اِفِسیوں 4 - کِتاب مُقدّس سرائیکی ترجمہ

مسیح ءچ ہِک تھیوݨ

¹ بس مَیں جیہڑا خُداوند یسُوع دی خاطر قید ءچ ہاں، تُہاڈی مِنت کریندا ہاں جو اُوں بُلاوے دے لائق زندگی گُزارو جیندے کیتے خُدا تُہاکُوں سڈے۔

² یعنی کمال فروتنی، نرم دِلی تے صبر نال، محبت ءچ ہِک ڈُوجھے دی برداشت کرو۔

³ رُوح القُدس تُہاکُوں ہِک کر ڈِتے، اِیں واسطے ہِک ڈُوجھے نال صُلح ءچ بدھے رہ تے اِینکُوں قائم رکھنڑ دی کوشش کرو۔

⁴ ہِک ای بدن ہے تے ہِک ای رُوح القُدس، تے اِینویں ای جِیں ویلے تُساں سڈے گئے ہَوے تاں ہِک ای اُمید رکھنڑ کیتے سڈے گئے ہَوے،

⁵ تے ہِک ای خُداوند ہے، ہِک ای اِیمان تے ہِک ای بپتسمہ ہے،

⁶ تے خُدا وی ہِک ہے جیہڑا ساریاں دا باپ ہے۔ اُوہو ساریاں دے اُتے، ساریاں دے نال تے ساریاں دے اندر ہے۔

⁷ پر ساڈے ءچوں ہر ہِک کُوں مسیح دی بخشش دے مطابق مختلف نعمتاں مِلیاں ہِن۔

⁸ اِیں واسطے فرمایا گِیا ہے جو ”جِیں ویلے او اُچائی اُتے چڑھیا تاں قیدیاں کُوں نال گِھن گِیا تے لوکاں کُوں تحفے ڈِتے۔“

⁹ اُوندے ”اسمان اُتے چڑھن“ دا مطلب ہے جو او پہلے زمین دے تلویں علاقے ءچ لتھا وی ہا۔

¹⁰ تے جیہڑا تلے لتھا، او اُوہو ہے جیہڑا ساریاں اسماناں کنُوں وی اُتے چڑھ گِیا تاں جو پُوری کائنات کُوں بھر ڈیوے۔

¹¹ اُوں کُجھ لوکاں کُوں رسُول، کُجھ کُوں نبی، کُجھ کُوں تبلیغ کرݨ آلے تے کُجھ کُوں نگہبان تے کُجھ کُوں اُستاد بنڑایا،

¹² تاں جو مُقدّس لوک خدمت دے کم کرݨ دے قابل بنڑݨ تے اِینویں مسیح دے بدن دی ترقی تھیوے،

¹³ جئیں تئیں اساں سارے اِیمان تے خُدا دے پوتر دی پچھاݨ ءچ ہِک تھی تے بالغ نہ بنڑ ونجُوں، یعنی مسیح دی پُوری کاملیت تئیں پُج نہ ونجُوں۔

¹⁴ وَل اساں اگُوں تے بال نہ راہسوں تے غلط تعلیم دی ہر تیز ہوا نال پانڑی دیاں چھلاں وانگُوں اِڈے اُڈے واہندے نہ راہوں، تے چالباز تے مکار لوکاں دے گُمراہ کر ڈیوݨ آلے منصوبیاں دا شکار نہ بنڑوں۔

¹⁵ بلکہ اساں محبت نال سچائی اُتے قائم رہ تے ہر گالھ ءچ مسیح آلی کار بنڑدے ونجُوں، جیہڑا سر ہے۔

¹⁶ اُوندے وسیلے پُورا بدن آپنڑے ہر جوڑ دی مدد نال آپس ءچ جُڑ تے قائم راہندے تے ہر اَنگ دے آپنڑا آپنڑا کم کرݨ نال پُورا بدن محبت ءچ ودھدے تے ترقی کریندے۔

مسیح دے وسیلے نوِیں زندگی

¹⁷ اِیں واسطے مَیں آدھا ہاں بلکہ خُداوند یسُوع ءچ چتیندا ہاں جو اگُوں تُوں تُساں غیر قوماں وانگُوں جیہڑیاں آپنڑے بےکار خیالاں دے مطابق چلدیاں ہِن، زندگی نہ گُزارو۔

¹⁸ اُنہاں دی عقل ماری گئی ہے تے خُدا دی ڈِتی ہوئی زندگی ءچ اُنہاں دا کوئی حصہ نئیں کیوں جو او آپنڑی سخت دِلی پارُوں جاہل بنڑ گئے ہِن۔

¹⁹ بے شرم تھی تے اُنہاں آپنڑے آپ کُوں شہوت پرستی دے حوالے کیتا تے ہر طرحاں دے گندے کم بہُوں شوق نال کریندے ہِن۔

²⁰ پر تُساں مسیح دی ایجھی تعلیم نئیں سِکھی

²¹ بلکہ تُساں یسُوع دے بارے ءچ سُنڑیا تے اُوندے ءچ تھی تے اُوں سچائی دے مطابق جیہڑی یسُوع ءچ ہے تعلیم سِکھی جو

²² آپنڑی پُرانڑی فطرت کُوں اُوندے پہلے چال چلنڑ سمیت لہا سٹو جیہڑی دوکھے باز خواہشاں دے سببّوں وِگڑدی ویندی ہے،

²³ تے رُوح القُدس نال آپنڑے ذہن کُوں نواں بنڑا گِھنو۔

²⁴ تے نوِیں فطرت کُوں پا گِھنو جیہڑی سچی راستبازی تے پاکیزگی ءچ خُدا دی صورت اُتے پیدا کیتی گئی ہے۔

²⁵ اِیں واسطے کُوڑ مارݨ چھوڑ تے ہر بندہ آپنڑے ہمسائے نال سچ بولے کیوں جو اساں سارے ہِک بدن دے اَنگ ہیں۔

²⁶ غُصے ءچ آ تے گُناہ نہ کرو تے تُہاڈا غُصہ سِجھ لہوݨ تئیں نہ راہوے۔

²⁷ تے ابلیس کُوں موقع نہ ڈیؤ۔

²⁸ چوری کرݨ آلا اگُوں تے چوری نہ کرے بلکہ آپنڑے ہتھاں نال محنت کر تے کوئی چنگا کم کرے تاں جو مُتھاجاں دی مدد کرݨ کیتے اُوندے کولھ کُجھ ہووے۔

²⁹ تُہاڈے مُنہ ءچوں کوئی گندی گالھ نہ نِکلے بلکہ صرف اُوہو گالھ نِکلے جیہڑی چنگی تے فائدہ مند ہووے تاں جو سُنڑݨ آلیاں کُوں وی اُوندے تُوں برکت مِلے۔

³⁰ خُدا دے رُوح القُدس کُوں ناراض نہ کرو جیندے نال تُہاڈے اُتے مخلصی دے ڈینہہ کیتے مُہر کیتی گئی ہے۔

³¹ ہر قِسم دی نفرت، قہر، تکرار، بدگوئی تے بُرائی کُوں آپنڑے ءچوں کڈھ ڈیؤ۔

³² ہر ہِک نال مہربانی تے نرم دِلی نال پیش آؤ۔ جِینویں خُدا مسیح ءچ تُہاڈے قصُور معاف کیتے ہِن، تُساں وی ہِک ڈُوجھے دے قصُور معاف کرو۔