گلتِیوں 5 - کِتاب مُقدّس سرائیکی ترجمہ

آپنڑی ازادی کُوں محفوظ رکھو

¹ مسیح ساکُوں ازاد راہنڑ کیتے ازاد کیتے۔ بس اِیں ازادی ءچ ثابت قدم راہو تے ولا غُلامی دی پنجالی ءچ نہ جُتو۔

² ڈیکھو! مَیں پولُس خود تُہاکُوں آدھا ہاں جو جے تُساں ختنہ کرواؤ تاں مسیح کنُوں تُہاکُوں کوئی فائدہ نہ تھیسی۔

³ بلکہ مَیں ہر اُوں بندے کُوں جیہڑا ختنہ کرویندے وَل آدھا ہاں جو اُونکُوں ساری شریعت اُتے عمل کرݨ فرض ہے۔

⁴ تُساں جیہڑے شریعت دے وسیلے نال راستباز بنڑݨ چاہندے ہیوے، مسیح کنُوں اَنج تھی گئے ہیوے تے فضل تُوں محروم تھی گئے ہیوے۔

⁵ پر اساں رُوح القُدس دے وسیلے اِیمان نال راستباز تھیوݨ دے انتظار ءچ ہیں، جیندی ساکُوں اُمید ہے۔

⁶ کیوں جو مسیح یسُوع ءچ ہوندے ہوئے ختنہ کراوݨ یا نہ کراوݨ دی کوئی اہمیت نئیں۔ صرف او اِیمان اہم ہے جیہڑا محبت کرݨ نال ظاہر تھیندے۔

⁷ تُساں چنگی طرحاں بھجدے پئے ہَوے۔ کئیں تُہاکُوں سچائی اُتے عمل کرݨ تُوں روک ڈِتے؟

⁸ اِینویں کرݨ تے اُکساوݨ آلا خُدا نئیں جئیں تُہاکُوں سڈے۔

⁹ تھوڑا جِیہا خمیر سارے مَلے ہوئے اٹّے کُوں خمیرا کر ڈیندے۔

¹⁰ میکُوں خُداوند یسُوع ءچ تُہاڈے اُتے بھروسہ ہے جو تُساں کوئی بئی سوچ نہ رکھیسو پر جیہڑا بندہ تُہاڈے ءچ پریشانی پیدا کریندے بھانویں جیہڑا وی ہووے، اُونکُوں سزا مِلسی۔

¹¹ بِھراؤ! جے مَیں ہُنڑ تئیں ختنے دی تبلیغ کریندا ہاں تاں حالی تئیں کیوں ستایا ویندے ہاں؟ جے میں ایجھی تبلیغ کریندا تاں لوک صلیب دا پیغام سُنڑ تے تُھڈا نہ کھاندے۔

¹² جے تُہاکُوں پریشان کرݨ آلے نہ صرف آپنڑا ختنہ کرویندے بلکہ آپنڑے آپ کُوں خوجے بنڑا گِھندے تاں چنگا ہوندا۔

¹³ بِھراؤ! تُساں ازاد راہنڑ کیتے سڈے گئے ہیوے پر اِیں ازادی کُوں آپنڑیاں جِسمانی خواہشاں کُوں پُورا کرݨ کیتے اِستعمال نہ کرو بلکہ محبت نال ہِک ڈُوجھے دی خدمت کریندے راہو۔

¹⁴ کیوں جو ساری شریعت اِیں ہِک گالھ ءچ ای پُوری تھی ویندی ہے جو ”تُوں آپنڑے ہمسائے نال آپنڑے وانگُوں محبت رکھ۔“

¹⁵ جے تُساں ہِک ڈُوجھے کُوں چِیر پھاڑ تے کھاندے ہیوے تاں خبردار، کِتھائیں اِینویں نہ تھیوے جو ہِک ڈُوجھے کُوں ختم کر ڈیؤ۔

خُدا دا رُوح تے اِنسانی خواہشاں

¹⁶ مَیں تاں ایہ آدھا ہاں جو رُوح القُدس دے مطابق چلو تاں وَل تُساں نفسانی خواہشاں کُوں ہرگز پُورا نہ کریسو۔

¹⁷ کیوں جو نفس رُوح دے خلاف خواہش کریندے تے رُوح نفس دے خلاف۔ ایہ ڈوہائیں ہِک ڈُوجھے دے مخالف ہِن، اِیں واسطے جیہڑا کم تُساں کرݨ چاہندے ہیوے او نئیں کر سگدے۔

¹⁸ پر جے تُساں پاک رُوح دی ہدایت نال چلدے ہیوے تاں شریعت دے تابع نئیں ہوندے۔

¹⁹ نفسانی کم تاں صاف ظاہر ہِن یعنی، زِناکاری، ناپاکی، شہوت پرستی،

²⁰ بُت پرستی، جادُوگری، دُشمنڑی، جھیڑے، حسد، کاوڑ، خود غرضی، نا اتفاقی، پارٹی بازی،

²¹ بُغض، نشہ بازی، نچنڑ ٹپنڑ تے اِنہاں جِیہے بئے کم۔ اِنہاں گالھیں دے بارے ءچ مَیں پہلے تُہاکُوں آکھیا ہا تے ہُنڑ ولا آدھا ہاں، جو ایجھے کم کرݨ آلے خُدا دی بادشاہی دے وارث نہ ہوسن۔

²² پر رُوح القُدس دا پھل محبت، خوشی، اِطمینان، صبر، مہربانی، نیکی، وفاداری،

²³ نرم دِلی تے پرہیزگاری ہے۔ ایجھے کماں دی کوئی شریعت مخالفت نئیں کریندی۔

²⁴ تے جیہڑے مسیح یسُوع دے ہِن اُنہاں آپنڑی اِنسانی فطرت کُوں اُوندے جذبات تے بُریاں خواہشاں سمیت صلیب اُتے چڑھا ڈِتے۔

²⁵ جے اساں رُوح القُدس دے وسیلے زندہ ہیں تاں رُوح القُدس دی ہدایت دے مطابق زندگی گُزاروں۔

²⁶ اساں غیر مناسب فخر، ہِک ڈُوجھے کُوں بھڑکاوݨ تے ہِک ڈُوجھے کنُوں حسد کرݨ چھوڑ ڈیؤں۔