نئیں آئے جِینکُوں ہتھ لاوݨ ممکن ہا۔ او پہاڑ بھاہ نال بلدا پِیا ہا تے کالے بدّل، اندھارے تے طوفان نال چارے پاسُوں گِھریا ہویا ہا۔

¹⁹ اُوں ویلے نرسِنگے دی اواز تے کلام کرݨ آلے دی ایجھی اواز سُنڑائی ڈِتی جیندے پارُوں لوکاں مِنت کیتی جو ساڈے نال بِیا کلام نہ کیتا ونجے۔

²⁰ کیوں جو او ڈر تے اِیں حُکم دی برداشت نہ کر سگے جو ”جے کوئی جانور وی اُوں پہاڑ نال لگ ونجے تاں اُونکُوں وی سنگسار کر ڈِتا ونجے۔“

²¹ او نظارہ اِتنا خوفناک ہا جو مُوسیٰ آکھیا، ”مَیں خوف نال کمبدا ہاں۔“

²² بلکہ تُساں صِیُّون پہاڑ، تے زندہ خُدا دے شہر یعنی اسمانی یروشلیم دے کولھ آئے ہیوے، تے خوشی مناوݨ آلے لکھاں فرشتیاں،

²³ تے اُنہاں پلوٹھیاں دی جماعت دے کولھ جِنہاں دے ناں اسمان اُتے لِکھے ہِن، تے سبھ دے مُنصف خُدا، تے کامِل کیتے ہوئے راستبازاں دیاں رُوحاں دے کولھ آئے ہیوے۔

²⁴ تُساں نویں عہد دے درمیانی یسُوع تے اُوندے اُوں چِھنڈکے ہوئے خون دے کولھ آئے ہیوے جیہڑا ہابل دے خون دی نسبت چنگا پیغام ڈیندا ہے۔

²⁵ خبردار! آپنڑے نال کلام کرݨ آلے دا اِنکار نہ کرائے کیوں جو جِیں ویلے بنی اِسرائیل زمین اُتے ہدایت کرݨ آلے دا اِنکار کر تے بچ نہ سگے تاں جے اساں اسمان کنُوں ہدایت کرݨ آلے دا اِنکار کریسوں تاں کِینویں بچ سگسوں؟

²⁶ اُوں ویلے خُدا دی اواز زمین کُوں ہِلا ڈِتا، پر ہُنڑ اُوں ایہ وعدہ کیتے جو ”ہِک پھیری ولا مَیں نہ صرف زمین کُوں بلکہ اسمان کُوں وی ہِلا ڈیساں۔“

²⁷ خُدا دا ”ہِک پھیری ولا“ آکھنڑ صاف ظاہر کریندے جو پیدا کیتیاں ہوئیاں چیزاں جیہڑیاں ہلائیاں وَنج سگدیاں ہِن مِٹا ڈِتیاں ویسن تاں جو جیہڑیاں ہلائیاں نئیں وَنج سگدیاں، صرف اُوہو قائم راہوݨ۔

²⁸ اِیں واسطے جڈاں ساکُوں ایجھی بادشاہی مِلدی پئی ہے، جیہڑی ہلائی نئیں وَنج سگدی، تاں آؤ اساں شُکر کرُوں تے خوف تے احترام نال خُدا دی ایجھی عبادت کرُوں جیہڑی اُونکُوں پسند ہے۔

²⁹ کیوں جو ساڈا خُدا ”ساڑ تے سواہ کر ڈیوݨ آلی بھاہ ہے۔“