اِفِسیوں 2 - کِتاب مُقدّس سرائیکی ترجمہ

موت کنُوں نِکل تے زندگی ءچ داخل

¹ تُساں پہلے آپنڑے قصُوراں تے گُناہاں دی وجہ کنُوں رُوحانی طور تے مُردہ ہَوے

² تے دُنیا دے طور طریقے اُتے چلدے تے ہوائی طاقتاں دے سردار یعنی ابلیس دی پیروی کریندے ہَوے۔ ایہ رُوح ہُنڑ تئیں نافرمان لوکاں ءچ تاثیر رکھیندی ہے۔

³ ہِک وقت ہا جِیں ویلے اساں وی اُنہاں ءچ شامل ہسے تے نفسانی خواہشاں ءچ زندگی گُزریندے تے دل تے دماغ دی ہر ہَوس کُوں پُورا کرݨ ءچ لگے راہندے ہسے۔ اساں ڈُوجھیاں وانگُوں فطرتی طور تے غضب دے حقدار ہسے۔

⁴ پر خُدا جیہڑا بہُوں ای رحم کرݨ آلا ہے، اُوں ساڈے نال ایجھی محبت رکھی جو

⁵ جِیں ویلے اساں گُناہاں دی وجہ کنُوں مُردہ ہسے، تاں اُوں ساکُوں مسیح دے نال زندہ کیتا۔ ہا، تُہاکُوں فضل نال ای نجات مِلی ہے۔

⁶ خُدا ساکُوں مسیح یسُوع نال زندہ کر تے اسمانی مقاماں ءچ اُوندے نال بِلھایا،

⁷ تاں جو او آپنڑی اُوں مہربانی دے وسیلے جیہڑی مسیح یسُوع ءچ ساڈے اُتے تھئی ہے، آوݨ آلے زمانیاں ءچ آپنڑے حد کنُوں زیادہ فضل دی دولت کُوں ظاہر کرے۔

⁸ کیوں جو تُہاکُوں اِیمان گِھن آوݨ دے وسیلے فضل نال ای نجات مِلی ہے۔ ایہ تُہاڈی طرفوں نئیں بلکہ خُدا دی بخشش ہے۔

⁹ ایہ تُہاڈے کماں دا پھل نئیں، اِیں واسطے کوئی فخر نئیں کر سگدا۔

¹⁰ کیوں جو اساں خُدا دی کاریگری ہیں تے اُوں ساکُوں مسیح یسُوع ءچ نیک کماں کیتے نویں سِروں پیدا کیتا۔ ایہ نیک کم اُوں پہلے ای ساڈے کیتے تیار کیتے ہَن۔

مسیح نال ہِک تھیونڑاں

¹¹ بس یاد رکھو جو ماضی ءچ تُساں جیہڑے پیدائشی طور تے غیر قوم آلے ہَوے، کیا ہَوے۔ ختنہ کراوݨ آلے یہُودی تُہاکُوں ”بغیر ختنہ آلے“ آدھے ہَن، بھانویں اُنہاں دا ختنہ صرف اِنسانی ہتھ نال جِسم ءچ کیتا ہویا کم ہے۔

¹² اُوں ویلے تُساں مسیح کنُوں جُدا، بنی اِسرائیل دے غیر شہری، اُنہاں نال کیتے ہوئے عہداں دے وعدیاں کنُوں اَݨسُوویں تے دُنیا ءچ نا اُمید تے خُدا کنُوں ناواقف ہَوے۔

¹³ پر تُساں جیہڑے پہلے دُور ہَوے ہُنڑ یسُوع مسیح ءچ اُوندے خون دے وسیلے خُدا دے نیڑے گِھن آئے گئے ہیوے۔

¹⁴ مسیح ساڈی صُلح ہے جئیں یہُودی تے غیر یہُودی ڈوہائیں کُوں ہِک کر ڈِتے تے دُشمنڑی تے جُدائی دی اُوں دیوار کُوں جیہڑی ساڈے وچال ہئی، آپنڑے جِسم کُوں قُربان کر تے ڈھا ڈِتے۔

¹⁵ کیوں جو اُوں شریعت کُوں اُوندے حُکماں تے قانُوناں سمیت ختم کر ڈِتے، تاں جو یہُودی تے غیر یہُودی کُوں آپنڑے آپ ءچ ہِک نواں اِنسان بنڑا تے صُلح کرا ڈیوے۔

¹⁶ تے اِینویں آپنڑی صلیبی موت دے ذریعے دُشمنڑی کُوں ختم کر تے ڈُوہائیں کُوں ہِک تَن بنڑا تے خُدا نال میل مِلاپ کروا ڈِتا۔

¹⁷ تے اُوں تُساں غیر قوم آلیاں کُوں جیہڑے کہیں ویلے اُوندے کنُوں دُور ہَوے تے یہُودیاں کُوں وی جیہڑے اُوندے نزدیک ہَن، ڈُوہائیں کُوں صُلح دی خوشخبری ڈِتی۔

¹⁸ تے ہُنڑ اساں مسیح دے ذریعے ہِکو رُوح القُدس ءچ باپ دے حضُور آ سگدے ہیں۔

¹⁹ بس ہُنڑ تُساں پردیسی تے اجنبی نئیں ریہے بلکہ خُدا دے مُقدّساں دے ہم وطن تے خُدا دے گھرانڑے دے لوک بنڑ گئے ہیوے۔

²⁰ تُساں ہِک ایجھی عمارت ہیوے جیہڑی رسُولاں تے نبیاں دی بنیاد اُتے اُساری گئی ہے، جیندے کونے دے سرے دا پتھر یسُوع مسیح خود ہے۔

²¹ مسیح ءچ ہر حصہ آپس ءچ جُڑ تے خُداوند کیتے ہِک پاک ہیکل بنڑدی ویندی ہے۔

²² تے تُساں وی خُداوند ءچ دُوجھیاں نال تعمیر تھیندے ویندے ہیوے تاں جو ایجھا گھر بنڑے جیندے ءچ خُدا آپنڑے رُوح القُدس دے وسیلے راہوے۔