گلتِیوں 4 - کِتاب مُقدّس سرائیکی ترجمہ

¹ مَیں ایہ آدھا ہاں جو وارث جئیں تئیں بال ہے، اُوندی تے ہِک غُلام دی حالت ءچ کوئی فرق نئیں بھانویں او ساریاں چیزاں دا مالک ہے۔

² تے او پِیُو دی مقرر کیتی ہوئی عُمر تئیں نگہباناں تے مُختاراں دے اِختیار ءچ راہندے۔

³ اِینویں ای اساں وی جِیں ویلے بال ہسے تاں دُنیاوی اصُولاں دی غُلامی ءچ ہسے۔

⁴ پر جِیں ویلے وقت پُورا تھی گِیا تاں خُدا آپنڑے پوتر کُوں بھیجیا جیہڑا عورت تُوں پیدا تھیّا تے شریعت دے تابع پیدا تھیّا،

⁵ تاں جو او ساکُوں جیہڑے شریعت دے تابع ہیں، چُھڑا گِھنے تے ساکُوں لےپالک پوتر تھیوݨ دا درجہ مِلے۔

⁶ کیوں جو تُساں پوتر ہیوے اِیں واسطے خُدا آپنڑے پوتر دا رُوح القُدس ساڈے دِلاں ءچ بھیجیا تے او ”ابّا“ یعنی ”باپ“ آکھ تے سڈیندا راہندے۔

⁷ بس ہُنڑ تُساں غُلام نئیں ریہے بلکہ پوتر بنڑ گئے ہیوے، تے جے پوتر تھئے تاں خُدا تُہاکُوں وارث وی بنڑا ڈِتے۔

گلِتیاں کیتے پولُس دی فِکر مندی

⁸ اِیں تُوں پہلے جِیں ویلے تُساں خُدا تُوں واقف نہ ہَوے تاں تُساں ایجھے معبُوداں دے غُلام ہَوے جیہڑے خُدا ہِن کائنی۔

⁹ پر ہُنڑ جڈاں تُساں خُدا کُوں پچھاݨ گِھدے بلکہ خُدا تُہاکُوں پچھاݨ گِھدے تاں تُساں کیوں اُنہاں کمزور تے بے کار اصُولاں دو واپس ویندے پئے ہیوے؟ کیا ولا کنُوں اُنہاں دی غُلامی ءچ آوݨ چاہندے ہیوے؟

¹⁰ تُساں ڈینہاں، مہینیاں، موسماں تے سالاں کُوں منیندے ہیوے۔

¹¹ میکُوں ڈر ہے جو جیہڑی محنت مَیں تُہاڈے اُتے کیتی ہے، کِتھائیں بے فائدہ نہ تھی ونجے۔

¹² بِھراؤ! مَیں تُہاڈی مِنت کریندا ہاں جو میڈے وانگُوں بنڑو جِینویں پہلے مَیں تُہاڈے وانگُوں بنڑیا ہم۔ تُساں میڈا کُجھ نُقصان نئیں کیتا۔

¹³ تُہاکُوں یاد ہوسی جو مَیں پہلی پھیری بیماری دی حالت ءچ تُہاکُوں خوشخبری سُنڑائی ہئی۔

¹⁴ میڈی ایہ جِسمانی حالت تُہاڈی ازمائش دا سبب ہئی، پر تُساں نہ تاں میکُوں حقیر جانڑیا تے نہ ای مَیں تُوں نفرت کیتی۔ اِیندے بجائے تُساں میکُوں خُدا دے فرشتہ وانگُوں بلکہ مسیح یسُوع وانگُوں قبول کیتا۔

¹⁵ ہُنڑ تُہاڈی او خوشی کِتھاں گئی؟ کیوں جو مَیں تُہاڈا گواہ ہاں جو جے ممکن ہوندا تاں تُساں آپنڑے اکھیں وی کڈھ تے میکُوں ڈے ڈیندے۔

¹⁶ کیا تُہاڈے نال سچ بولنڑ دے سببّوں مَیں تُہاڈا دُشمنڑ بنڑ گِیا ہاں؟

¹⁷ او لوک تُہاکُوں آپنڑا دوست بنڑاوݨ دی کوشش تاں کریندے ہِن پر اُنہاں دی نیّت صاف کائنی۔ او تُہاکُوں میڈے تُوں اَنج کراوݨ چاہندے ہِن تاں جو تُساں اُنہاں دے ای بنڑے راہو۔

¹⁸ ہا، نیک نیّتی نال دوست بنڑاوݨ چنگا ہے جے ایہ کوشش ہر ویلے کیتی ونجے نہ صرف جڈاں میں اُتھاں تُہاڈے کولھ حاضر ہوندا ہاں۔

¹⁹ میڈے بالو! تُہاڈے کیتے میکُوں ولا کنُوں بال جاوݨ وانگُوں دے درد لگے ہِن تے اُوں ویلے تئیں لگے راہسن، جئیں تئیں مسیح دی صورت تُہاڈے ءچ قائم نہ تھی ونجے۔

²⁰ میڈا دل چاہندے جو ہُنڑ تُہاڈے کولھ ہوواں تے بئے طریقے نال بولاں کیوں جو مَیں تُہاڈے بارے ءچ بہُوں شک ءچ ہاں۔

ہاجرہ تے سارہ دی مثال

²¹ میکُوں ڈساؤ! تُساں جیہڑے شریعت دے تابع تھیوݨ چاہندے ہیوے، کیا شریعت دے گالھیں نئیں سُنڑدے؟

²² اُوندے ءچ لِکھیا ہے جو ابرہام دے ڈُو پوتر ہَن، ہِک غُلام عورت ءچوں، ڈُوجھا ازاد ءچوں۔

²³ جیہڑا پوتر غُلام عورت ءچوں ہا او اِنسانی فطرت دے مطابق پیدا تھیّا پر جیہڑا پوتر ازاد ءچوں پیدا تھیّا، او خُدا دے وعدے دے مطابق پیدا تھیّا۔

²⁴ اِنہاں گالھیں ءچ ہِک مثال ہے کیوں جو ایہ عورتاں ڈُو عہداں دو اِشارہ کریندیاں ہِن۔ ہِک کوہ ِسِینا اُتے بدھیا ہویا عہد ہے جیندے ءچوں غُلام ای پیدا تھیندے ہِن تے او ہاجرہ ہے۔

²⁵ ہاجرہ عرب دے کوہ ِ سِینا دو اِشارہ ہے تے موجودہ یروشلیم دو وی، کیوں جو یروشلیم آپنڑے بالاں سمیت غُلامی ءچ ہے۔

²⁶ پر اسمانی یروشلیم ازاد ہے تے اُوہو ساڈی ماء ہے۔

²⁷ کیوں جو کلام ءچ لِکھیا ہے جو ”اے بانجھ! تُوں جئیں بال نئیں جمیّا، خوشی دے نعرے لا۔ تُوں جِینکُوں جمنڑ دا درد نئیں تھیّا، اُچی اواز نال پُکار، کیوں جو چھوڑی ہوئی تریمت دے بال پئے آلی دے بالاں تُوں زیادہ ہوسن۔“

²⁸ اِیں واسطے بِھراؤ! تُساں اِضحاق آلی کار وعدے دے فرزند ہیوے۔

²⁹ پر جِینویں اُوں وقت اِنسانی فطرت دے مطابق پیدا تھیّا ہویا بال رُوح دی قُدرت نال پیدا تھئے ہوئے کُوں سَتیندا ہا، ہُنڑ وی اِینویں ای تھیندے۔

³⁰ پر خُدا دا کلام کیا آدھے؟ ایہ جو ”اِیں کنیز تے اُوندے پوتر کُوں کڈھ ڈیؤ کیوں جو کنیز دا پوتر ازاد دے پوتر نال ہرگز وارث نہ ہوسی۔“

³¹ اِیں واسطے بِھراؤ! اساں غُلام عورت دی اولاد نئیں بلکہ ازاد دی ہیں۔