اِفِسیوں 1 - کِتاب مُقدّس سرائیکی ترجمہتعارف 1 ایہ خط میں پولُس دی طرفوں ہے جیہڑا خُدا دی مرضی نال یسُوع مسیح دا رسُول ہاں، اُنہاں مُقدّساں دے ناں جیہڑے اِفِسُس ءچ راہندے ہِن تے یسُوع مسیح ءچ وفادار ہِن۔ 2 تُہاکُوں ساڈے باپ خُدا تے خُداوند یسُوع مسیح دی طرفوں فضل تے اِطمینان حاصل تھیندا راہوے۔ مسیح دے وسیلے رُوحانی برکتاں 3 ساڈے خُداوند یسُوع مسیح دے خُدا تے باپ دی حمد ہووے جئیں ساکُوں مسیح ءچ اسمان دی ہر رُوحانی برکت بخشی ہے۔ 4 اُوں دُنیا بنڑاوݨ کنُوں پہلے ای ساکُوں مسیح ءچ چُنڑ گِھدا تاں جو اساں اُوندے حضُور پاک تے بے عیب تھیؤں۔ محبت ءچ 5 خُدا آپنڑی مرضی تے نیک اِرادے دے مطابق پہلے کنُوں ای فیصلہ کیتا جو او ساکُوں یسُوع مسیح دے ذریعے آپنڑے لے پالک پوتر بنڑاوے، 6 تاں جو اُوندے اُوں جلال آلے فضل دی حمد ہووے، جیہڑا اُوں آپنڑے عزیز پوتر دے وسیلے نال ساکُوں مُفت بخشیا۔ 7 ساکُوں مسیح دے خون دے وسیلے نال مخلصی یعنی گُناہاں دی معافی مِلی ہے۔ ایہ خُدا دے اُوں بے حد فضل دے سببّوں تھیّا، 8 جیہڑا اُوں بہُوں حِکمت تے دانائی نال ساڈے اُتے کثرت نال نازل کیتا۔ 9 تے خُدا آپنڑی مرضی دے راز کُوں آپنڑی خوشی دے مطابق ساڈے اُتے ظاہر کر ڈِتا، جِیندا اُوں مسیح ءچ پُورا کرݨ دا اِرادہ کیتا ہا، 10 تے خُدا دی مرضی ایہ ہے جو مناسب وقت اُتے او ساریاں چیزاں کُوں مسیح ءچ کٹھا کرے، بھانویں اسمان دیاں ہووݨ یا زمین دیاں۔ 11 مسیح ءچ ساکُوں وی وراثت مِل گئی ہے کیوں جو خُدا جیہڑا سبھ کُجھ آپنڑی مرضی تے مقصد دے مطابق کریندے، اُوں آپنڑے اِرادہ دے مطابق ساڈے کیتے ایہ پہلے کنُوں ای مقرر کیتے۔ 12 تاں جو اساں جِنہاں سبھ کنُوں پہلے مسیح اُتے اُمید رکھی ہئی، اُوندے جلال دی تعریف دا سبب بنڑوں۔ 13 تے جِیں ویلے تُساں وی سچائی دے کلام کُوں یعنی آپنڑی نجات دی خوشخبری کُوں سُنڑیا تے مسیح اُتے اِیمان گِھن آئے تاں خُدا تُہاڈے اُتے وی وعدہ کیتے ہوئے رُوح القُدس دی مُہر لائی۔ 14 رُوح القُدس ساڈی میراث دا بیعانہ ہے جئیں تئیں ساکُوں مخلصی نہ مِل ونجے، تاں جو خُدا دے جلال دی تعریف کیتی ونجے۔ پولُس دی دُعا 15 مَیں وی ایہ سُنڑ تے جو تُساں خُداوند یسُوع اُتے اِیمان رکھیندے ہیوے تے سارے مُقدّساں نال محبت کریندے ہیوے، 16 تُہاڈے کیتے خُدا دا شُکر کرݨ کنُوں باز نئیں آندا تے آپنڑیاں دُعاواں ءچ تُہاکُوں یاد کریندا ہاں۔ 17 مَیں دُعا کریندا ہاں جو ساڈے خُداوند یسُوع مسیح دا خُدا جیہڑا جلال آلا باپ ہے، تُہاکُوں حِکمت تے مُکاشفے دی رُوح بخشے تاں جو تُساں اُونکُوں چنگی طرحاں جاݨ گِھنو 18 تے تُہاڈے دل دے اکھیں روشن تھی ونجنڑ تاں جو تُساں جاݨ گِھنو جو خُدا تُہاکُوں کیجھی اُمید کیتے سڈے تے مُقدّساں کیتے اُوندے جلال آلی میراث دی دولت کیجھی ہے، 19 تے ایہ وی جو اساں اِیمان گِھن آوݨ آلیاں کیتے اُوندی قُدرت کیجھی عظیم ہے۔ ایہ اُوہو بے حد قُدرت ہے 20 جِیندے نال اُوں مسیح کُوں مُردیاں ءچوں زندہ کر تے اسمان اُتے آپنڑے سجے پاسے بِلھایا، 21 تے اُونکُوں ہر قِسم دی حکُومت تے اِختیار تے قُدرت تے ریاست بلکہ ہر ہِک ناں کنُوں اُچا کیتا، نہ صرف اِیں جہان ءچ بلکہ آوݨ آلے جہان ءچ وی۔ 22 خُدا سبھ کُجھ اُوندے پیراں تلے کر ڈِتے تے اُونکُوں کلیسیا دی خاطر یکے چیزاں دا سردار بنڑایا۔ 23 کلیسیا مسیح دا بدن ہے تے مسیح نال کامل تھیندی ہے جیہڑا ہر ہِک چیز کُوں کامل کریندے۔ |
Modern Central Saraiki Bible © 2024 Strategic Resource Group
Strategic Resource Group