کلُسِّیوں 4 - کِتاب مُقدّس سرائیکی ترجمہ

¹ مالکو! آپنڑے نوکراں نال عدل تے اِنصاف نال پیش آؤ کیوں جو تُساں جانڑدے ہیوے جو اسمان اُتے تُہاڈا وی ہِک مالک ہے۔

ہدایات

² شُکرگزاری تے بیداری نال دُعا کرݨ ءچ مصروف راہو۔

³ تے ساڈے کیتے وی دُعا کرو جو خُدا ساڈے کیتے کلام سُنڑاونڑ دا دروازہ کھول ڈیوے تاں جو مَیں مسیح دے راز دی تبلیغ کر سگاں جیندی وجہ کنُوں قید ءچ ہاں۔

⁴ تے دُعا کرو جو مَیں اُونکُوں اِینویں صاف ظاہر کراں جِینویں میکُوں کرݨ چاہیدے۔

⁵ ہر موقع کُوں چنگی طرح استعمال کریندے ہوئے غیر اِیمانداراں نال ہوشیاری نال پیش آؤ۔

⁶ تُہاڈی گُفتگو ایجھی فضل نال بھری تے سوہنڑی ہووے، جو تُہاکُوں ہر بندہ کُوں مناسب جواب ڈیونڑ آ ونجے۔

آخری گالھیں تے سلام

⁷ عزیز بِھرا تخِکُس جیہڑا وفادار خادم تے خُداوند دی خدمت ءچ میڈا ساتھی ہے میڈا سارا حال تُہاکُوں ڈسا ڈیسی۔

⁸ مَیں اُونکُوں اِیں مقصد کیتے بھجیندا پِیا ہاں جو تُہاکُوں ساڈی خبر مِل ونجے تے او تُہاکُوں حوصلہ ڈیوے۔

⁹ اُوندے نال اُنیسمُس کُوں وی بھجیندا پِیا ہاں۔ او وفادار تے عزیز بِھرا ہے بلکہ تُہاڈے ءچوں ای ہے۔ ایہ ڈوہائیں تُہاکُوں اِتُھوں دے سارے گالھیں ڈسا ڈیسن۔

¹⁰ ارِسترخُس جیہڑا میڈے نال قید ءچ ہے تے مرقس جیہڑا برنباس دا رشتے دار ہے، تُہاکُوں سلام آدھے۔ تُہاکُوں مرقس کیتے ہدایت ڈِتی گئی ہے جو جے او تُہاڈے کولھ آوے تاں اُونکُوں خوشی نال قبول کرائے۔

¹¹ تے یسُوع وی جیہڑا یُوستُس اکھویندے تُہاکُوں سلام آدھے۔ یہُودی اِیمانداراں ءچوں صرف اِیہو ترے بندے خُدا دی بادشاہی دے پیغام دی تبلیغ کرݨ ءچ میڈے ہم خدمت تے میڈی تسلی دا سبب ریہے ہِن۔

¹² اِپَفراس جیہڑا تُہاڈے ءچوں ہے تے مسیح یسُوع دا خادم ہے تُہاکُوں سلام آدھے۔ او بہُوں محنت نال تُہاڈے کیتے دُعا کریندے جو تُساں خُدا دی پُوری مرضی ءچ کامِل تے پُورے اعتقاد نال ثابت قدم راہو۔

¹³ مَیں اُوندے حق ءچ گواہی ڈیندا ہاں جو او تُہاڈے کیتے تے لَودِیکیہ تے ہِیراپُلس دے اِیمانداراں کیتے بہُوں محنت کریندے۔

¹⁴ پیارا طبیب لُوقا تے دیماس تُہاکُوں سلام آدھے ہِن۔

¹⁵ لَودِیکیہ دے بِھرانواں تے نُمفاس بھینڑ تے اُوندے گھر ءچ جمع تھیوݨ آلی کلیسیا کُوں سلام اکھائے۔

¹⁶ جِیں ویلے تُساں ایہ خط پڑھ گِھنو تاں ایہ لَودِیکیہ دی کلیسیا ءچ وی پڑھیا ونجے، تے جیہڑا خط لَودِیکیہ دی کلیسیا دے ناں ہے اُونکُوں وی تُساں پڑھ گِھنائے۔

¹⁷ اَرخِپُس کُوں اکھائے جو جیہڑی خدمت خُداوند ءچ اُوندے سپُرد تھئی ہے اُونکُوں ہوشیاری نال پُورا کرے۔

¹⁸ مَیں پولُس آپنڑے ہتھ نال تُہاکُوں سلام لِکھدا پِیا ہاں۔ میڈے زنجیراں کُوں یاد رکھائے۔ خُدا دا فضل تُہاڈے نال راہوے۔