عبرانیوں 1 - کِتاب مُقدّس سرائیکی ترجمہ

خُدا دا آپنڑے پوتر دے وسیلے آخری کلام

¹ گُزرے زمانیاں ءچ خُدا ساڈے پِیُو ڈاڈا نال مختلف موقعیاں اُتے تے مختلف طریقیاں نال نبیاں دے وسیلے کلام کیتا،

² پر اِنہاں آخری ڈینہاں ءچ اُوں آپنڑے پوتر دے وسیلے ساڈے نال کلام کیتا، جِینکُوں اُوں سبھ چیزاں دا وارث بنڑایا تے جیندے وسیلے اُوں کائنات کُوں خلق کیتا۔

³ پوتر خُدا دے جلال دی چمک تے اُوندی ذات دا عین نقش ہے، تے او آپنڑے قُدرت آلے کلام نال سبھ چیزاں کُوں سنبھلیندے۔ او گُناہاں تُوں پاک کرݨ تُوں بعد اسمان اُتے عظیم خُدا دے سجے پاسے وَنج بیٹھا۔

خُدا دے پوتر دی عظمت

⁴ اِینویں او فرشتیاں کنُوں اِتنا بزُرگ تھی گِیا جِتنا اُوں اُنہاں کنُوں افضل ناں میراث ءچ پایا۔

⁵ کیوں جو فرشتیاں ءچوں خُدا کڈھاں کہیں کُوں آکھیا جو ”تُوں میڈا پوتر ہیں اَج مَیں تیڈا باپ بنڑیا۔“ تے وَل ایہ جو ”مَیں اُوندا باپ ہوساں تے او میڈا پوتر ہوسی۔“

⁶ تے وَل جِیں ویلے خُدا آپنڑے پلوٹھے کُوں دُنیا ءچ گِھن آندے تاں اکھیندے جو ”خُدا دے سبھ فرشتے اُونکُوں سجدہ کرݨ۔“

⁷ فرشتیاں دے بارے ءچ او آدھے جو ”او آپنڑے فرشتیاں کُوں ہواواں آپنڑے خادماں کُوں بھاہ دے لُمبے بنڑیندے۔“

⁸ پر پوتر دے بارے ءچ اکھیندے جو ”اے خُدا، تیڈا تخت ہمیشاں تئیں قائم راہسی، تیڈی بادشاہی دا عصا اِنصاف دا عصا ہے۔

⁹ تَیں نیکی نال محبت تے بُرائی تُوں نفرت کیتی۔ اِیں واسطے خُدا، ہاں تیڈے خُدا تیکُوں شادمانی دے تیل نال مخصوص کر تے تیڈے ساتھیاں کنُوں زیادہ سرفراز کیتا۔“

¹⁰ تے ایہ وی اکھیندے جو ”اے خُداوند، تَیں شروع ءچ زمین دی بنیاد رکھی تے اسمان تیڈے ہتھاں دی کاریگری ہے۔

¹¹ او ختم تھی ویسن پر تُوں قائم راہسیں۔ او سارے کپڑیاں وانگُوں گھس ویسن۔

¹² تُوں اُنہاں کُوں چادر وانگُوں ولھیٹ ڈیسیں تے او کپڑیاں وانگُوں بدل ڈِتے ویسن۔ پر تُوں لاتبدیل ہیں تے تیڈی زندگی کڈھائیں ختم نہ تھیسی۔“

¹³ خُدا فرشتیاں ءچوں کہیں دے بارے ءچ ایہ کڈھاں آکھیا جو ”تُوں میڈے سجے پاسُوں بہہ جئیں تئیں مَیں تیڈے دُشمنڑاں کُوں تیڈے پیراں دی چوکی نہ بنڑا ڈیواں ؟“

¹⁴ کیا او سارے فرشتے خدمت گُزار رُوحاں نئیں، جیہڑیاں نجات پاوݨ آلیاں دی خدمت کیتے بھیجیاں ویندیاں ہِن؟