عبرانیوں 10 - کِتاب مُقدّس سرائیکی ترجمہ1 مُوسیٰ دی شریعت آوݨ آلیاں چنگیاں چیزاں دا صرف ہِک پچھاواں ہے نہ جو او اصل ہے۔ اِیں واسطے جیہڑیاں قُربانیاں ہر سال پیش کیتیاں ویندیاں ہِن، او خُدا دے کولھ آوݨ آلیاں کُوں ہرگز کامِل نئیں کر سگدیاں۔ 2 جے کر سگدیاں تاں کیا اُنہاں دا پیش کیتا ونجنڑ ختم نہ تھی ویندا؟ کیوں جو جے عبادت کرݨ آلے ہِکے پھیری ہمیشاں کیتے پاک تھی ویندے تاں اُنہاں دا دل اُنہاں کُوں ولا گُنہگار نہ آدھا۔ 3 پر او قُربانیاں لوکاں کُوں ہر سال یاد ڈیویندیاں ہِن جو او گُنہگار ہِن۔ 4 کیوں جو ممکن نئیں جو بکریَاں تے ڈانداں دا خون گُناہاں کُوں مِٹا سگے۔ 5 اِیں واسطے جِیں ویلے مسیح دُنیا ءچ آیا تاں اُوں خُدا کُوں آکھیا جو ”تَیں قُربانیاں تے نذرانیاں کُوں پسند نہ کیتا بلکہ میڈے کیتے ہِک بدن تیار کیتا 6 تُوں ساڑے ونجنڑ آلیاں قُربانیاں تے گُناہ تُوں پاک کرݨ آلیاں قُربانیاں تُوں خوش نہ تھیّا۔ 7 اُوں ویلے مَیں آکھیا جو ’اے خُدا، ڈیکھ مَیں حاضر ہاں تاں جو مَیں تیڈی مرضی پُوری کراں جِینویں میڈے بارے ءچ کتاب ءچ لِکھیا ہے‘۔“ 8 پہلے تاں او فرمیندے جو ”تَیں قُربانیاں، نذرانے، ساڑے ونجنڑ آلیاں قُربانیاں تے گُناہ تُوں پاک کرݨ آلیاں قُربانیاں کُوں پسند نہ کیتا تے نہ اُنہاں تُوں خوش تھیّا۔“ بھانویں جو او قُربانیاں شریعت دے مطابق کیتیاں ویندیاں ہَن۔ 9 وَل او آدھے جو ”ڈیکھ مَیں حاضر ہاں، تاں جو مَیں تیڈی مرضی پُوری کراں۔“ اِینویں او پہلیاں قُربانیاں کُوں ختم کریندے تاں جو ڈُوجھی کُوں قائم کرے۔ 10 خُدا دی مرضی دا نتیجہ ایہ ہے جو اساں یسُوع مسیح دے جِسم دے ہِکے پھیری قُربان تھیوݨ دے وسیلے نال پاک کر ڈِتے گئے ہیں۔ 11 ہر کاہِن روزانہ ہیکل ءچ کھڑا تھی تے آپنڑی خدمت انجام ڈیندے، تے اُوہو قُربانیاں ولا ولا پیش کریندے جیہڑیاں گُناہاں کُوں کڈھائیں مِٹا نئیں سگدیاں۔ 12 پر مسیح گُناہاں کُوں مِٹاوݨ کیتے ہِکو قُربانی پیش کیتی جیہڑی ہمیشاں کیتے ہے تے وَل خُدا دے سجے پاسُوں وَنج بیٹھا۔ 13 اُوں ویلے تُوں او اِنتظار ءچ ہے جو اُوندے دُشمنڑ اُوندے پیراں دی چوکی بنڑ ونجنڑ۔ 14 کیوں جو اُوں پاک تھیوݨ آلیاں کُوں ہِکے قُربانی نال ہمیشاں تئیں کامِل کر ڈِتے۔ 15 رُوح القُدس وی ساکُوں اِیں گالھ دی گواہی ایہ آکھ تے ڈیندے جو، 16 ”رب فرمیندے، ’جیہڑا عہد مَیں اُنہاں ڈینہاں تُوں بعد آپنڑے لوکاں نال کریساں، او ایہ ہے: مَیں آپنڑے حُکم اُنہاں دے دِلاں ءچ پیساں تے اُنہاں دے ذہناں اُتے لِکھیساں۔ 17 مَیں اُنہاں دے گُناہاں تے بُرائیاں کُوں ولا کڈھائیں یاد نہ کریساں‘۔“ 18 بس جڈاں گُناہاں دی معافی تھی گئی تاں وَل گُناہاں تُوں پاک کرݨ دی قُربانی دی کیا لوڑ ہے؟ خُدا دے کولھ آ تے اِیمان ءچ قائم راہو 19 اِیں واسطے میڈے بِھراؤ! اساں یسُوع دے خون دے وسیلے نال اُوں سبھ تُوں مُقدّس جاہ ءچ پُورے اعتقاد نال داخل تھی سگدے ہیں۔ 20 مسیح آپنڑے بدن دی قُربانی نال ہِک نواں تے زندگی ڈیوݨ آلا رستہ کھول ڈِتے جیہڑا پڑدے تُوں اگُوں گِھن ویندے۔ 21 تے او ساڈا ایجھا وڈا سردار کاہِن ہے جیہڑا خُدا دے گھر دا مُختار ہے۔ 22 اِیں واسطے آؤ اساں سچے دل تے پُورے اِیمان نال خُدا دے کولھ جُلوں، کیوں جو ساڈے دل خون دے چھِنڈکیاں نال گُناہ تُوں پاک کیتے گئے ہِن تے ساڈے بدن صاف پانڑی نال دھوتے گئے ہِن۔ 23 اساں آپنڑی اُوں اُمید کُوں مضبوطی نال پکڑی رکھوں جِیندا اساں اِقرار کریندے ہیں کیوں جو جئیں وعدہ کیتے او وفادار ہے۔ 24 تے آؤ اساں غور کرُوں جو کِینویں ہِک ڈُوجھے کُوں محبت تے نیک کم کرݨ کیتے اُبھار سگدے ہیں۔ 25 آپس ءچ میل جول رکھنڑ نہ چھوڑوں جِینویں کُجھ لوکاں دی عادت بنڑ گئی ہے بلکہ اساں ہِک ڈُوجھے کُوں مزید حوصلہ ڈیؤں خاص کر ایہ ڈیدھے ہوئے جو مسیح دے واپس آوݨ دا ڈینہہ نیڑے آندا پِیا ہے۔ 26 کیوں جو جے اساں حق دی پچھاݨ کرݨ تُوں بعد جاݨ بُجھ تے گُناہ کریندے راہوں تاں گُناہاں تُوں پاک کرݨ دی کوئی بئی قُربانی باقی نئیں۔ 27 وَل صرف خُدا دی عدالت دا خوفناک اِنتظار تے بھڑکدی ہوئی بھاہ باقی ہے جیہڑی خُدا دے دُشمنڑاں کُوں کھا ویسی۔ 28 جڈاں مُوسیٰ دی شریعت کُوں رَد کرݨ آلا ڈُو یا ترے بندیاں دی گواہی نال بغیر رحم دے قتل کر ڈِتا ویندے، 29 تاں او بندہ کِتنی وڈی سزا دے لائق ہوسی جئیں خُدا دے پوتر دی توہین کیتی تے عہد قائم کرݨ آلے خون کُوں جیندے نال او پاک تھیّا ہا، ناپاک سمجھیا، تے فضل ڈیوݨ آلے رُوح القُدس دی بے عزتی کیتی۔ 30 کیوں جو اساں اُونکُوں جانڑدے ہیں جئیں فرمائے جو ”اِنتقام گِھننڑ میڈا کم ہے، بدلہ مَیں ای گِھنساں۔“ تے وَل ایہ جو ”رب العالمین آپنڑے لوکاں دا اِنصاف کریسی۔“ 31 ایہ ہِک خوفناک گالھ ہے جو زندہ خُدا ساکُوں سزا ڈیوݨ کیتے پکڑے۔ 32 پر اُنہاں پہلے ڈینہاں کُوں یاد کرو جِیں ویلے تُساں اِیمان نال روشن تھیوݨ تُوں بعد شدید تکلیفاں دا ڈُکھ برداشت کیتا۔ 33 کڈھائیں تاں لعن طعن تے مُصیبتاں دے سببّوں تُساں خود تماشا بنڑے تے کڈھائیں ڈُوجھیاں کُوں تکلیفاں سہندے ہوئے ڈیکھ تے اُنہاں نال شریک تھئے۔ 34 تُساں قیدیاں نال ہمدردی کیتی تے آپنڑے مال دے لُٹے ونجنڑ کُوں وی خوشی نال قبول کیتا کیوں جو تُساں جانڑدے ہَوے جو ہِک بہتر تے ابدی ملکیت تُہاڈے کولھ ہے۔ 35 بس ہِمت نہ ہارو کیوں جو اِیندا اجر وڈا ہے۔ 36 تُہاکُوں وڈے صبر نال کم گِھننڑا چاہیدے تاں جو تُساں خُدا دی مرضی پُوری کر تے او چیز حاصل کر سگو جِیندا اُوں وعدہ کیتے۔ 37 کیوں جو ہُنڑ تھوڑی جیہی دیر باقی ہے جو ”آوݨ آلا آ ویسی، تے دیر نہ لیسی۔ 38 میڈا راستباز بندہ اِیمان نال زندہ راہسی، جے او پِچھاں ہٹ ونجے تاں میڈا دل اُوں کنُوں خوش نہ تھیسی۔“ 39 پر اساں پِچھاں ہٹ تے ہلاک تھیوݨ آلے نئیں، بلکہ اِیمان رکھ تے نجات پاوݨ آلے ہیں۔ |
Modern Central Saraiki Bible © 2024 Strategic Resource Group
Strategic Resource Group