عبرانیوں 11 - کِتاب مُقدّس سرائیکی ترجمہ

اِیمان دی اہمیت

¹ اِیمان، اُمید کیتی ہوئی چیزاں دے بارے ءچ اعتماد تے اَن ڈِٹھے چیزاں دا یقین ہے۔

² اِیمان دی وجہ کنُوں ساڈے پِیُو ڈاڈا خُدا دی نظر ءچ مقبول تھئے۔

³ اِیمان دی وجہ کنُوں ساکُوں سمجھ آندی ہے جو ساری کائنات خُدا دے حُکم نال بنڑی ہے۔ جیہڑیاں چیزاں اساں ڈیدھے ہیں، او نظر آوݨ آلیاں چیزاں نال نئیں بنڑیاں۔

⁴ اِیمان دی وجہ کنُوں ای ہابل خُدا کُوں قائن کنُوں بہتر قُربانی پیش کیتی۔ اُوندے اِیمان دی وجہ تُوں خُدا اُوندے نذرانے قبول کر تے گواہی ڈِتی جو ایہ راستباز ہے۔ تے بھانویں جو ہابل مر گئے، وَل وی او آپنڑے اِیمان دی مثال دے وسیلے نال ہُنڑ تئیں کلام کریندے۔

⁵ اِیمان دی وجہ کنُوں ای حنُوک مرے بغیر اسمان اُتے زندہ چا گِھدا گِیا۔ کہیں کُوں اُوندا پتہ نہ لگیا کیوں جو خُدا اُونکُوں چا گِھدا ہا۔ اُوندے چا تے ونجنڑ کنُوں پہلے اُوندے حق ءچ گواہی ڈِتی گئی جو او خُدا کُوں پسند آئے۔

⁶ تے بغیر اِیمان دے خُدا کُوں پسند آوݨ ناممکن ہے، کیوں جو لازم ہے جو خُدا دے کولھ آوݨ آلا اِیمان رکھے جو خُدا موجود ہے تے او اُنہاں کُوں اجر ڈیندے جیہڑے اُوندے طالب ہِن۔

⁷ اِیمان دی وجہ کنُوں ای نُوح اُنہاں چیزاں دے بارے ءچ جیہڑیاں اُوں وقت تئیں نظر نہ آندیاں ہَن، خُدا دی طرفوں ہدایت پا تے خُدا دا خوف منیندے ہوئے آپنڑے سارے خاندان کُوں بچاوݨ کیتے کشتی بنڑائی۔ اِینویں اِیمان رکھنڑ نال اُوں دُنیا کُوں قصُوروار بنڑایا تے اُوں راستبازی دا وارث بنڑ گِیا جیہڑی اِیمان نال مِلدی ہے۔

⁸ اِیمان دی وجہ کنُوں ای ابرہام جِیں ویلے سڈیا گِیا تاں خُدا دا حُکم مَن تے اُوں جاہ دو چلیا گِیا جیہڑی بعد ءچ اُونکُوں میراث ءچ مِلنڑ آلی ہئی۔ بھانویں جو او جانڑدا وی نہ ہا جو او کِتھاں ویندا پئے، وَل وی روانہ تھی گِیا۔

⁹ اِیمان دی وجہ کنُوں ای او خُدا دے وعدہ کیتے ہوئے اُوں مُلک ءچ ہِک پردیسی دے طور تے اِضحاق تے یعقُوب سمیت جیہڑے وعدے ءچ اُوندے نال وارث ہَن، تمبُواں ءچ راہنڑ لگا۔

¹⁰ کیوں جو ابرہام اُوں مضبوط بنیاد آلے شہر دے اِنتظار ءچ ہا، جِیندا نقشہ بنڑاوݨ آلا تے تعمیر کرݨ آلا خود خُدا ہے۔

¹¹ اِیمان دی وجہ کنُوں ای سارہ حاملہ تھیوݨ دی طاقت پاتی بھانویں اُوندی بال جمنڑ دی عُمر گُزر گئی ہئی کیوں جو سارہ کُوں یقین ہا جو وعدہ کرݨ آلا وفادار ہے۔

¹² اِینویں ہِک بندے کنُوں جیہڑا مُردہ جِیہا ہا، اسمان دے تارے تے سمندر دے کنارے دی ریت دے برابر اولاد پیدا تھئی۔

¹³ ایہ سارے لوک اِیمان رکھیندے ہوئے مر گئے تے وعدہ کیتیاں ہوئیاں چیزاں نہ پاتیاں، بلکہ صرف دُور کنُوں ای ڈیکھ تے خوش تھئے، تے اِقرار کیتا جو اساں زمین اُتے پردیسی تے مسافر ہیں۔

¹⁴ جیہڑے ایجھے گالھیں کریندے ہِن، او ظاہر کریندے ہِن جو او ہُنڑ تئیں آپنڑے وطن دی گولھ ءچ ہِن۔

¹⁵ جے او اُوں مُلک دا خیال کریندے جیندے ءچوں او نِکل تے آئے ہَن تاں اُنہاں دے کولھ واپس ونجنڑ دا موقع ہوندا۔

¹⁶ پر حقیقت ءچ او ہِک بہتر یعنی اسمانی مُلک دی سِک ءچ ہَن۔ اِیں واسطے خُدا اُنہاں دا خُدا اکھواوݨ تُوں نئیں شرمیندا بلکہ اُوں اُنہاں کیتے ہِک شہر تیار کیتا۔

¹⁷ اِیمان دی وجہ کنُوں ای ابرہام آپنڑے اِمتحان دے وقت اِضحاق کُوں قُربانی دے طور تے نذر کیتا۔ ہا، ابرہام جیندے نال وعدے کیتے گئے ہَن او آپنڑے کلھے پوتر کُوں قُربان کرݨ کیتے تیار تھی گِیا،

¹⁸ بھانویں خُدا آکھیا ہا جو ”اِضحاق تُوں ای تیڈی نسل اکھویسی۔“

¹⁹ ابرہام سمجھیا جو خُدا مُردیاں کُوں وی زندہ کرݨ دی قُدرت رکھیندے۔ تے اِیں لحاظ نال اِضحاق اُونکُوں مُردیاں ءچوں ولا زندہ مِلیا۔

²⁰ اِیمان دی وجہ کنُوں ای اِضحاق آپنڑے ڈُوہائیں پوتراں یعقُوب تے عیسو کُوں اُنہاں دے آوݨ آلے ڈینہاں کیتے برکت ڈِتی۔

²¹ اِیمان دی وجہ کنُوں ای یعقُوب مردے ویلے یُوسف دے ڈُوہائیں پوتراں کُوں برکت ڈِتی تے آپنڑی سوٹی دا سہارا گِھن تے خُدا کُوں سجدہ کیتا۔

²² اِیمان دی وجہ کنُوں ای یُوسف مردے ویلے بنی اِسرائیل دے مِصر ءچوں نِکل ونجنڑ دا ذِکر کیتا تے آپنڑیاں ہڈیاں دفن کرݨ دے بارے ءچ حُکم ڈِتا۔

²³ اِیمان دی وجہ کنُوں ای مُوسیٰ دے ماء پِیُو اُوندے جمنڑ دے بعد ترے مہینے تئیں اُونکُوں لُکائی رکھیا، کیوں جو اُنہاں ڈِٹھا جو ایہ بال بہُوں سوہنڑا ہے تے اُنہاں بادشاہ دا حُکم تروڑن دا خوف نہ کیتا۔

²⁴ اِیمان دی وجہ کنُوں ای مُوسیٰ وڈا تھی تے فرعون دی دِھی دا پوتر سڈواوݨ کنُوں اِنکار کیتا۔

²⁵ کُجھ ڈینہہ گُناہ دا مزہ چاوݨ دی بجائے اُوں خُدا دی اُمت نال رَل تے بدسلُوکی برداشت کرݨ زیادہ پسند کیتا۔

²⁶ اُوں مسیح دی خاطر بے عزت تھیوݨ کُوں مِصر دے خزانیاں کنُوں وڈی دولت سمجھیا کیوں جو اُوندی نِگاہ اجر اُتے لگی ہوئی ہئی۔

²⁷ اِیمان دی وجہ کنُوں ای اُوں بادشاہ دی کاوڑ کنُوں خوف نہ کھادا تے مِصر چھوڑ ڈِتا۔ او اِینویں ثابت قدم ریہا جِینویں اَن ڈِٹھے خُدا کُوں ڈِٹھا ہووے۔

²⁸ اِیمان دی وجہ کنُوں ای اُوں فسح دی عید کرݨ تے چوکھٹاں اُتے خون چِھنڈکنڑ اُتے عمل کروایا تاں جو پلوٹھیاں کُوں ہلاک کرݨ آلا فرشتہ بنی اِسرائیل دے پلوٹھیاں کُوں ہلاک نہ کرے۔

²⁹ اِیمان دی وجہ کنُوں ای بنی اِسرائیل بحر قُلزم ءچوں اِینویں لنگھے جِینویں سُکی زمین اُتے ٹُر تے گئے ہووݨ۔ پر جِیں ویلے مِصریاں اُونکُوں پار کرݨ دی کوشش کیتی تاں بُڈ گئے۔

³⁰ اِیمان دی وجہ کنُوں ای بنی اِسرائیل سَت ڈینہہ تئیں یرِیحُو شہر دی چاردیواری دے چودھارُوں چکر لیندے ریہے تے چاردیواری ڈھے پئی۔

³¹ اِیمان دی وجہ کنُوں ای راحب طوائف اِسرائیلی جاسُوساں کُوں سلامتی نال قبول کیتا تے اِیں واسطے او نافرماناں دے نال ہلاک تھیوݨ تُوں بچ گئی۔

³² تے ہُنڑ مزید کیا آکھاں؟ اِتنی فُرصت کائنی جو جِدعون، برق، سمسُون، اِفتاہ، داؤد، سموئیل تے ڈُوجھے نبیاں دے بارے ءچ بیان کراں۔

³³ اِیمان دی وجہ کنُوں ای او سلطنتاں اُتے غالب آئے، اِنصاف کریندے ریہے، وعدہ کیتیاں ہوئیاں چیزاں کُوں حاصل کیتا، شیراں دے مُنہ بند کیتے،

³⁴ بھاہ دی طاقت کُوں وِسمایا، تلواراں نال مرݨ کنُوں بچ نِکلے، کمزوری ءچ زور آور تھئے، جنگ ءچ بہادر بنڑے، دُشمنڑاں دیاں فوجاں کُوں شکست ڈِتی۔

³⁵ تے عورتاں کُوں آپنڑے مُردے زندہ مِلے۔ کُجھ اُتے تشدد کیتا گِیا، پر اُنہاں رہائی قبول نہ کیتی تاں جو اُنہاں کُوں قیامت ءچ ہِک بہتر زندگی مِلے۔

³⁶ کُجھ مذاق دا نشانہ بنڑے، تے کوڑے کھادے، کُجھ زنجیراں نال بدھے گئے تے قید ءچ سٹے گئے۔

³⁷ او سنگسار کیتے گئے، آرے نال چِیرے گئے، تلوار نال قتل کیتے گئے، بھیڈاں تے بکریاں دی کَھل پا تے مُتھاجی ءچ، مُصیبت تے بدسلُوکی دا سامنڑا کریندے ہوئے جاہ جاہ پِھردے ریہے۔

³⁸ دُنیا اُنہاں دے لائق نہ ہئی۔ او غاراں، زمین دے کھڈیاں ءچ راہندے ہوئے، جنگلاں تے پہاڑاں ءچ آوارہ پِھردے ریہے۔

³⁹ اُنہاں ساریاں دے اِیمان دی وجہ کنُوں اُنہاں دے حق ءچ چنگی گواہی ڈِتی گئی پر اُنہاں کُوں وعدہ کیتی ہوئی چیز نہ مِلی۔

⁴⁰ کیوں جو خُدا پہلے کنُوں ای ساڈے کیتے ہِک چنگا منصوبہ بنڑایا ہا تاں جو او لوک صرف ساڈے نال ای کامِل کیتے ونجنڑ۔